ដោយៈ ប​.​ខុន / ភ្នំពេញៈ ប្រព័ន្ធ​សម្ពាធ​ទាប នៅ​ថ្ងៃទី​៥ ខែតុលា បាន​ស្ថិតនៅលើ ភាគ​ខាង ត្បូង របស់​ប្រទេស​កម្ពុជា ហើយ​វា​នឹង​រំកិល ឡើងលើ (​ជើង​) នៅពេល​បន្ទាប់ ធ្វើឱ្យមាន ភ្លៀង​ធ្លាក់ រាយប៉ាយ ខ្លាំង នៅលើ​ផ្ទៃសមុទ្រ ព្រម​ពេល​ជាមួយគ្នានេះ សម្ពាធ​ទាប​សកម្ម នៅក្នុង​សមុទ្រ​ចិន​ខាងត្បូង ដែលមាន​ការវិវត្ត នឹង​បង្កើន​ឥទ្ធិពល ទៅជា​កូន​ព្យុះ នៅពេល បន្ទាប់​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​៥ ខែតុលា​នេះ​ថាៈ ប្រព័ន្ធ​សម្ពាធ​ពេលនេះ (៥ តុលា​) ស្ថិតនៅលើ​ភាគខាងត្បូង របស់​ប្រទេស​កម្ពុជា ហើយ​វា​នឹង​រំកិល​ឡើងលើ (​ជើង​) នៅពេល បន្ទាប់ ធ្វើឱ្យ​ការ​ភ្លៀង​ធ្លាក់ រាយប៉ាយ មាន​ជា​ហូរហែរ​។ នៅលើ​ផ្ទៃសមុទ្រ មាន​ខ្យល់​ខ្លាំង និង​រលក​ខ្ពស់ៗ​។​

​នៅឯ​ក្នុង​សមុទ្រ​ចិន​វិញ អ្នកនាំពាក្យ​ក្រសួង​ជំនាញ ខាងលើ បានបញ្ជាក់​ថាៈ សម្ពាធ​ទាប សកម្ម នៅលើ​ប្រទេស​ហ្វីលីពីន បាន​រំកិល​ចូលក្នុង​សមុទ្រ​ចិន​ខាងត្បូង ដោយមាន​ការវិវត្ត ប្រែប្រួល​លឿន ហើយនឹង​បង្កើន​ឥទ្ធិពល ទៅជា​កូន​ព្យុះ នៅពេល​ខាងមុខ​។​

​ក្រសួង​ធនធានទឹក និង​ឧតុនិយម នៅ​ថ្ងៃទី​៥ ខែតុលា បាន​ជូនដំណឹង ស្តីពី​ការ​ព្យាករ ស្ថានភាព​អាកាសធាតុ សម្រាប់​ពីថ្ងៃ​ទី​៦ ដល់​ថ្ងៃទី​១២ ខែតុលា ឆ្នាំ​២០២១​ថាៈ នៅ​ថ្ងៃទី​៨ ខែតុលា ខាងមុខ មាន​សម្ពាធ​ទាប​សកម្ម​មួយ បានកើត​ឡើង នៅលើ​ប្រទេស​ហ្វីលីពីន ។
​សម្ពាធ​ទាប​សកម្ម​នេះ នឹង​បង្កើន​ឥទ្ធិពល ជា​បន្តបន្ទាប់ ធ្វើដំណើរ​ចូលក្នុង​សមុទ្រ​ចិន ខាងត្បូង ដោយ​អាច​បង្កើន​ឥទ្ធិពល ទៅជា​ព្យុះ​ទី​១៧ ព្រម​ពេល ព្រះរាជាណាចក្រ​កម្ពុជា ទទួល​ឥទ្ធិពល ពី​ខ្យល់មូសុង​និរតី ក្នុង​កម្រិត​ពី មធ្យម ទៅ​ខ្លាំង ជ្រលង​សម្ពាធ​ទាប ប៉ាស៊ីហ្វិក​, ឥទ្ធិពល​ព្យុះ​ទី​១៧ និង​ប្រព័ន្ធ​សម្ពាធ​ទាប (ITCZ)​។​

​សេចក្តីជូនដំណឹង សរសេរ​ទៀតថាៈ ស្ថានភាព​អាកាសធាតុ​បែបនេះ ធ្វើឱ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា ពី ២១ ទៅ ២៣ អង្សា​សេ សីតុណ្ហភាព អតិបរមា មាន​ពី ២៨ ទៅ ៣០ អង្សា​សេ អាច​នឹងមាន​ពពក​ច្រើន​ដេរដាស មាន​ភ្លៀង​ផ្គរ រន្ទះ ក្នុង​កម្រិត​ពី​មធ្យម​ទៅ​ខ្លាំង ដែល​អាច​បង្ក​ជា​ជំនន់​ទឹកភ្លៀង ក្នុងភូមិ​សាស្ត្រ មួយចំនួន ដូចជា រាជធានី​ភ្នំពេញ ខេត្តកណ្តាល ស្វាយរៀង ព្រៃវែង កំពង់ស្ពឺ តាកែវ កំពង់ឆ្នាំង ពោធិ៍សាត់ កំពង់ធំ និង​ខេត្តសៀមរាប ។ ពីថ្ងៃ​ទី​១០ ដល់ ១២ ខែតុលា នឹង​អាចមាន​ខ្យល់​កន្ត្រាក់ ក្នុង​ល្បឿន​មធ្យម ។

​សម្រាប់​បណ្តា​ខេត្ត ជាប់​ជួរ​ភ្នំ​ដងរែក និង​ខ្ពង់រាប​ឦសាន មាន​សីតុណ្ហភាព អប្បបរមា ពី ១៩ ទៅ ២១ អង្សា​សេ សីតុណ្ហភាព អតិបរមា មាន​ពី ២៥ ទៅ ២៧ អ​អ្សា​សេ អាច​នឹងមាន ពពក​ច្រើន ដេរដាស មាន​ភ្លៀង​ផ្គរ រន្ទះ ក្នុង​កម្រិត​ពី​មធ្យម​ទៅ​ខ្លាំង ដែល​អាច​បង្ក​ជា ជំនន់​ទឹកភ្លៀង ក្នុងភូមិ​សាស្ត្រ​មួយចំនួន ដូចជា ខេត្តព្រះវិហារ ឧ​ត្ត​រ​មានជ័យ កំពង់ចាម និង​ខេត្ត​ត្បូង ឃ្មុំ ។ ពីថ្ងៃ​ទី​១០ ដល់ ១២ ខែតុលា អាចមាន​ខ្យល់​កន្ត្រាក់ ក្នុង​ល្បឿន ពី​មធ្យម ទៅ​ខ្លាំង​។​

​សម្រាប់​តំបន់​មាត់សមុទ្រ មាន​សីតុណ្ហភាព អប្បបរមា ពី ២១ ទៅ ២៣ អង្សា​សេ សីតុណ្ហភាព អតិបរមា មាន​ពី ២៥ ទៅ ២៧ អង្សា​សេ អាចមាន​ពពក​ច្រើន មាន​ភ្លៀង​ធ្លាក់ ក្នុង​កម្រិត​ពី​តិច ទៅ​មធ្យម អាចមាន​ពពក​ច្រើន ដេរដាស មាន​ភ្លៀង ផ្គរ រន្ទះ ក្នុង​កម្រិត​មធ្យម ទៅ​ខ្លាំង ដែល​អាច​បង្ក ជា​ជំនន់​ទឹកភ្លៀង ក្នុងភូមិ​សាស្ត្រ​មួយចំនួន ដូចជា ខេត្តកោះកុង និង​ក្រុងព្រះសីហនុ ។ ពីថ្ងៃ​ទី ១០-១២ ខែតុលា អាចមាន​ខ្យល់​កន្ត្រាក់ ក្នុង​ល្បឿន ពី​មធ្យម​ទៅ​ខ្លាំង ជាមួយនឹង​រលក នៅលើ​ផ្ទៃសមុទ្រ មាន​កម្ពស់​ពី​មធ្យម ទៅ​ខ្ពស់ ។​

​យោងតាម​ការ​ព្យាករ ស្ថានភាព​ធាតុអាកាស ដូច​ជម្រាបជូន​ខាងលើ ក្រសួង​ធនធានទឹក និង​ឧតុនិយម បាន​អំពាវនាវ​ដល់ សាធារណជន បង្កើន​ការប្រុងប្រយ័ត្ន​ខ្ពស់ ចំពោះ​បាតុភូត ខាងលើ​៕/V​