ប្រែ​សម្រួលៈ​វាសនា​/​ហាណូយ​៖ មជ្ឈមណ្ឌល​ពាណិជ្ជកម្ម​វៀតណាម គឺ​ក្រុង​ហូជីមិញ​កាលពី​ថ្ងៃ​ព្រហស្បតិ៍​ទី​៣០​កញ្ញា បានចាប់ផ្តើម​បន្ធូរបន្ថយ​ការ​រឹតបន្តឹង​ដើម្បី​ទប់ស្កាត់​ការឆ្លង​រាលដាល​​វីរុស​កូរ៉ូណា ដោយ​អនុញ្ញាត​អោយ​មាន​សកម្ម​ភាព​អាជីវកម្ម​និង​សង្គម​ច្រើន​ឡើង​ក្រោយ​ការបិទ​ខ្ទប់​អស់​ពេល​៤​ខែ​។​

​ចំណាត់ការ​នេះ​មានបំណង​ជំរុញ​សេដ្ឋកិច្ច​និង​ស្តារ​ប្រក្រតីភាព​ខ្លះ​មក​វិញ ហើយ​ចាប់ផ្តើម​រៀន​រស់នៅ​ជាមួយ​ជំងឺ​កូវី​ដ​១៩ ដែល​បាន​វាយប្រហារ​ប្រទេស​អាស៊ី​អាគ្នេយ៍​នេះ​ជា​ខ្លាំង​ចាប់ពី​ខែ​មេសា​​មក​និង​បាន​រុញ​ចំនួន​មនុស្ស​ស្លាប់​ពី​៣៦​នាក់​នៅ​ត្រឹម​ពាក់កណ្តាល​ខែ​ឧសភា​មកដល់​១៩.០៩៨​នាក់​គិត​ត្រឹម​ថ្ងៃ​ពុធ​ទី​២៩​កញ្ញា​។​

​លោក​ឡេ ហ័​រ ប៊ិញ អនុប្រធាន​នៃ​គណៈកម្មាធិការ​ប្រជាជន​ក្រុង បាន​ប្រាប់​សន្និសីទកាសែត​មួយ​ថា «​រាល់​ចំណុច​ត្រួតពិនិត្យ​ឬ​កុងត្រូល​ទាំងអស់​នៅតាម​ផ្លូវ​នឹង​ត្រូវ​រើ​ចេញ​ហើយ​មិន​ត្រូវការ​​លិខិតអនុញ្ញាត​ធ្វើដំណើរ​ដូច​មុន​ទេ​បន្ទាប់​ពី​ថ្ងៃនេះ​ទៅ​។​យើង​បើក​ទីក្រុង​ឡើងវិញ​បណ្តើរៗ​តែ​គិតគូរ​ពី​សុវត្ថិភាព​របស់​អ្នក​ក្រុង​របស់​យើង​ជាមុន​»​។​

​ទីក្រុង​ដែល​មាន​មនុស្ស​ប្រមាណ​៩​លាន​នាក់​រស់នៅ​នេះ បាន​និង​កំពុង​រងគ្រោះ​ខ្លាំងជាងគេ​ពី​ជំងឺ​ឆ្លងកូវី​ដ​១៩​នៅ​រលក​ទី​៤​នេះ ដោយ​អ្នក​ស្លាប់​ប្រមាណ​៨០​ភាគរយ​និង​អ្នក​ឆ្លង​ប្រហែល​ពាក់​​កណ្តាល​ក្នុងចំណោម​អ្នក​ឆ្លង​សរុប​ជាង​៧៨០.០០០​នាក់​នៅ​ទូទាំង​ប្រទេស ស្ថិត​នៅក្នុង​ទីក្រុង​ភាគ​ខាងត្បូង​នេះ​។​

​លោក​ឡេ ហ័​រ ប៊ិញ​បាន​និយាយថា ចាប់ពី​ថ្ងៃ​១​តុលា​នេះ​ទៅ បណ្តា​សួនឧទ្យាន គំរោង​សាងសង់ ផ្សារ​ទំនើប ហាង​កាត់សក់ សណ្ឋាគារ​ផ្ទះសំណាក់ និង​ភោជនីយដ្ឋាន​លក់​អាហារ​ឬ​ភេសជ្ជ​យកទៅ​​បរិភោគ​នៅក្រៅ អាច​បន្ត​ដំណើរការ​ឡើង​វិញ​។​

​សូមបញ្ជាក់​ថា​ការ​រឹតបន្តឹង​ចរាចរណ៍​មនុស្ស​បាន​បង្ខំ​អោយ​បិទ​រោងចក្រ​ជាច្រើន​នៅក្នុង​ខ្សែក្រវាត់​ឧស្សាហកម្ម​របស់​ទីក្រុង​នេះ​ជាហេតុ​នាំ​អោយ​មាន​ការព្រមាន​ចេញពី​ក្រុម​ពាណិជ្ជករ​បរទេស​​ខ្លះ​ថា​ការបិទ​ខ្ទប់​យូរ​ពេល​នាំ​អោយ​ម្ចាស់​ក្រុមហ៊ុន​រោងចក្រ​រើ​ធុរកិច្ច​របស់គេ​ទៅកាន់​ប្រទេស​ផ្សេង​។​

​ក្នុងពេល​ជាមួយគ្នា អាជ្ញាធរ​កំពុង​បង្កើន​ការចាក់​វ៉ាក់សាំង ដោយ​អោយ​អាទិភាព​លើ​កម្មករ​និង​មនុស្ស​មាន​អាយុ​៥០​ឆ្នាំ​ឡើង​។​រហូតដល់​ពេល​នេះ ប្រមាណ​១​ភាគ​៣​នៃ​ប្រជាជន​ក្នុង​ក្រុង​បាន​ចាក់​​វ៉ាក់សាំង​ការពារកូ​វីដ​១៩​បាន​២​ដូសពេញ​លេញ​៕

​ទីក្រុង​ហូជីមិញ ចាប់ផ្តើម​រើ​កុងត្រូល​ចេញ​និង​ផ្សារ​ទំនើប​ចាប់ផ្តើម​បើក​ឡើង​វិញ​ផង​ដែរ​កាលពី​ថ្ងៃ​៣០​កញ្ញា​