ដោយៈ​បូព៌​ព្រឹក្ស​/​ភ្នំពេញៈ​យោងតាម​សេចក្តីរាយការណ៍​ឱ្យដឹងថា នៅ​យប់​ថ្ងៃទី​៧ ខែតុលា​លោក គួច ចំរើន អភិបាលខេត្ត​ព្រះសីហនុ បាន​ដឹកនាំ​បញ្ជា​ផ្ទាល់​ក្នុង​ប្រតិបត្តិការ​ជួយសង្គ្រោះ​ជនរងគ្រោះ​ដែល​បាន​លង់ទឹក នៅ​ចំណុច​ឆ្នេរ​ជំទាវ​ម៉ៅ ស្ថិតក្នុង​ភូមិ​គគីរ ឃុំ​បិត​ត្រាំ​ង ស្រុក​ព្រៃនប់ ។

​ប្រភព​បន្តថា ជនរងគ្រោះ ដែល​បាន​ចុះ​លេង​ទឹកសមុទ្រ និង​បាន​លង់ទឹក​នៅ​ទីតាំង​ខាងលើ​មាន​ចំនួន​ប្រាំ​នាក់ គិត​ត្រឹម​ម៉ោង​៩​យ​ប្ងៃ់​ដដែល ក្រុម​សង្គ្រោះបាន​ស្រង់​មនុស្ស​បាន​ចំនួន​បួន​នាក់​ក្នុងនោះ​មាន​ម្នាក់​សង្គ្រោះបាន និង​បីនាក់​បាន​បាត់បង់​ជីវិត ។ នៅសល់​មួយនា​ក់ទៀត​នៅ​បាត់​ខ្លួន នៅឡើយ ហើយ​ក្រុម​សង្គ្រោះ​កំពុង​មុជទឹក​ស្វែងរក​បន្ត​។

 

​លោក​គួច​ចំរើន​បានដាក់​បទបញ្ជា​ឱ្យ​ក្រុម​ជួយសង្គ្រោះ​ប្រើប្រាស់​គ្រប់​មធ្យោបាយ​ដើម្បី​បន្ត​ស្វែងរក​ជនរងគ្រោះ​ដែល​កំពុង​បាត់​ខ្លួន​ឱ្យបាន​ឃើញ​។ ប្រតិបត្តិការ​នៃ​ការស្វែងរក​ជន​គ្រោះ​មិនទាន់​បញ្ចប់​នៅឡើយ​ទេ​៕

​ក្មេងប្រុស ស្រី ជំទង់ៗ ប្រាំ​នាក់​លង់ទឹក​សមុទ្រ សង្គ្រោះ បាន​ពីរ ស្លាប់​ម្នាក់ និង​នៅ​បាត់​ខ្លួន​បីនាក់​ទៀត​រក​មិនឃើញ

​គួររំលឹកថា មាន​ក្មេងៗ​ជំទង់​ចំនួន​ប្រាំ​នាក់​បាន​លង់ទឹក​សមុទ្រ ពេល​នាំគ្នា​ចុះ​លេង​ទឹកសមុទ្រ​នៅ​ចំណុច ខាងក្រោម​ដើមឈើ​ចាំ​ស្នេហ៍ តំបន់​ពយ​ម៉ា​ចូ​វ ក្នុង​ឃុំ​បិត​ត្រាំ​ង ស្រុក​ព្រៃនប់​នា វេលា​ម៉ោង​៣ រសៀល​ថ្ងៃទី​៧​ខែតុលា​ខណៈ​ព្យុះ​រលក​សមុទ្រ​ធំៗ​កំពុង​កើតមាន​។​

​បើតាម​សមត្ថកិច្ច​ឲ្យ​ដឹងថា ក្មេងៗ​ជំទង់​ទាំង​ប្រាំ​នាក់ មាន​ទីលំនៅ​ឃុំ​អូរ​ឧកញ៉ា​ហេង ស្រុក​ព្រៃនប់​៕​សរន​