ដោយៈ មុនី​រ័ត្ន​/​ភ្នំពេញៈ លោក​ឧ​ត្ត​ម​សេនីយ៍​ឯក ស ថេត អគ្គ​ស្នងការរង និង​ជា​ស្នងការ​នគរបាល​រាជធានី​ភ្នំពេញ បាន​ណែនាំ​ដល់​គ្រប់​អង្គភាព អនុវត្ត​ការងារ​ឲ្យ​បានល្អ នឹង​ហាម​ដាច់ខាត​ចំពោះ​សារព័ត៌មាន​ដែល​ចូលមក​ថត ឬ​ឡាយ នៅពេលដែល​សមត្ថកិច្ច​កំពុងតែ​អនុវត្ត​ការងារ​ជំនាញ​ចាំបាច់ បើ​ប្រាប់​មិន​ស្តាប់​ត្រូវតែ​ចាត់វិធានការ​តាមច្បាប់ ព្រោះ​ការថត ឬ​ឡាយ អាចធ្វើ​ឲ្យ​បែកការណ៍ ហើយ​ជនសង្ស័យ​បានឃើញ និង​ធ្វើការ​គេចខ្លួន ដែល​នាំ​ឲ្យ​សមត្ថកិច្ច​ពិបាក​ក្នុងការ​ស្រាវជ្រាវ និង​តាមដាន​ដើម្បី​តាម​ឃាត់ខ្លួន​ជនសង្ស័យ​។

រូបថតៈលោក​ឧ​ត្ត​ម​សេនីយ៍​ឯក ស ថេត អគ្គ​ស្នងការរង និង​ជា​ស្នងការ​នគរបាល​រាជធានី​ភ្នំពេញ

ការណែនាំ​នេះ​បានធ្វើ​ឡើង​ក្នុង​កិច្ចប្រជុំ​បូកសរុប​ការងារ​ប្រចាំ​ខែកញ្ញា និង​ទិសដៅ​ការងារ​ខែតុលា តាមរយ​:​កិច្ចប្រជុំ​អន​ឡាញ​ប្រព័ន្ធ​ហ្សូ​មកា​លពី​ព្រឹក​ថ្ងៃទី​០១ ខែតុលា ឆ្នាំ​២០២១​។

​ក្នុង​កិច្ចប្រជុំ​នេះដែរ​ក៏មាន​ការចូលរួម​ពី​ស្នងការរង នាយការិយាល័យ​ជំនាញ អធិការនគរបាល​ខ​ណ្ឌ​ទាំង​១៤ នាយប៉ុស្តិ៍​នគរបាលរ​ដ្ឋ​បាល​ទាំង​១០៥ ផងដែរ ។​

លោក​ឧ​ត្ត​ម​សេនីយ៍​ឯក ស ថេត បាន​ណែនាំ​ឲ្យ​គ្រប់​អង្គភាព​ទាំងអស់​ត្រូវ​ចូលរួម​សហការ​ជាមួយ​ក្រុមការងារ​ព័ត៌មាន និង​ប្រតិកម្ម​រហ័ស ឲ្យ​បានល្អ​ដើម្បី​ម្បី​បន្សាប​ឲ្យ​បាន​ទាន់ពេលវេលា នៅ​រាល់​ព័ត៌មាន​មិន​ពិត ដែលមាន​លក្ខណ​:​ញុះញង់​បង្ក​ឲ្យ​មាន​ភាពវឹកវ​ដល់​សង្គម​ជាតិ ក៏ដូចជា​ក្នុង​បំណង​អាក្រក់​បង្ខូច​កិត្តិយស​របស់​ថ្នាក់ដឹកនាំ និង​អង្គភាព​៕​សរន​