ដោយៈសុផល/ភ្នំពេញ៖“បញ្ញវន្តខ្មែរ ដែលបានទៅរៀននៅបរទេស មិនគួរមោទនភាពបរទេសហួសពេក រហូតភ្លេចខ្លួនឯងជាកូនខ្មែរ ជាពូជសាសន៍ដ៏អស្ចារ្យនោះឡើយ”។នេះជាប្រសាសន៍របស់ លោកហឿន សំនៀង នាយកវិទ្យាស្ថាន តេជោ សែន សាធារណការ និងដឹកជញ្ជូន ។
ថ្លែងទៅកាន់សិស្ស និស្សិត ប្រមាណ ៣០០នាក់នៅក្នុងសិក្ខាសាលាតាមអនឡាញមួយស្តីពី៖ “គន្លឹះ ទទួលបានអាហារូបករណ៍ជប៉ុន”កាលពីថ្ងៃទី១២ខែកញ្ញា ឆ្នាំ២០២១ លោកនាយកវិទ្យាស្ថានតេជោសែន សាធារណការ និងដឹកជញ្ជូន បានបន្តលើកឡើងថា៖យុវជនដែលទទួលអាហារូបករណ៍ទៅសិក្សានៅក្រៅប្រទេស នឹងក្លាយជាបញ្ញវន្តតំណាងជាតិសាសន៍ខ្មែរ ដូច្នេះនិស្សិតគួរត្រៀមខ្លួន និងគួរបំពាក់ខ្លួនឯងនូវចំណេះដឹងស្តីពីជំនឿ ទំនៀមទម្លាប់ វប្បធម៌ សាសនា ប្រពៃណី សិល្បៈ អត្តសញ្ញាណ និងគុណតម្លៃផ្សេងៗទៀត ដែលតំណាងឱ្យពូជសាសន៍ខ្មែរនៅឯបរទេស។ ត្រូវធ្វើយ៉ាងណាកុំភ្លេចថាខ្លួនជាខ្មែរ មានភារកិច្ចជាប្រតិភូតំណាងជាតិដ៏ពេញលេញ និងគួរជាទីមោទនភាព បំផុតសម្រាប់ជាតិខ្មែរ និងកុំវង្វែង កុំស្រវឹងជាមួយវប្បធម៌បរទេស កុំយកខួរក្បាលបរទេសមកពាក់ ហើយតាំងខ្លួនឯងអស្ចារ្យ ជាងជាតិសាសន៍ខ្មែរខ្លួនឯងឱ្យសោះ យើងអស្ចារ្យ យើងខ្លាំង ព្រោះយើងជាកូនខ្មែរ។
លោកបានបន្តថា កុំបានទៅរៀននៅបរទេស ពេលត្រឡប់មកខ្មែរវិញ ចេញឬកចេញរាងជាបរទេស ភ្លេចអស់វប្បធម៌ ទំនៀម ទម្លាប់ សាសនា អត្តសញ្ញានជាតិ និងគុណតម្លៃដ៏ល្អរបស់ខ្លួនឯងជាខ្មែរ សម្តែងឬទ្ធិបរទេសដាក់ពូជត្រកូលខ្លួនឯង។ យើងទៅរៀននៅបរទេស ដើម្បីបានចំណេះដឹង និងបទពិសោធន៍ល្អៗពីគេ តែត្រូវតម្កល់ភាវៈនៃខ្លួន ក្នុងនាមខ្មែរ ដែលមានទាំងអត្តចរិត ទំនៀមទម្លាប់ វប្បធម៌ សាសនាជាដើម។
នៅក្នុងសិក្ខាសាលានោះដែរ វាគ្មិនកិត្តិយស លោកបណ្ឌិត វុទ្ធី មុនីរ័ត្ន ដែលបានបញ្ចប់ការសិក្សាថ្នាក់បណ្ឌិតលើជំនាញធនធានទឹកក្រោមដីពីសាកលវិទ្យាល័យឈីបាប្រទេស ជប៉ុនក្នុងឆ្នាំ២០១០ បានចែករំលែកបទពិសោធន៍សំខាន់ៗមួយចំនួនដល់សិស្សនិស្សិតដូចជា៖ ១. ការរៀបចំខ្លួនដើម្បីទទួលបានអាហារូបករណ៍ ត្រូវមានព័ត៌មានគ្រប់ជ្រុងជ្រោយស្តីពីអាហារូបករណ៍) ២. ការរស់នៅប្រទេសជប៉ុន មានលក្ខណៈល្អប្រសើរ ដែលនិស្សិតមិនគួរមានការបារម្ភពេកនោះឡើយ ៣. បញ្ហាប្រឈមរបស់សិស្សនិស្សិតមានខ្លះៗ ពិសេសអ្នកដែលមិនធ្លាប់ចេញទៅក្រៅប្រទេស អាចមានការពិបាកបន្តិចបន្តួច ទាំងរបៀបរបប ទំលាប់ អាហារ និងវប្បធម៌ ជាដើម ៤. ក្រោយបញ្ចប់ការសិក្សាពីប្រទេសជប៉ុន និស្សិតភាគច្រើនមានឱកាសការងារល្អ ព្រោះអ្នកដែលបានបញ្ចប់ការសិក្សាពីប្រទេសនេះ ជាមនុស្សប្រកបដោយភាពជាអ្នកដឹកនាំ គុណធម៌ សីលធម៌ និងអាចធ្វើការជាមួយដទៃបាន។
សូមបញ្ជាក់ថាសិក្ខាសាលានេះរៀបចំឡើងដោយវិទ្យាស្ថានតេជោសែន សាធារណការ និងដឹកជញ្ជូននៃក្រសួងសាធារណការ និងដឹកជញ្ជូន សហការ ជាមួយយុវជនស្ម័គ្រចិត្តដើម្បីអភិវឌ្ឍសង្គម ក្នុងគោលបំណងផ្តល់ឱកាសដល់សិស្សនិស្សិតបានសិក្សាស្វែងយល់អំពី អាហារូបករណ៍ទៅសិក្សានៅប្រទេសជប៉ុន និងលក្ខខណ្ឌនានាដែលសិស្សនិស្សិតអាចត្រៀមខ្លួនជាមុន ដើម្បីចូលរួមប្រកួតយកអាហារូបករណ៍ទៅសិក្សានៅប្រទេសជប៉ុន ក៏ដូចជាបណ្តាប្រទេសនានាផងដែរ។
ដោយធ្លាប់ទទួលអាហារូបករណ៍ទៅសិក្សានៅបរទេសដែរនោះ លោកហឿន សំនៀង នាយកវិទ្យាស្ថាន តេជោ សែន សាធារណការ និងដឹកជញ្ជូនបានចែករំលែកនូវចំណុចសំខាន់មួយចំនួន។លោកបានលើកឡើងពីគន្លឹះមួយចំនួន ដែលនិស្សិតត្រូវមាន ក្នុងការត្រៀមប្រកួតយកអាហារូបករណ៍ រួមមាន÷ ១. និស្សិតត្រូវមានចំណេះដឹងទូទៅល្អ ទាំងចំណេះដឹងមូលដ្ឋាន និងចំណេះដឹងសកល ដែលអាចជួយកំណត់គោលដៅខ្លួនឯងច្បាស់លាស់ផង និងដឹងថាតើសាលាចង់បានអ្វីខ្លះ ជាដើម ,២. ត្រូវចេះភាសាអង់គ្លេស ដែលជាស្ពានចម្លងដ៏សំខាន់បំផុត និងជាជំនាញសកលដែលមិនអាចខ្វះបាន, ៣. ត្រូវមានជំនាញ និងបទពិសោធន៍ពាក់ព័ន្ធជាមួយនឹងមុខជំនាញ ដែលខ្លួនចង់សិក្សា (មានហេតុផលត្រឹមត្រូវ ដែលផ្អែកលើបទពិសោធន៍ នឹងក្លាយជាភស្តុតាងរឹងមាំក្នុងការទទួលបានអាហារូបករណ៍) ,៤. ត្រូវមានសមត្ថភាពបង្ហាញពីហេតុផលច្បាស់លាស់ (ហេតុផលដែលសំខាន់ជាងប្រយោជន៍ផ្ទាល់ខ្លួន) ពោលគឺ ចេះបកស្រាយបានពេញលេញលើហេតុផលនោះៗ និង ៥. ការដាក់ពាក្យប្រឡងបានត្រឹមត្រូវ ទាំងបច្ចេកទេស ទាំងឯកសារពាក់ព័ន្ធ និងពេលវេលាជាដើម។ក្នុងន័យនេះ វិទ្យាស្ថានតេជោសែន មានបំណងចង់ឱ្យនិស្សិតយើងក្លាយជាមនុស្សសកល មានសមត្ថភាព ពេញលេញ អាចចាប់យកឱកាសផ្សេងៗបាន ដូច្នេះហើយទើបថ្នាក់បំប៉នភាសារអង់គ្លេស និងកម្មវិធីពង្រីកចំណេះដឹងផ្សេងៗជាច្រើនសម្រាប់សិស្សនិស្សិត ត្រូវបានបង្កើតឡើង។
សូមជម្រាបជូនថា៖ និស្សិតជំនាន់ទី១ ចំនួន ១៩១នាក់ របស់វិទ្យាស្ថានតេជោសែន សាធារណការ និង ដឹកជញ្ជូន បាននឹងកំពុងសិក្សាលើមុខជំនាញចំនួន៦ ក្នុងដេប៉ាតឺម៉ង់ចំនួន៣ រួមមាន៖ ១) ដេប៉ាតឺម៉ង់ សំណង់សាធារណការលើជំនាញផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ និងជំនាញប្រព័ន្ធ ចម្រោះទឹកកខ្វក់ ២) ដេប៉ាតឺម៉ង់គ្រប់គ្រងដឹកជញ្ជូន និងភស្តុភារកម្មលើមុខជំនាញសេដ្ឋកិច្ច និងគ្រប់គ្រង ដឹកជញ្ជូនផ្លូវគោក និងជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ និង៣) ដេប៉ាតឺម៉ង់នាវាចរណ៍៖ លើមុខជំនាញបរិបាលនាវា និងម៉ាស៊ីននាវា ដែលសិក្សាពេលពេញមួយថ្ងៃ (ព្រឹក-សៀល) ៥ថ្ងៃ/សប្តាហ៍ ព្រឹក ៧:០០-១១:០០ និងរសៀល ១:០០-៥:០០ និងថ្នាក់បំប៉នភាសាអង់គ្លេស ចន្ទ-ពុធ-សុក្រ ៥.៣០-៧.០០យប់៕សរន
