ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ក្រុម​កាំភ្លើង​ធំ Arsenal បាន​ចុះហត្ថលេខា​ទិញ​យក​កីឡាករ​សញ្ជាតិ​ជប៉ុន តាកេ​ហ៊ី​រ៉ូ តូ​មី​យ៉ា​ស៊ូ ពី​ក្រុម Bologna និង​អនុញ្ញាត​ឱ្យ​ខ្សែការពារ ហិកទ័រ បែ​ល​ឡឺរី​ន ចាកចេញ​ទៅ​ក្លិប Real Betis ក្នុង​លក្ខខណ្ឌ​ខ្ចី​ជើង​ក្នុង​អំឡុង​ថ្ងៃ​ចុងក្រោយ​នៃ​ទីផ្សារ​ដោះដូរ​កីឡាករ​ដ៏​មមាញឹក (៣១​សីហា​)​។​

​កីឡាករ​អន្តរជាតិ​ជប៉ុន​តូ​មី​យ៉ា​ស៊ូ ដែល​អាច​លេង​បាន​ទាំង​ខ្សែការពារ​ស្តាំ​និង​ខ្សែការពារ​កណ្តាល បាន​ចុះហត្ថលេខា​លើ​កិច្ចសន្យា​រយៈពេល​វែង​នៅឯ​ទឹកដី Emirates Stadium បន្ទាប់ពី​បាន​បង្ហាញខ្លួន​ចំនួន ៦៣ លើក​សម្រាប់​ក្រុម​នៅ​ក្របខ័ណ្ឌ Serie A រយៈពេល​ពីរ​រដូវ​ចុងក្រោយ​នេះ​។​

​កីឡាក​រវ័យ ២២ ឆ្នាំ​រូប​នេះ​បាន​តំណាងឱ្យ​ប្រទេស​របស់​គេ​នៅ​ឯ​ព្រឹត្តិការណ៍​កីឡា​តូ​ក្យូរ​ដូវ​ក្តៅ​នេះហើយ​បច្ចុប្បន្ន​កំពុង​បំពេញ​កាតព្វកិច្ច​អន្តរជាតិ​ឱ្យ​ក្រុមបាល់ទាត់​ជម្រើសជាតិ ដែល​នឹង​ពន្យារពេល​ការមកដល់​របស់​គេ​នៅ​ភាគ​ខាងជើង​ទីក្រុង​ឡុង​ដ៍​។​

​អ្នក​ចាត់ការ​ទូទៅ​លោក មី​គែល អាតិតា បាន​ប្រាប់​វេបសាយ​ផ្លូវកា​ររបស់​ក្លិប​ថា “​តាកេ​ហ៊ី​រ៉ូ​គឺជា​ខ្សែការពារដ៏​រឹងមាំ​ម្នាក់​ដែល​មាន​បទពិសោធន៍​ល្អ​នៅ Serie A និង​នៅ​កម្រិត​អន្តរជាតិ​។​​រូបគេ​ជា​ខ្សែការពារ​រឹងមាំ​ម្នាក់​ដែល​មាន​គុណភាព​ការពារ​ល្អ មាន​សមត្ថភាព​បច្ចេកទេស​ខ្ពស់ និង អាច​គ្រប់គ្រង​បាល់​បាន​យ៉ាង​អស្ចារ្យ​។ រូប​គេ​នឹង​ក្លាយ​ជា​សមាជិក​សំខាន់​នៃ​ក្រុម​របស់​យើង​។ យើង​ទន្ទឹង​រង់ចាំ​តាកេ​ហ៊ី​រ៉ូ​ចូលរួម​ជាមួយយើង នៅពេល​គេ​ត្រឡប់មក​ពី​បំពេញ​កាតព្វកិច្ច​អន្តរជាតិ​វិញ​”៕

​ខ្សែការពារ​ជប៉ុន តាកេ​ហ៊ី​រ៉ូ តូ​មី​យ៉ា​ស៊ូ