ដោយៈ សុផល / ភ្នំពេញ​៖ ព្រះ​បញ្ញា​មុនី​ញាណ ហាក់ សៀង​ហៃ នាយក​ប្រតិបត្តិ អង្គការ​ព្រះពុទ្ធសាសនា ដើម្បី​អប់រំ​នៃ​កម្ពុជា​, ជា​រាជាគណៈ ថ្នាក់​កិត្តិយស គង់នៅ​វត្ត កំផែង ខេត្តបាត់ដំបង និង​ជាទី​ប្រឹក្សា​ក្រុម​ប្រឹក្សាជាតិ ភាសា​ខ្មែរ នៃ​រាជបណ្ឌិត្យសភា កម្ពុជា បាន​មាន​សង្ឃដីកា លើកឡើង​ពី​សារសំខាន់ នៃ​ធម៌​ចំនួន​បី​ប្រការ ដែល​រួមមានៈ សច្ចៈ ខន្តី និង កតញ្ញូ​។

​ព្រះ​តេជគុណ បាន​មាន​ថេ​ដីកា​ថាៈ «​យើង​មិនអាច​កសាង​សង្គម​មួយ ឱ្យ​រីកចម្រើន បានទេ បើ​មនុស្ស ក្នុងសង្គម គ្មាន​សច្ចធម៌ ពេញ​ទៅដោយ មនុស្ស​កុហក​គ្នា បោកប្រាស់​គ្នា បាត់បង់​សំដី​ទៀងត្រង់ គ្មាន​ខន្តី ដែលជា​អលង្កា របស់​អ្នកប្រាជ្ញ ជា​គ្រឿង​លម្អ របស់​អ្នកប្រាជ្ញ និង​គ្មាន​ក​ត្ត​ញ្ញូ​ទេនោះ​»​។​

​ព្រះ​តេជគុណ បាន​មាន​សង្ឃដីកា​ដូច្នេះ ក្នុងពេល​សំណេះសំណាល ជាមួយ សាស្ត្រាចារ្យ និង​និស្សិត ជំនា​ន់ទី​១ នៃ​វិទ្យាស្ថាន​តេ​ជោ​សែន សាធារណការ និង​ដឹកជញ្ជូន ឆ្នាំ​សិក្សា​មូលដ្ឋាន ២០២០-២០២១ តាមរយៈ ប្រព័ន្ធ​វីដេអូ​ពី​ចម្ងាយ កាលពី​ថ្ងៃទី​៣១ ខែសីហា​។​

​ជា​ឱវាទ​ទុក​ដល់​សិស្ស និស្សិត យកទៅ​ពិចារណា ព្រះ​បញ្ញា​មុនី​ញាណ ហាក់ សៀង​ហៃ ព្រះអង្គ បានលើកឡើង នូវ​កំណាព្យ​មួយ​ឃ្លា​ថាៈ កើតជា​អង្គ ពង្ស​ជា មនុស្ស ប្រុស​ឬ​ស្រី មាន​សម្តី ថ្វីគំនិត គិត​គ្រប់​ប្រាណ ត្រូវ​ប្រឹងរៀន រៀន​ឱ្យ​ចេះ ចេះ​ចំណាន ទើប​ជាតិ​បាន ឋាន​ខ្ពង់ខ្ពស់ យស​ថ្កុំថ្កើង​។ កើតជា​ខ្មែរ សែ​ពូជពង្ស វង្ស​អង្គរ ត្រូវ​សាទរ ទ្រ​លើកស្ទួយ ជួយ​ជាតិខ្មែរ ឱ្យ​ថ្កើង​យស ខ្ពស់​ជោគជ័យ ល្បី​ពូកែ ជាប់​ហូរហែ ខ្មែរ​មាន​រិ​ទ្ធ ពិត​ដូចដើម​។ យើង​មានកំណើត កើតជា​ខ្មែរ ជាតិ​ខ្លាំងពូកែ ផ្នែក​អាស៊ី ត្រូវ​ខំធ្វើការ ខំ​សាមគ្គី បំពេញ​នាទី ពូជ​អង្គរ​”​។​

​ថ្លែង​ក្នុង​ពិធី​សំណេះសំណាល នាឱកាស​នោះដែរ លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ណែនាំ​ឱ្យ​និស្សិត​ជំនា​ន់ទី​១ នៃ​វិទ្យាស្ថាន​តេ​ជោ​សែន សាធារណការ និង​ដឹកជញ្ជូន ត្រូវខិតខំ​ប្រឹងប្រែង​រៀនសូត្រ ឱ្យ​ពូកែ មាន​ឆន្ទៈ​ខ្ពស់ ក្នុងការ​សិក្សា ទើប​អាច​ទទួលបាន ភាពជោគជ័យ បើ​មិន​មិន​ដូច្នោះ​ទេ មិនអាច​រក​ការងារ បានធ្វើ​ឡើយ​។​

​លោក​ទេសរដ្ឋមន្ត្រី ក៏បាន​ចែករំលែក​បទពិសោធន៍ នៃ​ការសិក្សា​របស់លោក កាល​សិក្សា នៅ​សហរដ្ឋអាមេរិក និង​បទពិសោធន៍ បម្រើ​ក្នុង​វិស័យ​ឯកជន នៅក្នុង​ក្រុមហ៊ុន​ធំ​មួយ នៅ សហរដ្ឋអាមេរិក ផងដែរ​។​

​លោក​ទេសរដ្ឋមន្ត្រី បាន​បន្ថែមទៀតថាៈ និស្សិត​ត្រូវការពារ​មុខមាត់ និង​តម្លៃ​របស់ វិទ្យាស្ថាន​តេ​ជោ សែន សាធារណការ និង​ដឹកជញ្ជូន ត្រូវមាន​មោទនភាព​ថា យើង​បាន​ចូលរៀន នៅ​វិទ្យាស្ថាន​តេ​ជោ សែន សាធារណការ និង​ដឹកជញ្ជូន ជា​វិទ្យាស្ថាន​តែមួយគត់ នៅ​កម្ពុជា ដែល​បណ្ដុះបណ្ដាល​សិស្ស និស្សិត ឱ្យ ក្លាយជា​វិស្វករ អាច​កសាង​ផ្លូវ ស្ពាន មានគុណ​ភាព ជូន​ប្រទេសជាតិ មាតុភូមិ​យើង ដូនតា​យើង​បាន​សាង សង់​ប្រាង្គ​ប្រាសាទអង្គរវត្ត និង​ប្រាសាទ​ផ្សេងទៀត ដោយ​គ្មាន​កុំព្យូទ័រ គ្រឿងចក្រ​ទំនើប ដូច​សព្វថ្ងៃនេះ ប៉ុន្តែ​លោក​អាចធ្វើ​បាន ប្រកបដោយ​គុណភាព​។​

​លោក​ទេសរដ្ឋមន្ត្រី ចង់ឃើញ​កូន​ខ្មែរ មាន​សមត្ថភាព បច្ចេកទេស និង​ចំណេះដឹង ជំនាញ អាច​កសាង ប្រព័ន្ធ​ហេដ្ឋារចនាសម្ព័ន្ធ ស្ពាន​ឆ្លងកាត់​ទន្លេមេគង្គ ទន្លេបាសាក់ ទន្លេសាប និង​ស្ពាន​ក្រោម​ដី​បាន និង បាន​ជំរុញ​លើកទឹកចិត្ត ឱ្យ​សិស្ស និស្សិត ខិតខំ​ប្រឹងប្រែង​រៀនសូត្រ​ឱ្យ​ចេះ ដើម្បី​យកចំណេះ​វិជ្ជា​ទៅ​ជួយ កសាង​ប្រទេសជាតិ មាតុភូមិ ឱ្យបាន​រុងរឿង​ថែមទៀត ដើម្បី​មោទនភាព​គ្រួសារ បងប្អូន មិត្ត​ភ័​ក្ត សាស្ត្រា ចា​រ្យ ថ្នាក់ដឹកនាំ នៅ​ក្រសួង​សាធារណការ និង​ដឹកជញ្ជូន ក៏ដូចជា​ថ្នាក់ដឹកនាំ ប្រទេសជាតិ​យើង​ផងដែរ​។​

​ឆ្លៀត​ក្នុងឱកាស​នោះដែរ លោក​ទេសរដ្ឋមន្ត្រី បាន​ជម្រាបជូន​ផងដែរ​ថាៈ វិទ្យាស្ថាន បាន​ចុះ​អនុស្សា រណៈ យោគយល់ ជាមួយ​សាកលវិទ្យាល័យ​ល្បីៗ នៅ​ប្រទេស​ចិន ក្រុមហ៊ុន​ឯកជន​នានា និង​បន្ត​ខិតខំ ប្រឹងប្រែង ទំនាក់ទំនង​រក​សាស្ត្រា​ល្អៗ មក​បង្រៀន​និស្សិត​យើង ដោយផ្ទាល់ ឬ​តាម​ប្រព័ន្ធ​វីដេអូ​ពី​ចម្ងាយ​ដើម្បី​បង្កើន ចំណេះដឹង ឱ្យបាន​គ្រប់​ជ្រុងជ្រោយ ប៉ុន្តែ​និស្សិត​យើង ត្រូវមាន​ឆន្ទៈ​ខ្លួនឯង ដាក់ចិត្ត​ដាក់​កាយ រៀនសូត្រ​ឱ្យ​ពូកែ ដើម្បី​យកចំណេះ​ដឹង ទៅ​បម្រើ​ប្រទេសជាតិ មាតុភូមិ មិនមែន​រៀន ដើម្បី​ចប់ នោះឡើយ​។​

​លោក​ទេសរដ្ឋមន្ត្រី បានផ្តល់​ដំបូន្មាន​ល្អៗ ដល់​សិស្ស​ផងដែរ​ថាៈ ក្នុងនាម​ជា​និស្សិត ក្រៅពី​ការខិតខំ ប្រឹងប្រែង រៀនសូត្រ ត្រូវធ្វើ​ខ្លួន​ជាម​នុស្ស​ល្អ ក្នុងសង្គម​ត្រូវ​ចូលរួម ធ្វើយ៉ាងណា ឱ្យ​ប្រទេសជាតិ​យើង មានការ​រីកចម្រើន ដូច​ពាក្យស្លោក​មួយ​ឃ្លា​ថា យើង​មិនអាច​រស់​លើ​កោះ ដែលមាន​ទ្រព្យសម្បត្តិ​ស្តុកស្តម្ភ ហ៊ុមព័ទ្ធ​ដោយ​សមុទ្រ ក្រីក្រ​បានទេ យើង​មាន​តួនាទី ភារកិច្ច ជួយ​ពង្រីក​កោះ ដែលមាន​សម្បត្តិ​ស្តុក ស្តម្ភ​នោះ​ឱ្យ​ធំ ហើយ​បង្រួញ​សមុទ្រ​ក្រីក្រ ឱ្យនៅ​រួម​តូច​បំផុត ដើម្បី​ប្រជាពលរដ្ឋ​យើង និង​ពាក្យស្លោក​មួយ ចំនួន ទៀតថា “ បើ​អ្នក​មិនដឹងថា ទៅ​ផ្លូវ​ណា ផ្លូវ​ណា ក៏​នាំ​អ្នក​ទៅ​ទីនោះ​ដែរ​” , “​សំដី​អត់​ប្រយោជន៍ នាំ​គ្រោះ​ដល់​ជាតិ​ការងារ​មាន ប្រសិទ្ធភាព នាំ​ជាតិ​រុងរឿង​” ដូច្នេះ​កុំ​និយាយ​អ្វី អត់​បានការ នាំឱ្យ​ខ្មែរ​ឈ្លោះ​គ្នា នាំ​ឱ្យគេ​មើលងាយ​ជនជាតិ​យើង និង​ត្រូវ​រួបរួមគ្នា កសាង​ប្រទេសជាតិ​យើង ឱ្យបាន​រុងរឿង​៕/V​-PC