ដោយ​: ពៅ​និមល​/​ភ្នំពេញ​៖ ដើម្បី​ជាការ​លើកទឹកចិត្ត​ឲ្យ​ម្ចាស់​យានយន្ត​ចូលខ្លួន​មក​បំពេញ​តាត​ព្វ​កិច្ច​ពន្ធ និង​អាករ​ឱ្យបាន​ទាន់ពេលវេលា អគ្គនាយក​នៃ​អគ្គនាយកដ្ឋាន​គយ​និង​រដ្ឋាករ​កម្ពុជា នឹង​ទទួល​អនុគ្រោះ​បន្ធូរ​បន្ថយពន្ធ​ចំនួន​ភាគរយ នៃ​ទឹកប្រាក់​ពន្ធអាករ​សរុប​ដែល​ត្រូវ​បង់ ដែលមាន​ឱសានវាទ​អនុវត្ត​ត្រឹម​ថ្ងៃទី​៣១ ខែធ្នូ ឆ្នាំ​២០២១ និង​មិន​គ្របដណ្តប់​លើ​យានយន្ត​មាន​ឆ្នាំ​ផលិត​២០២១​ឡើយ​។

 

​លោក​បណ្ឌិត គុណ ញឹម រដ្ឋមន្ត្រី​ប្រតិភូ​អម​នាយករដ្ឋមន្ត្រី អគ្គនាយក នៃ​អគ្គនាយកដ្ឋាន​គយ​និង​រដ្ឋាករ​កម្ពុជា នៅក្នុង​សន្និសីទ​សារ​ព័ត​មាន​តាមរយៈ​ប្រព័ន្ធ​វីដេអូ ហ្សូ​ម កាលពី​រសៀល​ថ្ងៃទី​១០ ខែកញ្ញា ឆ្នាំ​២០២១​នេះ បាន​មានប្រសាសន៍ថា ចាប់ពី​ថ្ងៃទី​១ ខែមករា ឆ្នាំ​២០២២ រហូតដល់​ថ្ងៃទី​៣០ ខែមិថុនា ឆ្នាំ​២០២២ ដែលជា​ថ្ងៃ​ឱសានវាទ​ចុងក្រោយ​នៃ​ការអនុញ្ញាត​ឲ្យ​ចូលខ្លួន​មក​បង់ពន្ធ ម្ចាស់​យានយន្ត ត្រូវបំពេញ​ការ​ព្វ​កិច្ច​ពន្ធ និង​អាករ​ពេញលេញ​ដោយ​គ្មាន​ការអនុគ្រោះ​បន្ធូរបន្ថយ​ពន្ធ​ឡើយ​។ លោក​បាន​បញ្ជាក់ថា អគ្គនាយកដ្ឋាន​គយ​និង​រដ្ឋាករ​កម្ពុជា មាន​កាតព្វកិច្ច​ក្នុង​ការរកចំណូល​ជូន​រដ្ឋ​ដូច​បាន​ជ្រាប​ហើយ​ថា រដ្ឋាភិបាល​បាន​បញ្ចេញ​សាច់ប្រាក់​ច្រើនណាស់​សម្រាប់​ជួយ​ដល់​ប្រជាពលរដ្ឋ​ដែល​ជួប​ការខ្វះខាត ដូចជា​កម្មករ​រោងចក្រ​ជាដើម ដែល​ចំណាយ​ច្រើន ចំណូល​ទាប មិនមែនជា​រឿង​ល្អ​ឡើយ ដូច្នេះហើយ​គយ​ត្រូវខិតខំ​បំពេញភារកិច្ច​ប្រមូល​ពន្ធ​ជូន​រដ្ឋ​។​

ពាក់ព័ន្ធ​ការលើកឡើង​ខាងលើនេះអគ្គនាយកដ្ឋាន​គយ និង​រដ្ឋាករ​កម្ពុជាបានចេញ​សេចក្តីជូនដំណឹង​ដល់​សាធារណជន ជាពិសេស​ម្ចាស់​យានយន្ត​ជ្រក​ក្រោម​ផ្លាកលេខ​ផ្សេងៗ និង​គ្មាន​ពន្ធ និង​អាករ​នាំចូល​ជ្រាបថា នឹង​អនុវត្ត​ការប្រមូល​ពន្ធ និង​អាករ​នាំចូល​លើ​យានយន្ត​គ្មាន​ពន្ធ​ទាំងនោះ​តាម​គោលការណ៍ និង​យន្តការ ដូចជា​៖ ផ្អាក​សកម្មភាព​បង្ក្រាប​យានយន្ត​នៅ​ភូមិសាស្ត្រ​ក្នុងប្រទេស​មួយរយៈ (​លើកលែងតែ​តំបន់​តាម​ព្រំដែន​) ចាប់ពីពេលនេះ​តទៅ ដើម្បី​ទុកពេល​ឲ្យ​ម្ចាស់​យានយន្ត​ជ្រក​ក្រោម​ផ្លាកលេខ​ផ្សេងៗ និង​មិនទាន់មាន​ពន្ធ​និង អាករ​នាំចូល រួសរាន់​មក​បំពេញ​កាតព្វកិច្ច​ព​ន្ធ និង​អាករ​តាមច្បាប់​ជា​ធរមាន​។ ក្នុងនោះ​ចាប់ពី​ថ្ងៃទី​១ ខែមករា ឆ្នាំ​២០២២ រហូតដល់​ថ្ងៃទី​៣០ ខែ មិថុនា ឆ្នាំ ២០២២ ដែលជា​ថ្ងៃ​ឱសានវាទ​ចុងក្រោយ​នៃ​ការអនុញ្ញាត​ឲ្យ​ចូលខ្លួន​មក​បង់ពន្ធ ម្ចាស់​យានយន្ត ត្រូវបំពេញ​ការ​ព្វ​កិច្ច​ពន្ធ និង​អាករ​ពេញលេញ​ដោយ​គ្មាន​ការអនុគ្រោះ​បន្ធូរបន្ថយ​ពន្ធ​ឡើយ​។ ដោយឡែក ចាប់ពី​ថ្ងៃទី​១ ខែកក្កដា ឆ្នាំ​២០២២​តទៅ យានយន្ត​គ្មាន​ពន្ធ​ដែល​បង្ក្រាបបាន នឹង​តម្រូវ​ឲ្យ​បង់ពន្ធ និង​អាករ​រួមទាំង​ប្រាក់​ពិន័យ​តាម​លិខិតបទដ្ឋាន​ជា​ធរមាន​៕​srn

(រូបថត ឯកសារ)