ដោយ​: ប​.​ជ័យ / បន្ទាយមានជ័យ​: ការចាក់​វ៉ាក់សាំង​បង្ការ​ជំងឺ​កូ​វីដ​១៩ ដល់​កុមារ​អាយុ​ចាប់ពី ៦​ឆ្នាំ​ដល់​១២​ឆ្នាំ​នៅ​ខេត្តបន្ទាយមានជ័យ ក្រុមការងារ​និង​ការសង្កេតឃើញថា ក្នុង​២​ថ្ងៃ​មកនេះ​ផុលផុស​ខ្លាំង ដោយ​ឱ​ពុក​ម្តាយ អាណាព្យាបាល​បាន​នាំ​កូនចៅ​មក​ទទួល​សេវា​នេះ​ដ៏​កុះករ ។​

​លោក អ៊ុ រាត្រី អភិបាលខេត្ត​បន្ទាយមានជ័យ លោក​ខេង ស៊ុម ប្រធាន​ក្រុមប្រឹក្សា​ខេត្ត បានទទួល​ស្គាល់​យុទ្ធនាការ​ថ្មី​មួយទៀត គឺ​ការចាក់​វ៉ាក់សាំង​បង្ការ​ជំងឺ​កូ​វីដ​១៩ ជូន​ដល់​កុមារ​អាយុ​ចាប់ពី ៦​ឆ្នាំ ដល់ ១២​ឆ្នាំ បាន​ប្រព្រឹត្តទៅ​ដោយមាន​កុមារ​យ៉ាងច្រើន​កុះករ​មកចាក់ ហើយ​ក្រុមការងារ​គ្រូពេទ្យ​បាន​អនុវត្ត​ដោយ​រលូន ការទទួលខុសត្រូវ​ខ្ពស់ និង​មាន​ប្រសិទ្ធភាព​។​
​ពោលគឺ​ក្នុង​ការការពារ​អាយុជីវិត​កុមារ​ពី​ជំងឺ​កាច​សាហាវ​កូ​វីដ​-១៩ និង​ការបើក​អោយ​ដំណើរ ការ​សាលារៀន​ឡើងវិញ​ឆាប់ៗ ។​

​សូម​រំលឹកថា កាលពី​ថ្ងៃទី ១៨ ខែកញ្ញា ឆ្នាំ ២០២១ ខេត្តបន្ទាយមានជ័យ​បើក​យុទ្ធនា​ការចាក់​វ៉ាក់សាំង​ការពារ​ជំងឺ​កូ​វីដ​.១៩​ដល់​កុមារ​អាយុ​ចាប់ពី ៦​ឆ្នាំ​ដល់​ក្រោម​១២​ឆ្នាំ នៅតាម​ម​ណ្ឌ​សុខភាព​និង​ទីតាំង​កំណត់​ក្បែរ​ខាង​ឬ​ជិត​ផ្ទះ​ពលរដ្ឋ ។​

​តាម​សេចក្តីជូនដំណឹង​លេខ ៤៧៩/២១ សជណ ចុះ​ថ្ងៃទី​១៦ ខែកញ្ញា ឆ្នាំ​២០២១ រដ្ឋបាលខេត្ត​បាន​ជូនដំណឹង ដល់​សាធារណជន និង​មាតាបិតា ឬ​អាណាព្យាបាល​ទាំងអស់ ជ្រាបថា មន្ទីរ​សុខាភិបាល​នៃ​រដ្ឋបាលខេត្ត​បន្ទាយមានជ័យ នឹង​បើក​យុទ្ធនា​ការចាក់​វ៉ាក់សាំង​ការពារ​ជំងឺ​កូ​វីដ​.១៩ ដល់​កុមារ​មាន​អាយុ​ចាប់ពី ៦​ឆ្នាំ ដល់​អាយុ​ក្រោម ១២​ឆ្នាំ នៅតាម​ទីកន្លែង និង​ពេលវេលា​ដូចខាងក្រោម ៖

១/​ក្រុង​សិរីសោភ័ណ ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​២៩ ខែកញ្ញា ឆ្នាំ​២០២១ ។ ២-​ក្រុង​ប៉ោយប៉ែត ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​០៦ ខែតុលា ឆ្នាំ​២០២១ ។ ៣/​ស្រុក​អូរជ្រៅ ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​២២ ខែកញ្ញា ឆ្នាំ​២០២១​។ ៤/ ស្រុក​មង្គល​បូរី ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​៣០ ខែកញ្ញា ឆ្នាំ​២០២១ ។
៥-​ស្រុក​ម៉ាឡៃ ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​២៧ ខែកញ្ញា ឆ្នាំ​២០២១ ។ ៦-​ស្រុក​ស្វាយចេក ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​២៨ ខែកញ្ញា ឆ្នាំ​២០២១) ។
៧-​ស្រុក​ថ្មពួក ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​០៤ ខែវិច្ឆិកា ឆ្នាំ​២០២១​។ ៨-​ស្រុក​ភ្នំស្រុក ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​២៤ ខែកញ្ញា ឆ្នាំ​២០២១ ។
៩-​ស្រុក​ព្រះនេត្រព្រះ ពីថ្ងៃ​ទី​១៨ ខែកញ្ញា ឆ្នាំ​២០២១ ដល់​ថ្ងៃទី​២៨ ខែកញ្ញា ឆ្នាំ​២០២១ ។​
​សម្រាប់ ទីកន្លែង​ដែល​ត្រូវ​មក​ទទួល​ការចាក់​វ៉ាក់សាំង នៅតាម​មណ្ឌល​សុខភាព ស្ថិតនៅក្នុង​ឃុំ​សង្កាត់ របស់​ស្រុក​ក្រុង ទូទាំង​ខេត្តបន្ទាយមានជ័យ រៀងរាល់ថ្ងៃ​ច័ន្ទ​ដល់ ថ្ងៃអាទិត្យ ពេលព្រឹក​ពី​ម៉ោង ៧ និង​៣០​នាទី ដល់​ម៉ោង​១១ និង​៣០​នាទី ។

​ពេល​រសៀល​ពី​ម៉ោង​១៣ ដល់​ម៉ោង​១៦ ល្ងាច ។​ក្នុងនោះ​សូម​មាតាបិតា កូន​ភ្ជាប់​ជាមួយ​ឯកសារ​ដែល​ត្រូវ​យកមក​ជាមួយ​សម្រាប់​ការចាក់​វ៉ាក់សាំង​ការពារ​ជំងឺ​កូ​វីដ​១៩ រួមមាន ៖​សំបុត្រកំណើត ឬ​សៀវភៅ​គ្រួសារ ឬ​សៀវភៅ​ស្នាក់នៅ ឬ​លិខិតឆ្លងដែន ឬ​លិខិតបញ្ជាក់​ផ្សេងៗ​ពី​អាជ្ញាធរ​មូលដ្ឋាន​។ ត្រូវមាន មាតា បិតា​ឬ អាណាព្យាបាល នាំ​កុមារ​មក​ទទួល​ចាក់​វ៉ាក់សាំង​ការពារ​ជំងឺ​កូ​វីដ​១៩ ហើយ​ការចាក់​វ៉ាក់សាំង​នេះ ដោយ​ការស្ម័គ្រចិត្ត និង​មិនមាន​ការបង់​ថវិកា​ឡើយ​។ ម្តាយ ឪពុក​កូន រំពឹងថា នៅពេលដែល​កូនៗ​បាន​ចាក់​វ៉ាក់សាំង ពួកគេ​នឹងមាន​សុខភាព​ល្អ ហើយ​អាច​ចូលរៀន​នៅតាម​សាលា​រដ្ឋ​និង​ឯកជន​បាន​ឆាប់ៗ​ដែរ គាត់​បាន​ថ្លែង​អំណរ​អរគុណ​យ៉ាង​ជ្រោ​ល​ជៅ​ជូន​សម្តេច​តេ​ជោ ដែល​បាន​យកចិត្តទុកដាក់​ខ្ពស់​លើ​ការផ្តល់​វ៉ាក់សាំង​ដល់​ក្រុម​កុមារ​តូចៗ ក្រោយ​ចាក់​ថ្នាំ​រួច​បន្ត​អនុវត្ត​វិធានការ​សុខាភិបាល​៣​កុំ​៣​ការពារ​ជាប្រចាំ​មិនអាច​ធ្វេសប្រហែស​បានឡើយ ។​

​យោង​ទិន្នន័យ​របស់​រដ្ឋបាលខេត្ត ក្នុង​ខេត្ត​នេះ មាន​កុមារ​អាយុ​ចន្លោះ​៦​ទៅ​១២​ឆ្នាំ ប្រមាណ​ជាង​២០​ម៉ឺន​នាក់​៕​