ដោយ​៖ ដេប៉ូ / ភ្នំពេញ​៖ លោក​នេត្រ ភក្ត្រា រដ្ឋលេខាធិការ នៃ​ក្រសួងបរិស្ថាន បាន​ថ្លែងថាៈ ដើម្បី​បង្កើន​ប្រសិទ្ធភាព នៅក្នុង​ការងារ​គ្រប់គ្រង និង​អភិរក្ស​ធនធាន ធម្មជាតិ មន្ត្រី​ឧ​ទ្យា​នុ​រក្ស ត្រូវ​បន្ត​ហ្វឹកហាត់ បង្កើន​សមត្ថភាព​ខ្លួន ជាប្រចាំ ទាំង​ផ្នែក​ក្របខណ្ឌ​ច្បាប់ និង​បច្ចេកទេស ត្រូវធ្វើ​បច្ចុប្បន្នភាព ខ្លួនឯង លើ​ការប្រើ ប្រាស់​បច្ចេកវិទ្យា​ព័ត៌មាន និង​បន្ត​ប្រតិបត្តិ ក្រមសីលធម៌ វិជ្ជាជីវៈ​ខ្ពស់ ក្នុងនាម​ជា​ឆ្មាំ​ព្រៃ​។​

​ក្នុងឱកាស​ជួប​សំណេះសំណាល និង​ប្រគល់​ប័ណ្ណសរសើរ និង​ឧបករណ៍​ដ្រូ​ន អាយកូម សម្ភារ​ផ្សេងទៀត ជា​ជំនួយ​ល្បាត ដល់​មន្ត្រី​ឧ​ទ្យា​នុ​រក្ស នៃ​មន្ទីរ​បរិស្ថាន ខេត្តកំពត កាលពី​ថ្ងៃទី​២៧ ខែសីហា ឆ្នាំ​២០២១ លោក នេត្រ ភក្ត្រា បានឱ្យដឹងថាៈ នៅតាម​តំបន់​ប្រឈម លើ​ការទន្ទ្រាន​កាន់កាប់​ដី ព្រៃ​ខុសច្បាប់ ពី​សំណាក់​ក្រុម ជនខិលខូច គឺ​ចាំបាច់​ណាស់ ដែល​ទាមទារ​ឱ្យ​មន្ត្រី​ឧ​ទ្យា​នុ​រក្ស ទាំងអស់​យកចិត្ត ទុកដាក់ និង​មាន​ឧបករណ៍ សម្ភារ​ទំនើប ដើម្បី​ជា​ជំនួយ​ក្នុង​ការងារ​ល្បាត របស់ខ្លួន ចុះ​អន្តរាគមន៍ និង​បង្ក្រាប​បទល្មើស បាន​ទាន់ពេលវេលា និង​មាន​ប្រសិទ្ធភាព​ខ្ពស់​។​

​លោក រដ្ឋលេខាធិការ ក្រសួងបរិស្ថាន បាន​សម្តែង នូវ​ការកោតសរសើរ ពី​ការលះបង់ និង​ការប្តេជ្ញាចិត្ត​ខ្ពស់ របស់​មន្ត្រី​ឧ​ទ្យា​នុ​រក្ស​ទាំងអស់ ក្នុងការ​ថែរក្សា និង​ការពារ ធនធានធម្មជាតិ សត្វព្រៃ ទីជម្រក​ធម្មជាតិ និង​ប្រព័ន្ធ​អេកូឡូស៊ី ដែល​កម្ពុ​ជាមាន​។​

​ជាមួយគ្នានេះ លោក នេត្រ ភក្ត្រា បាន​មានប្រសាសន៍ថាៈ មន្ត្រី​ឧ​ទ្យា​នុ​រក្ស អនុវត្ត​កាតព្វកិច្ច​របស់ខ្លួន ជា​រៀងរាល់ថ្ងៃ ដោយ​មិន​ខ្លាច​នឿយហត់ និង​បាន​លះ បង់​ខ្ពស់ ក្នុង​បុព្វហេតុ​ការពារ នូវ​ធនធានធម្មជាតិ សត្វព្រៃ​ដ៏​មានតម្លៃ មិនអាច កាត់ថ្លៃ​បាន​។ ទាំងនេះ វា​ក៏​បង្ហាញ​ពី​ទឹកចិត្ត​មោះមុត ដើម្បី​ទប់ស្កាត់ និង​បង្ក្រាប បទល្មើស ដូចជា ការ​បរបាញ់​សត្វព្រៃ ខុសច្បាប់ ការកាប់​ព្រៃឈើ​ខុសច្បាប់ និង​នេសាទ​ខុសច្បាប់​ជាដើម​។​

​លោក បាន​មានប្រសាសន៍ សង្កត់ធ្ងន់ថាៈ មន្ត្រី​របស់​យើង ត្រូវ​ប្រឈម​នឹង​ហានិភ័យ ស្ថានភាព​លំបាក និង​ប្រឈម​នឹង​គ្រោះថ្នាក់ ដោយ​ចៃដន្យ​ផ្សេងៗ ពិសេស​ជនល្មើស អាច​បង្ក​គ្រោះថ្នាក់ នៅពេល​មន្ត្រី​យើង ចុះ​អនុវត្ត​ច្បាប់​។ ក្រៅពីនេះ ពួកគាត់ ក៏​ប្រឈម​ទៅនឹង​កត្តា​ផ្សេងៗ​ទៀត ដូចជា ជំងឺ ការឆ្លងកាត់​ឧបសគ្គ លំបាកៗ​ជាច្រើន ក្នុងពេល​បំពេញការងារ ដូចជា ទឹកជំនន់ សត្វ​ដែល​អាច​បង្ក​គ្រោះថ្នាក់ ។​ល​។​

​ជាមួយគ្នានេះ លោក ក៏បាន​ជំរុញ​និង​លើកទឹកចិត្ត ដល់​មន្ត្រី​ឧ​ទ្យា​នុ​រក្ស មិនត្រូវ​រុញ​រា​ឡើយ ក្នុងការ​អនុវត្ត​ច្បាប់ ដើម្បី​ការពារ​តំបន់ការពារធម្មជាតិ ឱ្យបាន​គង់វង្ស យូរអង្វែង ដល់​កូនចៅ​យើង ជំនាន់​ក្រោយ​របស់​យើង​។​

​លោក រដ្ឋលេខាធិការ បាន​មានប្រសាសន៍ថាៈ បច្ចុប្បន្ននេះ កម្ពុជា មាន​មន្ត្រី ឧ​ទ្យា​នុ​រក្ស ចំនួន ១.២៦០ នាក់ កំពុង​ឈរជើង​ការពារ និង​អភិរក្ស​ធនធានធម្មជាតិ នៅតាម​តំបន់ការពារធម្មជាតិ និង​របៀង​អភិរក្ស​ជីវៈចម្រុះ នៅ​ទូទាំងប្រទេស​។ កម្ពុជា មាន​ផ្ទៃដី​អភិរក្ស ទំហំ ៧,៣ លាន​ហិកតា ឬ​ស្មើ​ប្រមាណ ៤១ ភាគរយ​នៃ​ផ្ទៃដី ប្រទេស​កម្ពុជា ដោយ​ចែកជា​ឧទ្យាន​ជាតិ ដែនជម្រកសត្វព្រៃ តំបន់ការពារទេសភាព តំបន់​ប្រើប្រាស់​ច្រើនយ៉ាង តំបន់​បេតិកភណ្ឌ​ធម្មជាតិ តំបន់​រ៉ា​ម​សា និង​របៀង​អភិរក្ស ជីវៈចម្រុះ​។​

​លោក​រដ្ឋលេខាធិការ បាន​ថ្លែងថា​៖ ការបន្ត​ហ្វឹកហាត់ ពង្រឹងសមត្ថភាព គឺជា​ការ ចាំបាច់​បំផុត ព្រោះ​ការងារ​ជា​ឆ្មាំ​ព្រៃ របស់​មន្ត្រី​ឧ​ទ្យា​នុ​រក្ស គឺ​ប្រឈមមុខ​ច្រើន ក្នុងនោះ ក្រុម​ជនល្មើស​ធនធាន ធម្មជាតិ​ខ្លះ មានប្រើ​ប្រាស់​អាវុធ ទាំង​អាវុធ​ពិត និង​អាវុធ​កែច្នៃ រួមទាំង​គ្រោះថ្នាក់​ជាយថាហេតុ បង្កឡើង​ដោយ​អន្ទាក់ គ្រប់​ប្រភេទ ដែល​ត្រូវ​ជនខិលខូច ដាក់​នៅក្នុង​ព្រៃ ដើម្បី​ចាប់​សត្វព្រៃ ដោយ​ខុសច្បាប់​។​

​ក្នុងឱកាស​នោះ មន្ត្រី​ឧ​ទ្យា​នុ​រក្ស​ឆ្នើម ចំនួន ៥ រូប ក្នុងចំណោម​មន្ត្រី​ឧ​ទ្យា​នុ​រក្ស ៤១ រូប ដែល​កំពុង​ការពារ និង​អភិរក្ស​តំបន់ការពារធម្មជាតិ ក្នុងភូមិ​សាស្ត្រ​ខេត្តកំពត បានទទួល​ប័ណ្ណសរសើរ មេត្រីភាព ពី​ក្រសួងបរិស្ថាន​។ ការផ្តល់​បណ្ណ​សរសើរ​ស្ថិត ក្នុង​ក្របខណ្ឌ​នៃ​ការអបអរសាទរ​ទិវា​ឧ​ទ្យា​នុ​រក្ស​ពិភពលោក ៣១ កក្កដា​។​

​លោក​រដ្ឋលេខាធិការ ក្រសួងបរិស្ថាន បាន​ថ្លែងថាៈ ប័ណ្ណសរសើរ​មេត្រីភាព​បរិស្ថាន នេះ គឺជា​សក្ខីភាព បញ្ជាក់​ពី​ទទួលស្គាល់​ពី ការលះបង់​កម្លាំងកាយ កម្លាំងចិត្ត​ដ៏ មោះមុត ក្នុងការ​បំពេញការងា​រ ការពារ​ធនធានធម្មជាតិ​នៅ​កម្ពុជា​។​

​ទន្ទឹម​ជាមួយគ្នានេះ លោក រដ្ឋលេខាធិការ បាន​លើកទឹកចិត្ត ដល់​មន្ត្រី​ឧ​ទ្យា​នុ​រក្ស បន្ត​បំពេញការងារ ប្រកបដោយ​ការទទួលខុសត្រូវ និង​បន្ត​បង្កើន​សមត្ថភាព វិជ្ជាជីវៈ​របស់ខ្លួន​។ លោក​បាន​ថ្លែងអំណរគុណ ដល់​ក្រុមគ្រួសារ​មន្ត្រី​ឧ​ទ្យា​នុ​រក្ស ជាពិសេស ឪពុកម្តាយ ភរិយា​ស្វាមី កូនៗ របស់​មន្ត្រី​ឧ​ទ្យា​នុ​រក្ស​ដែល​បានអនុញ្ញាត ឱ្យ​កូន ស្វាមី ឬ​ភរិយា​របស់ខ្លួន ចូលរួម​ក្នុង​ការងារ​អភិរក្ស ធនធានធម្មជាតិ ដែលជា​ការងារ​ប្រឈម​ខ្លាំង ជាពិសេស​ជាមួយ​ក្រុម​ជនល្មើស​៕/V​-PC