​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ សហរដ្ឋ​អាម៉េរិក​ឥឡូវ​កំពុង​មាន​អ្នកជំងឺ​កូវី​ដ​១៩ ដេក​នៅ​មន្ទីរពេទ្យ​ជា​មធ្យម​ជា​ង ១០០.០០០ នាក់ គឺ​ខ្ពស់ជាង​ការកើនឡើង​លើក​មុនៗ​លើកលែងតែ​​នៅ​រដូវរងា​ឆ្នាំមុន នៅពេល​ជនជាតិ​អាម៉េរិក​ភាគច្រើន​មាន​សិទ្ធិ​ទទួលបាន​វ៉ាក់សាំង​។​

​លំហូរ​ចូល​នៃ​អ្នកជំងឺ​កំពុង​ធ្វើ​ឱ្យ​កើន​សម្ពាធ​យ៉ាងខ្លាំង​ដល់​មន្ទីរពេទ្យ​និង​កំពុង​រុញ​បុគ្គលិក​ថែទាំ​សុខភាព​ទៅរក​មាត់ជ្រោះ​គ្រោះថ្នាក់ ខណៈ​ការស្លាប់​បាន​កើនឡើង​ជា​មធ្យម​ជាង ១.០០០ នាក់​ក្នុង​មួយ​ថ្ងៃ​ជា​លើកដំបូង​ចាប់តាំងពី​ខែ​មីនា​។​

​ការ​ចូល​ដេក​មន្ទីរពេទ្យ​នៅ​ទូទាំងប្រទេស​បាន​កើនឡើង​ជិត ៥០០ ភាគរយ​ក្នុង​រយៈពេល​ពីរ​ខែ​ចុងក្រោយ​នេះ​ជា​ពិសេស​នៅ​ទូទាំង​បណ្តា​រដ្ឋ​ភាគខាងត្បូង​កន្លែង​ដែល​គ្រែ​នៅ​បន្ទប់​សង្គ្រោះ​​បន្ទាន់ (ICU)​កំពុង​ពេញ ដែល​នេះ​ជា​វិបត្តិ​បង្កឡើង​ដោយ​អត្រា​ចាក់​វ៉ាក់សាំង​ទាប​បំផុត​នៅ​ផ្នែក​ខ្លះ​នៃ​ប្រទេស​និង​ការប្រឆាំង​ផ្នែក​នយោបាយ​ខ្លាំង​ឡើង​ចំពោះ​វិធានការ​សុខភាព​សាធារណៈ ដូច​ជា​ការតម្រូវ​ឱ្យ​ពាក់​ម៉ាស់​។​

​នៅ​រដ្ឋ​ផ្លរីដា មនុស្ស ១៦.៤៥៧ នាក់​កំពុង​ដេក​មន្ទីរពេទ្យ ដែល​ជា​ចំនួន​ច្រើន​ជាង​រដ្ឋ​ណាៗ​ទាំងអស់ បន្ទាប់មក​គឺ​រដ្ឋ​តិច​សាស់​នេះ​បើ​យោង​តាម​ទិន្នន័យ​ពី​ក្រសួង​សុខាភិបាល​និង​សេវាកម្ម​​មនុស្សជាតិ​អាម៉េរិក​។​

​ជាមួយនឹង​ការកើនឡើង​ករណី​ឆ្លង​យ៉ាង​ខ្លាំង​នៅ​ទូទាំង​ប្រទេស​និង​មន្ទីរពេទ្យ​ជោរជន់​ដោយ​អ្នកជំងឺ កង្វះ​គ្រូពេទ្យ​ក៏​កំពុង​ធ្វើឱ្យ​មាន​ភាពស្មុគស្មាញ​ក្នុង​ការព្យាបាល​អ្នកជំងឺ​ដែល​ឆ្លង​វីរុស​កូរ៉ូណា​​នៅ​មន្ទីរពេទ្យ ដែលនាំឱ្យ​មាន​ការរង់ចាំ​បន្ទប់សង្គ្រោះបន្ទាន់​យូរ​ជាង​មុន និង នាំឱ្យ​មាន​ការថែទាំ​មិន​បាន​គ្រប់គ្រាន់​។​

​កាលពីដើម​ខែ​នេះ បន្ទប់ ICU របស់​អាម៉េរិក​មួយ​ក្នុងចំណោម​ប្រាំ​បាន​ឈាន​ដល់​ឬ​លើស​សមត្ថភាព ៩៥ ភាគរយ​នៃ​គ្រែ​របស់ខ្លួន​៕

ការ​ចូល​ដេក​មន្ទីរពេទ្យ​នៅ​ទូទាំងប្រទេស​បាន​កើនឡើង​ជិត ៥០០ ភាគរយ​ក្នុង​រយៈពេល​ពីរ​ខែ​ចុងក្រោយ​នេះ​