ដោយ​៖ ប​.​ជ័យ / បន្ទាយ​មាន​ជ័​យៈ មន្ត្រី​ជំនាញ នៃ​កងរាជអាវុធហត្ថ ខេត្ត​បន្ទាយ មានជ័យ បាន​បញ្ជូន​មេខ្យល់ ២ នាក់ ទៅ​តុលាការ នៅ​ថ្ងៃទី​៤ ខែតុលា នេះ​ពាក់ព័ន្ធ ករណី​នាំ​ពលករ ៦ នាក់ ឆ្លងដែន​ខុសច្បាប់ ទៅរក​ការងា​ធ្វើ នៅ​ប្រទេស​ថៃ​ហើយ​ត្រូវ កម្លាំងយោធា កងការពា​ព្រំដែន លេខ​៥០៣ ឃាត់ខ្លួន កាលពី​ល្ងាច​ថ្ងៃទី​៣ ខែតុលា ឆ្នាំ​២០២១ ។​

​លោក​វរសេនីយ៍ត្រី ធឿ​ង វាសនា នាយការិយាល័យ ប្រឆាំង​ការជួញដូរ​មនុស្ស និង​ការពារ​អនីតិជន នៃ​កងរាជអាវុធហត្ថ ខេត្តបន្ទាយមានជ័យ បានអោយដឹង កាលពី​ថ្ងៃទី​៣ ខែតុលា​ថាៈ ជនសង្ស័យ ជា​មេខ្យល់ និង​ជា​ម្ចាស់​រថយន្ត ដឹក​ពលករ មានឈ្មោះ វ៉ែន វឿន ភេទ​ប្រុស អាយុ​៥៦​ឆ្នាំ រស់នៅ​ភូមិ​សាមគ្គី​មានជ័យ សង្កាត់​-​ក្រុង​ប៉ោយប៉ែត ខេត្តបន្ទាយមានជ័យ និង​ឈ្មោះ យ៉ុង វីរ​: ភេទ​ប្រុស អាយុ​៣៥​ឆ្នាំ រស់នៅ​ភូមិ​ចំការ​គ ឃុំ​ស្វាយចេក ស្រុក​ស្វាយចេក ខេត្តបន្ទាយមានជ័យ​។​

​លោក​បាន​បន្តថាៈ លោក​ឧ​ត្ត​ម​សេនីយ៍​ត្រី ឃួន ជឿន មេបញ្ជាការ កងការពារ​ព្រំដែន លេខ​៥០៣ នៃ​យោធភូមិភាគ​ទី​៥ បាន​ដឹកនាំ​កំលាំង​ល្បាត បាន​ប្រទះឃើញ​មេខ្យល់ និង​ពលករ​ទាំង ៦ នាក់ ក៏បាន​ឃាត់ខ្លួន​បាន នៅវេលា​ម៉ោង ៨ យប់ នា​ថ្ងៃនោះ ។​

​ពលករ បាន​បំភ្លឺ​អោយដឹងថាៈ ពួកខ្លួន​បានសម្រេច​ចិត្ត ឆ្លងដែន​ទៅធ្វើ​ការ​នៅ ប្រទេស​ថៃ ដោយបាន​ទំនាក់ទំនង ទូរស័ព្ទ​ជាមួយ​មេខ្យល់ ក្នុងតម្លៃ​ជូន​ផ្លូវ ៥.០០០ បាត ក្នុង​ម្នាក់ៗ​។​

​នាពេលនោះ ក្រុម​ខ្លួន​បាន​រង់ចាំ​មេខ្យល់ នៅមុខ​សួន​ស្នហ៍​ជនបទ នា​សង្កាត់​ទឹកថ្លា ស្ថិតក្នុង​ក្រុង​សិរីសោភ័ណ ខេត្តបន្ទាយមានជ័យ​។ មួយសន្ទុះ​ក្រោយមក មាន​រថយន្ត ម៉ាក​លុច​ស៊ី​ស ពណ៌​ប្រផេះ ពាក់​ផ្លាកលេខ ប​.​មានជ័យ 2B-1911 មក​យក​ក្រុម​ខ្លួន ហើយ​ចេញដំណើរ​ទៅ ។​

​ពេលទៅដល់​ចំណុច​ចម្ការកៅស៊ូ​មួយកន្លែង ស្រាប់​តែមាន​មនុស្ស​ប្រុស​ម្នាក់ទៀត ឈ្មោះ យ៉ុង វីរ​: ឡើង​ឡាន​ទៅជា​មួយ​ពួកខ្លួន​ដែរ ដោយ​រូបគេ​ប្រាប់ថា រូបគេ​ជា អ្នក​នាំ​ផ្លូវ​ពួកខ្លួន ឆ្លងដែន​ទៅ​ប្រទេស​ថៃ ។ លុះ​ជិះ​ដល់​ចំណុច ប៉ុស្តិ៍​ដើម​ព្រីង ក៏​ត្រូវបាន​កម្លាំងយោធា (​កងការពារ​ព្រំដែន​លេខ​៥០៣ ដឹកនាំ​ដោយ​លោក ឧ​ត្ត​ម​សេនីយ៍​ឃួន ជឿន មេបញ្ជាការ​) ឃាត់​រថយន្ត ហើយ​សួរនាំ និង​ឃាត់​ក្រុម​ខ្លួន បញ្ជូនមក​បញ្ជាការដ្ឋាន កងរាជអាវុធហត្ថ​ខេត្ត ទៅវិញ​។

​លោក​វរសេនីយ៍ឯក ម៉ែន ភិរម្យ មេបញ្ជាការរង កងរាជអាវុធហត្ថ​ខេត្ត ទទួល​ការងារ ស្រាវជ្រាវ និង​បង្ក្រាប​បទល្មើស បានឱ្យដឹងថាៈ ដោយបាន​ការអនុញ្ញាត លោក ឧ​ត្ត​ម​សេនីយ៍ ត្រី បោ​ន ប៊ិន មេបញ្ជាការ កងរាជអាវុធហត្ថ​ខេត្ត មេខ្យល់​ទាំង ២ នាក់​នេះ ត្រូវបាន​មន្ត្រី អាវុធហត្ថ នៅ​ល្ងាច​ថ្ងៃទី​៣ ខែតុលា ឆ្នាំ​២០២១ នេះ បាន​បញ្ជូនទៅ​តុលាការ ដើម្បី​អនុវត្ត តាមច្បាប់​។ ចំណែក​ពលករ​ទាំង ៦ នាក់ ត្រូវបាន​កម្លាំង​ធ្វើ​កិច្ចសន្យា​អប់រំ និង​អោយធ្វើ ច​ត្តា​ឡី​ស័ក រួច​ឱ្យ​វិលត្រឡប់ ទៅ​លំនៅដ្ឋាន​វិញ ៕/V-PC