ដោយ​៖​តារា​រិ​ទ្ធ​/​ភ្នំពេញ​​ ប្រមុខ​រាចរដ្ឋាភិបាល​កម្ពុជា​សម្តេច​អគ្គមហាសេនាបតី​តេ​ជោ ហ៊ុន សែន បាន​មានប្រសាសន៍ថា​៖​វត្តមាន​រដ្ឋមន្ដ្រីក្រសួង​ការបរទេស​ចិន​លោក វ៉ាង យី នៅ​កម្ពុជា​នាពេលនេះ​បាន​នាំមក​ជាមួយ​នូវ​ជំនួយឥតសំណង​ចំនួន ១,៧៥០ លាន​យន់​ស្មើ និង ប្រមាណ ២៧០ លាន​ដុល្លារ​រួមជាមួយ​និង​ការ​ផ្តល់ជំនួយ​ជា​វ៉ាក់សាំង​ចំនួន ៣ លាន​ដូ​ស​បន្ថែមទៀត​ដល់​កម្ពុជា ។

​សម្តេច​តេ​ជោ ហ៊ុន សែន បាន​មានប្រសាសន៍​ឲ្យ​ដឹង​នៅក្នុង​ពិធី​ចុះហត្ថលេខា​លើ​ឯកសារ​សំខាន់ៗ​ចំនួន​៦ រវាង​កម្ពុជា​-​ចិន ក្រោម​អធិបតីភាព​នៅ​វិមាន​សន្តិភាព​នា​ល្ងាច​ថ្ងៃទី​១២ ខែកញ្ញា ឆ្នាំ​២០២១​នេះ​។

​សម្តេច​តេ​ជោ ហ៊ុន សែន បាន​មានប្រសាសន៍ថា​៖«​ខ្ញុំ​មាន​ព័ត៌មាន​ល្អ​ខ្លះ​ដើម្បី​ផ្ញើជូន​តាមរយៈ​សារព័ត៌មាន​ជូន​ប្រជាជន​កម្ពុជា​ទីមួយ​គឺ​តាមរយៈ​ការពិភាក្សា​ជាមួយ​លោក វ៉ាង យី ទីប្រឹក្សា​រដ្ឋ​និង​ជា​រដ្ឋមន្ត្រីការបរទេស​ចិន​បានប្រកាស​ផ្តល់ជំនួយ​វ៉ាក់សាំង​ចំនួន ៣​លាន​ដូ​ស​បន្ថែមទៀត​ដល់​កម្ពុជា​ដែល​នេះ​ជា​ព័ត៌មាន​ដ៏​ល្អ​ព្រោះ​ជាការ​កង្វល់​របស់ខ្ញុំ​ហើយ​វា​ក៏ ជាការ​កង្វល់​របស់​មិត្ត​ចិន​ផងដែរ ។

​សម្តេច​តេ​ជោ ហ៊ុន សែន បាន​បញ្ជាក់ថា​វ៉ាក់សាំង​សម្រាប់​ចាក់​ដូ​ស​ទី​៣​នេះ​បាន​មកដល់​ចំនួន ២​លាន​ដូ​ស​ហើយ​ហើយនឹង​មកដល់​៣ លាន​ដូ​ស​ទៀត​ដែលមាន​ចំនួន​សរុប ៥ លាន​ដូ​ស ហើយ​បូក​ថែម​នឹង​ជំនួយ​របស់​មិត្ត​ចិន​ចំនួន ៣ លាន​ដូ​ស​ទៀត​និង​ការចាក់​កន្លងមក​ជិត​១​លាន​ដូ​ស​យើង​នឹងមាន​៩​លាន​ដូ​ស ។ បើ​យើង​ត្រូវ​ការចាក់​១២​លាន​ដូ​ស ទៀត​យើង​ត្រូវការ​តែ ៣ លាន​ដូ​ស​ទៀត​ប៉ុណ្ណោះ​។​

​សម្តេច​តេ​ជោ​នាយករដ្ឋមន្ត្រី​បាន​បន្តថា​សម្តេច​ចង់​ផ្ញើ​សារ​នេះ​ទៅ​ប្រជាជន​កម្ពុជា​ថា​៖​ក្រៅពី​ការផ្ដល់​ជំនួយ​ដែល​ប្រគល់​នៅ​ពហុកីឡាដ្ឋាន​មរតក​តេ​ជោ​ដែលមាន​តម្លៃ ១៥០​លាន ដុល្លារ​អា​មេ​រិច​ហើយ ថ្ងៃនេះ​មិត្ត​ចិន​បាន​ចុះហត្ថលេខា​ជាច្រើន​ទៀត​ដែល​សុទ្ធតែជា​ជំនួយ​របស់​រដ្ឋាភិបាល​ចិន ដែល​ក្នុងនោះ​រាប់ទាំង​ជំនួយឥតសំណង​របស់​រដ្ឋាភិបាល​ចិន​ចំនួន ១,៧៥០ លាន​យន់​ស្មើនឹង​២៧០​លាន​ដុល្លារ​អាមេរិក និង​ជំនួយ​ផ្សេងៗ​ទៀត​ដែល​បាន​ចុះហត្ថលេខា​នៅពេលនេះ បូក​បញ្ចូល​ទាំង​វ៉ាក់សាំង​៣​លាន​ដូ​សទៀ​តវា​នឹង​ជួយ​ឲ្យ​យើង ស្រោច​វ៉ាក់សាំង​ទៅលើ​ប្រជាពលរដ្ឋ​យើង​បាន​គ្រប់គ្រាន់ ។

​ជាមួយនេះ​សម្តេច​តេ​ជោ ហ៊ុន សែន ក៏បាន​ផ្ញើ​សារ​ជូនទៅ​កសិករ​កម្ពុជា​ដែល​តែងតែ​ជួប​បញ្ហា​កសិផល​មិនអាច​នាំចេញ​បាន​ថា​៖​សម្តេច​បាន​លើក​បញ្ហា​នេះ​ជា​នឹង​រដ្ឋមន្ត្រី​ការ​បរ ទេស​ចិន​អំពី​បញ្ហា​ការនាំ​កសិផល​កម្ពុជា​ត្រង់​ទៅកាន់​ប្រទេស​ចិន​ដូចជា ផ្លែ​មៀន​ប៉ៃលិន ជាដើម​សុំ​ឲ្យ​ជំរុញ​វិធាន​ការចរចា​បញ្ហា​ទាំងអស់នេះ ។ ចិន​កំពុងបើក​ទីផ្សារ​តាមរយៈ​ការ ដែល​បានធ្វើ​កន្លងទៅ​និង​កិច្ចព្រមព្រៀង​ពាណិជ្ជកម្ម​សេរី​អាស៊ាន​ចិន​ដែល​ត្រូវ​ចូល​ជា​ធរមាន​នាពេល​ឆាប់ៗ​ខាងមុខ​,​ដែល​អាច​ឲ្យ​យើង​ប្រើប្រាស់​ទីផ្សារ​របស់​ចិន​ដែល​នឹង​ទទួលបាន​,​កម្ពុជា​នឹង​ទទួលបាន​ផលប្រយោជន៍​ពីនេះ​យ៉ាងច្រើន ហើយ​ប្រសិនបើ​ចិន​ច​ជំនះបាន​នៅ​កូ​វីដ​១៩ ដែល​សព្វថ្ងៃនេះ​ចំនួន​នៃ​ការឆ្លង​របស់​ប្រទេស​ចិន​ដែលមាន​ប្រជាជន ១,៤០០​លាន​នាក់ ឆ្លង​មួយ​មួយថ្ងៃ ២០ ទៅ ៣០ នាក់​គឺមាន​ចំនួន​តិច​បំផុត​។​សម្តេច​តេ​ជោ​បន្តថា នៅពេល​ចិន​មាន​កំនើនសេដ្ឋកិច្ច មាន​ភាពរុងរឿង ជីវភាព​ប្រជាជន​ចិន​មាន ភាពរុងរឿង​វា​ក៏បានផ្តល់​ប្រយោជន៍​ដល់​កម្ពុជា​ហើយ​ប្រទេស​ដទៃទៀត​ដែល​ត្រូវការ​ទីផ្សារ​របស់​ចិន ។ ដូច្នេះហើយ​ជា​ចំណុច​ដែល​ខ្ញុំ​ចង់​ផ្ញើ​សារ​ជូនទៅ​ដល់​ប្រជាកសិករ​កម្ពុជាគឺ​រាជរដ្ឋាភិបាល​បាន​ប្រឹងប្រែង​ជាមួយនឹង​ការប្ដេជ្ញាចិត្ត​របស់​ប្រទេស ​ចិន​ក្នុង​ការជួយ​ដល់​កម្ពុជា​ជួយ​ដល់​កសិករ​កម្ពុជា ៕