ដោយ​: ម៉េង​ឆៃ / ភ្នំពេញ​: ក្នុងអំឡុងពេល​ឈប់សម្រាក​បុណ្យ​ភ្ជុំបិណ្ឌ​នេះ ប្រជាពលរដ្ឋ​ជាច្រើន បានធ្វើ​ដំណើរ​ចល័ត​ពី​កន្លែង​មួយទៅ​កន្លែង​មួយ ដើម្បី​ជួបជុំ​ក្រុមគ្រួសារ និង​ធ្វើដំណើរ​កម្សាន្ត ទៅតាម​រមណីយដ្ឋាន​នានា នៅ​ទូទាំងប្រទេស​។ ការធ្វើដំណើរ​ចល័ត​ដូច្នេះ នាំ​ឲ្យ​មានការ​ព្រួយបារម្ភ​ថា នឹង​អាចធ្វើ​ឲ្យ​កម្ពុជា​យើង ប្រឈម​នឹង​ហានិភ័យ​នៃ​ការឆ្លង​រាលដាល​ទ្រង់ទ្រាយ​ធំ​នៃ​ជំងឺ​កូ​វីដ​១៩ ជាពិសេស​មេរោគ​ប្រភេទដែល​តា ដែល​កំពុង​បន្ត​ឆ្លង​រាលដាល​ក្នុង​សហគមន៍​យ៉ាង​ឆាប់រហ័ស​។

​ដើម្បី​ទប់ស្កាត់ និង​បង្ការ​ការឆ្លង​រាលដាល​ទ្រង់ទ្រាយ​ធំ​នៃ​ជំងឺ​កូ​វីដ​១៩ ពិសេស​ដើម្បី​ការពារ​អាយុជីវិត និង​សុខភាព​ប្រជាពលរដ្ឋ ក្នុងអំឡុងពេល​ឈប់សម្រាក​បុណ្យ​ភ្ជុំបិណ្ឌ​នេះ ទាំង​ប្រមុខ​រាជរដ្ឋាភិបាល ទាំង​ក្រសួងសុខាភិបាល ទាំង​ក្រសួង​ការងារ និង​ទាំង​អាជ្ញាធរ​រាជធានី​ភ្នំពេញបានចេញ​វិធានការ​ផង អំពាវនាវ​ផង ធ្វើយ៉ាងណា កុំ​ឲ្យ​ឆ្លង​រាលដាល​កូ​វីដ​១៩​។

​កាលពី​ថ្ងៃអាទិត្យ ទី​៣ ខែតុលា​សម្តេច​តេ​ជោនាយករដ្ឋមន្ត្រី ហ៊ុន សែន បានចេញ​សារាចរ ៣​ចំណុច ស្តីពីការពង្រឹង​វិធានការ​គ្រប់គ្រង​ការឆ្លង​រាលដាល​នៃ​ជំងឺ​កូ​វីដ​១៩ សម្រាប់​អំឡុងពេល និង​ក្រោយពេល​ឈប់សម្រាក​ក្នុង​ពិធីបុណ្យ​ភ្ជុំបិណ្ឌ ដើម្បី​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​១៩​។​

​រាជរដ្ឋាភិបាល ក៏បាន​ប្រកាស​អំពាវនាវ​ដល់​ប្រជាពលរដ្ឋ​ទាំងអស់ ត្រូវ​បង្កើន​ការប្រុងប្រយ័ត្ន នៅក្នុង​អំឡុងពេល​ឈប់សម្រាក​នៃ​ពិធីបុណ្យ​ភ្ជុំបិណ្ឌ​នេះ និង​ត្រូវ​ប្រកាន់ខ្ជាប់​នូវ​វិធានការ​សុវត្ថិភាព​ផ្នែក​សុខាភិបាល ពិសេស​វិធានការ ៣​កុំ និង ៣​ការពារ ព្រមទាំង​ត្រូវគោរព​វិធានការ​រដ្ឋបាល និង​វិធានការ​ច្បាប់ សំដៅ​ការពារ​សុវត្ថិភាព​ផ្ទាល់ខ្លួន និង​ក្រុមគ្រួសារ​ពី​ការឆ្លង​មេរោគ​កូ​វីដ​១៩​។​

​ក្រសួង​ការងារ នៅ​ថ្ងៃទី​៤ ខែតុលា ក៏​បានចេញ​សេចក្តីណែនាំ​បន្ថែម ដោយ​លើកទឹកចិត្ត​ឲ្យ​ម្ចាស់ ឬ​នាយក​រោងចក្រ សហគ្រាស ត្រៀម​ឧបករណ៍​ធ្វើតេស្ត​រហ័ស​រក​មេរោគ​កូ​វីដ​១៩ សម្រាប់ធ្វើ​តេស្ត​រក​មេរោគ​កូ​វីដ​១៩ ដល់​កម្មករនិយោជិត​របស់ខ្លួន ក្រោយពេល​ឈប់សម្រាក​ក្នុង​ពិធីបុណ្យ​ភ្ជុំបិណ្ឌ ឆ្នាំ​២០២១​។ ការធ្វើ​តេស្ត​រហ័ស​រក​មេរោគ​កូ​វីដ​១៩ នេះ គឺ​ផ្អែកលើ​គោលការណ៍​ស្ម័គ្រចិត្ត និង​មិនមាន​ការផាកពិន័យ​ទៅលើ​ម្ចាស់ ឬ​នាយក​រោងចក្រ សហគ្រាស និង​កម្មករនិយោជិត​ឡើយ​។​

​ក្នុងនោះ ដើម្បី​ចូលរួមចំណែក​ប្រយុទ្ធ និង​ទប់ស្កាត់​ការរីក​រាលដាល​ទ្រង់ទ្រាយ​ធំ​នៃ​ជំងឺ​កូ​វីដ​១៩ នៅតាម​រោងចក្រ សហគ្រាស ក៏ដូចជា ការរៀន​រស់នៅ​តាម​គ​ន្ល​ង​ប្រក្រតីភាព​ថ្មី ( New Normal ) និង​ការត្រៀម​បើក​សកម្មភាព​សេដ្ឋកិច្ច​ឡើងវិញ ក្រសួង​ការងារ ក៏បាន​ណែនាំ​ដល់​កម្មករនិយោជិត ដែល​បាន​ឈប់សម្រាក​ក្នុង​ពិធីបុណ្យ​ភ្ជុំបិណ្ឌ​នេះ ត្រូវអនុវត្ត​ឲ្យ​បាន​ខ្ជាប់ខ្ជួន​នូវ​វិធានការ «៣​ការពារ និង ៣​កុំ​» ជាពិសេស​ពាក់​ម៉ាស លាងដៃ​ញឹកញាប់​នឹង​សាប៊ូ រក្សា​គម្លាត​សុវត្ថិភាព​បុគ្គល ក្នុងពេល​ធ្វើដំណើរ​ដោយ​រថយន្ត​រួម និង​ត្រូវ​យកតាម​ខ្លួន​នូវ​ទឹក​អាល់កុល ឬ​អាល់កុល​ជែ​ល​លាងដៃ​។​

​រីឯ​រដ្ឋមន្ត្រី​ក្រសួងសុខាភិបាល ក៏បាន​ចេញ​លិខិត នៅ​ថ្ងៃទី​៤​តុលា ណែនាំ​ដល់​អភិបាលខេត្ត​រាជធានី​ទូទាំងប្រទេស ត្រូវ​ពង្រឹង​សកម្មភាព​នៃ​យុទ្ធនា​ការអប់រំ​ផ្សព្វផ្សាយ និង​ជំរុញ​ការចាក់​វ៉ាក់សាំង​កូ​វីដ​១៩ ដល់​ប្រជាពលរដ្ឋ​ក្រុម​គោលដៅ​ឲ្យ​បាន​គ្រប់ៗ​គ្នា​។

​កន្លងមកនេះ ក្រសួងសុខាភិបាល សង្កេតឃើញ​មានការ​ធ្វេសប្រហែស​រប​ស់បង​ប្អូន​ប្រជាពលរដ្ឋ​មួយចំនួន ក្នុងការ​អនុវត្ត​វិធានការ​បង្ការ​ការចម្លង​វីរុស​កូ​វីដ​១៩ ដែល​ធ្វើ​ឲ្យ​មានការ​ហក់​ឡើងវិញ នូវ​ការ​ចម្លងជំងឺ​កូ​វីដ​១៩ នៅតាម​ខេត្ត​មួយចំនួន ហើយ​ក្នុងនោះ ការឆ្លង​ជំងឺ​កូ​វីដ​១៩ ធ្ងន់ធ្ងរ និង​ការស្លាប់​មាននៅ​ក្នុងចំណោម​បងប្អូន​ប្រជាពលរដ្ឋ ដែល​មិនទាន់បាន​ចាក់​វ៉ាក់សាំង​កូ​វីដ​១៩​។​

​មួយថ្ងៃ​មុន​ថ្ងៃ​ឈប់សម្រាក​បុណ្យ​ភ្ជុំបិណ្ឌ គឺ​រដ្ឋបាល​រាជធានី​ភ្នំពេញ បានចេញ​លិខិត ប្រកាស​លើកទឹកចិត្ត​ឲ្យ​អ្នកធ្វើដំណើរ​ទៅ​ស្រុក និង​កម្សាន្ត​តាម​រមណីយដ្ឋាន អំឡុងពេល​ភ្ជុំបិណ្ឌ ប្រើ​មធ្យោបាយ​ធ្វើដំណើរ​ឯកជន​។ នោះ​គឺ​ដើម្បី​ចូលរួម​បង្ការ ទប់ស្កាត់ និង​កាត់បន្ថយ​ការឆ្លង​រាលដាល​ទ្រង់ទ្រាយ​ធំ​នៃ​ជំងឺ​កូ​វីដ​១៩ ក្នុងអំឡុងពេល និង​ក្រោយពេល​ឈប់សម្រាក​ក្នុង​ពិធីបុណ្យ​ភ្ជុំបិណ្ឌ ពិសេស​មេរោគ ប្រភេទ​ដែល​តា ( Delta ) ដែល​កំពុង​បន្ត​ឆ្លង​រាលដាល​ក្នុង​សហគមន៍​យ៉ាង​ឆាប់រហ័ស រដ្ឋបាល​រាជធានី​ភ្នំពេញ សូម​អំពាវនាវ និង​លើកទឹកចិត្ត​ដល់​បងប្អូន​ប្រជាពលរដ្ឋ ដែលជា​អ្នកធ្វើដំណើរ​ទៅ​ជួបជុំ​គ្រួសារ​នៅ​ស្រុកកំណើត និង​ធ្វើដំណើរ​កម្សាន្ត​តាម​រមណីយដ្ឋាន​នានា ឲ្យ​ប្រើ​មធ្យោបាយ​ធ្វើដំណើរ​ឯកជន ដោយ​ចៀសវាង​ការប្រើ​មធ្យោបាយ​ធ្វើដំណើរ​រួម ដែល​ងាយ​នឹង​ឆ្លង​កូ​វីដ​១៩​។

​ក្នុងករណី​ចៀស​មិន​ផុតពី​ការប្រើ​មធ្យោបាយ​ធ្វើដំណើរ​រួមគ្នា​នោះ រដ្ឋបាល​រាជធានី​ភ្នំពេញ សូម​ឲ្យ​បងប្អូន​ប្រជាពលរដ្ឋ ដែលជា​អ្នកធ្វើដំណើរ​អំឡុងពេល​ឈប់សម្រាក​នេះ ត្រូវអនុវត្ត​ឲ្យ​បាន​ម៉ឺងម៉ាត់​ដាច់ខាត​តាម​វិធាន​សុខាភិបាល ជាពិសេស​វិធានការ ៣​កុំ និង​៣​ការពារ​។​

​តាម​រដ្ឋបាល​រាជធានី​ភ្នំពេញ ក្នុងអំឡុងពេល​ឈប់សម្រាក​បុណ្យ​ភ្ជុំបិណ្ឌ​នេះ ប្រជាពលរដ្ឋ​ជាច្រើន អាចធ្វើ​ដំណើរ​ទៅ​ជួបជុំ​គ្រួសារ និង​ធ្វើដំណើរ​កម្សាន្ត តាម​រមណីយដ្ឋាន​នានា ដែល​អាចធ្វើ​ឲ្យ​ប្រទេស​កម្ពុជា​យើង ប្រឈម​នឹង​ហានិភ័យ​នៃ​ការឆ្លង​រាលដាល​ទ្រង់ទ្រាយ​ធំ​នៃ​ជំងឺ​កូ​វីដ​១៩​។​

​ក្រៅពីនេះ អាជ្ញាធរ​សមត្ថកិច្ច​រាជ​ធានី​ភ្នំពេញ ក្នុង​សន្និសីទកាសែត នៅ​រសៀល​ថ្ងៃទី​៤ ខែតុលា ក៏បាន​ប្រកាស​រឹតបន្តឹង​លើ​ការអនុវត្ត​ច្បាប់​ចរាចរណ៍​ផ្លូវគោក និង​វិធានការ​ការពារ​ការរីក​រាលដាល​ជំងឺ​កូ​វីដ​១៩ ក្នុងពេល​ប្រជាពលរដ្ឋ សម្រុក​ចាកចេញ​ពី​ភ្នំពេញ ទៅកាន់​ស្រុកកំណើត និង​ដើរលេង​កម្សាន្ត ក្នុងឱកាស​បុណ្យ​ភ្ជុំបិណ្ឌ​នេះ​។

​អាជ្ញាធរ​សមត្ថកិច្ច​រាជ​ធានី​ភ្នំពេញ តម្រូវ​ឲ្យ​អ្នកធ្វើដំណើរ​ទាំងអស់ ទោះជា​តាម​ឡាន​ឈ្នួល ឡានក្រុង ឡាន​ផ្ទាល់ខ្លួន និង​តាម​ម៉ូតូ​ក៏ដោយ ពេល​ចេញចូល​រាជធានី​ភ្នំពេញ ត្រូវតែ​ពាក់​ម៉ាស​ឲ្យ​បាន​គ្រប់ៗ​គ្នា រួមទាំង​ការគោរព​ច្បាប់​ចរាចរណ៍​។ បើ​មិន​ដូច្នោះ​ទេ ប៉ូលិស ដែល​ដាក់ពង្រាយ​តាម​ច្រក​ផ្លូវចេញចូល​រាជធានី​ភ្នំពេញ នឹង​ចាប់​ផាកពិន័យ តាមច្បាប់ ដោយ​គ្មាន​ការលើកលែង​ឡើយ​។

​ជា​សរុប ការបោះ​ជំហាន​ឆ្ពោះទៅកាន់​ការបើក​ដំណើរការ​ប្រទេស​ពេញលេញ​ឡើងវិញ លើ​គ្រប់​វិស័យ នាពេលខាងមុខ គឺ​រង់​ចាំមើល​លទ្ធផល ក្នុងអំឡុងពេល និង​ក្រោយ​ការឈប់​សម្រាក​បុណ្យ​ភ្ជុំបិណ្ឌ​នេះ​។ តើ​ឆ្លង​រាលដាល​កូ​វីដ ឬទេ ដោយសារតែ​ការ​ចល័ត​ធ្វើដំណើរ​ច្រើន ពិសេស​អ្នក​ចេញពី​ភ្នំពេញ ទៅលេង​ស្រុក​ផង និង​អ្នក​ចេញទៅ​ខេត្ត​ដើរលេង តាម​រមណីយដ្ឋាន​នានា​ផង​។​

​តែ​ឆ្លង ឬ​មិន​ឆ្លង ហើយ​អាច​បើក​ប្រទេស​បាន​ឡើងវិញ ឬ​មិនបាន ក៏​អាស្រ័យ​លើ​ប្រជាពលរដ្ឋ​យើង​ម្នាក់ៗ មិន​ថា ពេល​ភ្ជុំ ក្រោយ​ភ្ជុំ ឬ​ពេលណា​ណា​នោះទេ​។ ម្នាក់ៗ ត្រូវតែ​បន្ត​អនុវត្ត​វិធានការ​សាមញ្ញៗ តែមាន​ប្រសិទ្ធភាព​ខ្ពស់ កុំ​ឲ្យ​ឆ្លង​កូ​វីដ តាមរយៈ ៣​ការពារ គឺ​ពាក់​ម៉ាស លាងដៃ​ឲ្យ​ញឹកញាប់ និង​រក្សា​គម្លាត​សុវត្ថិភាព​បុគ្គល​ពីមួយ​ម៉ែត្រ​កន្លះ​ឡើង រួមទាំង​វិធានការ ៣​កុំ គឺ​កុំទៅ​កន្លែង​មាន​មនុស្ស​ច្រើន កុំទៅ​កន្លែង​បិទ​ជិត​គ្មាន​ខ្យល់​ចេញចូល កុំ​ប៉ះពាល់​គ្នា កុំ​ចាប់ដៃគ្នា និង​កុំ​កៀក​ស្មា​គ្នា នៅតែ​ចាំបាច់​បំផុត និង​ត្រូវអនុវត្ត​ជាប់​ជាប្រចាំ ទោះបី​ម្នាក់ៗ បាន​ចាក់​វ៉ាក់សាំង​រួចហើយ​ក៏ដោយ​។​

​ម្យ៉ាងទៀត រាជរដ្ឋាភិបាល មាន​ភាគរយ​ខ្ពស់ គូសវាស​ទុក​រួចហើយ​ថា អ្វីៗ នឹង​ដំណើរ​រលូន​តាម​ការគ្រោង​ទុក គឺ​កម្ពុជា​យើង នឹង​បើក​ប្រទេស​ឡើងវិញ​បាន ព្រោះ​កាលពី​ពាក់កណ្តាល​ខែកញ្ញា សាលារៀន​បើក​ដំណើរការ​ឡើងវិញ ដោយ​មិនមាន​បញ្ហា​អ្វី ទោះបីជា​អ្នក​ភ្នំពេញ រកឃើញ​គ្រូ និង​សិស្ស ៤៧​នាក់ ឆ្លង​កូ​វីដ នៅមុន និង​នៅ​ថ្ងៃ​បើក​សាលារៀន​ដំបូង ថ្នាក់​អនុវិទ្យាល័យ និង​វិទ្យាល័យ​ក៏ដោយ​។ មួយវិញទៀត ប្រជាជន​កម្ពុជា ចាប់ពី​អាយុ ៦​ឆ្នាំ​ឡើង ចាក់​វ៉ាក់សាំង បាន​ដល់​ជាង ១៣​លាន​នាក់ ជិត​គ្រប់​ចំនួន​តាម​ផែនការ ហើយ​អ្នក​អាយុ​ចាប់ពី ១៨​ឆ្នាំ​ឡើង ក៏បាន​ចាក់​វ៉ាក់សាំង​ដូ​ស​ទី​៣ ជា​បណ្តើរៗ ខណៈ​ថ្ងៃទី​១១​តុលា ពេល​ភ្ជុំ​រួច នឹង​ចាប់ផ្តើម​ចាក់​ដូ​ស​ទី​៣ ដល់​ប្រជាជន​ទូទៅ​។ ពេលនេះ កម្ពុជា កំពុង​រៀន​រស់​ជាមួយ​កូ​វីដ ខណៈ​អត្រា​អ្នក​ឆ្លង​ថយចុះ ទោះបីជា​អ្នក​ស្លាប់មាន​ក្នុង​រង្វង់ ២០​នាក់ ក្នុង​ថ្ងៃ​ក៏ដោយ​៕​សរន