​ដោយៈ ប​.​ខុន / ភ្នំពេញៈ ប្រទេស​កម្ពុជា នៅពេលនេះ ស្ថិតក្រោម​ឥទ្ធិពល តំបន់​សម្ពាធ​ទាប នៃ​ប្រព័ន្ធ​សម្ពាធ​ទាប ដែល​ងាយ​បង្កឱ្យមាន​ភ្លៀង​ធ្លាក់ ក្នុង​កម្រិត​ពី​បង្គួរ​ទៅ​ច្រើន ជាពិសេស​នៅ​តំបន់ ទំនាប​កណ្តាល ភាគ​ពាយព្យ និង​ខ្ពង់រាប ភាគ​ខាងកើត ជាប់​ដែនកម្ពុជា វៀតណាម​។ ឯ​នៅ​តំបន់​អាង ទន្លេមេគង្គ​លើ ក៏មាន​ភ្លៀង​ធ្លាក់​រាយប៉ាយ​ដែរ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ រស្មី​កម្ពុជា​ដឹង នៅ​ថ្ងៃទី​២៧ ខែសីហា ឆ្នាំ​២០២១​ថាៈ នៅ​ល្ងាច​ថ្ងៃទី​២៧ ខែសីហា នេះ​ថា ភ្លៀង​ចាប់ផ្តើម ធ្លាក់​រាយប៉ាយ ក្នុង​កម្រិត​ពី​បង្គួរ ទៅ​ច្រើន នៅក្នុង​ក្របខណ្ឌ​ទូទាំងប្រទេស ពិសេស​នៅ​តំបន់​ទំនាប កណ្តាល ភាគ​ពាយព្យ និង​ខ្ពង់រាប​ភាគ​ខាងកើត ជាប់​ព្រំដែន​កម្ពុជា វៀតណាម ដោយសារ​ប្រទេស​កម្ពុជា នៅពេលនេះ ស្ថិតក្រោម​ឥទ្ធិពល នៃ​តំបន់​សម្ពាធ​ទាប ដែលមាន​ប្រព័ន្ធ​សម្ពាធ​ទាប អូស​កាត់​ពីលើ​។​

​អ្នកនាំពាក្យ​ក្រសួង​ជំនាញ ខាងលើ បាន​និយាយ​ឱ្យដឹងទៀតថាៈ ចាប់ពី​ថ្ងៃទី​២៧ ខែសីហា រហូតដល់​សប្តាហ៍ ដើមខែ​កញ្ញា ប្រទេស​កម្ពុជា ក៏ដូចជា នៅ​តំបន់​អាង​ទន្លេមេគង្គ​លើ មាន​ភ្លៀង​ធ្លាក់ រាយប៉ាយ ក្នុង​កម្រិត​ពី​បង្គួរ ទៅ​ច្រើន រាល់ថ្ងៃ​។ ការធ្លាក់​ភ្លៀង បន្តបន្ទាប់​នេះ អាច​នឹង​បង្កឱ្យមាន ជំនន់​ទឹកភ្លៀង នៅ​តំបន់ភ្នំ​, ទឹកទន្លេ​ក៏​នឹង​ចាប់ផ្តើម​ងើបឡើង​មកវិញ​ដែរ​។​

​ក្រសួង​ធនធានទឹក និង​ឧតុនិយម នៅ​ថ្ងៃទី​២៤ ខែសីហា ឆ្នាំ​២០២១ បាន​ជូនដំណឹង ស្តីពី​ការ​ព្យាករ ស្ថានភាព​អាកាសធាតុ សម្រាប់​ពីថ្ងៃ​ទី​២៥ ដល់​ថ្ងៃទី​៣១ ខែសីហា​ថាៈ ក្នុង​សប្តាហ៍​នេះ ព្រះរាជាណាចក្រ​កម្ពុជា ទទួល​ឥទ្ធិពល ពី​ជ្រលង​សម្ពាធ​ទាប​ឥណ្ឌា កម្រិត​ខ្លាំង នឹង​អាច​កើតមាន​ជ្រលង ស​ម្ពា​ប​ទាប ITCZ សារជាថ្មី​ឡើងវិញ​។​

​ស្ថានភាព​អាកាសធាតុ បែប​ខាងលើនេះ នឹងធ្វើ​ឲ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា​ពី ២៥ ទៅ ២៧ អង្សា​សេ សីតុណ្ហភាព​អតិបរមា មាន​ពី ៣៤ ទៅ ៣៦ អង្សា​សេ​។ អាចមាន​ភ្លៀង​ធ្លាក់​រាយប៉ាយ ក្នុង​កម្រិត​ពី​មធ្យម ទៅ​ខ្លាំង លាយឡំ​ទៅដោយ ផ្គរ រន្ទះ និង​ខ្យល់​កន្ត្រាក់ ។​

​សម្រាប់​បណ្តា​ខេត្ត ជាប់​ជួរ​ភ្នំ​ដងរែក និង​ខ្ពង់រាប​ឦសាន មាន​សីតុណ្ហភាព អប្បបរមា ពី ២៣ ទៅ ២៥ អង្សា​សេ សីតុណ្ហភាព​អតិបរមា មាន​ពី ៣២ ទៅ ៣៤ អង្សា​សេ​។ អាចមាន​ភ្លៀង​ធ្លាក់ ក្នុង​កម្រិត​ពី​មធ្យម ទៅ​ច្រើន​លាយឡំ ទៅដោយ​ផ្គរ រន្ទះ និង​ខ្យល់​កន្ត្រាក់​។​

​តំបន់​មាត់សមុទ្រ សីតុណ្ហភាព អប្បបរមា មាន​ពី ២៣ ទៅ ២៥ អង្សា​សេ សីតុណ្ហភាព អតិបរមា មាន​ពី ៣៣ ទៅ ៣៥ អង្សា​សេ​។ អាចមាន​ភ្លៀង​ធ្លាក់ ក្នុង​កម្រិត​ពី​មធ្យម ទៅ​ច្រើន​។ នៅលើ​ផ្ទៃសមុទ្រ អាចមាន​ភ្លៀង​ធ្លាក់​ច្រើន និង​រលក​សមុទ្រ​មធ្យ​ម ។​

​នៅក្នុង​សេចក្តីជូនដំណឹង បាន​អំពាវនាវ​ដល់​ប្រជាពលរដ្ឋ ឱ្យមាន​ការប្រុងប្រយ័ត្ន ចំពោះ​បាតុភូត​ភ្លៀង ផ្គរ រន្ទះ ខ្យល់​កន្ត្រាក់ និង​រលក​សមុទ្រ​៕/V​