ដោយៈ​បូព៌​ព្រឹក្សៈ​ភ្នំពេញៈ​ទណ្ឌិត សម រ​ង្ស៉ី និង​បក្ខពួក​បាន​រង​នូវ​ការចោទប្រកាន់​ពីរ​បទល្មើស​ទៀត​គឺ​បទ «​រួមគំនិត​ក្បត់​» និង​បទ «​ញុះញង់​បង្កឱ្យមាន​ភាពវឹកវរ​ធ្ងន់ធ្ងរ​ដល់​សន្តិសុខ​សង្គម​» ។​នេះ​បើ​យោងតាម​សេចក្តីប្រកាស​ព័ត៌មាន​របស់​អ្នកនាំពាក្យ​របស់​អយ្យកា​រ​អម​សាលាដំបូង​រាជធានី​ភ្នំពេញ នៅ​ល្ងាច​ថ្ងៃទី​៧ ខែតុលា ឆ្នាំ​២០២១​នេះ​។​

​សេចក្តីប្រកាស​ព័ត៌មាន​បាន​បញ្ជាក់ថា អយ្យការ​អម​សាលាដំបូង​រាជធានី​ភ្នំពេញ​បានសម្រេច​ចោទប្រកាន់​បុគ្គល​មួយ ក្រុម រួមមាន​ឈ្មោះ សម រង្ស៊ី ឈ្មោះ អេង ឆៃអ៊ាង ឈ្មោះ មូរ សុខ​ហួរ ឈ្មោះ ហូរ វ៉ាន់ និង​គូកន ពីបទ «​រួមគំនិត​ក្បត់​» និង​បទ «​ញុះញង់​បង្កឱ្យមាន​ភាពវឹកវរ​ធ្ងន់ធ្ងរ​ដល់​សន្តិសុខ​សង្គម​» តាម​មាត្រា ៤៥៣ មាត្រា ៤៩៤ និង​មាត្រា ៤៩៥ នៃ​ក្រមព្រហ្មទណ្ឌ នៃ​ព្រះរាជាណាចក្រ​កម្ពុជា​។​

«​ការចោទប្រកាន់​ខាងលើ​នេះ ពាក់ព័ន្ធ​នឹង​អង្គហេតុ​នៃ​សេចក្តីអំពាវនាវ​របស់​បុគ្គល សម រង្ស៊ី បាន​បង្ហោះ​តាម​បណ្តាញ​ទំនាក់ទំនង​សង្គម​ហ្វេ​ស​ប៊ុ​ក ចុះ​ថ្ងៃទី ០៥ ខែ តុលា ឆ្នាំ ២០២១ ដែលមាន ខ្លឹមសារ​បង្កប់​នូវ “​ការរៀបចំ​ផែនការ​ផ្តួលរំលំ​រាជរដ្ឋាភិបាល​កម្ពុជា​” ក្រោម​ឧបាយកល​អំពាវនាវ ញុះញង់​កងកម្លាំង ប្រដាប់អាវុធ និង​ប្រជាពលរដ្ឋ ឱ្យ​ផ្តួលរំលំ​រាជរដ្ឋាភិបាល​ស្របច្បាប់ នៃ​ព្រះរាជាណាចក្រ​កម្ពុជា​»​។

​អ្នកនាំពាក្យ​នៃ​អយ្យការ​អម​សាលាដំបូង​រាជធានី​ភ្នំពេញ បាន​បញ្ជាក់ថា ផែនការ​ទុច្ចរិត​ក្នុងការ​ញុះញង់​កងកម្លាំង ប្រដាប់អាវុធ ប្រជាពលរដ្ឋ ឱ្យ​ផ្តួលរំលំ​រាជរដ្ឋាភិបាល​កម្ពុជា ដែល​បាន​រៀបចំឡើង​ដោយ​ក្រុម​ឧក្រិដ្ឋជន​ឈ្មោះ សម រង្ស៊ី ឈ្មោះ អេង ឆៃអ៊ាង ឈ្មោះ មូរ សុខ​ហួរ ឈ្មោះ ហូរ វ៉ាន់ ព្រមទាំង​គូកន គឺជា​ឧក្រិដ្ឋកម្ម​ដែល​ប៉ះពាល់ ដល់​សន្តិសុខ​ជាតិ​ធ្ងន់ធ្ងរ​។​

​សូមបញ្ជាក់ថា បន្ទាប់ពី​បាន​ផ្សព្វផ្សាយ​បំភ្លៃ​ថា សម្តេច​តេ​ជោ ហ៊ុន សែន ទិញ​សញ្ជាតិ​សាយ​ប្រឺស (Cyprus) កាលពី​ថ្ងៃទី​៥ ខែតុលា​ទណ្ឌិត សម រ​ង្ស៉ី ដែលមាន​សំណុំរឿង​យ៉ាងច្រើន​នៅ​តុលាការ បានចេញ​សេចក្តីប្រកាស​មួយ​ដោយ​ជំរុញឱ្យមាន​ការផ្តួលរំលំ​រាជរដ្ឋាភិបាល និង​រៀបចំ​ប្រទេស​កម្ពុជា​ឡើងវិញ​៕​សរន​