ដោយៈ ឫទ្ធិ​សក្តិ /​ភ្នំពេញៈ កម្លាំង​អាវុធហត្ថ​បាន​បើក​ប្រតិបត្តិ​ការបង្ក្រាប​ក្រុម​ជនប្រដាប់អាវុធ​ជា​ជនជាតិ​ចិន និង​បាន​រំដោះ​ចំណាប់ខ្មាំង​ចំនួនមួយ​នាក់ ជា​ជន​ជាតិចិន​ដូចគ្នា និង​បាន​ហូត​កាំភ្លើង​វែង​ខ្លី​ចំនួនប្រាំពីរដើម ។ ការបង្ក្រាប​នេះ បានធ្វើ​ឡើង​កាលពី​យប់​ថ្ងៃទី​១០ ខែកញ្ញា ឆ្នាំ​២០២១ នៅ​ចំណុច​អគារ​មួយកន្លែង​ក្បែរ​កាស៊ីណូ​ជី​ង​កាង ស្ថិតនៅ​ភូមិ​៤ សង្កាត់​លេខ​៤ ក្រុង​-​ខេត្ត​ព្រះសីហនុ ដោយមាន​ការសម្របសម្រួល នីតិ​វិធី​ផ្លូវច្បាប់​ដោយ​លោក សៀង សុខ ព្រះរាជអាជ្ញា​អម​សាលាដំបូង​ខេត្ត​ព្រះសីហនុ។​

មន្ត្រី​កងរាជអាវុធហត្ថ​បាន​បញ្ជាក់ថា ការបង្ក្រាប​នេះ ដឹកនាំ​ដោយ​លោក​ឧ​ត្ត​ម​សេនីយ៍​ត្រី ហេង ប៊ុន​ទី មេបញ្ជាការ​កងរាជអាវុធហត្ថ​ខេត្ត​ព្រះសីហនុ សហការ​ជាមួយ​កម្លាំង​ស្នងការ​នគរបាល​ខេត្ត និង​ដោយមាន​ការសម្របសម្រួល​នីតិវិធី ពី​លោក​សៀង សុខ ព្រះរាជអាជ្ញា​នៃ​អយ្យការ​អម​សាលាដំបូង​ខេត្ត​ព្រះសីហនុ បាន​ចុះបង្ក្រាប​បទល្មើស ចាប់​ឃុំឃាំង និង​បង្ខាំង​ដោយ​ខុសច្បាប់ និង​បទ​កាន់កាប់ ប្រើប្រាស់​អាវុធ​គ្មាន​ការ​អនុ​ញ្ញា​ត​។

មន្ត្រី​ដដែល​បាន​បញ្ជាក់ថា ក្នុង​ប្រតិបត្តិ​ការបង្ក្រាប​នេះ ឃាត់ខ្លួន​ជនជាតិ​ចិន​ចំនួន ១៤​នាក់ ក្នុងនោះ​មាន​ស្រី​មួយ​នាក់ រំដោះ​បាន​ជនរងគ្រោះ​ចំនួន​មួយ​នាក់ ភេទ​ប្រុស ជនជាតិ​ចិន និង​ដកហូត​អាវុធ​វែង​ខ្លី​ចំនួន​ប្រាំពីរ​ដើម រួមមានៈ អាវុធ​វែង​ចំនួនមួយ​ដើម ម៉ាក​AK47 ពណ៌​ខ្មៅ , អាវុធ​វែង​ចំនួនមួយដើម ម៉ាក​M4 ពណ៌​ខ្មៅ , អាវុធខ្លី​ចំនួនពីរដើម ម៉ាក​K54 ពណ៍​ខ្មៅ , អាវុធខ្លី​ចំនួនមួយដើម ម៉ាក​K59 ពណ៍​ខ្មៅ , អាវុធខ្លី​ចំនួនមួយ​ដើម ម៉ាក​CF98 ពណ៌​ខ្មៅ និង​អាវុធខ្លី​ចំនួនមួយដើម ម៉ាក​រ៉ូឡូ ព​ណ៌ស រួមទាំង​គ្រាប់​អាវុធខ្លី​ចម្រុះ​មួយចំនួន , រថយន្ត​ចំនួនមួយ គ្រឿង ម៉ាក​TOYOTA ALPHARD ពណ៌ខ្មៅ ពាក់​ស្លាក​លេខ ភ្នំពេញ 2P-0199 ។​

សេចក្តីរាយការណ៍​បាន​ឲ្យ​ដឹងថា ចំពោះ​ករណីនេះ សមត្ថកិច្ច​កំពុងតែធ្វើការ​ស្រាវជ្រាវ​ជា​បន្តទៀត​ដើម្បី​រក​មេខ្លោង និង​បក្ខពួក ជាពិសេស​រក​ប្រភព​ដែល​ផ្តល់​អាវុធ​ទៅ​ឲ្យ​ក្រុម​ជនជាតិ​ទាំងនោះ​ប្រើប្រាស់​ខុសច្បាប់​។​ក្រុម​សង្ស័យ​និង ​វត្ថុតាង ត្រូវបាន​នាំ​ខ្លួ​ទៅកាន់​បញ្ជាការដ្ឋាន​កង​រាជ​អាវុធហត្ថ​ខេត្ត​ព្រះសីហនុ ដើម្បី​បន្តនីតិ​វិធី​តាមផ្លូវ​ច្បាប់​៕​សរន

កម្លាំង​អាវុធហត្ថ​បាន​បើក​ប្រតិបត្តិ​ការបង្ក្រាប​ក្រុម​ជនប្រដាប់អាវុធ​ជា​ជនជាតិ​ចិន និង​បាន​រំដោះ​ចំណាប់ខ្មាំង​ចំនួនមួយ​នាក់ ជា​ជន​ជាតិចិន​ដូចគ្នា និង​បាន​ហូត​កាំភ្លើង​វែង​ខ្លី​ចំនួនប្រាំពីរដើម(រូបថត សហការី)