ដោយ​: ម៉េង​ឆៃ / ភ្នំពេញ​: កាលពី​ថ្ងៃទី​៣០ ខែកញ្ញា​ក្រសួងសុខាភិបាល​ប្រកាសថា មាន​អ្នក​ឆ្លង​កូ​វីដ​១៩​នៅ​ទូទាំង ប្រទេស​ចំនួន ៩៧៨​នាក់​។ តែ​នៅ​ថ្ងៃទី​១ ខែតុលា ក្រសួងសុខាភិបាល​ប្រកាសថា មាន​អ្នក​ឆ្លង​កូ​វីដ ត្រឹមតែ ២៣២​នាក់ ហើយ​នៅ​ថ្ងៃទី​២​តុលា​មាន​អ្នក​ឆ្លង​ថយ​ចុះមក​នៅតែ​១៧៤​នាក់​ប៉ុណ្ណោះ​។​ដោយសារតែ​តួលេខ​ឆ្លង​កូ​វីដ​ពី​ី​រ​ថ្ងៃ​ចុង​ក្រោយនេះ ថយចុះ​ដូច្នេះ ក្រែងលោ​ម្នាក់ៗ ភ្លេចខ្លួន ហើយ​ភ្លេច​វិធី​ការពារ​កូ​វីដ ទាំង​ក្នុង​ជីវភាព​រស់នៅ​ប្រចាំថ្ងៃ​និង​ជាពិសេស ក្នុងអំឡុងពេល​ឈប់សម្រាក​បុណ្យ​ភ្ជុំបិណ្ឌ​នេះ​។​

​យ៉ាងណាក៏ដោយ ចូរ​កុំភ្លេចថា ចំនួន​អ្នក​ឆ្លង​កូ​វីដ ប្រចាំថ្ងៃ ថយចុះ ២​ថ្ងៃ​ចុង​ក្រោយនេះ គឺ​នៅ​ថ្ងៃទី​១ និង​ថ្ងៃទី​២​ខែតុលា នេះ ត្រូវបាន​ក្រសួងសុខាភិបាល បញ្ជាក់​ច្បាស់​ហើយ​ថា លទ្ធផល​នេះ បញ្ជាក់​ដោយ​ម៉ាស៊ីន​ធ្វើតេស្តរ​កកូ​វីដ PCR​។ ពោលគឺ​ក្រសួងសុខាភិបាល​លែង​កត់ត្រា​តួលេខ​រកឃើញ​អ្នក​ឆ្លង​កូ​វីដ​ដោយ​ប្រើប្រាស់​តេស្ត​រហ័ស រក​មេរោគ​កូ​វីដ​១៩ តាម​ភូមិ​តាម​សហគមន៍​ទៀតហើយ​។ ក្នុងនោះ សូម្បីតែ​ចំនួន​អ្នក​ឆ្លង​កូ​វីដ​១៩ ប្រភេទ​មេរោគ​បំប្លែង​ថ្មី ដែល​តា​នៅក្នុង សហគមន៍​យើង ក៏​ក្រសួង​លែង​ប្រកាស​ឲ្យ​ដឹង​ដែរ​។​

​ប៉ុន្តែ​មក​មើល​ស្ថានភាព​ជាក់ស្តែង​ក្នុងសង្គម​យើង​វិញ គឺ​នៅ​ភ្នំពេញ ពិសេស​នៅតាម​បណ្តា​ខេត្ត​មួយចំនួន​ចំនួន​អ្នក​ឆ្លង កូ​វីដ​១៩ នៅមាន​អត្រា​ខ្ពស់​នៅឡើយ ហើយ​ឆ្លង​ចូល​ផ្សារ និង​ចូល​ភូមិ​មួយចំនួន​ថែមទៀត​។ នៅ​សៀមរាប​ទោះបីជា លែង​បិទ​ខ្ទប់ ដោយ​លុបចោល​តំបន់​ក្រហម និង​តំបន់​លឿងទុំ តែ​ចំនួន​អ្នក​ឆ្លង​កូ​វីដ​នៅតែ​រកឃើញ​រៀងរាល់ថ្ងៃ​ហើយ​ផ្សារ មួយចំនួន នៅ​បន្ត​បិទ ដោយសារ​ផ្ទុះ​ការឆ្លង​រាលដាល​កូ​វីដ​១៩​។ នៅ​ខេត្តព្រះវិហារ ក៏បាន​បិទ​ខ្ទប់​តំបន់​មួយចំនួន ដោយសារតែ​ការឆ្លង​រាលដាល​កូ​វីដ​ក្នុង​សហគមន៍​។​

​ជាមួយនឹង​អត្រា​អ្នក​ឆ្លង​កូ​វីដ​ប្រចាំថ្ងៃ​ថយចុះ ក៏​ក្រសួងសុខាភិបាល ប្រកាសថា​ពីរ​ថ្ងៃ​ចុង​ក្រោយនេះ គឺ​នៅ​ថ្ងៃទី​១ និង​ថ្ងៃទី​២​តុលា ចំនួន​អ្នកស្លាប់​ដោយសារ​ជំងឺ​កូ​វីដ​១៩ មាន​ចំនួន​ប្រមាណ ២០​នាក់ ក្នុង​មួយថ្ងៃ គឺ​នៅ​ថ្ងៃទី​១​តុលា មាន​អ្នកស្លាប់ ១៧​នាក់ និង​នៅ​ថ្ងៃទី​២ ខែតុលា មាន​អ្នកស្លាប់ ២៤​នាក់​។ ក្នុងនោះ បើ​សរុប​អ្នក​ឆ្លង​កូ​វីដ​១៩ នៅ​ទូទាំងប្រទេស មាន​ចំនួន ១១៣ ០៥៧​នាក់​។ ជាសះស្បើយ ១០៣ ៩១៨​នាក់ និង​ករណី​ស្លាប់​សរុប កើនឡើង​ដល់ ២៣៦០​នាក់​។​

​ដូច្នេះ​នៅពេល​ឈប់សម្រាក​បុណ្យ​ភ្ជុំបិណ្ឌ ៣​ថ្ងៃ នៅ​ថ្ងៃទី​៥-៦-៧ ខែតុលា ហើយ​អ្នកខ្លះ ឈប់​តាំង​ពីថ្ងៃ​សៅរ៍ ទី​២ ខែតុលា និង​អាច​បន្ត​ឈប់​ដាច់ ១​អាទិត្យ ដល់​ថ្ងៃទី​១០ ខែតុលា គឺជា​ហានិភ័យ​នៃ​ការឆ្លង​រាលដាល​កូ​វីដ​១៩ បើសិនជា​មានការ​ធ្វេសប្រហែស​។​

​ជាការ​ពិត ក្នុងអំឡុងពេល​បុណ្យ​ភ្ជុំបិណ្ឌ​នេះ ទោះបីជា​រាជរដ្ឋាភិបាល ផ្អាក​ពិធីបុណ្យ​កាន់បិណ្ឌ និង​ភ្ជុំបិណ្ឌ​តែ​នៅមាន អ្នក​ទៅ​វត្ត ចូលធ្វើ​បុណ្យ​ជា​ក្រុមៗ ពិសេស​នៅ​វត្ត​តាម​ស្រុកភូមិ​។ ក្នុងនោះ ទោះជា​វិធានការ​ការពារ​កូ​វីដ​ត្រូវបាន​អនុវត្ត តាម​វត្ត ដោយមាន​ម៉ាស៊ីន​វាស់​កម្តៅ ហើយ​អ្នក​ជួបជុំ​បាន​ពាក់​ម៉ាស​គ្រប់គ្នា និង​លាងដៃ​នឹង​អាល់កុល​ញឹកញាប់​ក៏ដោយ ប៉ុន្តែ​វិធានការ​រក្សា​គម្លាត​សុវត្ថិភាព​យ៉ាងតិច ១​ម៉ែត្រ​កន្លះ​ពីគ្នា មិន​ត្រូវបាន​អនុវត្ត ឲ្យ​បាន​ត្រឹមត្រូវ​ឡើយ​។

​ម្យ៉ាងវិញទៀត អំឡុងពេល​ឈប់សម្រាក​បុណ្យ​ភ្ជុំបិណ្ឌ​នេះ អ្នករស់នៅ​ភ្នំពេញ និង​តាម​បណ្តា​ខេត្ត​នានា ភាគច្រើន នឹងធ្វើ​ឡើង​ដំណើរ ទៅលេង​ស្រុកកំណើត ជួបជុំ​ជីដូន​ជីតា ឪពុកម្តាយ សាច់ញាតិ ជាដើម​។ ក្នុងនោះ​ក៏មាន​អ្នកដើរ លេង​កម្សាន្ត តាម​រមណីយដ្ឋាន​ជិត​ឆ្ងាយ ពិសេស​នៅ​តំបន់​មាត់សមុទ្រ និង​ព្រៃភ្នំ នៅ​ភាគ​ឦសាន​រួមទាំង​តំបន់ ទេសចរណ៍​នានា​នៅ​ទូទាំងប្រទេស​។

​យ៉ាងណាក៏ដោយ ទោះជា​ទៅលេង​ស្រុកកំណើត ទោះជា​ទៅ​វត្ត​ធ្វើបុណ្យ និង​ទោះជា​ដើរលេង​ទីណា​ណាក៏ដោយ សូម​ម្នាក់ៗ កុំ​ភ្លេច​នូវ​វិធានការ​ទប់ស្កាត់ និង​ការពារ កុំ​ឲ្យ​ឆ្លង​កូ​វីដ​១៩​។ «៣​កុំ និង​៣​ការពារ​»​ត្រូវតែ​អនុវត្ត​ឲ្យ​បាន ជាប់​ជានិច្ច ហើយ​គ្រប់គ្នា មិន​ថា​ព្រះសង្ឃ តាអាចារ្យ យាយជី ឬ​ពុទ្ធបរិស័ទ​ទេ​។ ទោះជា​ក្នុង​រង្វង់​ក្រុមគ្រួសារ ញាតិមិត្ត​ជិត​ឆ្ងាយ ជីដូន​ជីតា ឪពុកម្តាយ និង​កូនចៅ ក៏​ត្រូវតែ​ប្រុងប្រយ័ត្ន​ឲ្យ​បាន​គ្រប់ៗ​គ្នា​ដែរ​។​

​ក្រៅពី​កូ​វីដ ក្នុងអំឡុងពេល​ឈប់សម្រាក​បុណ្យ​ភ្ជុំបិណ្ឌ​នេះ ទាំងអស់គ្នា​ក៏​មិនត្រូវ​ធ្វេសប្រហែស​នឹង​គ្រោះថ្នាក់​ចរាចរណ៍ នោះឡើយ​។ ចូរ​កុំភ្លេចថា រៀងរាល់ឆ្នាំ នៅពេល​បុណ្យទាន តែងតែមាន​កំណើន​នៃ​គ្រោះថ្នាក់​ចរាចរណ៍ កើតឡើង​។ ភ្ជុំ​ឆ្នាំមុន ៣​ថ្ងៃ នៅ​ថ្ងៃទី​១៦-១៨ ខែកញ្ញា ឆ្នាំ​២០២០ គ្រោះថ្នាក់​ចរាចរណ៍ នៅ​ទូទាំងប្រទេស សម្លាប់​មនុស្ស ១៥​នាក់ និង​របួស ៦២​នាក់​។ ចំណែក​ភ្ជុំ​ឆ្នាំ​២០១៩ គឺ ៣​ថ្ងៃ ចាប់ពី​ថ្ងៃទី​២៧-២៩ ខែកញ្ញា មាន​ករណី​គ្រោះថ្នាក់​ចរាចរណ៍ នៅ​ទូទាំងប្រទេស ៥២​លើក ស្លាប់ ២៦​នាក់ និង​របួស ៨០​នាក់​។​

​មូលហេតុ ដែលនាំឱ្យ​កើតមាន​គ្រោះថ្នាក់​ចរាចរណ៍​ពេល​ភ្ជុំបិណ្ឌ ក៏ដូចជា រៀងរាល់ថ្ងៃ គឺ​ដោយសារ​៖ បើកបរ​លឿន មិន​គោរព​សិទ្ធិ មិន​ប្រកាន់​ស្តាំ ស្រវឹង ងងុយដេក ប្រជែង និង​បត់​មិន​ប្រយ័ត្ន​។​

​ដូច្នេះ​អំឡុងពេល​ឈប់សម្រាក​បុណ្យ​ភ្ជុំបិណ្ឌ​នេះ ទាំងអស់គ្នា ត្រូវតែ​ប្រយ័ត្ន​ឆ្លង​កូ​វីដ ហើយក៏​ត្រូវ​ប្រុងប្រយ័ត្ន​នឹង គ្រោះថ្នាក់​ចរាចរណ៍​ដែរ​។ សូមកុំ​ឲ្យ​សប្បាយ​ក្លាយជា​ទុក្ខ​៕​សរន​