ដោយ​:ម៉េង​ឆៃ / ភ្នំពេញ​: ដូច​ការគ្រោងទុក នៅ​ថ្ងៃទី​១៥ ខែកញ្ញា ឆ្នាំ​២០២១ សាលារៀន នៅ​កម្រិត​អនុវិទ្យាល័យ និង​វិទ្យាល័យ ក្នុង​រាជធានី​ភ្នំពេញ និង​នៅ​ខេត្តកណ្តាល បាន​បើក​ដំណើរការ​ឡើងវិញ​។ សាលា​និ​មួយៗ ត្រូវបាន​រឹតបន្តឹង និង​គោរព​គោលការណ៍​ប្រតិបត្តិ​ស្តង់ដារ​សុវត្ថិភាព ដែល​កំណត់ដោយ​ក្រសួង​អប់រំ យុវជន និង​កីឡា យ៉ាង​ហ្មត់ចត់ ដើម្បី​ការពារ និង​ទប់ស្កាត់​ការឆ្លង​រាលដាល​ជំងឺ​កូ​វីដ​១៩​។ ទាំង​គ្រូ និង​ទាំង​សិស្ស ដែល​បាន​ចាក់​វ៉ាក់សាំង​បង្ការ​ជំងឺ​កូ​វីដ​១៩ រួចរាល់ ទើប​អនុញ្ញាត​ឲ្យ​ចូល​សាលារៀន​។​

​នៅ​ព្រឹក​ថ្ងៃទី​១៥ ខែកញ្ញានេះដែរសម្តេច​តេ​ជោ ហ៊ុន សែន នាយករដ្ឋមន្ត្រីនៃកម្ពុជាក៏បានប្រកាស​បើក​យុទ្ធនា​ការចាក់​វ៉ាក់សាំង​ដល់​កុមារ អាយុ ៦​ឆ្នាំ ដល់ ១២​ឆ្នាំ ដោយ​ចាប់ផ្តើម​នៅ​ថ្ងៃ​សុក្រ ទី​១៧ ខែកញ្ញាក្នុង​ក្របខ័ណ្ឌ​ទូទាំងប្រទេស​។​

​បន្ថែម​លើ​សារ​សំឡេង កាលពី​ព្រឹក​ថ្ងៃទី​១៥ ខែកញ្ញា គឺ​នៅពេល​រសៀល​ថ្ងៃទី​១៥ ខែកញ្ញា សម្តេច​តេ​ជោ ហ៊ុន សែន បាន​បង្ហោះ​សំណេរ​អមដោយ​រូបថត​ហាត់ប្រាណ​ថា បន្ទាប់ពី​ចាក់​វ៉ាក់សាំង​ដូ​ស​ទី​៣ ឬ​ដូ​ស​ជំរុញ​បាន​ប្រមាណ ៣០​ម៉ោង មកដល់ពេលនេះ សម្តេច ហាត់ប្រាណ​បានជា​ធម្មតា​ឡើងវិញ​ហើយ​។​

​សម្តេច​តេ​ជោ ហ៊ុន សែន លើកឡើងថា សប្តាហ៍​នេះ មាន​កិច្ចការ​ជាច្រើន ដែល​ត្រូវធ្វើ ហើយ​កិច្ចការ​មួយ ដែល​សំខាន់​ជាងគេ គឺ​អនាគត​របស់​កុមារ ទាំង​ជីវិត ទាំង​សុខភាព និង​ទាំង​ការសិក្សា​របស់​ពួកគេ​។ ការសម្រេច​ចាក់​វ៉ាក់សាំង​ជូន​កុមារ​អាយុ​ពី ៦ ដល់ ១២​ឆ្នាំ ដែល​នឹង​ត្រូវធ្វើ​ចាប់ពី​ថ្ងៃទី​១៧ ខែកញ្ញា ឆ្នាំ​២០២១ ខាងមុខនេះ គឺ​សំដៅ​ធានា​នូវ​សិទ្ធិ​រស់រានមានជីវិត សិទ្ធិ​ទទួលបាន​ការថែទាំ​សុខភាព និង​សិទ្ធិ​ទទួលបាន​នូវ​ការសិក្សា​រៀនសូត្រ​។​ល​។​

​សម្តេចតេជោ​ប្រមុខ​រាជរដ្ឋាភិបាល បន្ថែមថា ប្រសិនបើ​យើង មិនអាច​បើក​សាលាបឋមសិក្សា​ឡើងវិញ សម្រាប់​កុមារ​របស់​យើង​ទេ ប្រៀបបាន​ទៅនឹង​ការបាត់បង់​គ្រឹះ​មូលដ្ឋាន​នៃ​វិស័យ​អប់រំ​របស់​យើង​។ ម្យ៉ាងទៀត ការចាក់​វ៉ាក់សាំង​ជូន​កុមារ​ពី​អាយុ ៦​ឆ្នាំ​ឡើង គឺជា​ផ្នែក​មួយ​នៃ​ការងារ​ប្រយុទ្ធប្រឆាំង​ជាមួយ​ជំងឺឆ្លង​ផងដែរ ព្រោះ​វា​នឹង​នាំអោយមាន​ភាព​សាំ​ក្នុង​សហគមន៍ រហូតដល់​ប្រមាណ​ជាង ៨០% ដើម្បី​ទប់ទល់​នឹង​ការវាយលុក​ពី​ជំងឺឆ្លង​កូ​វីដ​-១៩ ដែល​កំពុង​រាតត្បាត​ក្នុងប្រទេស​យើង និង​ប្រទេស​ផ្សេងទៀត នៅលើ​ពិភពលោក​ទាំងមូល​។

​តាម​សម្តេច​តេ​ជោ ហ៊ុន សែន គឺ កុមារ​អាយុ​ចាប់ពី ៦​ឆ្នាំ ដល់ ១២​ឆ្នាំ ដែល​ត្រូវ​ចាក់​វ៉ាក់សាំង​បង្ការ​ជំងឺ​កូ​វីដ​១៩ នាពេលនេះ មាន​ចំនួន​ជាង ១​,៨លាន​នាក់​។ ការសម្រេច​ចាក់​វ៉ាក់សាំង​ដល់​កុមារ​នេះ គឺ​ដើម្បី​ឈានទៅ​បើក​សាលារៀន នៅ​ថ្នាក់បឋមសិក្សា​ឡើងវិញ​។ ក្នុងនោះ ប្រទេស​នានា លើ​ពិភពលោក បាន​សិក្សា​រួចហើយ និង​បាន​ប្រើប្រាស់​វ៉ាក់សាំង ចាក់​ឲ្យ​កុមារ ហើយ​ម្យ៉ាងទៀត កម្ពុជា​យើង ក៏មាន​ថ្នាំ​វ៉ាក់សាំង ស៊ី​ណូ​វ៉ា​ក់ ក្នុង​ដៃ​គ្រប់គ្រាន់​ផងដែរ​។​

​ជាការ​ពិត អ្នកជំនាញ លើកឡើង​រួចមកហើយ ហើយ​កម្ពុជា​យើង ក៏​ទទួលស្គាល់​រួចហើយ​ថា ចាក់​វ៉ាក់សាំង​រួចហើយ ក៏​នៅតែ​ឆ្លង​កូ​វីដ​១៩​។ ដូច្នេះ​ទាមទារ​ឲ្យ​យើង​ម្នាក់ៗ បន្ត​ការពារ កុំ​ឲ្យ​ឆ្លង​កូ​វីដ តាមរយៈ​វិធានការ​ហ្មត់ចត់ ទាំង​នៅ​សាលារៀន និង​ទាំង​សិស្សានុសិស្ស​ម្នាក់ៗ​។ ពាក់​ម៉ាស់ លាងដៃ និង​រក្សា​គម្លាត​សុវត្ថិភាព ទាំង​នៅក្នុង​សាលារៀន និង​ទាំង​ពេលចេញ​លេង ព្រមទាំង​នៅផ្ទះ និង​ការធ្វើដំណើរ ជាដើម​។​

​ដូច្នេះ​នៅពេល​ខាងមុខនេះ ច្បាស់​ណាស់​ថា កុមារ​អាយុ ៦​ឆ្នាំ ដល់​ក្រោម ១២​ឆ្នាំ ត្រូវតែ​ចាក់​វ៉ាក់សាំង​បង្ការ​ជំងឺ​កូ​វីដ​១៩ រួចរាល់ ចំនួន ២​ដូ​ស ទើប​អនុញ្ញាត​ឲ្យ​ចូល​សាលារៀន ដូច​ករណី​សិស្សានុសិស្ស នៅ​ថ្នាក់​អនុវិទ្យាល័យ និង​វិទ្យាល័យ នាពេល​នេះដែរ​។ ប៉ុន្តែ​អ្វី​សំខាន់​ជាង​វ៉ាក់សាំង គឺ​ការបន្ត​រៀបចំ​វិធានការ​ការពារ និង​ទប់ស្កាត់​កូ​វីដ តាម​សាលារៀន ដូច​អ្វី ដែល​ក្រសួង​អប់រំ គណៈ​គ្រប់គ្រង​សាលារៀន និង​អាជ្ញាធរ​សមត្ថកិច្ច​រាជ​ធានី​ខេត្ត បាន​ដាច់ចេញ និង​បើក​ដំណើរការ​សាកល្បង​សាលារៀន​ឡើងវិញ នៅ​ថ្នាក់​អនុវិទ្យាល័យ និង​ថ្នាក់​វិទ្យាល័យ នាពេលនេះ​។​

​ប៉ុន្តែ​កុមារ​នៅ​ថ្នាក់បឋមសិក្សា នៅ​ក្មេងៗ ហើយ​អាច​នឹង​ពិបាក​ក្នុងការ​គ្រប់គ្រង ពិសេស​លើ​ផ្នែកអនាម័យ និង​ការរត់​លេង រក្សា​គម្លាត​សុវត្ថិភាព​ពីគ្នា​នេះ​តែម្តង​។ នៅ​រាជធានី​ភ្នំពេញ និង ​នៅតាម​ទីប្រជុំជន ទី​រួម​ខេត្ត លើ​បញ្ហា​អនាម័យ ដូចជា​មិន​ចោទ​ទេ តែ​សម្រាប់​សិស្ស​នៅតាម​ទីជនបទ និង​តំបន់​ដាច់ស្រយាល រាង​ពិបាក​បន្តិច​។ តែ​ករណីនេះ អាស្រ័យ​លើ​លោកគ្រូ​អ្នកគ្រូ អាណាព្យាបាល និង​ឪពុកម្តាយ ដែល​ត្រូវ​មើលថែទាំ អប់រំ និង​បង្រៀន​កុមារ​ទាំងនោះ ឲ្យ​ចេះ​ការពារ​ខ្លួន​ពី​កូ​វីដ គឺ​ពាក់​ម៉ាស​ជាប់​ជានិច្ច លាង​សម្អាត​ដៃ​ញឹកញាប់ មាន​អាល់កុល ឬ​ជែ​ល​តាម​ខ្លួន និង​កុំ​រត់​លេង​ជួបៗ​គ្នា ដូច​មុន ជាដើម​។​

​យ៉ាងណា​ក៏ដោយចុះ បើសិនជា​ក្នុង​សហគមន៍​យើង កាត់បន្ថយ និង​ឈានទៅដល់​ការមិន​មាន​ឆ្លង​កូ​វីដ​១៩ នោះ​សាលារៀន​យើង ក៏​នឹងមាន​សុវត្ថិភាព ១០០%​ដែរ​។ តែបើ​ប្រទេស​យើង នៅមាន​អ្នក​ឆ្លង​កូ​វីដ​១៩ ហើយ​សព្វថ្ងៃនេះ មាន​ដល់​ទៅ​ជាង ៦០០​នាក់ ក្នុង ១​ថ្ងៃៗ​ដូច្នេះ ទាល់តែ​ទាមទារ​ឲ្យ​មានការ​ប្រុងប្រយ័ត្ន​ខ្ពស់​។ សម្រាប់​គ្រូ និង​សិស្ស គួរតែ​ចេញពីផ្ទះ ទៅ​សាលា ហើយ​ចេញពី​សាលា មក​ផ្ទះ​។ ពោលគឺ​មិនត្រូវ​ដើរទៅ​កន្លែង​ណា​ផ្សេង ឬក៏​ជួប​មនុស្ស​ច្រើន ក្នុង​កាលៈទេសៈ​នេះ​ទេ​។​

​បើសិនជា​មិន​អនុវត្ត​ឲ្យ​បាន​ត្រឹមត្រូវ ហ្មត់ចត់​តាម​វិធាន​សុវត្ថិភាព ក្នុង​សាលារៀន រួមទាំង​វិធានការ​សាមញ្ញៗ គឺ ៣​កុំ និង ៣​ការពារ ទេនោះ អាច​នឹងមាន​ហានិភ័យ​ក្នុង​ការឆ្លង​រាលដាល​កូ​វីដ​១៩ ក្នុង​សាលារៀន បើទោះបីជា​គ្រូ និង​សិស្ស បាន​ចាក់​វ៉ាក់សាំង​ទាំងអស់គ្នា​ក៏ដោយ​៕​