​ដោយ​៖ ម៉េង​ឆៃ / ភ្នំពេញ​៖ ក្នុង​សប្តាហ៍​នេះ មាន​ហេតុការណ៍​ជាច្រើន​បានកើត​ឡើង ហើយ​ក្នុងនោះ បញ្ហា​កូ​វីដ​១៩ នៅតែ​បន្ត​កើតឡើង ខណៈដែល​សាលារៀន​មួយចំនួន បាន​បើកទ្វារ​ឡើងវិញ នៅ​ខេត្តមណ្ឌលគិរី ហើយ​នៅ​រាជធានី​ភ្នំពេញ និង​ខេត្ត​មួយចំនួនទៀត សាលារៀន​នឹង​បើក​ដំណើរការ​ឡើងវិញ នៅ​សប្តាហ៍​ក្រោយ​។​

១-​ខុទ្ទកាល័យ​ប្រកាសថា សម្ដេច​ក្រឡាហោម ស ខេង មកពី​ដល់​កម្ពុជា​វិញ​ហើយ ក្រោយ​វះកាត់​ជោគជ័យ​នៅ​បារាំង

​កាលពី​ថ្ងៃ​ចន្ទ ទី​៦ ខែកញ្ញា ។ ខុទ្ទកាល័យ​សម្តេច​ក្រឡា​ហោម ស ខេង បានប្រកាសថា សម្តេច បាន​អញ្ជើញ​មកដល់​កម្ពុជា​វិញ​ហើយ កាលពី​ព្រឹក​ថ្ងៃទី​៦ ខែកញ្ញា បន្ទាប់ពី​សម្តេច បាន​អញ្ជើញ​ទៅពិនិត្យ​សុខភាព និង​ទទួល​ការវះកាត់​ដោយ​ជោគជ័យ​ពី​ក្រុមគ្រូពេទ្យ​បារាំង​។​

២-ក្រសួងសុខាភិបាល ប្រកាស​ពី​ការរកឃើញ​អ្នក​ឆ្លង​កូ​វីដ​១៩ បំប្លែង​ថ្មី ដែល​តា ចំនួន ១.៣២៨​នាក់​ទៀត

​ក្នុង​សប្តាហ៍​នេះ ក្រសួងសុខាភិបាល បានប្រកាស​ពី​ការរកឃើញ អ្នក​ឆ្លង​កូ​វីដ​១៩ ប្រភេទ​បំប្លែង​ថ្មី ដែល​តា ជា​បន្តបន្ទាប់ គិតពី​ថ្ងៃទី​៣ ដល់​ថ្ងៃទី​៩ ខែកញ្ញា មាន​ចំនួន ១៣២៨​នាក់​។ ក្នុងនោះ គិត​ចាប់ពី​ថ្ងៃទី​៣១ ខែមីនា រហូតដល់​ថ្ងៃទី​៩ ខែកញ្ញា ឆ្នាំ​២០២១ កូ​វីដ​១៩ បំប្លែង​ថ្មី ដែល​តា មាន​អ្នក​ឆ្លង​សរុប​ចំនួន ៣.៧៣១​នាក់ នៅ ២៤​ខេត្ត​រាជធានី គឺ​លើកលែងតែ​ខេត្ត​កែប​មួយ​ប៉ុណ្ណោះ​។ ក្នុងចំណោម ២៤​ខេត្ត​រាជធានី ដែល​ឆ្លង ដែល​តា គឺ​នៅ​ភ្នំពេញ មាន​អ្នក​ឆ្លង​ច្រើនជាងគេ រហូតដល់ ១.២៥៦​នាក់​។​

៣-ក្រសួង​ធម្មការ អនុញ្ញាត​ឲ្យ​ប្រារព្ធ​ពិធីបុណ្យ​កាន់បិណ្ឌ​-​ភ្ជុំបិណ្ឌ និង​បុណ្យ​កឋិនទាន​

​កាលពី​ថ្ងៃទី​៦ ខែកញ្ញា ក្រសួង​ធម្មការ និង​សាសនា បានប្រកាស​អនុញ្ញាត​ឲ្យ​ប្រារព្ធ​ពិធីបុណ្យ​កាន់បិណ្ឌ និង​ភ្ជុំបិណ្ឌ រួមទាំង​ពិធីបុណ្យ​កឋិនទាន នៅ​ឆ្នាំនេះ ទោះបីជា​កូ​វីដ​១៩ មិនទាន់​ស្ងប់ស្ងាត់​ក៏ដោយ​។ ជាមួយគ្នា​នោះ ក្រសួង​ធម្មការ និង​សាសនា បានចេញ​សេចក្តីណែនាំ​មួយចំនួន ដើម្បី​ទប់ស្កាត់​ការឆ្លង​រាលដាល​ជំងឺ​កូ​វីដ​១៩ ក្នុងពេល​ប្រារព្ធ​ពិធីបុណ្យ​កាន់បិណ្ឌ និង​ភ្ជុំបិណ្ឌ នា​ចុងខែ​កញ្ញា​នេះ រួមទាំង​ពិធីបុណ្យ​កឋិនទាន នា​ខែតុលា​ខាងមុខ​។​

៤-អាជ្ញាធរ ប្តូរ​ពេលវេលា​បើកបរ​រថយន្ត​ដឹក​ខ្សាច់​ពី​ពេល​ថ្ងៃ ទៅ​ពេលយប់

​រថយន្ត​ដឹក​ខ្សាច់​ធំៗ ដែល​តែងតែ​បើកបរ​លើផ្លូវ​ជាតិ​លេខ​២ នៅពេល​ថ្ងៃ នាំឱ្យមាន​ដី​ហុយ និង​ផលប៉ះពាល់​ផ្សេងៗ​ទៀត ដល់​ពលរដ្ឋ ក្នុងភូមិ​សាស្ត្រ​ខណ្ឌមានជ័យ គឺ​កាលពី​ថ្ងៃ​ចន្ទ ដើម​សប្តាហ៍​នេះ បាន​ប្តូរ​ទៅ​ដឹក​ពេលយប់​វិញ​ហើយ ក្រោយ​មានការ​ណែនាំ​ពី​អាជ្ញាធរ​។ ប្រជាពលរដ្ឋ បាន​បញ្ជាក់ថា ក្រោយ​ប្តូរ​ពេលវេលា​ដឹកជញ្ជូន និង​បោស​លាង​សម្អាត​ផ្លូវ​ត្រឹមត្រូវ​នោះ ដី​ហុយ និង​ផលប៉ះពាល់​ផ្សេងៗ​ទៀត ត្រូវបាន​កាត់បន្ថយ​។​

៥-​សហជីព កំណត់​យក​តួលេខ ២១៤.២​ដុល្លារ សម្រាប់​ចរចា​ដំឡើង​ប្រាក់ខែ​គោល​កម្មករ នៅ​ឆ្នាំ​២០២២

​ក្រុមប្រឹក្សា​ជាតិ​ប្រាក់​ឈ្នួល​អប្បបរមា អាណត្តិ​ទី​២ លើក​ទី​១ បាន​បើក​កិច្ចប្រជុំ លើក​ទី​១ ដើម្បី​ពិភាក្សា​កំណត់​ប្រាក់​ឈ្នួល​អប្បបរមា​របស់​កម្ម​ករ សម្រាប់​ឆ្នាំ​២០២២​។ ក្នុងនោះ ភាគី​សហជីព បានកំណត់​យក​តួលេខ​រួម ២១៤.២​ដុល្លារ សម្រាប់​ចរចា​ដំឡើង​ឲ្យ​កម្មករ​។ ប៉ុន្តែ​កិច្ចប្រជុំ​មិនទាន់​សម្រេច​យ៉ាងណា​នោះទេ ដោយ​ត្រូវ​បើក​កិច្ចប្រជុំ ៣​លើក​ទៀត មុននឹង​កំណត់​យក​តួលេខ​ជា​ផ្លូវការ នៅ​ចុងខែ​កញ្ញា​នេះ​។​

៦-​សម្តេច​តេ​ជោ ហ៊ុន សែន ប្រកាសថា ពលរដ្ឋ​កម្ពុជា​គ្រប់រូប ត្រូវ​ទទួលបាន​ឱកាស​សិក្សា​ពេញ​មួយជីវិត

​នៅក្នុង​ឱកាស​នៃ​ការ​ប្រារព្ធ​ទិវា​អក្ខរកម្ម​ជាតិ ថ្ងៃ​៨​កញ្ញា សម្តេច​តេ​ជោ ហ៊ុន សែន បាន​ផ្ញើ​សារ​ជូន​ជនរួមជាតិ ដោយ​ជំរុញ​អោយ​ពលរដ្ឋ​កម្ពុជា​គ្រប់រូប ត្រូវ​ទទួលបាន​ឱកាស​សិក្សា​ពេញ​មួយជីវិត ដើម្បី​រួមចំណែក​ស្តារឡើងវិញ​នូវ​សង្គម​សេដ្ឋកិច្ច ក្រោយ​វិបត្តិ​កូ​វីដ​១៩​។ ទិវា​អក្ខរកម្ម​ជាតិ ថ្ងៃ​៨​កញ្ញា ត្រូវបាន​ប្រារព្ធ​ឡើង ក្រោម​ប្រធានបទ «​អក្ខរកម្ម​ជា​មូលដ្ឋានគ្រឹះ​នៃ​ការសិក្សា​ពេញ​មួយជីវិត​»​។

៧-សម្តេច​តេ​ជោ ហ៊ុន សែន ដឹកនាំ​កិច្ចប្រជុំ​កំពូល​មហា​អនុតំបន់​មេគង្គ (GMS) លើក​ទី​៧

​កាលពី​ព្រឹក​ថ្ងៃ​ព្រហស្បតិ៍ ទី​៩ ខែកញ្ញា សម្តេច​តេ​ជោ នាយករដ្ឋមន្ត្រី ហ៊ុន សែន បាន​អញ្ជើញ​ដឹកនាំ​កិច្ចប្រជុំ​កំពូល​មហា​អនុតំបន់​មេគង្គ (GMS) លើក​ទី​៧ ក្រោម​មូលបទ​៖ «​មហា​អនុតំបន់​មេគង្គ​៖ ពង្រឹង​ភាពខ្លាំង ដើម្បី​ទប់ទល់​នឹង​បញ្ហា​ប្រឈម​នៃ​ទសវត្សរ៍​ថ្មី​»​។ កិច្ចប្រជុំ​តាម​ប្រព័ន្ធ​វិ​ដេ​អូ​នេះ ក៏មាន​ការចូលរួម​ពី​លោក លី ខឺ​ឈាំ​ង (Li Keqiang) នាយករដ្ឋមន្ត្រី​ចិន និង​ថ្នាក់ដឹកនាំ​ប្រទេស​ក្នុង​តំបន់​អាស៊ាន​ជាច្រើន​ទៀតផង​ដែរ​។​

៨-ផ្លាស់ប្តូរ​ឯកអគ្គរាជទូត​កម្ពុជា ប្រចាំ​ប្រទេស​កូរ៉េខាងត្បូង​

​ប្រមុខ​ការទូត​កូរ៉េខាងត្បូង បានបញ្ជាក់​ជូន​ប្រមុខ​ការទូត​កម្ពុជា​ថា រដ្ឋាភិបាល​កូរ៉េខាងត្បូង នឹង​បង្កើន​ចំនួន​ពលករ និង​អាហារូបករណ៍ ដល់​រាជរដ្ឋាភិបាល​កម្ពុជា​។ ប្រមុខ​ការទូត​កម្ពុជា លោក ប្រាក់ សុខុន បានបញ្ចប់​ទស្សនកិច្ច ៣​ថ្ងៃ នៅ​ប្រទេស​កូរ៉េខាងត្បូង នៅក្នុង​សប្តាហ៍​នេះ ខណៈដែល​មានការ​ដោះដូ​រ​ឯកអគ្គរាជទូត​ក​ម្ពុ​ជា ប្រចាំ​ប្រទេស​កូរ៉េខាងត្បូង ដោយ​ស្ងាត់ស្ងៀម​។ នោះ​គឺ​លោកស្រី ជ្រឹង បុ​ទុមរ​ង្សី រដ្ឋលេខាធិការ​ក្រសួងការបរទេស ត្រូវបានតែងតាំង​ជា​ឯកអគ្គរាជទូត​កម្ពុជា ប្រចាំ​កូរ៉េខាងត្បូង ជំនួស​លោក ឡុង ឌី​ម៉​ង់ ដែល​បាន​កាន់តំណែង​នេះ ជាង ៥​ឆ្នាំ​មកហើយ ចាប់តាំងពី​ខែមេសា ឆ្នាំ​២០១៦​។​

៩-​កម្ពុជា ជំ​រុញអោយ​អាស៊ាន សហការ​ជាមួយ​ចិន ប្រឆាំង​កូ​វីដ​-១៩ និង​ស្ដារ​សេដ្ឋកិច្ច​

​នៅក្នុង​ពិធី​បើក​ពិព័រណ៍​ចិន​-​អាស៊ាន លើក​ទី​១៨ ឆ្នាំ​២០២១ ធ្វើឡើង​តាម​ប្រព័ន្ធ​វីដេអូ កាលពី​ព្រឹក​ថ្ងៃទី​១០ ខែកញ្ញា សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​ជំរុញ​អោយ​បណ្តា​ប្រទេស​សមាជិក​អាស៊ាន​ទាំងអស់ សហការ​ជាមួយ​ប្រទេស​ចិន រួមគ្នា​ប្រឆាំង​កូ​វីដ​-១៩ និង​ស្ដារ​សេដ្ឋកិច្ច ក្រោម​យន្តការ​ពហុភាគី​និយម​។ សម្តេច​តេ​ជោ ជឿជាក់ថា ជោគជ័យ​នៃ​ការប្រយុទ្ធ​ប្រឆាំងនឹង​ជំងឺឆ្លង​កូ​វីត​១៩ ទាមទារ​នូវ​សាមគ្គីភាព ការជឿទុកចិត្ត ការគិតគូរ និង​អនុវត្ត​រួមគ្នា ប្រកបដោយ​ភាព​ហ្មត់ចត់ និង​ក្រោម​យន្តការ​ពហុភាគី​និយម និង​គោរព​ច្បាប់​អន្តរជាតិ និង​អធិបតេយ្យភាព​របស់​ប្រទេស​និ​មួយៗ​។​

១០-​អភិបាល​រាជធានី​ភ្នំពេញ តម្រូវអោយ​គ្រូ និង​បុគ្គលិក​សិក្សា ធ្វើតេស្ត រក​កូ​វីដ​១៩ មុនពេល​បើក​សាលារៀន​ឡើងវិញ នៅ​សប្តាហ៍​ក្រោយ​

​អាជ្ញាធរ​រាជធានី​ភ្នំពេញ គ្រោង​បើក​សាលារៀន​ឡើងវិញ នៅ​ថ្ងៃទី​១៥ ខែកញ្ញា ខាងមុខ បន្ទាប់ពី​បិទ​ផ្អាក​អស់​ជាច្រើន​ខែ ដោយសារ​ការរីក​រាល​ដាល​នៃ​ជំងឺ​កូ​វីដ​១៩​។ ទន្ទឹមគ្នា​នឹង​ការបើក​សាលារៀន​ឡើងវិញ​នេះ អភិបាល​រាជធានី​ភ្នំពេញ តម្រូវអោយ​គ្រូ និង​បុគ្គលិក​អប់រំ ត្រូវធ្វើ​តេស្ត​រហ័ស រក​មេរោគ​កូ​វីដ​១៩ មុនពេល​បើក​ដំណើរការ​សាលារៀន​នីមួយៗ​ឡើងវិញ ហើយ​ត្រូវ​បន្តធ្វើ​តេស្ត​រហ័ស​ជាប្រចាំ ក្នុង​រយៈពេល​សមស្រប​។​
​កាលពី​ថ្ងៃទី​៦​កញ្ញា សាលារៀន​មួយចំនួន នៅ​ថ្នាក់​ទី​៩ និង​ថ្នាក់​ទី​១២ បាន​បើក​ដំណើរការ​ឡើងវិញ ខណៈដែល​នៅ​ខេត្ត​ព្រះសីហនុ ក៏បាន​ជ្រើសរើស​សាលារៀន ចំនួន ៥​កន្លែង ដើម្បី​បើក​ដំណើរការ​ឡើងវិញ នៅ​ថ្ងៃទី​១៣​កញ្ញា​។ សាលារៀន នៅ​ខេត្តកណ្តាល ចាប់ពី​ថ្នាក់បឋមសិក្សា ដល់​ថ្នាក់​វិទ្យាល័យ ស្ទើរតែ​ទាំងអស់ នឹងត្រូវ​បើកទ្វារ​ឡើងវិញ នៅ​ថ្ងៃទី​១៥ ខែកញ្ញា​។​

១១-​ប្រមុខ​ការទូត​ចិន លោក វ៉ាង យី មក​ទស្សនកិច្ច​នៅ​កម្ពុជា ថ្ងៃទី​១២-១៣​កញ្ញា​

​ក្រសួងការបរទេស បានប្រកាស​នៅ​ព្រឹក​ថ្ងៃទី​១១ ខែកញ្ញា​ថា លោក វ៉ាង យី ទីប្រឹក្សា​រដ្ឋ និង​ជា​រដ្ឋមន្ត្រីការបរទេស​ចិន នឹង​អញ្ជើញ​មក​បំពេញ​ទស្សនកិច្ច​ផ្លូវការ​នៅ​កម្ពុជា នៅ​ថ្ងៃទី​១២-១៣ ខែកញ្ញា ឆ្នាំ​២០២១​។ ក្នុងអំឡុងពេល​ទស្សន​កិច្ច​នេះ លោក វ៉ាង យី នឹង​អញ្ជើញ​ចូលជួប​សម្តែង​ការគួរសម​ចំពោះ​សម្តេច​តេ​ជោ ហ៊ុន សែន នាយករដ្ឋមន្ត្រី និង​មាន​អាហារ​ការងារ​ពេលព្រឹក ជាមួយ​ឯកឧត្តម​ឧបនាយករដ្ឋមន្ត្រី ហោ ណាំហុង​។
​លោក​ប្រមុខ​ការទូត​ចិន ក៏​នឹង​អញ្ជើញ​ជួប​ទ្វេភាគី​ជាមួយ​លោក​ឧបនាយករដ្ឋមន្ត្រី ប្រាក់ សុខុន ដើម្បី​ពិភាក្សា​លើ​ទិដ្ឋភាព​ផ្សេងៗ នៃ​កិច្ចសហប្រតិបត្តិការ​ទ្វេភាគី រួមមាន ការប្រយុទ្ធ​ប្រឆាំងនឹង​ជំងឺ​កូ​វីដ​-១៩ ពាណិជ្ជកម្ម និង​ការវិនិយោគ ការអប់រំ សន្តិសុខ​និង​ការពារជាតិ ព្រមទាំង​បញ្ហា​តំបន់ និង​អន្តរជាតិ​ដែលជា​ប្រយោជន៍ និង​កង្វល់​រួម ផងដែរ​។

​ក្រសួងការបរទេស ក៏បាន​ប្រកាសថា សម្តេច​តេ​ជោ ហ៊ុន សែន និង​លោក វ៉ាង យី នឹង​អញ្ជើញ​ធ្វើជា​អធិបតី​ក្នុង​ពិធី​ប្រគល់​-​ទទួល​ជា​ផ្លូវការ​នូវ​ពហុ​កីឡដ្ឋាន​ជាតិ​មរតក​តេ​ជោ ដែល​នឹង​ក្លាយជា​ទីតាំង​សំខាន់ សម្រាប់​រៀបចំ​ការប្រកួត​កីឡា​អាស៊ីអាគ្នេយ៍ នៅ​ឆ្នាំ​២០២៣ ដែល​កម្ពុជា​នឹងត្រូវ​ធ្វើជា​ម្ចាស់ផ្ទះ​។

​សម្តេច​តេ​ជោ​នាយករដ្ឋមន្ត្រី ហ៊ុន សែន និង​លោក វ៉ាង យី ក៏​នឹង​អញ្ជើញ​ធ្វើជា​សាក្សី និង​អធិបតី ក្នុង​ពិធី​ចុះហត្ថលេខា​លើ​ឯកសារ​ទ្វេភាគី​ដ៏​សំខាន់​មួយចំនួន​ផងដែរ​៕​srn