​ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ វៀតណាម​បាន​បន្ថែម​ការព្រួយបារម្ភ​អំពី​ការផ្គត់ផ្គង់​កាហ្វេ​លើ​ពិភពលោក ខណៈ​ទីក្រុង​ធំ​បំផុត​របស់​ប្រទេស​អាស៊ី​អាគ្នេយ៍​មួយ​នេះ​នៅតែ​បន្ត​បិទ​ខ្ទប់​។​

​មជ្ឈមណ្ឌល​នាំចេញ​នៃ​ក្រុង​ហូជីមិញ​បាន​បន្ត​ស្ថិតក្រោម​ការ​រឹតបន្តឹង​ការធ្វើដំណើរ​ដ៏​តឹងតែង បន្ទាប់​ពី​មាន​ការកើនឡើង​ករណី​វីរុស​កូរ៉ូ​ណាបំ​ប្លែងខ្លួន Delta​។​

​វៀតណាម​គឺ​ជា​អ្នក​ផលិត​រ៉ូ​បូស្តា​ដ៏​សំខាន់ ដែល​ជា​កាហ្វេ​រសជាតិ​ល្វីង​ប្រើ​ក្នុង​កាហ្វេ​ឆុង​ក្តៅ​ភ្លាមៗ និង កាហ្វេ Espresso Blend ។​

​តម្លៃ​គ្រាប់​កាហ្វេ​រ៉ូ​បូស្តា​លក់ដុំ​បានកើនឡើង​ប្រហែល ៥០ ភាគរយ​គិត​មក​ទល់​ឆ្នាំនេះ​។​

​ការបិទ​ទីក្រុង​ហូជីមិញ​មានន័យថា​អ្នក​នាំ​ចេញ​របស់​វៀតណាម​កំពុង​ពិបាក​ក្នុងការ​ដឹកជញ្ជូន​ទំនិញ​រួម​ទាំង​គ្រាប់​កាហ្វេ​ទៅកាន់​កំពង់ផែ​សម្រាប់​ការដឹកជញ្ជូន​ទូទាំង​ពិភពលោក​។​

​ការ​រឹតបន្តឹង​លើ​ការធ្វើដំណើរ​បានបង្ហាញ​ពី​បញ្ហា​ប្រឈម​មួយ​ទៀត​ចំពោះ​អ្នក​នាំ​ចេញ​ដែល​កំពុង​ប្រឈម​មុខ​នឹង​ការខ្វះខាត​កុងតឺន័រ​ដឹកជញ្ជូន​និង​ការកើនឡើង​ថ្លៃ​ដឹកជញ្ជូន​រួចជាស្រេច​។​

​ទីក្រុង​ហូជីមិញ​និង​កំពង់ផែ​របស់​ខ្លួន​គឺជា​ផ្នែក​សំខាន់​មួយ​នៃ​បណ្តាញ​ដឹកជញ្ជូន​ទូទាំង​ពិភពលោក​ដែល​ធ្វើដំណើរ​ពី​ចិន​រហូតដល់​ទ្វីបអឺរ៉ុប​។​

​សមាគម​កាហ្វេ​-​កា​កាវ​វៀតណាម​និង​អង្គការ​ពាណិជ្ជកម្ម​ដទៃ​ទៀត​បាន​អំពាវនាវ​ដល់​រដ្ឋាភិបាល​របស់​ប្រទេស​នេះ​ឱ្យ​បន្ធូរបន្ថយ​ការ​រឹតបន្តឹង​ដើម្បី​ជួយ​បញ្ចៀស​ការពន្យារពេល​បន្ថែម​ទៀត​ចំពោះ​ការដឹ​ក​ជញ្ជូននិង​ថ្លៃដើម​ពាក់ព័ន្ធ​។​

​កាលពី​សប្តាហ៍​មុន​រដ្ឋមន្ត្រី​ក្រសួង​ដឹកជញ្ជូន​វៀតណាម​បាន​ឆ្លើយតប​ទៅនឹង​ការព្រួយបារម្ភ​នេះ ដោយ​បញ្ជា​ឱ្យ​អាជ្ញាធរ​តំបន់​នៅ​ភាគខាងត្បូង​នៃ​ប្រទេស​ចាត់វិធានការ​បន្ធូរបន្ថយ​បន្ទុក​មិនចាំបាច់​លើ​ការដឹកជញ្ជូន​ទំនិញ​រួមទាំង​កាហ្វេ​ផងដែរ​។​

​បញ្ហា​ដែល​ផលិតករ​វៀតណាម​កំពុង​ជួបប្រទះ​គឺ​គ្រាន់តែ​ជា​បញ្ហា​ចុងក្រោយ​បំផុត​មួយទៀត​ដែល​ជះ​ឥទ្ធិពល​ដល់​ឧស្សាហកម្ម​កាហ្វេ​។​

​ប្រេ​ស៊ីល​ដែល​ជា​ប្រទេស​ផលិត​គ្រាប់​កាហ្វេ​អា​រ៉ាប៊ី​កា​លំដាប់​ខ្ពស់​បំផុត​របស់​ពិភពលោក​បាន​ឃើញ​ដំណាំ​របស់​ខ្លួន​រង​ផល​ប៉ះពាល់​ដោយសារ​គ្រោះ​រាំងស្ងួត​និង​ការ​ត្រជាក់​កក​ខូច​ដំណាំ​កាហ្វេ​។​

​ការ​កក​ដ៏​អាក្រក់​បំផុត​នៅក្នុង​ប្រទេសប្រេ​ស៊ីល​ចាប់តាំងពី​ឆ្នាំ ១៩៩៤ បានធ្វើឱ្យ​ថ្លៃដើម​គ្រាប់​កាហ្វេ​ដែល​មិនទាន់​ដុត​កើនឡើង​ដល់​កម្រិត​ខ្ពស់​បំផុត​ក្នុង​រយៈពេល​ជិត ៧ ឆ្នាំ​។​

​យោងតាម​របាយការណ៍ ការខូចខាត​ពី​ការ​ត្រជាក់​កក​ដំណាំ​គឺ​ធ្ងន់ធ្ងរ​ណាស់​រហូតដល់​ថ្នាក់​កសិករ​ដាំ​កាហ្វេ​ខ្លះ​ត្រូវ​ដាំ​ដើម​កាហ្វេ​ឡើងវិញ​ដែល​អាច​មាន​ន័យ​ថា​វា​ត្រូវការ​ពេល​រហូត​ដល់​បី​ឆ្នាំ​ដើម្បី​អាច​បន្ត​ការផលិត​កាហ្វេ​បាន​ឡើងវិញ​៕