ដោយៈ​សុ​ផានី​តា​/​កោះកុង​ៈសត្វ​គោ​ចំនួន​១៥០​ក្បាល​នៅ​ភូមិ​ឈូក ឃុំ​ជីខ​លើ ស្រុកស្រែ​អំបិល ត្រូវបាន​ក្រុមមន្ត្រី​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តកោះកុង និង​អាជ្ញាធរ​ស្រុកស្រែ​អំបិល គៀងគរ​ប្រមូល​មកចាក់​វ៉ាក់សាំង​បង្កា​ជំងឺ​ដុំ​ពក​លើ​ស្បែក​។​

​ប្រាប់​រស្មី​កម្ពុជា ល្ងាច​ថ្ងៃទី​២១ ខែកញ្ញា ឆ្នាំ​២០២១​នេះ លោក អ៊ី ម៉េង​លាង ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តកោះកុង និយាយថា ២​ថ្ងៃ​ហើយ គិត​ចាប់ពី​ថ្ងៃទី​២០ កញ្ញា​ដែល​យុទ្ធនា​ការចាក់​វ៉ាក់សាំង​ការពារ​បង្ការ​ជំងឺ​ដុំ​ពក​លើ​ស្បែក​សត្វ​គោ ប្រព្រឹត្តឡើង​។​

​លោកបន្ថែមថា សត្វ​គោ​ខាងលើ អាច​ងាយ​នឹង​ប្រឈម​បណ្តាលឱ្យ​សត្វពាហនៈ​ងាប់​ប៉ះពាល់​ដល់​សេដ្ឋកិច្ច​ជីវភាព​ប្រជាកសិករ​។ ក្រុម​សត្វ​គោ​របស់​ពលរដ្ឋ​ចំនួន​១៥០​ក្បាល​បានទទួល​ថ្នាំ​វ៉ាក់សាំង​។

​មន្ត្រី​ជំនាញ​អះអាង​ទៀតថា កាលពីពីរ​ទៅ​បីខែ​មុន ក្រុមមន្ត្រី​ជំនាញ​ក៏បាន​ចុះ​តាមដាន​អាកា​រៈ​ជំងឺ​សត្វ​គោក្របី និង​ចាក់​វ៉ាក់សាំង​បង្ការ​ជំងឺ​អុជ​ក្តាម ឬ​សារ​ទឹក ដល់​សត្វ​ទាំងនោះ​ជាច្រើន​ក្បាល​កន្លែង​ផ្សេងគ្នា​នៅ​ស្រុក​បូ​ទុម​សាគរ និង​ស្រែអំបិល​។​

​ជំនួសមុខ​ដល់​ប្រជាពលរដ្ឋ លោក​ជា ច័ន្ទ​កញ្ញា អភិបាលស្រុក​ស្រែអំបិល សម្តែង​ក្តី​អរគុណ​ចំពោះ​ក្រុមមន្ត្រី​ជំនាញ​ដែល​បាន​យកចិត្តទុកដាក់​ខ្ពស់​ទៅលើ​សុខភាព​សត្វ​របស់​អ្នក​ស្រុកភូមិ​របស់លោក​តាមរយៈ​ការផ្តល់​ថ្នាំ​បង្ការ​ដ៏​មាន​សារៈសំខាន់​បូករួម​ណែនាំ​ពី​វិធីសាស្ត្រ​ទប់ស្កាត់​បន្ថែម​។

​បើតាម​លោក​អភិបាលស្រុក​ស្រែអំបិល ភូមិ​ឈូក ឃុំ​ជីខ​លើ ជា​មូលដ្ឋាន​ដែល​ប្រជាពលរដ្ឋ​ចិញ្ចឹម​សត្វពាហនៈ​ច្រើនជាងគេ កន្លងទៅ ក៏មាន​ដែល​សត្វ​គោ​របស់​ពលរដ្ឋ​ចំនួន​២១​ក្បាល​បានកើត​ជំងឺ​ដុំ​ពក​លើ​ស្បែក​នេះ​។
​ទោះយ៉ាងណា ក្នុងចំណោម​សត្វ​ដែល​ឈឺ​នោះ មាន​៥​ក្បាល​ជាសះស្បើយ​ពី​ជំងឺ នៅ​សេសសល់​ប៉ុន្មាន​កំពុង​បន្ត​ព្យាបាល ប៉ុន្តែ​គ្មាន​សញ្ញា​អ្វី​គួរឱ្យ​ព្រួយបារម្ភ​នោះទេ​ព្រោះ​យើង​អាច​គ្រប់គ្រង​ស្ថានការណ៍​បានល្អ​ប្រសើរ​។​
​រាល់ពេល​ក្នុង​មូលដ្ឋាន​កើតមាន​ជំងឺ​លើស​ត្វ អ្នកស្ម័គ្រចិត្ត​ភូមិ​តែង​តាមដាន និង​រាយការណ៍​ព័ត៌មាន​បន្ទាន់​មកកាន់​អាជ្ញាធរ​សមត្ថកិច្ច ព្រមទាំង​មន្ត្រី​ជំនាញ​ចុះ​ពិនិត្យ​ព្យាបាល​ភ្លាមៗ​៕​សរន