​ប្រែ​សម្រួលៈ​វាសនា​/​ប៉េកាំង​៖ ចិន​និយាយថា​ខ្លួន​ថ្កោលទោស​ការវាយប្រហារ​នៅ​អាកាសយានដ្ឋាន​ក្រុង​កា​ប៊ុល​និង​«​ត្រៀម​ធ្វើការ​ជាមួយ​សហគមន៍​អន្តរជាតិ​ដើម្បី​ដោះស្រាយ​ការ​គំរាម​ភេរវកម្ម​​ព្រមទាំង​រារាំង​កុំ​អោយ​អា​ហ្វ​ហ្គានី​ស្ថាន​ក្លាយ​ជា​ប្រភព​ភេរវកម្ម​ជាថ្មី​»​។​

​ការលើកឡើង​របស់​អ្នកនាំពាក្យ​ក្រសួងការបរទេស​ចិន ហ្សា​វ លី​ជៀន កាលពី​រសៀល​ថ្ងៃ​សុក្រ ជា​ប្រតិកម្ម​ដំបូង​របស់​រដ្ឋាភិបាល​ក្រុង​ប៉េកាំង​ចំពោះ​ការ​បំផ្ទុះ​គ្រាប់បែក​អត្តឃាត​នៅ​អាកាសយាន​​ដ្ឋា​ន​ក្រុង​កា​ប៊ុល​កាលពី​ថ្ងៃ​ព្រហស្បតិ៍​។​

​លោក​ហ្សា​វ បាន​និយាយថា មិន​មាន​ជនជាតិ​ចិន​ណា​ម្នាក់​បាន​ស្លាប់​ឬ​រងរបួស​ក្នុង​ការវាយប្រហារ​កាល​ពី​ថ្ងៃ​ព្រហស្បតិ៍​ទេ និង​ថា​ចិន​បាន​ណែនាំ​ពលរដ្ឋ​ខ្លួន​នៅក្នុង​ប្រទេស​នេះ​អោយ​«​បង្កើន​ការ​​ប្រុងប្រយ័ត្ន​សន្តិសុខ​។​ក្នុងពេល​ជាមួយគ្នា យើង​បាន​ស្នើសុំ​ភាគី​ពាក់ព័ន្ធ​អោយ​ចាត់វិធានការ​ធានា​សុវត្ថិភាព​ជនជាតិ​ចិន​»​។​

​ចិន​បាន​បន្ត​បើក​ស្ថានទូត​របស់ខ្លួន​នៅ​ក្រុង​កា​ប៊ុល​និង​កាលពីពេល​ថ្មីៗ​បាន​ទទួល​ធ្វើ​ជំនួប​ពិភាក្សា​រវាង​ក្រុម​តា​លី​បង់​និង​ឯកអគ្គរដ្ឋទូត​ចិន ក្នុងពេល​ខ្លួន​បន្ត​រិះគន់​អាម៉េរិក​អំពី​ទិដ្ឋភាព​​ជ្រួលច្របល់​នៅ​អាកាសយានដ្ឋាន​ក្រុង​កា​ប៊ុល​។​

​លោក​ហ្សា​វ​ក៏​បាន​បញ្ជាក់​អះអាង​ឡើងវិញ​អំពី​ការព្រួយបារម្ភ​របស់​ចិន​អំពី​អ្វី​ដែល​រដ្ឋាភិបាល​ក្រុង​ប៉េកាំង​និយាយថា ការ​គំរាម​មួយ​ចំពោះ​សន្តិសុខ​របស់​ខ្លួន​បង្ក​ឡើង​ដោយ​ចលនា​អ៊ីស្លាម​ទឺ​កេ​ស្ថាន​​តែ «​មេដឹកនាំ​ក្រុម​តា​លី​បង់​និយាយថា ក្រុម​លោក​នឹងមិន​អនុញ្ញាត​អោយ​កងកម្លាំង​ណាមួយ​ប្រើ​ទឹកដី​អា​ហ្វ​ហ្គានី​ស្ថាន​ដើម្បី​ធ្វើ​អ្វីមួយ​ដែល​ធ្វើអោយ​អន្តរាយ​ដល់​ចិន​ទេ​។​យើង​សង្ឃឹម​ភាគី​ពាក់​​ព័ន្ធ​នឹង​ចាត់​វិធានការ​ដើម្បី​ធានា​អន្តរកាល​ដ៏​រលូន​មួយ​នៅ​អា​ហ្វ​ហ្គានី​ស្ថាន ហើយ​នឹង​សុវត្ថិភាព​របស់​ប្រជាជន​អា​ហ្វ​ហ្គានី​ស្ថាន និង​ពលរដ្ឋ​បរទេស​នៅ​ទីនោះ​»៕

​ស្ថានទូត​ចិន​នៅ​ក្រុង​កា​ប៊ុល​បន្ត​បើក​ទោះជា​ស្ថានទូត​បរទេស​ដទៃទៀត​បិទ​