​ដោយៈ ប​.​ខុន / ភ្នំពេញៈ ការធ្លាក់​ភ្លៀង នៅ​ល្ងាច​ថ្ងៃទី​១ ខែកញ្ញា លើ​រាជធានី​ភ្នំពេញ សម្រាប់​តំបន់ ក្នុង​ក្រុង មាន​កម្រិត​រង្វង់​ពី ៥១ ដល់ ៦០ មី​លី​ម៉ែត្រ និង​នៅ​ចោមចៅ ៦២ មី​លី​ម៉ែត្រ បង្កឱ្យមាន​ការ​លិច លង់​ផ្លូវ និង​តំបន់​ទំនាប មួយចំនួន ក្នុង​រយៈពេល​ខ្លី ដោយសារ​បរិមាណ​ទឹក​ភ្លៀង ធ្លាក់​មាន​ចំនួន​ច្រើន ក្នុង​រយៈពេល​ខ្លី​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ រស្មី​កម្ពុជា​ដឹង នៅ​យប់​ថ្ងៃទី​១ ខែកញ្ញា នេះ បន្ទាប់ពី​ភ្លៀង​ធ្លាក់​លើ​ក្រុង ភ្នំពេញ បាន​រាំង​ទៅវិញ​ថាៈ ការធ្លាក់​ភ្លៀង​លើ​រាជធានី​ភ្នំពេញ នៅ​ល្ងាច​ថ្ងៃនេះ (០១​កញ្ញា​) សម្រាប់​តំបន់​ក្នុង​ក្រុង ដូចជា ផ្សារ​ដើម​គរ បូកគោ និង​តំបន់​មួយចំនួនទៀត មាន​កម្រិត ក្នុង​រង្វង់​ពី ៥១ ទៅដល់ ៦០ មី​លី​ម៉ែត្រ​។ នៅ​ចោមចៅ មាន​កម្រិត ៦២ មី​លី​ម៉ែត្រ ទើប​បង្កឱ្យមាន​ការលិចលង់ នៅ​កន្លែង​ខ្លះ មួយរយៈ​ពេល​ខ្លី​។​

​សូម​រំលឹក​ឱ្យដឹងថាៈ កម្រិត​ទឹកភ្លៀង ដែល​បាន​ធ្លាក់ រយៈពេល ២៤ ម៉ោង នៅ​រាជធានី​ភ្នំពេញ ត្រឹម​ព្រឹក​ថ្ងៃទី​១ ខែកញ្ញា មានៈ ១៦ មី​លី​ម៉ែត្រ នៅ​ចាក់អង្រែ , ១៨ មី​លី​ម៉ែត្រ នៅ​សាក់​សំពៅ , ២២ មី​លី​ម៉ែត្រ នៅ​ទួល​សង្កែ , ២៨ មី​លី​ម៉ែត្រ នៅ​ចោមចៅ និង ១០៥ មី​លី​ម៉ែត្រ នៅ​សែន​សុខ​។​

​ក្រសួង​ធនធានទឹក និង​ឧតុនិយម នៅ​ថ្ងៃទី​៣១ ខែសីហា ឆ្នាំ​២០២១ នេះ បាន​ជូនដំណឹង ស្តីអំពី​ការ​ព្យាក រ​អាកាសធាតុ សម្រាប់​ពីថ្ងៃ​ទី​១ ដល់​ថ្ងៃទី​៧ ខែសីហា​ថាៈ នៅក្នុង​សប្តាហ៍​នេះ ព្រះរាជាណាចក្រ​កម្ពុជា ទទួល​ឥទ្ធិពល​ពី ជ្រលង​សម្ពាធ​ទាប​ឥណ្ឌា កម្រិត​ខ្លាំង​ជាមួយនឹង​ប្រព័ន្ធ​សម្ពាធ​ទាប ហើយ​ទទួល​បន្ថែម នូវ​ខ្យល់​សមុទ្រ (Breeze)​។​

​នៅក្នុង​សេចក្តីជូនដំណឹង បាន​សរសេរ​ទៀតថាៈ ស្ថានភាព​អាកាសធាតុ បែប​ខាងលើ ធ្វើ​ឲ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា ពី ២៤​ទៅ​២៦​អង្សា​សេ សីតុណ្ហភាព​អតិបរមា មាន​ពី ៣០ ទៅ ៣២ អង្សា​សេ​។ អាចមាន​ភ្លៀង​ធ្លាក់ ក្នុង​កម្រិត ពី​មធ្យម​ទៅ​ច្រើន លាយឡំ​ទៅដោយ​ផ្គរ រន្ទះ ខ្យល់​កន្ត្រាក់ ។ ទន្ទឹម​នោះ អាចមាន​ជំនន់​ទឹកភ្លៀង កើតឡើង​នៅ​តំបន់​ខ្លះ​។​

​សម្រាប់​បណ្តា​ខេត្ត នៅជាប់​ជួរ​ភ្នំ​ដងរែក និង​ខ្ពង់រាប​ឦសាន មាន​សីតុណ្ហភាព អប្បបរមា ពី ២៣ ទៅ ២៥ អង្សា​សេ សីតុណ្ហភាព អតិបរមា មាន​ពី ២៩ ទៅ ៣១ អង្សា​សេ​។ អាច​នឹងមាន​ភ្លៀង​ធ្លាក់ ក្នុង​កម្រិត ពី​មធ្យម​ទៅ​ច្រើន លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់ ។​

​តំបន់​មាត់សមុទ្រ មាន​សីតុណ្ហភាព អប្បបរមា ពី ២៤ ទៅ ២៦ អង្សា​សេ សីរ​តុ​ណ្ហ​ភាព អតិបរមា មាន​ពី ៣២ ទៅ ៣៤ អង្សា​សេ​។ អាច​នឹងមាន​ភ្លៀង​ធ្លាក់ ក្នុង​កម្រិត​ពី​បង្គួរ​ទៅ​ច្រើន លាយឡំ​ទៅដោយ ផ្គរ រន្ទះ និង​ខ្យល់​កន្ត្រាក់ ។ នៅលើ​ផ្ទៃសមុទ្រ ពិសេស​ក្បែរ​បណ្តា​កោះ រលក​សមុទ្រ នឹង​អាច​កើតមានឡើង ក្នុង​កម្រិត​មធ្យម ។​

​ក្រសួង​ធនធានទឹក និង​ឧតុនិយម បាន​អំពាវនាវ នៅក្នុង​សេចក្តីជូនដំណឹង​នេះ ឱ្យ​ប្រជាពលរដ្ឋ​បង្កើន ការប្រុងប្រយ័ត្ន​ខ្ពស់ អំពី​គ្រោះថ្នាក់ ដែល​អាច​នឹង​កើតមាន​ពី​បា​តុ ភូត​ធម្មជាតិ​នេះ ជាយថាហេតុ​៕/V​