ដោយៈ បូកគោ / កំ​ពតៈ បរិក្ខារ​ប្រយុទ្ធប្រឆាំង​ជំងឺ​កូ​វីដ​-១៩ ក៏ដូចជា គ្រឿងឧបភោគ​បរិភោគ ព្រមទាំង ថវិកា​របស់ សម្តេច​តេ​ជោ នាយករដ្ឋមន្ត្រី និង​សម្តេច​កិត្តិ​ព្រឹទ្ធ​បណ្ឌិត ប្រធាន​កាកបាទក្រហមកម្ពុជា បាន​បញ្ជូន​ដល់​សាលាខេត្ត​កំពត ដើម្បី​ចែកជូន​ជនរងគ្រោះ បាន​ប្រើប្រាស់​បន្ទាន់​។​

​កាលពី​ព្រឹក​ថ្ងៃទី​១៧ ខែកញ្ញា ឆ្នាំ​២០២១ តំណាង​របស់​សម្តេច​ទាំង​ទ្វេ បាន​នាំយក​អំណោយ ជា​ម៉ាស់​ចំនួន ១០០.០០០ អាល់កុល ចំណុះ ១.០០០ លីត្រ អង្ករ​ទម្ងន់ ២០ តោន និង​ថវិកា ១០០ លាន​រៀល ផ្តល់ជូន​រដ្ឋបាលខេត្ត​កំពត ដើម្បី​បាន​ប្រើប្រាស់ ក្នុង​ភាព​បន្ទាន់ និង​តាម​តម្រូវការ ពិសេស​រង​ផលប៉ះពាល់ ដោយ​វិបត្តិ​កូ​វី​-១៩​។​

​នាឱកាស​ទទួល​អំណោយ​ដ៏​ថ្លៃថ្លា ខាងលើ លោក ជាវ តា​យ អភិបាល​ខេត្តកំពត បាន​មាន​ប្រសា​ន៍​ថាៈ ក្នុងនាម​រដ្ឋបាលខេត្ត លោក​សូម​ថ្លែងអំណរគុណ យ៉ាង​ជ្រាលជ្រៅ ចំពោះ​សម្តេច​តេ​ជោ និង​សម្តេច​កិត្តិ​ព្រឹទ្ធ​បណ្ឌិត ដែល​បាន​បញ្ជូន​អំណោយ ដល់​រដ្ឋបាល​ខេត្តកំពត នាពេលនេះ​។ សម្តេច​ទាំង​ទ្វេ តែង​បាន​គិតគូរ ចំពោះ​ប្រជាពលរដ្ឋ ដែល​ជួបប្រទះ​ការលំបាក ពិសេស​ជន​រង​ផលប៉ះពាល់ ដោយសារ​វិបត្តិ នៃ​ជំងឺ​កូ​វីដ​-១៩​។​

​លោក​អភិបាលខេត្ត បានបញ្ជាក់​ថាៈ បរិក្ខារ ក៏ដូចជា គ្រឿងឧបភោគ​បរិភោគ ព្រមទាំង​ថវិកា​ទាំងនេះ រដ្ឋបាលខេត្ត នឹង​ផ្តល់ឱ្យ​បណ្តា​ក្រុង​ស្រុក ដើម្បី​ចែកជូន​ជនរងគ្រោះ ចំ​គោលដៅ​ពិតប្រាកដ ហើយ​បាន​ទាន់ពេលវេលា ស្របតាម​គោលបំណង ប្រកបដោយ​សប្បុរសធម៌ របស់​សម្តេច ជា​ម្ចាស់​អំណោយ​។​

​សូមបញ្ជាក់ថា គិត​ត្រឹម​ថ្ងៃទី​១៦ ខែកញ្ញា ឆ្នាំ​២០២១ អ្នក​ឆ្លង​ជំងឺ​កូ​វីដ​-១៩ ក្នុង​ព្រឹត្តិការណ៍ ២០​កុម្ភៈ មាន​ចំនួន​៤.១០៧​នាក់ ស្រី​២.៣៦៥​នាក់​។ ក្នុងចំណោម​នោះ បាន​ព្យាបាល ឱ្យ​ជាសះស្បើយ ចំនួន ៣.៨១១ នាក់ ស្រី​២១៩៤​នាក់ កំពុង​សម្រាក​ព្យាបាល​២២៤​នាក់ ស្រី​១២៧​នាក់ និង​ស្លាប់​ចំនួន ៧២​នាក់ ស្រី​៤៣​នាក់​៕/V​