​ដោយៈ​ចាន់តូ​/​ភ្នំពេញៈ បុរស​ម្នា​ក់បាន​ស្លាប់បាត់​បង់ជីវិត បន្ទាប់ពី​ជិះ​ម៉ូតូ​យ៉ាង​លឿន​ដោយសារ​មាន​គេ​ជិះ​ម៉ូតូ​ដេញតាម​ពីក្រោយ​ក៏​ធ្លាក់​ជង្ហុក បណ្តាល​ឲ្យ​ដួល​បោក​ក្បាល​និង​ថ្នល់ កាលពី​វេលា ម៉ោង​១០​និង​៨​នាទី​យប់​ថ្ងៃទី​២ ខែកញ្ញា ឆ្នាំ​២០២១ ត្រង់ចំណុច​ស្តុ​ប​ផ្សារ​មាន់​អាំង ក្នុង​សង្កាត់​បឹងកក់​ទី​២ ​ខណ្ឌទួលគោក ។​

​ជនរងគ្រោះ​មិនទាន់​ស្គាល់​អត្តសញ្ញាណ នៅឡើយ​ទេ ដោយ​ស្លៀកពាក់​ខោអាវ​យឺត​កីឡា​ពណ៌​ខៀវ សម្បុ​លស​ល្មម កម្ពស់​ប្រហែល​១,៦០​ម៉ែត្រ​ជិះ​ម៉ូតូ​ម៉ាក​ហុងដា​ឌ្រី​ម C១២៥ ពណ៌​ខ្មៅ ពាក់​ស្លាក​លេខ កំពង់ធំ ១O ៦៨៧៦ ជិះ​តែម្នាក់ឯង​។​

​តាម​ប្រភព​បាន​ឲ្យ​ដឹងថា​ដំបូង​ឡើយ​គេ​ឃើញ បុរសរងគ្រោះ​ខាងលើ​ជិះ​ម៉ូតូ​តាម​បណ្ដោយ​ផ្លូវ ៣១៥ ក្នុងទិស​ដៅ​ពី​លិច​មក​កើត​យ៉ាង​លឿន ដោយមាន​ម៉ូតូ​ធន់​ធំ​ដេញតាម​ពីក្រោយ ខណៈ មកដល់​ចំណុចកើតហេតុ​ខាង​លើ​ក៏​ធ្លាក់​ជង្ហុក បណ្ដាលឱ្យ​ដួល​បោក​ក្បាល​នឹង​ថ្នល់​បែក​លលា​ដ៏ ក្បាល​ស្លាប់​ភ្លាមៗ​នៅ​កន្លែងកើតហេតុ​។ ចំណែក​ម៉ូតូ បាន​ខ្ទាត​ឆ្ងាយ​ពី​សព​ចម្ងាយ​ប្រហែល​៣០​ម៉ែត្រ ហើយ​អ្នក​ដែល​ដេញតាម​ពីក្រោយ​នោះ បានគេច​ខ្លួន​ចេញពី​កន្លែងកើតហេតុ​បាត់ស្រមោល​។​

​ក្រោយពី​កើតហេតុ​សមត្ថកិច្ច​ជំនាញ​ចុះ​មកដល់​កន្លែងកើតហេតុ​បាន​ពិនិត្យ​មើលឃើញ​នៅ​ជិត សព​មាន​ថ្នាំញៀន ២​កញ្ចប់​តូច សង្ស័យ​ជា​ថ្នាំញៀន​របស់​ជនរងគ្រោះ​។ ករណីនេះ ត្រូវគេ​ដាក់​ការសង្ស័យថា អាចមាន​សមត្ថកិច្ច​ខាង​ណា​ដេញចាប់​ជនសង្ស័យ​បណ្ដាលឱ្យ​ដួល​ស្លាប់​។​

​ក្រោយ​កើតហេតុ សមត្ថកិច្ច​ការវាស់វែង​យក​ម៉ូតូ​ទៅ​រក្សាទុក​រងចាំ​សាច់ញាតិ​មក​ទទួលយក ចំណែក​សព​សមត្ថកិច្ច​ធ្វើ​កំណត់ហេតុ រួច​បាន​ឲ្យ​អ្នក​ដឹក​សព​យកទៅ​តម្កល់ទុក​នៅ​វត្ត​ទឹកថ្លា​រងចាំ​សាច់ញាតិ​មក​ទទួលយក​ទៅធ្វើ​បុណ្យ​តាម​ប្រពៃណី​៕​