ដោយៈ បាយ័ន / សៀមរាបៈ នៅ​ថ្ងៃទី​៨ ខែកញ្ញា ឆ្នាំ​២០២១ លោក ផេង សំអឿន អគ្គនាយករង អាជ្ញាធរ​ជាតិ​ព្រះវិហារ ប្រចាំ​រមណីយដ្ឋាន ប្រាសាទ​កោះ​កេរ រួមជាមួយ​ប្រធាន​នាយកដ្ឋាន អនុប្រធាននាយកដ្ឋាន និង​មន្ត្រី​ប​ចេ្ច​ក​ទេស នៃ​នាយកដ្ឋាន​រមណីយដ្ឋាន និង​បុរាណវិទ្យា បាន​ចុះ​សិក្សា ត្រួតពិនិត្យ វាយតម្លៃ និង​ចង​ក្រ​ឯកសារ លើ​ប្រាសាទ​សំខាន់ ចំនួន​៦ ក្នុង​រមណីយដ្ឋាន​ប្រាសាទ​កោះ​កេរ ។​

​អាជ្ញាធរ​ជាតិ​ព្រះវិហារ បាន​បង្ហោះ​ក្នុង​បណ្តាញ​សង្គម នៅ​យប់ ថ្ងៃទី​៨ ខែកញ្ញា ឆ្នាំ​២០២១​នេះ​ថាៈ រួមមាន ប្រាសាទគោក​គ្រង ប្រាសាទបឹង​ខ្នារ ប្រាសាទក្ទម្ព ប្រាសាទក្រចាប់ ប្រាសាទ​បល្ល័ង្ក​ត្បូង និង​ប្រាសាទ ដងទង់​។ ប្រាសាទ​កោះ​កេរ មាន​ទីតាំង​ក្នុងភូមិ​ស្រយង់ជើង ឃុំ​ស្រយង់ ស្រុក​គូលែន ខេត្តព្រះវិហារ​។​

​ក្នុងន័យនេះ គឺ​ដើម្បី​ស្វែងយល់​ពី ស្ថានភាព​បច្ចុប្បន្ន កម្រិត​ហានិភ័យ របស់​ប្រាសាទ​នីមួយៗ និង​រៀបចំ ចងក្រង​ឯកសារ ស្តីពី​ផែនការ​អនុវត្តន៍ រយៈពេល​ខ្លី និង​រយៈពេល​វែង សម្រាប់​ការងារ​អភិរក្ស និង​ជួសជុល នាពេលខាងមុខ​៕/V​