​ប្រែ​សម្រួលៈ​វាសនា​/​អូ​ស្លូ​៖ អ្នកកាសែត​ហ្វីលីពីន លោកស្រី ម៉ា​រៀ រេស​សា និង​លោក ឌី​មី​ទ្រី មូរ៉ា​តូ​វ របស់​រុស្ស៊ី បាន​ឈ្នះ​រង្វាន់​ណូបែល​សន្តិភាព​ឆ្នាំ​២០២១ កាលពី​ថ្ងៃ​សុក្រ​ទី​៨​តុលា ចំពោះ​ការតស៊ូ​​របស់​គេ​ដើម្បី​សេរីភាព​ចេញពី​គារ​ជិះជាន់​នៅក្នុង​ប្រទេស​ដែល​អង្គការ​សារព័ត៌មាន​រង​ការវាយប្រហារ​ជាប្រចាំ​។​

​គណៈកម្មាធិការ​ណូបែលន័​រ​វេស្ស បាន​សង្កត់ធ្ងន់ថា សារព័ត៌មាន​ឯករាជ្យ​មាន​សារសំខាន់​ក្នុង​ការជំរុញ​សន្តិភាព​។​

​បេរី​ត រី​ស​-​អ៊ែន​ឌឺ​សុន ប្រធាន​គណៈកម្មាធិការ​នេះ បាន​និយាយថា​«​សារព័ត៌មាន​សេរី ឯករាជ្យ​និង​ផ្អែក​លើ​ការ​ពិត​ប្រើ​សំរាប់​ប្រឆាំង​នឹង​ការរំលោភ​អំណាច ការ​ភូតកុហក​និង​ការឃោសនា​​សង្គ្រាម​។​គ្មាន​សេរីភាព​នៃ​ការបញ្ចេញមតិ​និង​សេរីភាព​សារព័ត៌មាន ពិបាក​ក្នុង​ការជំរុញ​ភាតរភាព​រវាង​ប្រជាជាតិ ការដកហូត​អាវុធ​និង​សណ្តាប់ធ្នាប់​ពិភពលោក​ល្អប្រសើរ​មួយ​នៅក្នុង​យុ​គ​​សម័យ​របស់​យើង​»​។​

​លោកស្រី រេស​សា នៅ​ឆ្នាំ​២០១២​ជា​សហ​ស្ថាបនិក​គេហទំព័រ​សារព័ត៌មាន​Rappler​ដែល​ផ្តោត​លើ​ការរិះគន់​យុទ្ធនាការ​ប្រឆាំង​ថ្នាំញៀន​ដ៏​ប្រល័យ​របស់​ប្រធានាធិបតី រ៉ូ​ឌ្រី​ហ្គោ ឌុយ​ទែត ។​លោកស្រី​​និង​Rappler​ក៏​បាន​ចុះផ្សាយ​ព័ត៌មាន​ផ្អែកលើ​ការពិត​ស្តីពី​របៀប​ដែល​សារព័ត៌មាន​ក្នុង​បណ្តាញ​សង្គម​ត្រូវបាន​ប្រើ​សំរាប់​ផ្សព្វផ្សាយ​ព័ត៌មាន​ក្លែងក្លាយ រំខាន​ដល់​ជន​ប្រឆាំង​និង​ឃោសនា​​បំភ្លៃ​ដើម្បី​ប្រយោជន៍​បុគ្គល​សាធារណៈ​។​

​លោក ឌី​មី​ទ្រី មូរ៉ា​តូ​វ អ្នកនិពន្ធ​សារព័ត៌មាន​Novaya Gazeta​និង និពន្ធ​នាយក​សារព័ត៌មាន Rappler​ម៉ា​រៀ រេស​សា​

​ប្រតិកម្ម​នឹង​ដំណឹង​នេះ លោកស្រី​រេស​សា បាន​ប្រាប់​ទូរទស្សន៍​TV2​របស់ន័​រ​វេ​ស្សថា «​រដ្ឋាភិបាល​ហ្វីលីពីន​នឹង​មិន​សប្បាយ​ចិត្ត​ទេ​។​ខ្ញុំ​មាន​ការស្រឡាំងកាំង​បន្តិច វា​ពិតជា​រំភើព​។​តែ​ខ្ញុំ​សប្បាយចិត្ត​​ក្នុងនាម​ក្រុម​របស់​ខ្ញុំ និង​សូម​អរគុណ​គណៈកម្មាធិការ​ណូបែល​ចំពោះ​ការទទួលស្គាល់​អ្វីដែល​យើង​បាន​ឆ្លងកាត់​»​។​

​រំលឹក​បន្តិច​ថា អ្នកកាសែត​ស្រី​រូប​នេះ​កាលពី​ឆ្នាំមុន​ត្រូវបាន​កាត់ទោស​ដាក់គុក​ចំពោះ​ការចុះផ្សាយ​អត្ថបទ​បរិហារកេរ្តិ៍​នៅក្នុង​ការកាត់ក្តី​មួយ​ដែល​ត្រូវបាន​គេ​មើលឃើញ​ថា​ជាការ​វាយ​សំពង​ដ៏​​ធំ​មួយ​លើ​សេរីភាព​សារព័ត៌មាន​សកល​។​

​លោកស្រី​ជា​ស្ក្រី​ទី​១ ដែល​ទទួល​រង្វាន់​ណូបែល​នៅ​ឆ្នាំ​នេះ​។​

​ចំណែក​លោក​មូរ៉ា​តូ​វ​ជា​ស្ថាបនិក​ម្នាក់​នៃ​កាសែត​ឯករាជ្យ​របស់​រុស្ស៊ី​ឈ្មោះថា Novaya Gazeta​កាលពី​ឆ្នាំ​១៩៩៣​។​

​គណៈកម្មាធិការ​ណូបែល​បាន​និយាយថា « Novaya Gazeta​ជា​កាសែត​ឯករាជ្យ​បំផុត​នៅ​រុស្ស៊ី​នាពេល​បច្ចុប្បន្ន ជាមួយនឹង​ចរិត​ផ្តោត​ការវាយប្រហា​រលើ​អ្នក​កាន់​អំណាច​ជា​មូលដ្ឋាន​។​វិជ្ជា​​ជីវៈ​ផ្អែកលើ​ការពិត​និង​សេចក្តីថ្លៃថ្នូរ​ប្រកបដោយ​វិជ្ជាជីវៈ​របស់​កាសែត​ធ្វើអោយ​វា​ក្លាយ​ជា​ប្រភព​សារព័ត៌មាន​សំខាន់​មួយ​ស្តីពី​ទិដ្ឋភាព​សង្គម​រុស្ស៊ី​ដែល​សារព័ត៌មាន​ដទៃ​កម្រ​លើ​មក​បង្ហាញ​»​។​

​យោង​តាម​អង្គការ​សារព័ត៌មាន​ឈ្មោះថា​«​គណៈកម្មាធិការ​ការពា​រ​អ្នកសារព័ត៌មាន​»​បុគ្គលិក​សារព័ត៌មាន​១៧​នាក់​ត្រូវបាន​សម្លាប់​នៅ​ហ្វីលីពីន​នៅ​មួយ​ទសវត្សរ៍​ចុងក្រោយ និង​២៣​នាក់​នៅ​រុស្ស៊ី​។​

​គណៈកម្មាធិការ​ណូបែល​បាន​កត់សំគាល់ថា ចាប់តាំងពី​ពេល​បង្កើត​កាសែត​Novaya Gazeta​មក អ្នកកាសែត​៦​នាក់​របស់​វា​ត្រូវបាន​សម្លាប់ ក្នុងនោះ​មាន​នាង​អាន​ណា ប៉ូ​លី​ត​កូវ​ស្កា​យ៉ា​​ដែល​បាន​យក​ព័ត៌មាន​អំពី​ជម្លោះ​បង្ហូរ​ឈាម​នៅ​សាធារណរដ្ឋ​ឆេច​ឈ្នី​របស់​រុស្ស៊ី​។​

​ក្នុងពេល​ជាមួយគ្នា អង្គការ​សារព័ត៌មាន Reporters Without Borders​បាន​អបអរ​ការ​ប្រកាសជូន​រង្វាន់​ដល់​អ្នកកាសែត ដោយ​សម្តែង​«​ការរីករាយ​»​ចំពោះ​ដំណឹង​នេះ​៕

​រង្វាន់​ដ៏​មាន​កិត្យានុភាព​នេះ អម​ដោយ​មេដាយមាស​មួយ​ជាមួយនឹង​ប្រាក់ ១០​លាន​ក្រូ​ន័រ​(១,១៤​លាន​ដុល្លារ​)