ដោយ​: សុខ​សុ​ភ័​ណ្ឌ / កំពង់ស្ពឺ​: បុរស​ម្នាក់​បាន​ស្លាប់​ក្នុង​ថ្លុកឈាម ដោយសារ​ជនសង្ស័យ​ម្នាក់ កាប់​នឹង​កាំបិតផ្គាក់ វាយ​នឹង​ចបជីក ត្រង់ចំណុច​ភូមិ​អូរ​អង្គុំ ឃុំ​អម​លាំង ស្រុក​ថ្ពង ខេត្តកំពង់ស្ពឺ​កាលពី​ថ្ងៃទី​៥​ខែតុលា​ឆ្នាំ​២០២១​។​

​លោក ហ៊ុន សុ​ហុន អធិការនគរបាល​ស្រុក​ថ្ពង បាន​ឲ្យ​ដឹងថា ជនសង្ស័យ​ដែល​ត្រូវ​ឃាត់ខ្លួន​នេះ មានឈ្មោះ អ្វី មីន ភេទ​ប្រុស អាយុ​៣៦​ឆ្នាំ នៅ​ភូមិ​អូរ​អង្គុំ ឃុំ​អម​លាំង ស្រុក​ថ្ពង​ ​បាន​ទាស់​ពាក្យសម្តី​គ្នា​ជាមួយ​ជនរងគ្រោះ ឈ្មោះ សៅ វ៉ៃ ភេទ​ប្រុស​អាយុ​៥១​ឆ្នាំ រស់នៅក្នុង​ភូមិ​ឃុំ​ជាមួយគ្នា បាន​យក​កាំបិតផ្គាក់​យកមក​កាប់ និង​ចបជីក​វាយ​បណ្តាល​ឲ្យ​បែកក្បាល​ធ្លាយ​ខួរ​ បណ្តាល​ឲ្យ​ជនរងគ្រោះ​ស្លាប់​ភ្លាមៗ​នៅនឹងកន្លែង​។​

​ប្រភព​បាន​បន្តថា ក្រោយ​ឃាត់ខ្លួន​ ជនសង្ស័យ​បាន​សារភាពថា គេ​ពិតជា​បាន​យក​កាំបិតផ្គាក់ និង​ចបជីក​វាយ​លើ​ជនរងគ្រោះ​ពិតប្រាកដ​មែន​ ដោយ​ជនរងគ្រោះ​ជេរប្រមាថ​ឪពុកម្តាយ​របស់គេ ហើយខឹង​ទ្រាំលែងបាន ទើប​កាប់​វាយ​នឹង​ចបជីក​ទៅ​ជនរងគ្រោះ​តែម្តង​៕​