ដោយ​: ម៉េង​ឆៃ / ភ្នំពេញ​: នៅក្នុង​សប្តាហ៍​នេះ មាន​ព្រឹត្តិការណ៍​ជាតិ​ជាច្រើន បានកើត​ឡើង ដូចជា កិច្ចប្រជុំ​កំពូល​រវាង​មេដឹកនាំ​គណបក្សកាន់អំណាច​កម្ពុ​ជា វៀតណាម ឡាវ ការរៀបចំ​បើក​សាលារៀន នៅ​ថ្នាក់​មហាវិទ្យាល័យ ឡើងវិញ រាជរដ្ឋាភិបាល​សម្រេច​ផ្តល់​វ៉ាក់សាំង​កូ​វីដ​១៩ ចំនួន ២០​ម៉ឺន​ដូ​ស ដល់​ប្រទេស​ឡាវ និង​ការដំឡើង​ប្រាក់ខែ​កម្មករ​កាត់ដេរ ដល់ ១៩៤​ដុល្លារ​អាម៉េរិក ជាដើម​។​

១- សម្តេច​តេ​ជោ ហ៊ុន សែន និង​មេដឹកនាំ​កំពូល​វៀតណាម​-​ឡាវ ពិភាក្សា​អំពី​ការបង្កើន​កិច្ចសហប្រតិបត្តិការ​លើ​គ្រប់​វិស័យ

​កាលពី​ថ្ងៃអាទិត្យ ទី​២៦ ខែកញ្ញា សម្តេច​តេ​ជោ ហ៊ុន សែន ប្រធាន​គណបក្ស​ប្រជាជន​កម្ពុជា លោក ង្វៀង ភូ​ជុង អគ្គលេខាបក្ស​កុម្មុយនីស្ដ​វៀតណាម និង​លោក ថង​លូន ស៊ី​ស៊ូ​លី​ត អគ្គលេខាបក្ស​ប្រជាជន​បដិវត្តន៍​ឡាវ បាន​ជួបប្រជុំ​ដោយផ្ទាល់ នៅ​ទីក្រុង​ហាណូយ ប្រទេស​វៀតណាម​។ ក្នុងជំនួប​កំពូល នៅ​ទីស្នាក់ការ​កណ្តាល​គណបក្ស​កុម្មុយនីស្ដ​វៀតណាម ដែល​គ្មាន​ការប្រកាស​ឲ្យ​ដឹង​ជាមុន​នេះមេដឹកនាំ​កំពូល​កម្ពុជា​-​វៀតណាម​-​ឡាវ បាន​ពិភាក្សា​អំពី​ការបង្កើន​កិច្ចសហប្រតិបត្តិការ​លើ​គ្រប់​វិស័យ​។​

២- នៅពេល​បើក​ដំណើរការ​មហាវិទ្យាល័យ​ឡើងវិញ គ្រូ និង​និស្សិត ត្រូវ​ចាក់​វ៉ាក់សាំង​រួច ហើយ​ត្រូវ​ធ្វើតេស្ត រក​កូ​វីដ
​កាលពី​ថ្ងៃទី​២៧ ខែកញ្ញា ក្រសួង​អប់រំ យុវជន និង​កីឡា បានកំណត់​គោលការណ៍ ១១​ចំណុច សម្រាប់​បើក​ដំណើរការ​ឡើងវិញ ក្នុងដំណាក់កាល​ទី​១ សម្រាប់​គ្រឹះស្ថាន​ឧ​ត្ត​ម​សិក្សា​សាធារណៈ និង​ឯកជន​។ ក្នុង​គោលការណ៍​ទាំងនោះ ក្រសួង​អប់រំ បាន​កំណត់ថា នៅពេល​និស្សិត​ចូលរៀន​នៅ​មហាវិទ្យាល័យ​ឡើងវិញ គឺ​ក្នុង ១​ថ្នាក់ មិន​ឲ្យ​លើសពី ២០​នាក់​ទេ ហើយ​ទាំង​សាស្ត្រាចារ្យ និង​ទាំង​និស្សិត ដែល​ត្រូវ​ចូលរៀន ក្នុង​ថ្នាក់​ដោយផ្ទាល់ ត្រូវតែ​បា​នា​ចាក់​វ៉ាក់សាំង​រួច និង​ត្រូវ​ធ្វើតេស្ត យក​សំណាក រក​កូ​វីដ​១៩ ជាដើម​។​

៣- កម្ពុជា ផ្តល់​វ៉ាក់សាំង បង្ការ​ជំងឺ​កូ​វីដ​១៩ ចំនួន ២០​ម៉ឺន​ដូ​ស ដល់​ប្រទេស​ឡាវ
​កាលពី​ថ្ងៃទី​២៨ ខែកញ្ញា រាជរដ្ឋាភិបាល​កម្ពុជា បានប្រគល់​អំណោយ​ថ្នាំ​វ៉ាក់សាំង ប្រភេទ​ស៊ី​ណូ​វ៉ា​ក់ ចំនួន ២០​ម៉ឺន​ដូ​ស ដល់​ប្រទេស​ឡាវ​។ ជំនួយ​វ៉ាក់សាំង​នេះ ធ្វើឡើង ក្នុង​ស្មារតី​សាមគ្គីភាព និង​មិត្ត​ភាពជា​ប្រពៃណី​រវាង​ប្រទេស​បងប្អូន​ទាំងពីរ និង​ដើម្បី​រួមចំណែក​ដល់​ការខិតខំ​ប្រឹងប្រែង​ប្រយុទ្ធ​ប្រឆាំងនឹង​ជំងឺ​ដ៏​សាហាវ​កូ​វីដ​១៩​។​

៤- វ៉ាក់សាំង ៣​លាន​ដូ​ស​បន្ថែមទៀត ត្រូវបាន​ដឹកជញ្ជូន មកដល់​កម្ពុជា​
​វ៉ាក់សាំង​កូ​វីដ​១៩ ចំនួន ៣​លាន​ដូ​ស​ថ្មី​ទៀតហើយ ដែល​កម្ពុជា បញ្ជា​ទិញ​ពី​ប្រទេស​ចិន បាន​ដឹក​មកដល់​អាកាសយានដ្ឋាន​អន្តរជាតិ​ភ្នំពេញ កាលពី​ព្រឹក​ថ្ងៃទី​២៨ ខែកញ្ញា​។ បូក​រួមទាំង​វ៉ាក់សាំង ដែល​ដឹក​មកដល់​ក្នុង​សប្តាហ៍​នេះ កម្ពុជា​ទទួលបាន​វ៉ាក់សាំង​សរុប ៣៥​លាន ៥​សែន​ដូ​ស ហើយ​វ៉ាក់សាំង​ទើប​មកដល់​ថ្មី​ទាំងនេះ នឹង​សម្រាប់​បម្រើ​ដល់​ការចាក់​ដូ​ស​ជំរុញ ឬ​ដូ​ស​ទី​៣ ជូន​ប្រជាពលរដ្ឋ​កម្ពុជា ដែល​នឹង​ចាប់ផ្តើម នៅ​ថ្ងៃទី​១១ ខែតុលា នៅ​ភ្នំពេញ មុនគេ​។​

៥- ក្រសួង​ការងារ តម្រូវ​ឲ្យ​ធ្វើតេស្ត រក​មេរោគ​កូ​វីដ​១៩ លើ​កម្មករនិយោជិត ក្រោយ​ឈប់សម្រាក​បុណ្យ​ភ្ជុំបិណ្ឌ​
​នៅក្នុង​សប្តាហ៍​នេះ ក្រសួង​ការងារ និង​បណ្តុះបណ្តាល​វិជ្ជាជីវៈ បាន​ណែនាំ​ម្ចាស់ ឬ​នាយក​រោងចក្រ សហគ្រាស​ទាំងអស់ ត្រូវធ្វើ​តេស្ដ​រហ័ស​រក​មេរោគ​កូ​វីដ​-១៩ ដល់​កម្មករនិយោជិត នៅតាម​រោងចក្រ សហគ្រាស នៅ​ទូទាំងប្រទេស​កម្ពុជា ក្រោយពេល​ឈប់សម្រាក​ក្នុង​ពិធីបុណ្យ​ភ្ជុំបិណ្ឌ​ខាងមុខនេះ​។ ការធ្វើ​តេស្ត​នេះ ដើម្បី​រក្សាបាន​នូវ​សកម្មភាព​អា​ជីក​ម្ម ផលិតកម្ម និង​ការផ្តល់​សេវាកម្ម ក៏ដូចជា ចូលរួមចំណែក​ប្រយុទ្ធ និង​ទប់ស្កាត់​ការរីក​រាលដាល​ទ្រង់ទ្រាយ​ធំ​នៃ​ជំងឺ​កូ​វីដ​-១៩ បណ្តាលមកពី​មេរោគ​បំប្លែង​ថ្មី ប្រភេទ​ដែល​តា (Delta)​។

៦- រដ្ឋាភិបាល សម្រេច​ដំឡើង​ប្រាក់​ឈ្នួល​កម្មករនិយោជិត ១៩៤​ដុល្លារ នៅ​ឆ្នាំ​២០២២
​នៅក្នុង​សប្តាហ៍​នេះ ក្រសួង​ការងារ និង​បណ្តុះបណ្តាល​វិជ្ជាជីវៈ បានប្រកាស​ពី​តួលេខ​ប្រាក់​ឈ្នួល​ដល់ក​ម្មករ និយោជិត ក្នុង​វិស័យ​កាត់ដេរ​សំលៀកបំពាក់ និង​ស្បែកជើង សម្រាប់​ឆ្នាំ​២០២២​។ នោះ​តាម​សេចក្តីសម្រេច​ចុងក្រោយ ប្រាក់ខែ​កម្មករនិយោជិត ត្រូវបាន​ដំឡើង ២​ដុល្លារ​ទៀត​។ ដូច្នេះ ចាប់ពី​ថ្ងៃ​មករា ទី​១ ខែមករា ឆ្នាំ​២០២២ តទៅ កម្មករនិយោជិត នឹង​ទទួលបាន​ប្រាក់ខែ​ទាប​បំផុត ១៩៤​ដុល្លារ ក្នុង ១​ខែ គឺ​កើនឡើង ២​ដុល្លារ ធៀប​នឹង​ប្រាក់ខែ​ឆ្នាំ​២០២១​នេះ​។​

៧-​នាយករដ្ឋមន្ត្រី​ឡាវ ផ្ញើ​សារ​ថ្លែងអំណរគុណ​សម្តេច​តេ​ជោ ដែល​ឧបត្ថម្ភ​វ៉ាក់សាំង ស៊ី​ណូ​វ៉ា​ក់ ចំនួន ២០​ម៉ឺន​ដូ​ស ដល់​ប្រទេស​ឡាវ
​នាយករដ្ឋមន្ត្រី​ឡាវ បាន​ផ្ញើ​សារលិខិត ថ្លែងអំណរគុណ ជូន​សម្តេច ហ៊ុន សែន នាយករដ្ឋមន្ត្រី​នៃ​កម្ពុជា ចំពោះ​ការជួយឧបត្ថម្ភ​គាំទ្រ​ដល់​ប្រទេស​ឡាវ នូវ​វ៉ាក់សាំង ស៊ី​ណូ​វ៉ា​ក់ ចំនួន ២០​ម៉ឺន​ដូ​ស ជូន​ដល់​សាធារណរដ្ឋ​ប្រជាធិបតេយ្យ​ប្រជាមានិត​ឡាវ​។ លោកនាយក​រដ្ឋមន្ត្រី​ឡាវ បញ្ជាក់ថា វ៉ាក់សាំង​នេះ នឹង​ជួយ​ឱ្យ​ឡាវ សម្រេចបាន​ទិសដៅ ៥០% ក្នុង​ការចាក់​វ៉ាក់សាំង​ជូន​ប្រជាជន​ឡាវ នៅ​បំណាច់​ឆ្នាំនេះ តាម​ការគ្រោងទុក​។​

៨-​មកដល់ពេលនេះ ពលរដ្ឋ​ប្រមាណ​ជិត ២​ម៉ឺន​គ្រួសារ រង​ផលប៉ះពាល់​ដោយ​ទឹកជំនន់ ក្នុងនោះ មនុស្ស ២​នាក់ បាន​ស្លាប់​
​គិត​ត្រឹម​ថ្ងៃទី​២៩ ខែកញ្ញា មាន​ពលរដ្ឋ​ជិត ២​ម៉ឺន​គ្រួសារ នៅក្នុង​ក្រុង​-​ស្រុក ចំនួន ៦ ក្នុង​ខេត្តបន្ទាយមានជ័យ រង​ផលប៉ះពាល់ ដោយ​គ្រោះទឹកជំនន់​។ ក្នុងនោះ មនុស្ស ២​នាក់ បាន​ស្លាប់ ដោយសារ​គ្រោះទឹកជំនន់ ដែល​បង្កឡើង​ដោយ​ទឹកភ្លៀង​។​

៩-​ព្រះមហាក្សត្រ ប្រទាន​រាជសារ អបអរ​ខួប ៧២​ឆ្នាំ​នៃ​ការបង្កើត​សាធារណរដ្ឋ​ប្រជាមានិត​ចិន​
​កាលពី​ថ្ងៃទី​១ ខែតុលា ព្រះករុណា ព្រះបាទ សម្ដេចព្រះ​បរមនាថ ន​រោ​ត្ដម សីហមុនី ព្រះមហាក្សត្រ​កម្ពុជា បាន​ប្រទាន​ព្រះរាជសារ ជូនទៅ​លោក ស៊ី ជិន​ភីង ប្រធានាធិបតី​ចិន ដើម្បី​អបអរសាទរ​ខួប ៧២​ឆ្នាំ នៃ​ការបង្កើត​សាធារណរដ្ឋ​ប្រជាមានិត​ចិន​។ នៅ​ថ្ងៃទី​១ ខែតុលា ឆ្នាំ​១៩៤៩ ចិន​បានប្រកាស​ជា​ផ្លូវការ​ការបង្កើត​សាធារណរដ្ឋ​ប្រជាមានិត​ចិន​។

១០-​កម្ពុជា​បញ្ជូន​កម្លាំង​ទ័ព​មួក​ខៀវ ៣០០​នាក់ ទៅ​ប្តូរ​វេន​កម្លាំង​ចាស់ នៅ​ប្រទេស​ម៉ាលី​
​កងកម្លាំង​ទ័ព​មួក​ខៀវ​ប្រមាណ ៣០០​នាក់ ក្នុងនោះ មាន​ស្ត្រី ២៦​នាក់ បានធ្វើ​ដំណើរ​ចេញពី​កម្ពុជា កាលពី​រសៀល​ថ្ងៃទី​១​តុលា ដើម្បី​ទៅ​បំពេញបេសកកម្ម​ក្រោម​ឆ័​ត្រ​របស់​អង្គការសហប្រជាជាតិ នៅ​ប្រទេស​ម៉ាលី​។ កងកម្លាំង​ទ័ព​មួក​ខៀវ ដែល​បញ្ជូន​ទៅនេះ ជា​កង​កម្ទេច​គ្រាប់​មិនទាន់​ផ្ទុះ និង​កងវិស្វកម្ម​ថែទាំ​អាកាសយានដ្ឋាន​។​

១១-​ទោះបីជា​ផ្អាក​ពិធីបុណ្យ​កាន់បិណ្ឌ និង​ភ្ជុំបិណ្ឌ តែ​នៅមាន​អ្នក​ទៅ​វត្ត និង​ធ្វើដំណើរ​ទៅលេង​ស្រុកកំណើត​
​ក្នុង​សប្តាហ៍​នេះ ទោះបីជា​រាជរដ្ឋាភិបាល ផ្អាក​ពិធីបុណ្យ​កាន់បិណ្ឌ និង​ភ្ជុំបិណ្ឌ តែ​ក៏​នៅតែមាន​អ្នក​ទៅ​វត្ត និង​អ្នកធ្វើដំណើរ​ទៅលេង​ស្រុកកំណើត រួមទាំង​ដើរលេង​កម្សាន្ត​តាម​រមណីយដ្ឋាន​នានា​។ យ៉ាងណាក៏ដោយ វិធានការ​ការពារ​កូ​វីដ ត្រូវបាន​អនុវត្ត ដោយ​ពាក់​ម៉ាស លាងដៃ​អាល់កុល​ញឹកញាប់ ជាដើម​។ ប៉ុន្តែ​វិធានការ​រក្សា​គម្លាត​សុវត្ថិភាព​យ៉ាងតិច ១​ម៉ែត្រ​កន្លះ​ពីគ្នា មិន​ត្រូវបាន​អនុវត្ត​ឲ្យ​បាន​ត្រឹមត្រូវ​ឡើយ​។ ពិធីបុណ្យ​ភ្ជុំបិណ្ឌ នឹង​ចូល​មកដល់​នៅ​ថ្ងៃទី​៦ ខែតុលា ហើយ​រាជរដ្ឋាភិបាល នៅ​រក្សា​ការសម្រេច​ឲ្យ​ឈប់សម្រាក​រយៈពេល ៣​ថ្ងៃ គឺ​នៅ​ថ្ងៃទី​៥-៦-៧ ខែតុលា​។ រយៈពេល​ឈប់សម្រាក​នេះ នឹងមាន​ការធ្វើដំណើរ​ច្រើន មិន​ថា ទៅលេង​ស្រុកកំណើត ឬក៏​ទៅ​ដើរលេង​កម្សាន្ត តាម​រមណីយដ្ឋាន និង​តំបន់​ទេសចរណ៍​នានា​នៅ​ទូទាំងប្រទេស​។ យ៉ាងណាក៏ដោយ វិធានការ​ទប់ស្កាត់ និង​ការពារ​កូ​វីដ​១៩ ត្រូវតែ​អនុវត្ត និង​ប្រុងប្រយ័ត្ន​ឲ្យ​បាន​គ្រប់ៗ​គ្នា​៕​សរន