​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ មនុស្ស​យ៉ាង​តិច ១៩​នាក់​បាន​ស្លាប់​និង​រាប់សិប​នាក់​បាន​បាត់​ខ្លួន​បន្ទាប់​ពី​ទូក​ដឹក​អ្នកដំណើរ​មួយ​គ្រឿង​បាន​បើក​បុក​កប៉ាល់​ដឹក​ខ្សាច់​កាល​​ពី​ថ្ងៃ​សុក្រ​ទី ២៧ ខែសីហា​នៅក្នុង​សោកនាដកម្ម​លើ​ផ្លូវទឹក​ចុងក្រោយបង្អស់​ដែល​បាន​វាយប្រហារ​ប្រទេស​បង់​ក្លា​ដែស​។​

​លោក អា​នី​សួ រ៉ា​ម៉ាន់ មេ​ប៉ូលិស​នៅ​សង្កាត់​បា​ម៉ាន​បារៀ​ស្ថិត​នៅ​ភាគ​ខាងកើត​ទី​ក្រុង​ដា​ក្កា ទី​ដែល​ឧបទ្ទវហេតុ​នេះ​បាន​កើតឡើង បាន​និយាយថា “​មកទល់​ពេល​នេះ​យើង​បាន​ស្រង់​សាក​​សព​ចំនួន ១៩ នាក់​”​។​

​លោក​បាន​និយាយថា អ្នក​ស្លាប់​ទាំងនោះ​រួម​មាន​ស្ត្រី ៩ នាក់​និង​កុមារ ២ នាក់ ដោយ​បន្ថែម​ថា “​ប្រតិបត្តិការ​ជួយ​សង្គ្រោះ​អ្នក​បាត់​ខ្លួន​កំពុង​បន្ត​”​។​

​មន្ត្រីប៉ូលិស​បាន​និយាយថា​ពួកគេ​មិន​ដឹង​ពី​ចំនួន​ពិតប្រាកដ​នៃ​មនុស្ស​ដែល​បាត់​ខ្លួន​នោះទេ ប៉ុន្តែ​អ្នកដំណើរ​បាន​និយាយថា​មាន​មនុស្ស​ជាង ៥០ នាក់​ជិះ​នៅ​លើ​នោះ ខណៈ​ចៅសង្កាត់​លោក ហា​យ៉ាត អូ​ដ ដូវ​ឡា ខាន់ បាន​និយាយថា អ្នកខ្លះ​បាន​ហែល​ឡើងគោក​ឬ​ត្រូវ​បាន​ជួយសង្គ្រោះ​។​

​មនុស្ស​រាប់រយ​នាក់​បាន​ស្លាប់​ជា​រៀងរាល់ឆ្នាំ​នៅក្នុង​គ្រោះថ្នាក់​លិច​សាឡាង​នៅ​បង់​ក្លា​ដែស ជា​ប្រទេស​មាន​តំបន់​ទំនាប​ទាប​ដែល​មាន​ផ្លូវទឹក​យ៉ាង​ទូលំទូលាយ ប៉ុន្តែ​ខ្វះ​ស្តង់ដារ​សុវត្ថិភាព​៕

​មនុស្ស​១៩​នាក់​ស្លាប់​ក្នុង​គ្រោះថ្នាក់​ផ្លូវទឹក​កាលពី​ថ្ងៃ​សុក្រ​នៅ​ទីក្រុង​ដា​ក្កា