​ប្រែ​សម្រួលៈ​វាសនា​/​តៃ​ប៉ិះ​,​វ៉ាស៊ីនតោន ៖ ក្រោយ​ពី​យន្តហោះ​យោធា​ចិន​ក្នុង​ចំនួន​ដ៏​ច្រើន​បំផុត​បាន​ហោះចូល​ក្នុង​អ្វីដែល​អាជ្ញាធរ​កោះ​នេះ​អះអាងថា​ជា​តំបន់​ការពារ​ដែនអាកាស​របស់ខ្លួន រដ្ឋ​​មន្ត្រី​យោធា​នៃ​កោះ​តៃវ៉ាន់​បាន​និយាយ​កាលពី​ថ្ងៃ​ពុធ​នេះ​ថា ភាព​តានតឹង​យោធា​ជាមួយ​ចិន​មាន​សភាព​អាក្រក់​បំផុត​នៅ​រយៈពេល​៤​ទសវត្សរ៍​មក​នេះ​។​

​ភាព​តានតឹង​បាន​ឡើង​ដល់​កំរិត​ខ្ពស់​សាជាថ្មី រវាង​រដ្ឋាភិបាល​ក្រុងតៃ​ប៉ិះ​និង​ប៉េកាំង​ដែល​ចាត់ទុកកោះ​តៃវ៉ាន់​ជា​ផ្នែក​មួយ​នៃ​ទឹកដី​របស់​ចិន នៅពេល​យន្តហោះ​យោធា​ចិន​កាន់តែ​បង្កើន​ចំនួន​​យន្តហោះ​និង​ចំនួន​ដង​ហោះ​ចូលទៅក្នុង​តំបន់​ដែល​តៃវ៉ាន់​កំណត់ថា​ជា​តំបន់​ការពារ​ដែនអាកាស​របស់ខ្លួន​។​

​រយៈពេល​៤​ថ្ងៃ​ចាប់ពី​ថ្ងៃ​សុក្រ​សប្តាហ៍​មុន តៃវ៉ាន់​បាន​កត់ត្រា​ឃើញ​យន្តហោះ​ចិន​ដល់​ទៅ​១៥០​គ្រឿង​ហោះ​ចូលក្នុង​អ្វី​ដែល​តៃវ៉ាន់​អះអាងថា​ជា​តំបន់​ការពារ​ដែល​អាកាស​របស់ខ្លួន តែ​ចិន​ចាត់ទុក​​ថា​វា​ស្ថិតក្រោម​អធិបតេយ្យភាព​របស់​ខ្លួន​។​

​នៅពេល​ត្រូវ​បាន​សមាជិកសភា​ម្នាក់​សួរ​អំពី​ភាព​តានតឹង​យោធា​ជាមួយ​ចិន រដ្ឋ​មន្ត្រី​យោធា​តៃវ៉ាន់​លោក សុង កូ​ឆេង បាន​និយាយថា សភាពការណ៍​«​ធ្ងន់ធ្ងរ​បំផុត​»​បើ​ធៀប​នឹង​សភាពការណ៍​​នានា​នៅ​ជាង​៤០​ឆ្នាំ​មកនេះ ចាប់តាំងពី​លោក​បាន​ចូលរួម​ក្នុង​ជួរ​យោធា​មក​។​លោក​បាន​បន្ថែមថា​អាច​មាន​ហានិភ័យ​អំពី​«​ការបាញ់​ដោយ​យល់ច្រឡំ​»​កាត់​ច្រក​សមុទ្រ​តៃវ៉ាន់​។​

​លោក​បាន​ប្រាប់​គណៈកម្មាធិការ​សភា​មួយ​ដែល​កំពុង​ពិនិត្យ​មើល​ឡើងវិញ​លើ​ចំណាយ​យោធា​ចំនួន​២៤០​ពាន់​លាន​ដុល្លារ​តៃវ៉ាន់​(៨,៦១​ពាន់​លាន​ដុល្លារ​អាម៉េរិក​)​សំរាប់​សព្វាវុធ​ផលិត​ក្នុងស្រុក​ រួម​មាន​កាំជ្រួច​និង​នាវាចម្បាំង​ថា «​សំរាប់​ខ្ញុំ​ជា​ទាហាន​ម្នាក់ ភាព​បន្ទាន់​កំពុងស្ថិត​នៅ​ពីមុខ​ខ្ញុំ​ហើយ​»​។​

​ចិន​ចាត់ទុក​តៃវ៉ាន់​ជា​ខេត្ត​ផ្តាច់ខ្លួន​មួយ​ដែល​រង់ចាំតែ​បង្រួបបង្រួម​ជាមួយ​ចិន​ឡើងវិញ និង​អាច​ប្រើ​កម្លាំង​ក្នុង​ករណី​ចាំបាច់ តែ​អាជ្ញាធរ​តៃវ៉ាន់​និយាយថា ខ្លួន​ជា​ប្រទេស​ឯករាជ្យ​មួយ​ហើយ​​នឹង​ការពារ​សេរីភាព​និង​លទ្ធិប្រជាធិបតេយ្យ​របស់​ខ្លួន ។​

​លោក​សុង បាន​និយាយថា ចិន​មាន​សមត្ថភាព​ចូល​ឈ្លានពាន​តៃវ៉ាន់​និង​អាច​ធ្វើការ​វាយលុក​ចូល​តៃវ៉ាន់​ពេញទំហឹង​នៅ​យ៉ាងយូរ​ត្រឹម​ឆ្នាំ​២០២៥​។​

​ការចំណាយ​យោធា​ពិសេស​របស់​តៃវ៉ាន់​នៅ​៥​ឆ្នាំ​ខាង​មុខ​ភាគច្រើន​នឹង​ធ្លាក់​ទៅលើ​សព្វាវុធ​ជើង​ទឹក រួម​មាន​សព្វាវុធ​ប្រឆាំង​នាវា​មុជទឹក ដូចជា​ប្រព័ន្ធ​កាំជ្រួច​មាន​មូលដ្ឋាន​លើដី​។​

​ការលើកឡើង​របស់​លោក​សុង​កើតឡើង​ក្រោយ​ពី​ប្រធានាធិបតី​អាម៉េរិក​បាន​និយាយ​កាលពី​ថ្ងៃ​អង្គារ​ថា លោក​បាន​និយាយ​ទៅកាន់​ប្រធានាធិបតី​ចិន ស៊ី ជីន​ភីង អំពី​បញ្ហា​កោះ​តៃវ៉ាន់​ហើយ​​ថា​ពួក​លោក​បាន​យល់ព្រម​គោរព​តាម​កិច្ចព្រមព្រៀង​តៃវ៉ាន់​។​

​លោកបៃ​ដិន​ទំនង​ចង់​និយាយ​ដល់ «​គោលការណ៍​ចិន​តែមួយ​»​ដែល​មាន​ជា​យូរ​មក​ហើយ​ដែល​នៅក្រោម​គោលការណ៍​នេះ អាម៉េរិក​ទទួល​ស្គាល់​តែ​រដ្ឋាភិបាល​ក្រុង​ប៉េកាំង និង​មិន​ទទួលស្គាល់​​រដ្ឋាភិបាល​ក្រុង​តៃប៉ិះ​ទេ ព្រមទាំង​«​ច្បាប់​ទំនាក់ទំនង​តៃវ៉ាន់​»​ដែល​បញ្ជាក់​ច្បាស់​ថា រដ្ឋាភិបាល​ក្រុង​វ៉ាស៊ីនតោន​សំរេច​បង្កើត​ទំនាក់ទំំនង​ការទូត​ជាមួយ​ចិន​ប៉េកាំង​ជំនួស​អោយ​តៃវ៉ាន់ អាស្រ័យ​​លើ​ការ​រំពឹងថា អនាគត​របស់​តៃវ៉ាន់ នឹងត្រូវ​កំណត់​ដោយ​មធ្យោបាយ​សន្តិ​វិធី​៕

​រដ្ឋ​មន្ត្រី​យោធា​កោះ​តៃវ៉ាន់ អះអាង​ប្រាប់​សភា​ថា ចិន​មាន​សមត្ថភាព​វាយលុក​ចូល​កោះ​តៃវ៉ាន់​