​ប្រែ​សម្រួលៈ​វាសនា​/​ម៉ានីល​៖ អនុ​ប្រធានាធិបតី​ហ្វីលីពីន លោកស្រី ឡេ​នី រ៉ូ​ប្រេ​ដូ បាន​និយាយ​កាលពី​ថ្ងៃ​ព្រហស្បតិ៍​ទី​៧​តុលា​ថា លោក​ស្រី​នឹង​ឈរ​ឈ្មោះ​សំរាប់​មុខតំណែង​ប្រធានាធិបតី​ក្នុងការ​​បោះឆ្នោត​ឆ្នាំ​២០២២​ខាងមុខ​។​

​រ៉ូ​ប្រេ​ដូ វ័យ​៥៦​ឆ្នាំ ដែល​ជា​មេធាវី​សិទ្ធិមនុស្ស​និង​ជា​ស្ត្រី​មេម៉ាយ​របស់​អតីតរដ្ឋមន្ត្រី​មហាផ្ទៃ​ម្នាក់ ដឹកនាំ​ក្រុមប្រឆាំង​និង​ជា​បុគ្គល​រិះគន់​ប្រធានាធិបតី​ជិត​ផុត​តំណែង រ៉ូ​ឌ្រី​ហ្គោ ឌុយ​ទែត និង​សង្គ្រាម​​ប្រឆាំង​ថ្នាំញៀន​ដ៏​បង្ហូរ​ឈាម​របស់​លោក​។​

​ក្នុង​សុន្ទរកថា​ផ្សាយ​បន្ត​ផ្ទាល់​១៥​នាទី​ក្នុង​បណ្តាញ​សង្គម លោកស្រី​បាន​និយាយថា​«​ខ្ញុំ​សន្យា​ផ្តល់​កំលាំង​ថាមពល​របស់​ខ្ញុំ​មិន​ត្រឹមតែ​ក្នុង​ការបោះឆ្នោត តែ​នៅពេល​សេសសល់​ប៉ុន្មាន​ថ្ងៃ​ក្នុង​តំណែង​​អនុ​ប្រធានាធិបតី​ដើម្បី​ប្រយុទ្ធ​សំរាប់​ហ្វីលីពីន​»​។​

​សូមបញ្ជាក់​ថា នៅ​ហ្វីលីពីន អនុ​ប្រធានាធិបតី​ត្រូវបាន​បោះឆ្នោត​ជ្រើសរើស​ផ្សេង​ពី​ប្រធានាធិបតី ហើយ​លោក​ស្រី រ៉ូ​ប្រេ​ដូ ខ្វែងគំនិត​ជាមួយ​ប្រធានាធិបតី ឌុយ​ទែតលើ​បញ្ហា​ជាច្រើន​។​

​លោក​ឌុយ​ទែ​តមិន​ឈរឈ្មោះ​សំរាប់​អាណត្តិ​ថ្មី​ទេ ដោយសារ​ច្បាប់​ហាមឃាត់​។​

​រ៉ូ​ប្រេ​ដូ ម្តាយ​កូន​៣​រូប​នេះ​រំពឹងថា​នឹង​ដាក់​ពាក្យសុំ​បេក្ខភាព​ចូលរួម​ប្រកួតប្រជែង​យក​តំណែង​ប្រធានាធិបតី​ឆ្នាំ​២០២២​នៅ​ថ្ងៃ​ព្រហស្បតិ៍​នេះ

​ជុំវិញ​ការ​ឈរឈ្មោះ​បោះឆ្នោត​នេះដែរ ក្រុម​សិទ្ធិ​មនុស្ស​ហ្វីលីពីន បាន​ធ្វើ​ការតវ៉ា​ប្រឆាំង​កាលពី​ថ្ងៃ​ពុធ​ទី​៦​តុលា ដើម្បី​ថ្កោលទោស​ការប៉ុនប៉ង​របស់​កូនប្រុស​របស់​អតីតជន​ផ្តាច់​ការ​ហ្វែ​រ​ឌី​ណង់ ម៉ា​​កូស សំរាប់​មុខ​តំណែង​ប្រធានាធិបតី​។​

​លោ​កបុង​បុង ម៉ាកូ​ស អមដំណើរ​ដោយ​ភរិយា​និង​កូនប្រុស​២​នាក់ បាន​ដាក់​ពាក្យសុំ​បេក្ខភាព​សំរាប់​ការបោះឆ្នោត​ប្រធានាធិបតី​នៅ​ឆ្នាំក្រោយ​កាលពី​ថ្ងៃ​ពុធ​ដែល​វា​កាន់តែ​លម្អ​ទិដ្ឋភាព​ន​យោ​​បាយ​ប្រេះឆា​របស់​ប្រទេស​។​

​គ្រួសារ​ម៉ាកូស​បាននិងកំពុង កសាង​កេរ្តិ៍ឈ្មោះ​ឡើងវិញ​និង​តែង​បដិសេធ​ការចោទប្រកាន់​ដែល​ថា ខ្លួន​បាន​លួច​ប្លន់​ទ្រព្យសម្បត្តិ​រដ្ឋ ដែល​តាម​ការប៉ាន់ស្មាន​នៅ​ឆ្នាំ​១៩៨៧​មាន​ចំនួន​ដល់​ទៅ​១០​ពាន់​លាន​ដុល្លារ​។​

​ប្រធានាធិបតីហ្វែរ​ឌីណ​ង់ ម៉ាកូស​ត្រូវ​បាន​បណ្តេញចេញ​ពី​តំណែង​ក្នុង​ការបះបោរ​អំណាច​ប្រជាជន​ឆ្នាំ​១៩៨៦ និង​ស្លាប់​ដោយ​ការ​និរទេស​ខ្លួន​នៅ​កោះ​ហា​វ៉ៃ​នៅ​៣​ឆ្នាំក្រោយ​។​គ្រួ​រ​សារ​របស់​លោក​បាន​​វិល​មក​ហ្វីលីពីន​វិញ​នៅ​ទសវត្សរ៍​ឆ្នាំ​១៩៩០​និង​បាន​ក្លាយជា​អ្នកនយោបាយ​ដ៏​មាន​ឥទ្ធិពល​តំណាង​អោយ​ខេត្ត​កំណើត​អ៊ី​ឡូកូ​ស ណត​តេ​របស់គេ​៕

​លោ​កបុង​បុង ម៉ាកូ​ស​បាន​ឈរឈ្មោះ​ជា​អនុប្រ​ធានា​ធិបតី​ក្នុង​ការបោះឆ្នោត​ឆ្នាំ​២០១៦ តែ​ចាញ់​អនុ​ប្រធានាធិបតី ឡេ​នី រ៉ូ​ប្រេ​ដូ​។​បន្ទាប់​ពី​ចុះឈ្មោះ​ចូលរួម​យក​តំណែង​ប្រធានាធិបតី លោក​បាន​​អះអាងថា​នឹង​ធ្វើ​ជា​មេដឹកនាំ​បង្រួបបង្រួម​ជាតិ​ម្នាក់​ដើម្បី​ជួយ​ហ្វីលីពីន​ដោះស្រាយ​វិបត្តិ​ជំងឺឆ្លង​និង​សេដ្ឋកិច្ច​