ដោយ: ភ្នំសន្ទុក-ប.ជ័យ / កំពង់ធំ: សមត្ថកិច្ចអធិការដ្ឋានរដ្ឋបាលព្រៃឈើខាងជើងបឹងទន្លេសាប បានស្ទាក់បង្ក្រាបបទល្មើសដែលមេឈ្មួញឈើ ប្រចាំស្រុកសន្ទុកឈ្មោះ ធៀប ធួក ដឹកជញ្ជូនផលអនុផលព្រៃឈើចេញពីតំបន់ព្រៃអភិរក្សអង់តែន។
ប្រតិបត្តិការនោះ ដឹកនាំដោយលោកលោក តិប ញាតា នាយអធិការ និងលោក ហោ ភាជ នាយរងអធិការនៃអធិការដ្ឋានរដ្ឋបាព្រៃឈើខាងជើងបឹងទន្លេសាប សហការជាមួយផ្នែករដ្ឋបាលព្រៃឈើកំពង់ថ្ម រួមជាមួយសង្កាត់រដ្ឋបាលព្រៃឈើតាំងក្រសាំង ក្រោមការសម្របសម្រួលដោយលោក សាយ វាសនា ព្រះរាជអាជ្ញារង នៃអយ្យការអមសាលាដំបូងខេត្តកំពង់ធំ។
ការបង្ក្រាបបានធ្វើឡើងកាលពីម៉ោង ២និង១៥នាទីរសៀលថ្ងៃទី១៨ ខែកញ្ញា ឆ្នាំ២០២១ ត្រង់ចំណុចភូមិខ្វែក ឃុំកំពង់ថ្ម ស្រុកសន្ទុក ខេត្តកំពង់ធំ។ ក្នុងពេលនោះ មេឈ្មួញឈើ ឈ្មោះធៀប ធួក និង បក្សពួកបានរើឈើទម្លាក់ពីលើឡាន ហើយយកសាំងម៉ាស៊ូតដុតបំភ័យសមត្ថកិច្ច ដើម្បីរំដោះរថយន្តចេញ យ៉ាងគឃ្លើនទៀតផង។
សមត្ថកិច្ចរដ្ឋបាលព្រៃឈើបានឲ្យដឹងថា៖ រថយន្តដែលឃាត់នោះជាប្រភេទរថយន្តកូរ៉េ ៣តោន ក្បាលពណ៌ស ទ្រុងពណ៌បៃតង ដឹកប្រភេទឈើចម្រុះ ចេញពីតំបន់ព្រៃអង់តែន ជាឈើមិនគ្រប់អាយុ(ឈើប្រឡៅមូល)ដែលរដ្ឋបាលព្រៃឈើហាមឃាត់។
មកទល់ថ្ងៃទី១៩ខែកញ្ញា វត្ថុតាងប្រភេទឈើចម្រុះ ត្រូវបានយកមករក្សាទុកនៅផ្នែករដ្ឋបាលព្រៃឈើកំពង់ថ្ម។ ដោយឡែករថយន្តត្រូវបានជនល្មើសឈ្មោះ ធៀប ធួក និង បក្ខពួកយកសាំងដុត ដើម្បីបំភ័យសមត្ថកិច្ច រួចបើករត់គេចបាត់។ ប៉ុន្តែទោះជាយ៉ាងណាក៏ដោយពេលនេះ សមត្ថកិច្ចកំពុងតែកសាងសំណុំរឿង និងចំណាត់ការបន្តតាមនីតិវិធីច្បាប់។ ក្នុងនោះ ត្រូបស្វែងរករថយន្តដែលជាមធ្យោបាយល្មើស៕
