ដោយ: ប​.​ជ័យ / បន្ទាយមានជ័យ: ភាគី​លោក​លី អ៊ុត​នី ថា​នឹង​សម្បទាន​៤០​ហិក​តា ខណៈ​មន្ត្រី​ថ្នាក់ជាតិ​និង​ថ្នាក់​ខេត្ត​ថា ដំណោះស្រាយ​ទំនាស់​ដីធ្លី​រវាង​លោក​និង​អ្នកយក​ឈ្មោះ​អតីត​យោធិន​ខ្មែរក្រហម​នឹង​បញ្ចប់​ក្នុង​ខែកញ្ញា​ឆ្នាំ​២០២១ មិន​ទុក​ឱ្យនៅ​រ៉ាំរ៉ៃ​ទៀត​ទេ ។​

នេះ​បើតាម​មន្ត្រី​ប្រាប់​កាសែត​រស្មី​កម្ពុជា​កាលពី​ថ្ងៃទី​១១​ខែកញ្ញា​ឆ្នាំ​២០២១ បន្ទាប់ពី​កិច្ចប្រជុំ​មួយលើក​ទៀត​សម្របសម្រួល​រក​ដំណោះស្រាយ​ទំនាស់​ដីធ្លី​រវាង លោក​លី អ៊ុត​នី និង​លោក​គង់ ជា តំណាង​អ្នកយក​ឈ្មោះ​អតីត​ទាហាន​ខ្មែរក្រហម និង​លើក​នេះ​ថែម​លោក​ឧកញ៉ា​តាំង សុខ​ឃី លោក​តាំង សុ​វណ្ណា​រ៉េត នៃ​ទីតាំង​ដី​ស្ថិតនៅ​ចំនុច​បឹង​៧៥ ភូមិ​អូរ​អំពិល​ឃុំ​ទួល​ពង្រ ស្រុក​ម៉ាឡៃ​ខេត្តបន្ទាយមានជ័យ ។​

​កិច្ចប្រជុំ​នោះ ដឹកនាំ​ដោយលោក ​ប៉ាន់​ខែម ប៊ុនថន នាយករង​ខុ​ទ្ទ​ការ​ល័យ​សម្ដេច​តេ​ជោ ហ៊ុន សែន នាយករដ្ឋមន្ត្រី ទទួល​ចុះ​ដោះស្រាយ​ទំនាស់​ដីធ្លី​នៅ​ចំណុច​បឹង​ជង្រុក និង​ចំណុច​៦៧១ ឃុំ ទួល​ពង្រ​ស្រុក​ម៉ាឡៃ​និង​ចូលរួម​ដោយ​លោក លី សារី អភិបាលរង​ខេត្តបន្ទាយមានជ័យ នាយក នាយករង​ទីចាត់ការ​អន្តរ​វិស័យ ប្រធាន​មន្ទីរ​រៀបចំ​ដែនដី ប្រធាន​មន្ទីរ​កសិកម្ម មន្ត្រី​និង​ភាគី​ទំនាស់​ពាក់ព័ន្ធ នៅ​សាលប្រជុំ​សាលាខេត្ត​បន្ទាយមានជ័យ ។​

​លោក ​ប៉ាន​ខែម ប៊ុនថន បាន​រំលឹកថា ដំណោះស្រាយ​ទំនាស់​ដីធ្លី​នេះ​គឺ​រក្សា​ការសម្រេច​រួចហើយ​រប​ស់ស​ម្តេច​តេ​ជោ​នៃ​រាជរដ្ឋាភិបាល​លើ​ដំណោះស្រាយ​ទំនាស់​ដីធ្លី​ដ៏​រ៉ាំរ៉ៃ​រវាង​ក្រុមហ៊ុន​លោក​លី អ៊ុត​នី​និង​អតីត​យោធិន​ខ្មែរក្រហម​វរៈ​សេនា​តូច​លេខ​៦៧២​និង​លេខ​៦៧៣ កងពលធំ​លេខ​២១ នៅ​ចំណុច​បឹង​៧៥​ភូមិ​អូរ​អំពិល​និង​ចំណុច​បឹង​ក្របៅ​ភូមិ​សន្តិភាព​ឃុំ​ទួល​ពង្រ​ស្រុក​ម៉ាឡៃ​ខេត្ត បន្ទាយមានជ័យ ​និង​ថែម​បទពិសោធន៍​ថ្មី​ដែល​ត្រូវយក​គំរូ​នៃ​ដំណោះស្រាយ​ទំនាស់​ដីធ្លី​រ៉ាំរ៉ៃ​នៅ​ចំណុច​បឹង​ជង្រុក -៦៧១ នៃ​តំបន់​អតីត​ខ្មែរក្រហម​នៅ​ឃំ​ុ​ទួល​ពង្រ ជិត​ខាង​នោះ​ផង ។​

​ក្នុងនោះ​ត្រូវ​ដោះស្រាយ​ដាច់​ដោយ​ដុំ​ព្រោះ ។ភាគី​ទំនាស់​ខាង​លោក​លី អ៊ុត​នី មានតែ​ម្នាក់​។​ឯ​ភាគី​ខាង​ទៀត​មាន​ច្រើន​ក្រុម​និង​ច្រើន​នាក់ ។​
​ក្នុងនោះ មាន​ដំណោះស្រាយ​ទី​១ រវាង​ភាគី​លោក​លី អ៊ុត​នី និង​ពលរដ្ឋ​ម្នាក់ៗ​នៃ​ភាគី​លោក​គង់ ជា ដែល​បាន​ចាប់ដី​យកទៅ​បែងចែក​និង​គ្រប់​គ្រង់​។​

​ករណីនេះ ទោះ​លើក​នេះ​អវត្តមាន​លោក​គង់​ជា ត្បិត​លោក​កំពុងមាន​ជំងឺធ្ងន់ ប៉ុន្តែ​លោកនាយ​ករង​ខុទ្ទកាល័យ​មាន​បញ្ជាក់ថា ថ្នាក់ក្រោម​ឬ​ក្រុមមនុស្ស​ដែល​បានរៀបចំ​គ្នា​ជា​រចនាសម្ព័ន្ធ​និង​មាន​តំបន់​គ្រប់គ្រង​(​ដែល​អាជ្ញា​ធរមាន​សមត្ថកិច្ច​មិន​ទទួលស្គាល់​គឺជា​រូប​ភាគ​អប្ប​គម​ន័​នោះ​)​ត្រូវតែ​ទទួលយក​ខ្លឺ​ម​សារ​នៃ​ស្មារតី​អង្គប្រជុំ​ដំណោះស្រាយ ។​
​ពំ​ុ​នោះទេ អាជ្ញា​ធរមាន​សមត្ថកិច្ច​នឹង​ចាត់វិធានការ​រដ្ឋបាល​និង​ផ្លូវច្បាប់ ហើយ​មុខសញ្ញា​ត្រូវបាន​កំណត់​រួច​អស់ហើយ​​ហើយនឹង​មិនឱ្យ រួចខ្លួន​ទេ​ព្រោះ​ក្រុមការងារ​នឹង​យក​បទពិសោធន៍​នៃ​ដំណោះស្រាយ​ទំនាស់​ដីធ្លី​ចំណុច​បឹង​ជង្រុក ៦៧១ ជា​គំរូ (​ក្នុងនោះ​មាន​មាន​ចាប់ខ្លួន​អ្នក​ញុះញង់​នៅ​ពី​ក្រោយខ្នង រារាំង​ដំណើរការ​ដោះស្រាយ​) ។​

​លោកមា​ច សំបូរ ទីប្រឹក្សា​ក្រុមហ៊ុន​លី អ៊ុត​នី បានឱ្យដឹងថា​ ដី​នោះ​ត្រូវបាន​លោក​លី អ៊ុត​នី បាន​ទិញ​ពី​អតីត​យោធិន និង​គ្រួសារ​។​គឺជា​ដី​របប​គោលនយោបាយ​របស់​រាជ​រដ្ឋាភិបាល​ដែល​បាន​ផ្តល់អោយ​ពួកគាត់​សម្រាប់​បង្កបង្កើនផល​ដែលមាន​ទំហំ​៥​ហិក​តាក្នុងមួយ​គ្រួសារ​។​ពោលគឺ​បាន​ទិញ​ជា​បន្តបន្ទាប់​តាំងពី​ឆ្នាំ​១៩៩៨ មក ហើយ​មាន​ឯកសារ​បញ្ជាក់​និង​ទទួលស្គាល់​ពី​ភាគី​អាជ្ញា​ធរមាន​សមត្ថកិច្ច​និង​សា​មី​ខ្លួន​យោធិន​ពាក់ព័ន្ធ​ផងដែរ ។​ដី​នោះ​មាន​ទំហំ​សរុប​២២៨​ហិកតា ស្ថិតនៅ​ចំណុច​បឹង​៧៥​ភូមិ​អូរ​អំពិល​និង​ចំណុច​បឹង​ក្របៅ​ភូមិ​សន្តិភាព​ឃុំ​ទួល​ពង្រ​ស្រុក​ម៉ាឡៃ ។​
​ប៉ុន្តែ​បច្ចុប្បន្ន​ដី​នោះ​ក្រុមហ៊ុន​គ្រប់គ្រង​បានតែ​ចំនួន​១៤០​ហិក​តា​ប៉ុណ្ណោះ ។ ក្រៅពីនោះ​ត្រូវ​បាត់បង់​ទៅខាង​ភាគី​លោក​ព្រាប សារុន ,​លោក​គង់ ជា និង​បក្ខពួក​បាន​រំលោភ​យក ។​

​លុះ​ក្រោយ​ចេញ​ស ជ ណ ក្រុមហ៊ុន​បាន​ទិញ​បន្ថែម​បាន​ដី​ទំហំ​៧៧​ហិក​តា​ទៀត​ពី​ក្នុង​ដី​របប​ទទួលបាន​រប​ស់​អតីត​យោធិន​ចំនួន​១០១​ហិក​តា ដែល​បានចែង​ក្នុង​ស្មារតី​នៃ​ខ្លឹមសារ​សជណ លេខ ១៥៥៣​ចុះ ថ្ងៃទី​២៤​ខែធ្នូ ឆ្នាំ ២០១២ របស់​ទីស្តីការគណៈរដ្ឋមន្ត្រី ។ ដី​បន្ថែម​នោះ​ស្ថិតនៅ​ចំណុច​បឹង​៧៥ ,​ចំណុច​អុង​ម៉ុង​ក្នុងភូមិ​អូរ​អំពិល​ឃុំ​ទួល​ពង្រ​ដែរ ។ ប៉ុន្តែ​ដី​នោះ ក៏​ត្រូវគេ​រំលោភ​យក​ដូចគ្នា​អស់​ទៀត ។​

​លោកមា​ច សំបូរ បាន​បន្តថា ប៉ុន្តែ​ដើម្បីអោយ​ដំណោះស្រាយ​អាច​ធ្លុះធ្លាយ​បាន ភាគី​លោក​នឹងធ្វើ​សម្បទាន​ដី​ទំហំ​៤០​ហិច​តា​ទៅ​ភាគី​ម្ខាង ។​

​ចំណែក​លោក​ឧកញ៉ា​តាំង សុខ​ឃី រស់នៅ​រា​ធានី​ភ្នំពេញ ដែល​ទើប​លេចមុខ​ក្នុង​កិច្ច​ដំណោះស្រាយ​លើក​នេះ បានឱ្យដឹងថា លោក​បាន​ទិញ​ដី​ទំហំ​៣០​ហិក​តា​ពី​ឈ្មោះ​ហាក់ ហុង នៅជាប់​គ្នា​នឹង​ដី​លោក​លី អ៊ុត​នី​។ ម្ចាស់​ដី​ហាក់​ហុង បាន​ទិញ​ដី​នោះ​ពី​អតីត​យោធិន​ខ្មែរក្រហម​ទីទៃ​ពីគ្នា តែ​ដី​របប​គោលនយោបាយ​ជាប់ៗ​គ្នា ។​​ការទិញ លក់​នោះ មាន​ឯកសារ​ពិ​អាជ្ញាធរ​ភូមិ ឃុំ សាក្សី​ត្រឹមត្រូវ​ស្របច្បាប់ រួមទាំង​លោក​លី អ៊ុត​នី ធ្លាប់​ទទួលស្គាល់​ផង ។ ប៉ុន្តែ​ពេល​លោក​ចុះ​វាស់វែង​កំណត់​ទីតាំង​និង​ធ្វើ​ចរន្ត​ឯកសារ មន្ត្រី​ជំនាញ​សុរិយោដី មិន​ព្រម​បំពេញបែបបទ​ជូន​ឡើយ ។​

​លោក​សៀន វុទ្ធី ប្រធានការិយាល័យ​ភូមិបាល​ស្រុក​ម៉ាឡៃ​បានអោយដឹងថា​៖ ដី​ដែល​លោក​ឧកញ៉ា​តាំង សុខ​ឃី ចង្អុល​ទីតាំង​និង​ធ្វើ​គំនូស​ផែនទី​បង្ហាញ គឺ​ឃើញ​ស្ថិតក្នុង​ដី​របស់​ក្រុមហ៊ុន​លី អ៊ុត​នី ដែល​មានចែង​ក្នុង​ស ជណ (​សជណ លេខ ១៥៥៣​ចុះ ថ្ងៃទី​២៤​ខែធ្នូ ឆ្នាំ ២០១២ របស់​ទីស្តីការគណៈរដ្ឋមន្ត្រី​) ។ ហេតុនេះ​ជំនាញ​មិនអាច​ចេញ​ការ​បញ្ជាក់ជូន​លោក​ឧកញ៉ា​បានទេ ។​

​ករណីនេះ ប្រធាន​អង្គប្រជុំ​បាន​តម្រូវឱ្យ​លោក​ឧកញ៉ា​តាំង សុខ​ឃី រក​ឈ្មោះ​ហាក់ ហុង និង​អ្នក​ម្ចាស់​ដី​មុន​ដែល​លក់​ដី​អោយ​ដើម្បី​មក​បំភ្លឺ ។​

​សូម​រំលឹកថា អ្នក​តាំង​ទីលំនៅ​និង​កាន់កាប់​ដី​មិន​រៀបរយ នៃ​ភាគី​លោក​គង់​ជា មាន​ជាង​១.៣០០​គ្រួសារ​លើដី​ទំនាស់ ។​ពួកគេ​មិនមែនជា​យោធិន​ខ្មែរក្រហម​ទេ ។​ក្នុងនោះ សូម្បី​ក្រុមការងារ​រចនាសម្ព័ន្ធ​ភូមិ​ដែល​បង្កើតឡើង​ដោយ​លោក​គង់ ជា ក៏​មិនមែនជា​អតីត​ខ្មែរក្រហម​ដែរ ។​

​គួរ​បញ្ជា​ក់ថា តាម​ស្មារតី​នៃ​ខ្លឹមសារ​សេចក្តីជូនដំណឹង សជណ លេខ ១៥៥៣ ចុះ ថ្ងៃទី ២៤ ខែធ្នូ ឆ្នាំ ២០១២ របស់​ទីស្តីការគណៈរដ្ឋមន្ត្រី​ដែលជា​សេចក្តីសម្រេច​ចុងក្រោយ​និង​បាន អនុវត្ត​រួចហើយ នៅ​ទីនោះ មានដូចជា :

​ទី ១- ដី​ទំនាស់​ចំណុច​បឹង​៧៥ ភូមិ អូរ​អំពិល ឃុំ ទួល​ពង្រ ស្រុក ម៉ាឡៃ ត្រូវ បែងចែក និង​ប្រគល់ ដី​ទំហំ​២២៨ ហិក​តា​ជូន លោក លី អ៊ុត នី ដែល​បាន​ទិញ​និង​កាន់កាប់​ស្របច្បាប់​តាំងពី​ឆ្នាំ​១៩៩៨ មកជា​កម្មសិទ្ធិ ។
​និង ទី​២- ប្រគល់​ដី​ចំនួន ១០១ ហិកតា​និង ៧៨ អា ៣៣ សង់ ទី អា និង បូក​ចំនួន​៤ ហិក​តា​ទៀត។ សរុប​១០៦ ហិកតា ជូន​អតីត គ្រួសារ​យោធិន​ពិតប្រាកដ​នៃ​អង្គភាព​វរៈ​សេនា​តូច​លេខ​៦៧២ និង ៦៧៣​នៃ​កងពលធំ​ថ្មើ រ​ជើង​លេខ​២១ – ម៉ាឡៃ មាន​ចំនួន ១០៦ គ្រួសារ ជាដើម​។​

​ចំពោះ​ការដែល​មន្ត្រី​បាន​ចុះ​ស្រង់​ចំនួន ដី​ឡូ​ត៍ (​ព័ត៌មាន​បឋម​បណ្តោះអាសន្ន​)​កន្លងមក ដែល​បាន​បែងចែក​ដោយ ក្រុម​លោក​គង់ ជា ចែកចេញជា ៦ ប្លុក ៖ គឺ​តាម​ការ​រាយ​កាណ៍ របស់​ក្រុមការងារ​លោក​គង់ ជា ដី​ឡូ​តិ៍ ទាំង​៦​ប្លុក មាន​ចំនួន​១.០៧៤​ឡូ​តិ៍​(​ទំហំ​មិន​ស្មើគ្នា​ទេ​) ។​
​ទី​១- ដី​ឡូ​ត៍​មានផ្ទះ អត់​មាន​មនុស្ស​រស់នៅ​(​ឬ​ទុកចោល​) ចំនួន ៤២២​ឡូ​ត៍ ។​​ទី​២- មាន​ដី តែ​អត់​មានផ្ទះ​(​ឬ​អត់​បាន​អាស្រ័យ​ផល​) ចំនួន ១២៨​ឡូ​ត៍ ។​​ទី​៣- មានផ្ទះ និង​មាន​មនុស្ស រស់នៅ ចំនួន​៣០៩​ឡូ​ត៍។​

​សូម​រំលឹក​ដែរ​ថា កាលពី​ថ្ងៃទី​២​ខែកក្កដា មាន​កិច្ចប្រជុំ​ស្រាវជ្រាវ​មួយទៀត​នៅ​បឹង​ជង្រុក​ឃុំ​ទួល​ពង្រ ដែល​ដឹកនាំ​ដោយ​លោក​ប៉ាន​ខែម ប៊ុនថន ដដែល ហើយ​ខ្លឹមសារ​ស្មារតី​អង្គប្រជុំអះអាងថា នឹង​ទម្លាយ​ភាព​ទ័លច្រក​នៃ​ទំនាស់​ដីធ្លី​រវាង​ភាគី​លោក​លី អ៊ុត​នី​និង​ភាគី​ម្ខាង​ទៀត​ឱ្យបាន​លទ្ធផល​នៅត្រឹម​ចុងខែ​កញ្ញា​នេះ ។​

​សូម​បញ្ជាក់ដែរថា ពី​ពេល​ខ្មែរក្រហម​ធ្វើ​សមាហរណកម្ម​នា​ឆ្នាំ​១៩៩៦ មក អតីត​មេបញ្ជាការរង​និង​មេ​វរៈ​៦៧២​និង​៦៧៣ នៃ​កងពលធំ​លេខ​២១ ដែលមាន​សិទ្ធិ​គ្រប់គ្រង​និង​បែងចែក​ដី​នៅ​តំបន់​នោះ​គឺមាន​លោក​ព្រាប សារុន ,​លោក​មុំ គឹម​ហៃ ,​លោក​មិន ណៃ ,​លោក​រស់ ធឿន ជាដើម ។​ឯ​លោក​គង់ ជា មិនមាន​ឈ្មោះ​និង​ក៏​មិនមាន​សិទ្ធិ មិនមាន​ដីធ្លី​អ្វី​ទេ ៕​សរន