ដោយៈ សុផានីតា / កោះកុងៈ ខេត្តកោះកុង ដែលជាខេត្តមួយ ស្ថិតនៅភាគនិរតី នៃប្រទេសកម្ពុជា ក្នុងអំឡុងពេល ៤ ថ្ងៃមកនេះ ខានឃើញពន្លឺព្រះអាទិត្យ គ្រប់គ្រាន់ ព្រោះតែរងសម្ពាធទាប ព្យុះភ្លៀង ឥតដាច់គ្រាប់ និងបង្កការជន់លិច ផងដែរ។
ដំណក់ព្យុះភ្លៀង ធ្លាក់ឥតឈប់ឈរ ពីតិចទៅច្រើន ពីច្រើនមកតិច គិតចាប់ពីថ្ងៃទី២៤ ដល់ថ្ងៃទី២៧ សីហានេះ សម្រាប់ភូមិសាស្ត្រ ខេត្តកោះកុង ដែលជាប់នឹងឆ្នេរសមុទ្រ។ ការប្រែប្រួលអាកាសធាតុ លើកនេះ ក៏បានបង្កឱ្យមានជាជំនន់ទឹកភ្លៀង លិចផ្ទះ សម្បែង ប្រជាពលរដ្ឋ ផ្លូវថ្នល់ ផ្លូវលំ និងខូចខាតទ្រព្យសម្បត្តិ ផ្សេងៗទៀត។
បរិមាណនៃភាពរងផលប៉ះពាល់ នៅខេត្តកោះកុង ជាពិសេសក្រុងខេមរភូមិន្ទ ធៀបនឹងខេត្តព្រះសីហនុ ក៏មិនចាញ់គ្នាប៉ុន្មានឡើយ បើតាមការប៉ាន់ស្មាន របស់ប្រជាពលរដ្ឋ ដែលជួបផលខូចខាត។
ក្រុមប្រជាពលរដ្ឋ នៅក្នុងក្រុងខេមរភូមិន្ទ បានលើកឡើងថាៈ មូលហេតុដែលធ្វើឱ្យ ទឹកជន់លិចផ្ទះ និងផ្លូវថ្នល់ ពិបាកធ្វើដំណើរយ៉ាងដូច្នេះ ដោយសារតែបរិមាណ ទំហំទឹកភ្លៀងច្រើន ប្រព័ន្ធលូរំដោះទឹក មួយចំនួន គោករាក់ ការចោលសំរាម គ្មានសណ្តាប់ធ្នាប់ត្រឹមត្រូវ និងការរំលោភបំពាន ចាក់ដីចូលប្រឡាយធម្មជាតិ ជាដើម។
ក្រៅពីផលខូចខាតនានា ក្នុងក្រុងខេមរភូមិន្ទ នៅស្រុកបូទុមសាគរ និងស្រុកកោះកុង ឯណោះវិញ គេសង្កេតឃើញថា ទំហំទឹកជាច្រើនកន្លែងបានចូលកាត់ផ្លូវលំបណ្តាល ឱ្យដាច់ផងដែរ។
លោក ហាក់ ឡេង អភិបាលស្រុកបូទុមសាគរ បានឱ្យដឹងថាៈ ចំណុចដាច់ទឹកហូរ បុកដាច់នោះ ស្ថិតនៅក្នុងឃុំតានូន ឥឡូវ មិនទាន់ជួសជុលបានទេ ខណៈភ្លៀង នៅតែបន្តជន់លិចឥតឈប់ តែពេលរាំងស្ងួតបន្តិច នឹងផ្តើមកែលម្អសម្រួលចរាចរណ៍ ឡើងវិញហើយ។
ទាក់ទិនបញ្ហាគ្រោះធម្មជាតិ មិនកើតមាននេះ តាមរយៈហ្វេកប៊ុកផ្លូវការ របស់លោក ស្រី មិថុនា ភូថង អភិបាលខេត្តកោះកុង ទទួលស្គាល់ថាៈ ភ្លៀងធ្លាក់មួយមេយ៉ាងធំ ដែលមានកម្ពស់ទឹកភ្លៀង ១៨៥ ម.ម កាលពីថ្ងៃទី២៤ សីហា ថ្មីៗនះបណ្តាលឱ្យ មានទឹកលិចផ្លូវ និងហូរចូលផ្ទះសម្បែង ប្រជាពលរដ្ឋមួយចំនួន និងនៅជុំវិញផ្សារ ដងទង់ ក្នុងក្រុងខេមរភូមិន្ទ ព្រោះតែបរិមាណហូរទឹក ចូលប្រព័ន្ធលូមិនទាន់។
លោកស្រី អភិបាលខេត្តកោះកុង ក៏ជំរុញដល់រដ្ឋបាលក្រុង សង្កាត់ និងមន្ទីរពាក់ព័ន្ធ បង្កើនការខិតខំ ស្តារលូ ប្រឡាយធម្មជាតិ ដើម្បីរំដោះទឹក ពេលភ្លៀងខ្លាំង។ ទន្ទឹមនោះ សុំការចូលរួមពី ប្រជាពលរដ្ឋ តាមរយៈចិត្តអំណត់ និងអនុគ្រោះ ដល់អាជ្ញាធរ និងអ្នកពាក់ព័ន្ធ ចំពោះបាតុភូតធម្មជាតិ ដែលបានកើតឡើងនេះ។ ជាពិសេស មេត្តាយកចិត្តទុកដាក់ ប្រុងប្រយ័ត្នចំពោះ បាតុភូតធម្មជាតិនារដូវ វស្សា៕/V-PC
