ដោយៈ ម៉េង​ឆៃ / ភ្នំពេញៈ​កាលពី​យប់​ថ្ងៃទី​៨ ខែកញ្ញា ឆ្នាំ​២០២១ ក្រសួងសុខាភិបាល បានប្រកាស​ពី​ការរកឃើញ អ្នក​ឆ្លង​កូ​វីដ​១៩ ប្រភេទ​បំប្លែង​ថ្មី ដែល​តា ក្នុង​រយៈពេល ៣​ថ្ងៃ គឺ​នៅ​ថ្ងៃទី​៥ ថ្ងៃទី​៦ និង​ថ្ងៃទី​៧ ខែកញ្ញា ឆ្នាំ​២០២១ មាន​ចំនួន ៦៦៩​នាក់​។ នៅ​ភ្នំពេញ មាន​អ្នក​ឆ្លង​កូ​វីដ ប្រភេទ ដែល​តា ច្រើនជាងគេ រហូតដល់ ១៩៩​នាក់ ក្នុង​រយៈពេល ៣​ថ្ងៃនេះ​។ ក្នុងនោះ ដែល​តា ក៏បាន​រាលដាល​ដល់ ២៤​ខេត្ត​រាជធានី​ហើយ លើកលែងតែ​ខេត្ត​កែប​មួយ​ប៉ុណ្ណោះ​។​

​ក្រសួងសុខាភិបាលលើកឡើងថា គិត​ចាប់ពី​ថ្ងៃទី​៣១ ខែមីនា រហូតដល់​ថ្ងៃទី​៧ ខែកញ្ញា ឆ្នាំ​២០២១ កូ​វីដ​១៩ បំប្លែង​ថ្មី ដែល​តា មាន​អ្នក​ឆ្លង​សរុប​ចំនួន ៣៣២៣​នាក់​។ ក្នុងចំណោម ២៤​ខេត្ត​រាជធានី ដែល​ឆ្លង​ដែល​តា គឺ​នៅ​ភ្នំពេញ មាន​ច្រើនជាងគេ រហូតដល់ ១១១៣​នាក់​។​

​លទ្ធផល​នៃ​ការរកឃើញ​អ្នក​ឆ្លង​ជំងឺ​កូ​វីដ​១៩ ប្រភេទ​បំប្លែង​ថ្មី ដែល​តា ជា​បន្តបន្ទាប់ រហូតដល់​ជាង ៣០០០​នាក់​នេះ ត្រូវបាន​ក្រសួងសុខាភិបាល គូសបញ្ជាក់ថា វីរុស ដែល​តា បាន និង​កំពុង​បន្ត​រាតត្បាត វាយលុក​ចូលក្នុង​សហគមន៍​របស់​យើង ជាពិសេស នៅ​រាជធានី​ភ្នំពេញ ខេត្តបន្ទាយមានជ័យ ឧ​ត្ត​រ​មានជ័យ សៀមរាប ស្ទឹងត្រែង កណ្តាល ព្រះវិហារ ត្បូងឃ្មុំ បាត់ដំបង កំពង់ធំ កំពង់ចាម ស្វាយរៀង មណ្ឌលគិរី ព្រះសីហនុ ពោធិ៍សាត់ និង​បណ្តា​ខេត្ត​មួយចំនួនទៀត​។​

​ក្រសួងសុខាភិបាលក៏បាន​ប្រកាសថា ក្នុង​រយៈពេល ២៤​ម៉ោង​ចុងក្រោយ នៅ​កម្ពុជា មាន​ករណី​ឆ្លង​កូ​វីដ​១៩ ចំនួន ៥៨៩​នាក់ ជាសះស្បើយ ៤៨០​នាក់ និង​ស្លាប់ ២០​នាក់​។ ជារួម គិត​ត្រឹម​ថ្ងៃទី​៨ ខែកញ្ញា នៅ​ទូទាំងប្រទេស មាន​ករណី​ឆ្លង​កូ​វីដ​១៩ សរុប​ចំនួន ៩៧៥២៤​នាក់​។ ករណី​ជាសះស្បើយ មាន​ចំនួន ៩២៤៩៥​នាក់ និង​ករណី​ស្លាប់​សរុប មាន​ចំនួន ២០០៧​នាក់​។​

​ទន្ទឹមនឹង​កូ​វីដ​១៩ បន្ត​រកឃើញ​ក្នុង​មួយថ្ងៃៗ ជិត ៦០០​នាក់ និង​ស្លាប់​រៀងរាល់ថ្ងៃ ជាង ១០​នាក់​ផង ហើយ​ក្នុងនោះ ដែល​តា ក៏​បន្ត​វាយលុក​ដោយ​ស្ងាត់ស្ងៀម នៅពេលនេះ អាជ្ញាធរ​រាជធានី​ភ្នំពេញ ក៏បាន​សម្រេច ដាក់ចេញ​នូវ​វិធានកា​រដ្ឋបាល ដោយ​បន្ត​ផ្អាក​សកម្មភាព​អាជីវកម្ម ដែលមាន​ហានិភ័យ​ខ្ពស់ ក្នុង​រយៈពេល ១៤​ថ្ងៃ​ទៀត ចាប់ពី​ថ្ងៃទី​១០ ខែកញ្ញា ដល់​ថ្ងៃទី​២៣ ខែកញ្ញា ឆ្នាំ​២០២១ ដើម្បី​ប្រយុទ្ធ និង​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩​។​

​ក្នុង​វិធានការ​រដ្ឋបាល បន្ត​រយៈពេល ១៤​ថ្ងៃ ចាប់ពី​ថ្ងៃទី​១០ ខែកញ្ញា​តទៅ អាជ្ញាធរ​រាជធានី​ភ្នំពេញ តម្រូវឱ្យ​ផ្អាក​ជា​បណ្ដោះអាសន្ន ចំពោះ​សកម្មភាព​ការងារ មុខរបរ អាជីវកម្ម ដែលមាន​ហានិភ័យ​ខ្ពស់​នៃ​ការឆ្លង​រាលដាល​ជំងឺ​កូ​វីដ​-១៩ រួមមាន គ្រឹះស្ថានសិក្សា​សាធារណៈ និង​ឯកជន ដែល​មិនទាន់មាន​គោលការណ៍​អនុញ្ញាតឱ្យ​បើក​ដំណើរការ​ឡើងវិញ ត្រូវ​បន្តធ្វើ​ការបណ្តុះបណ្តាល តាម​ប្រព័ន្ធ​អន​ឡាញ អាជីវកម្ម​ក្លឹប​កម្សាន្ត គ្រប់​ប្រភេទ ខារ៉ាអូខេ រង្គសាល បៀ​ហ្គា​ឌិន និង​កាស៊ីណូ រមណីយដ្ឋាន សារមន្ទីរ សួន​កុមារ និង​សួន​កម្សាន្ត​នានា អាជីវកម្ម​ម៉ាស្សា សូ​ណា និង​ស្ចឹ​ម​គ្រប់​ប្រភេទ ហាង​លក់ និង​សេព​គ្រឿង​ស្រវឹង​គ្រប់​ប្រភេទ រោងភាពយន្ត រោង​សម្ដែង​សិល្បៈ ក្លិប​ហាត់ប្រាណ និង​មជ្ឈមណ្ឌល​កីឡា​គ្រប់​ប្រភេទ​។ ក្នុងនោះ អាជ្ញាធរ​រាជធានី​ភ្នំពេញ ក៏​ហាមឃាត់​នូវ​ការជួបជុំ ឬ​ការប្រមូលផ្តុំ មនុស្ស​ជា​លក្ខណៈ​ឯកជន ដែល​អ្នកចូលរួម​លើសពី ១៥​នាក់​ឡើងទៅ​។

​ដូច្នេះ​មកដល់ពេលនេះ កូ​វីដ ពិសេស​ដែល​តា នៅតែ​បន្ត​ឆ្លង​រាលដាល ហើយ​ប៉ុន្មាន​ថ្ងៃ​ចុង​ក្រោយនេះ ចំនួន​អ្នក​ឆ្លង​កូ​វីដ បាន​ឡើងដល់​ជិត ៦០០​នាក់ ខណៈដែល​តា ក៏​កើនឡើង​ច្រើន ហើយ​ច្រើនជាងគេ នៅ​ភ្នំពេញ​តែម្តង​។ ទន្ទឹមនឹងនេះ រាជធានី​ភ្នំពេញ គ្រោង​នឹង​បើក​សាលារៀន​ឡើងវិញ ចាប់ពី​ថ្នាក់​ទី​៩ ដល់​ថ្ងៃទី​១២ ចាប់ពី​ថ្ងៃទី​១៥ ខែកញ្ញា​តទៅ​។ តែ​តាមរយៈ​កិច្ចប្រជុំ នៅ​ថ្ងៃទី​៩​កញ្ញា​នេះ គឺ​អភិបាល​រាជធានី​ភ្នំពេញ បាន​តម្រូវ​ធ្វើតេស្តរ​កកូ​វី​ឌ លើ​គ្រូ និង​បុគ្គលិក​សិក្សា ចាប់ពី​ថ្ងៃទី​១០ ខែកញ្ញា​តទៅ​។​

​ក្នុងនោះ ទាំង​គ្រូ និង​ទាំង​សិស្ស ដែលមាន​អាយុ​ចាប់ពី ១២​ឆ្នាំ​ឡើងទៅ ត្រូវតែ​ចាក់​វ៉ាក់សាំង​រួច ទើប​អនុញ្ញាត​ឲ្យ​ចូល​សាលារៀន នៅពេល​សាលា​បើក​ឡើងវិញ នាពេល​ខាងមុខនេះ​។ ក្នុង​គ្រូបង្រៀន មកដល់ពេលនេះ ក៏ត្រូវ​បានអនុញ្ញាត​ឲ្យ​ចាក់​វ៉ាក់សាំង ដូ​ស​ទី​៣ រួចរាល់​ហើយ​។ រីឯ​សិស្ស​វិញ ក៏បាន​ចាក់​វ៉ាក់សាំង គ្រប់ ២​ដូ​ស​ហើយ ពោលគឺ​កុមារ​អាយុ​ត្រឹម ១២​ឆ្នាំ គឺ​ចូលរៀន​នៅ​មធ្យមសិក្សា ថ្នាក់​ទី​៦ ហើយ​។​

​យ៉ាងណា​ក៏ដោយចុះ ទោះបីជា​គ្រូ និង​សិស្ស បាន​ចាក់​វ៉ាក់សាំង​គ្រប់ ២​ដូ​ស និង​គ្រប់ ៣​ដូ​ស​ហើយក៏​ដោយ ក៏​នៅតែ​បន្ត​អនុវត្ត​នូវ​វិធានការ​ការពារ និង​ទប់ស្កាត់​ការឆ្លង​រាលដាល​ជំងឺ​កូ​វីដ​១៩​។ នោះ​គឺ​ពាក់​ម៉ាស​ទាំងអស់គ្នា ទាំង​គ្រូ ទាំង​សិស្ស និង​ទាំងអស់គ្នា មិន​ថា ក្នុង​សាលារៀន ឬ​នៅក្រៅ​សាលា​ឡើយ​។ វាស់​កំដៅ​នៅ​ច្រកចូល​សាលា ហើយ​រក្សា​គម្លាត​សុវត្ថិភាព ដែល​សាលារៀន បានរៀបចំ​ហើយ ក្នុង ១​ថ្នាក់ ដាក់​សិស្ស ត្រឹមតែ ១៥​នាក់ ហើយ​ឃ្លាត​ពីគ្នា ដោយ ១​តុ មាន​សិស្ស​តែ​ម្នាក់ ហើយ​ថ្នាក់រៀន ត្រូវ​បើកទ្វារ បង្អួច ឬក៏​រៀន​នៅ​ទី​សមគួរ ដែល​មិនមែនជា​បន្ទប់​បិទ​ជិត និង​មិន​ប្រើ​ម៉ាស៊ីនត្រជាក់​នោះទេ​។​

​ការធ្វើ​តេស្ត​មុន​ចូលរៀន ក៏​ត្រូវបាន​អនុវត្ត ហើយ​ពេលនេះ ធ្វើ​មុនគេ នៅ​រាជធានី​ភ្នំពេញ ខណៈដែល​នៅតាម​ខេត្ត​ផ្សេងទៀត ក៏បាន​បើក​សាលារៀន​ឡើងវិញ និង​បានរៀបចំ​ត្រៀម​បើក​សាលារៀន​ឡើងវិញ ជា​បន្តបន្ទាប់​។ ក្នុងនោះ នៅ​ខេត្តមណ្ឌលគិរី បើក​សាលារៀន​មុនគេ នៅ​ថ្ងៃទី​៩ និង​ថ្ងៃទី​១២ ចាប់តាំងពី​ថ្ងៃទី​៦ ខែកញ្ញា​។ រីឯ​នៅ​ខេត្ត​ព្រះសីហនុ ក៏​សម្រេច​ថា នឹង​បើក​សាលារៀន ៥​កន្លែង នា​ថ្ងៃទី​១៣​កញ្ញា​។​

​ដូច្នេះ​មិន​ថា នៅ​ភ្នំពេញ ឬ​នៅ​ខេត្ត​ណា​ណា​ទេ ពេល​បើក​សាលារៀន​ឡើងវិញ គឺ​កុំភ្លេចថា កូ​វីដ​នៅតែ​ឆ្លង​រៀងរាល់ថ្ងៃ ពិសេស ដែល​តា​។ ដូច្នេះ​សូមកុំ​ភ្លេចខ្លួន​ឲ្យ​សោះ មិន​ថា គ្រូ ឬ​សិស្ស​ទេ សូម្បី​មហាជន​ផ្សេងទៀត គ្រប់ៗ​រូប ក៏ត្រូវ​បន្ត​អនុវត្ត​វិធានការ ៣​កុំ និង​៣​ការពារ ជាប់​ជានិច្ច​៕​សរន