​ដោយ​៖ ម៉េង​ឆៃ / ភ្នំពេញ​៖ នៅក្នុង​សប្តាហ៍​នេះ មាន​ព្រឹត្តិការណ៍​សំខាន់ៗ ជាច្រើន ក្នុងនោះ ពិធីបុណ្យ​ភ្ជុំបិណ្ឌ ក៏​នាំ​ឲ្យ​មាន​អ្នកធ្វើដំណើរ​ច្រើន ទៅ​ស្រុកកំណើត និង​ដើរលេង​កម្សាន្ត តាម​រមណីយដ្ឋាន​នានា នៅ​ទូទាំងប្រទេស បើទោះបីជា​រាជរដ្ឋាភិបាល សម្រេច​ផ្អាក មិន​រៀបចំ​ការជួបជុំ ដូច​រៀងរាល់ឆ្នាំ នៅតាម​វត្ត ក៏ដោយ​។​

១-​រាជរដ្ឋាភិបាល ចេញ​សារាចរ ៣ ចំណុច ដើម្បី​ពង្រឹង​វិធានការ គ្រប់គ្រង​ការឆ្លង​រាលដាល ជំងឺ​កូ​វីដ​-១៩ ក្នុង​ពិធីបុណ្យ​ភ្ជុំបិណ្ឌ​
​កាលពី​ថ្ងៃអាទិត្យ ទី​៣ ខែតុលា សម្តេច​តេ​ជោ នាយករដ្ឋមន្ត្រី ហ៊ុន សែន បានចេញ​សារាចរ ៣ ចំណុច ស្តីពី​ការពង្រឹង​វិធានការ​គ្រប់គ្រង ការឆ្លង​រាលដាល នៃ​ជំងឺ​កូ​វីដ​១៩ សម្រាប់​អំឡុងពេល និង​ក្រោយពេល ឈប់សម្រាក ក្នុង​ពិធីបុណ្យ​ភ្ជុំបិណ្ឌ ដើម្បី​ទប់ស្កាត់ ការឆ្លង​រាលដាល នៃ​ជំងឺ​កូ​វីដ​១៩​។ សារាចរ​ថ្មី​នេះ ដើម្បី​ទប់ស្កាត់ និង​បង្ការ​ការឆ្លង​រាលដាល ទ្រង់ទ្រាយ​ធំ នៃ​ជំងឺ​កូ​វីដ​១៩ ពិសេស​ដើម្បី​ការពារ​អាយុជីវិត និង​សុខភាព​ប្រជាពលរដ្ឋ ស្រប​ពេលដែល​កម្ពុជា កំពុង​បោះជំហាន ឆ្ពោះទៅកាន់​ការបើក ដំណើរការ​ប្រទេស ពេញលេញ​ឡើងវិញ លើ​គ្រប់​វិស័យ នាពេលខាងមុខ​។​

២- សម្ដេច ស ខេង អញ្ជើញ​ជា​អធិបតី ក្នុង​ពិធី​ប្រកាស ចូលកាន់​មុខតំណែង អភិបាលខេត្ត​ស្ទឹងត្រែង
​កាលពី​ព្រឹក​ថ្ងៃ​ចន្ទ ទី​៤ ខែតុលា សម្ដេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​អញ្ជើញ​ជា​អធិបតី ក្នុង​ពិធី​ប្រកាស​ចូលកាន់​មុខតំណែង​អភិបាល នៃ​គណៈ​អភិបាលខេត្ត​ស្ទឹងត្រែង​។ ពិធី​ប្រកាស​នេះ បាន​ប្រារព្ធ​ឡើង បន្ទាប់ពី​ព្រះករុណា ជា​អ​ម្ចាស់ជីវិតលើត្បូង ព្រះបាទ​សម្ដេច​ព្រះបរមនាថ នរោត្តម សីហមុនី បានចេញ​ព្រះរាជក្រឹត្យ ត្រាស់បង្គាប់​តែងតាំង លោក ស្វាយ សំ​អ៊ាង អតីត​អភិបាល ខេត្តមណ្ឌលគិរី ជា​អភិបាល នៃ​គណៈ​អភិបាល ខេត្តស្ទឹងត្រែង រួមទាំង​ការផ្លាស់ប្តូរ អភិបាលខេត្ត ចំនួន ៦ ផ្សេងទៀត​។ អភិបាលខេត្ត ៦ ផ្សេងទៀត រួមមាន​៖ លោក ញ៉ែម សំអឿន ជា​អភិបាល​ខេត្តរតនៈគិរី លោក ថង សាវុន ជា​អភិបាលខេត្ត​មណ្ឌលគិរី លោក ម៉ៅ ធនិន ជា​ខេត្តកំពត លោក ជាវ តា​យ ជា​អភិបាលខេត្ត​ពោធិ៍សាត់ លោក ងួន រតនៈ ជា​អភិបាល​ខេត្តកំពង់ធំ និង​លោក សុខ លូ ជា​អភិបាលខេត្ត​បាត់ដំបង នឹងត្រូវ​ប្រកាស ចូលកាន់​តំណែង ជា​បន្តបន្ទាប់ នៅ​ថ្ងៃទី​១១ ថ្ងៃទី​១២ និង​ថ្ងៃទី​១៣ ខែតុលា​។​

៣- កូ​វីដ​១៩ ធ្វើអោយ​ពុទ្ធបរិស័ទ​ប្រគេន​ចង្ហាន់ និង​ទេយ្យវត្ថុ ដល់​ព្រះសង្ឃ នៅត្រឹម​ខ្លោងទ្វារវត្ត​
​ក្រោយ​រាជរដ្ឋាភិបាល សម្រេច​ផ្អាក​ការរៀបចំ ពិធីបុណ្យ​កាន់បិណ្ឌ និង​ភ្ជុំបិណ្ឌ ចាប់ពី​វេន​បិណ្ឌ​ទី​៤ រហូតដល់​ថ្ងៃ​ភ្ជុំបិណ្ឌ គេ​ឃើញ​តាម​វត្ត​អារាម បានរៀបចំ​ទទួល​ចង្ហាន់ និង​ទេយ្យវត្ថុ នៅត្រឹម​ខ្លោងទ្វារ និង​តាម​របង​វត្ត​ប៉ុណ្ណោះ​។ នៅ​វត្ត​នានា នៅ​រាជធានី​ភ្នំពេញ ពុទ្ធបរិស័ទ បាន​នាំយក​ចង្ហាន់ និង​ទេយ្យវត្ថុ​នានា ប្រគេន​ដល់​ព្រះសង្ឃ នៅមុខ​វត្ដ ដោយ​អនុវត្ត នូវ​វិធានការ​សុខាភិបាល មាន​ម៉ាស៊ីន​វាស់​កម្តៅ អាល់កុល​លាងដៃ និង​មាន​ពាក់​ម៉ាស​ការពារ ទាំង​ព្រះសង្ឃ ទាំង​តាអាចារ្យ និង​ទាំង​ប្រជា​ពុទ្ធបរិស័ទ​។ ប៉ុន្តែ​មិន​ថា តាម​វត្ត​មួយចំនួន នៅ​ភ្នំពេញ ឬ​នៅតាម​ខេត្ត​នានា នោះទេ គឺ​គម្លាត​សុវត្ថិភាព ពី​ម្នាក់​ទៅ​ម្នាក់ យ៉ាងតិច ១​ម៉ែត្រ​កន្លះ មិន​ត្រូវបាន​អនុវត្ត ឲ្យ​បាន​ត្រឹមត្រូវ​ទេ​។​

៤-​រដ្ឋមន្ត្រីក្រសួង​ការងារ ណែនាំ​បន្ថែម ពី​ការធ្វើ​តេស្ត​រហ័ស រក​មេរោគ​កូ​វីដ​១៩ ដល់ក​ម្មករ និយោជិត នៅតាម​រោងចក្រ សហគ្រាស ក្រោយ​បុណ្យ​ភ្ជុំបិណ្ឌ កាលពី​ថ្ងៃទី​៤ ខែតុលា លោក អ៊ិត សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បានចេញ​សេចក្តីណែនាំ​បន្ថែម ស្តីពី ការធ្វើ​តេស្ត​រហ័ស រក​មេរោគ​កូ​វីដ​១៩ ដល់ក​ម្មករ និយោជិត នៅតាម​រោងចក្រ សហគ្រាស ក្រោយពេល​ឈប់សម្រាក ក្នុង​ពិធីបុណ្យ​ភ្ជុំបិណ្ឌ ថ្ងៃទី​៥ ដល់​ថ្ងៃទី​៧ ខែតុលា​។ ក្នុងនោះ គឺ​ការធ្វើ​តេស្ត ត្រូវ​ធ្វើតាម​គោលការណ៍​ស្ម័គ្រចិត្ត​។​

៥- រដ្ឋមន្ត្រី​សុខាភិបាល ណែនាំ​ដល់​អភិបាលខេត្ត រាជធានី ឲ្យ​ពង្រឹង​សកម្មភាព យុទ្ធនា​ការអប់រំ ផ្សព្វផ្សាយ និង​ជំរុញ​ការចាក់​វ៉ាក់សាំង​កូ​វីដ​១៩ កាលពី​ថ្ងៃទី​៤ ខែតុលា រដ្ឋមន្ត្រី​ក្រសួងសុខាភិបាល លោក ម៉ម ប៊ុនហេង ដែលជា​ប្រធាន​គណៈកម្មការ អន្តរក្រសួង ដើម្បី​ប្រយុទ្ធ​នឹង​ជំងឺ​កូ​វីដ​១៩ បាន​ណែនាំ​ដល់ អភិបាលខេត្ត រាជធានី ទូទាំងប្រទេស ត្រូវ​ពង្រឹង​សកម្មភាព នៃ​យុទ្ធនា​ការអប់រំ​ផ្សព្វផ្សាយ និង​ជំរុញ​ការចាក់​វ៉ាក់សាំង​កូ​វីដ​១៩ ដល់​ប្រជាពលរដ្ឋ​ក្រុម​គោលដៅ ឲ្យ​បាន​គ្រប់ៗ​គ្នា​។

៦- កងទ័ព​មួក​ខៀវ​កម្ពុជា ប្រមាណ ៣០០ នាក់ ត្រលប់​ពី​ប្រទេស​ម៉ាលី ក្រោយ​បញ្ចប់​បេសកកម្ម ដោយ​ជោគជ័យ រយៈពេល​ពេញ ១​ឆ្នាំ​
​កងកម្លាំង​មួក​ខៀវ​កម្ពុជា ប្រមាណ ៣០០ នាក់ ដែល​បញ្ចប់​បេសកកម្ម ដោយ​ជោគជ័យ រយៈពេល​ពេញ ១ ឆ្នាំ នៅ​ប្រទេស​ម៉ាលី បានធ្វើ​មាតុភូមិនិវត្តន៍ មកដល់​កម្ពុជា​វិញ កាលពី​ថ្ងៃទី​៤ ខែតុលា​។ ក្នុង​ដំណើរ​ត្រឡប់​មកដល់​មាតុភូមិ​វិញ ក្រុមគ្រូពេទ្យ នៃ​ក្រសួងសុខាភិបាល សហការ​ជាមួយ​ក្រុមគ្រូពេទ្យ របស់​មជ្ឈមណ្ឌល​ជាតិ រក្សា​សន្តិភាព បាន​យក​សំណាក របស់​កងកម្លាំង​ទាំងអស់ នៅ​អាកាសយានដ្ឋាន​អន្តរជាតិ​ភ្នំពេញ ដើម្បី​វិភាគ​រក​មេរោគ​កូ​វិដ​១៩ ភ្លាមៗ និង​តម្រូវអោយធ្វើ ច​ត្តា​ឡី​ស័ក ចំនួន ២១​ថ្ងៃ មុននឹង​អនុញ្ញាត អោយទៅ​ជួបជុំ​ក្រុមគ្រួសារ​។​

៧-​ទិវា​គ្រូបង្រៀន ថ្ងៃ​៥​តុលា ក្រសួង​អប់រំ បំផុស​ការលើកតម្កើង គ្រូបង្រៀន លើ​បណ្ដាញ​សង្គម
​កាលពី​ថ្ងៃទី​៥ ខែតុលា កម្ពុជា និង​បណ្ដា​ប្រទេស​នានា បាន​ប្រារព្ធ​ទិវា​គ្រូបង្រៀន​។ នៅ​កម្ពុជា ទិវា​នេះ បាន​ប្រា​ព្ធ​ឡើង​ក្រោម​ប្រធានបទ «​គ្រូបង្រៀន​រក្សាបាន​តួនាទី​សំខាន់ ក្នុងការ​អប់រំ គ្រប់​កាលៈទេសៈ​»​។ ស្ថិតក្នុង​បរិបទ​កូ​វីដ​-១៩ ក្រសួង​អប់រំ យុវជន និង​កីឡា បាន​បំផុស​ការលើកតម្កើង គ្រូបង្រៀន​លើ​បណ្ដាញ​សង្គម​។​

៨-​សម្តេច​តេ​ជោ ហ៊ុន សែន ណែនាំ​ឲ្យ​កែ​រដ្ឋធម្មនុញ្ញ ដើម្បី​កំណត់ថា នាយករដ្ឋមន្ត្រី ប្រធានរដ្ឋសភា ប្រធានព្រឹទ្ធសភា និង​ប្រធាន​ក្រុមប្រឹក្សាធម្មនុញ្ញ ត្រូវមាន​សញ្ជាតិ​ខ្មែរ​តែមួយ​
​កាលពី​ថ្ងៃទី​៦ ខែតុលា សម្ដេច​តេ​ជោ ហ៊ុន សែន បានប្រកាស​តាម​ហ្វេ​ស​ប៊ុ​ក សម្រេច​ប្រគល់​ភារកិច្ច ឲ្យ​រដ្ឋមន្ត្រី​ក្រសួងយុត្តិធម៌ សិក្សា​អំពី​ការរៀបចំ​ធ្វើ វិសោធនកម្ម រដ្ឋធម្មនុញ្ញ ដើម្បី​កំណត់ថា នាយករដ្ឋមន្ត្រី ប្រធានរដ្ឋសភា ប្រធានព្រឹទ្ធសភា និង​ប្រធាន​ក្រុមប្រឹក្សាធម្មនុញ្ញ ត្រូវមាន​សញ្ជាតិ​ខ្មែរ​តែមួយ​។ សម្ដេច​តេ​ជោ ហ៊ុន សែន បាន​គូសបញ្ជាក់ថា «​បើ​លេង​កុំ​ខឹង បើ​ខឹង​កុំ​លេង ព្រោះ​ទ្វារ ត្រូវបាន​បិទ​ជា​រៀងរហូត​ហើយ សម្រាប់​ពួក​សញ្ជាតិ​ពីរ ដែល​ប៉ុនប៉ង​កាន់តំណែង​កំពូល​នេះ ពិសេស​តំណែង​នាយករដ្ឋមន្ត្រី ព្រោះថា វិសោធនកម្ម​រដ្ឋធម្មនុញ្ញ​ក្តី ឬ​ច្បាប់​អង្គការ​ក្តី ត្រូវការ​សម្លេង ២ ភាគ ៣ ទើប​អាច​អនុម័ត​បាន​»​។

​កាលពី​ថ្ងៃទី​៦ ខែតុលា មេធាវី​រាជរដ្ឋាភិបាល​កម្ពុជា បានចេញ​សេចក្តីថ្លែងការណ៍ បដិសេធ និង​ទាត់ចោល​ទាំងស្រុង នូវ​ការចុះផ្សាយ ដោយ​គ្មាន​ការពិត​របស់​សារព័ត៌មាន​អង់គ្លេស The Guardian ដោយ​ផ្សាយ​ថា សម្តេច​តេ​ជោ ហ៊ុន សែន មាន​លិខិតឆ្លងដែន ប្រទេស​ស៊ី​ព្រ ឬ​សាយ​ប្រ៊ី​ស (Cyprus)​។ ចំណែក​រដ្ឋមន្ត្រីការបរទេស លោក ប្រាក់ សុខុន នៅ​ថ្ងៃទី​៦ ខែតុលា ក៏បាន​ផ្ញើលិខិត​ផ្លូវការ​មួយ ជូន​រដ្ឋមន្ត្រីការបរទេស ស៊ី​ព្រ (Cyprus) ស្នើសុំ​ផ្តល់​កិច្ចសហការ ដើម្បី​ស្រាវជ្រាវ រក​ការពិត​ឱ្យឃើញ ចំពោះ​ការ​ចោទ ប្រកាន់​ផ្ទុយ​ការពិត មកលើ​សម្តេច​តេ​ជោ ហ៊ុន សែន ថា មាន​លិខិតឆ្លងដែន​ស៊ី​ព្រ​។ នៅ​ថ្ងៃទី​៧​តុលា កាសែត The Guardian បាន​កែសម្រួល​អត្ថបទ របស់ខ្លួន​ឡើងវិញ ដោយ​ដាក់ថា មនុស្ស​នៅក្បែរ​ខ្លួន​សម្តេច​ហ៊ុនសែន ដែល​ទទួលបាន​លិខិតឆ្លងដែន ស៊ី​ព្រ ឬ​ប្រទេស សាយ​ប្រ៊ី​ស​។​

 

៩-​សម្ដេច​តេ​ជោ ហ៊ុន សែន ប្រកាស​ឲ្យ​អាជ្ញាធរ សមត្ថកិច្ច យកចិត្តទុកដាក់ លើ​កំណើន​ប្រជាពលរដ្ឋ ដើរលេង​កម្សាន្ត ក្នុងឱកាស​បុណ្យ​ភ្ជុំបិណ្ឌ នៅ​ថ្ងៃបុណ្យ​ភ្ជុំបិណ្ឌ នា​ថ្ងៃទី​៦ ខែតុលា សម្ដេច​តេ​ជោ ហ៊ុន សែន បានប្រកាស​ណែនាំ ដល់​អាជ្ញាធរ​សមត្ថកិច្ច ត្រូវ​យកចិត្តទុកដាក់ ពិនិត្យមើល អំពី​ភាព​កកកុញ របស់​ប្រជាពលរដ្ឋ ដែល​បាន​ដើរលេង កម្សាន្ត តាម​រមណីយដ្ឋាន​នានា ដើម្បី​រក្សា​គម្លាត ពី​ក្រុមគ្រួសារ​មួយ ទៅ​ក្រុមគ្រួសារ មួយទៀត ក្នុង​បំណង​ទប់ស្កាត់ ការឆ្លង​រាលដាល​ជំងឺ​កូ​វីដ​១៩​។
​ការបើក​ឲ្យ​មាន​អ្នកដើរ​កម្សាន្ត តាម​រមណីយដ្ឋាន​នានា នាឱកាស​បុណ្យ​ភ្ជុំបិណ្ឌ​នេះ ត្រូវបាន​សម្ដេច​តេ​ជោ ហ៊ុន សែន លើកឡើងថា ជាការ​សាកល្បង​ដ៏​ធំ តែ​មិនមែន​ធ្វើឡើង ដោយ​ប្រថុយប្រថាន​នោះទេ​។ បើ​យើង​ធ្វើបាន​ត្រឹមត្រូវ មហន្តរាយ​ឆ្លង​កូ​វីដ នឹងមិន​មាន​ទេ​។ ករណីនេះ ក៏​វា​មិន​នាំទៅដល់​ការរារាំង នូវ​ការបើក​ប្រទេស​ឡើងវិញ នាពេលខាងមុខ ឡើយ​។
​យ៉ាងណាក៏ដោយ សម្ដេច​តេ​ជោ ហ៊ុន សែន សង្ឃឹមថា សុវត្ថិភាព ក្នុងអំឡុងពេល​បុណ្យ ភ្ជុំបិណ្ឌ​នេះ នឹង​អាច​កើតមាន​បាន អាស្រ័យទៅលើ​មនុស្ស​ម្នាក់ៗ ក្រុមគ្រួសារ​នីមួយៗ នៅក្នុងពេល​ដើរលេង​កម្សាន្ដ ក្នុងឱកាស​ពិធីបុណ្យ​ភ្ជុំបិណ្ឌ ដោយ​ប្រកាន់ខ្ជាប់​នូវ​វិធានការ ៣​កុំ និង​៣​ការពារ​។​

១០- នៅ​ថ្ងៃ​ភ្ជុំបិណ្ឌ មាន​អ្នក​ទៅ​វត្ត​ច្រើន ខណៈ​ចរាចរណ៍ ក៏​មមាញឹក នៅ​ភ្នំពេញ​
​នៅ​ថ្ងៃបុណ្យ​ភ្ជុំបិណ្ឌ នា​ថ្ងៃទី​៦ ខែតុលា ប្រជាពលរដ្ឋ បាន​យក​ចង្ហាន់ ទៅ​ប្រគេន​ព្រះសង្ឃ តាម​វត្ត​អារាម​។ វត្ត​មួយចំនួន ការ​ប្រគេន​ចង្ហាន់ ត្រឹម​ខ្លោងទ្វារវត្ត និង​វត្ត​ខ្លះ ចូលដល់​ក្នុង​បរិវេណ​វត្ត​។ វិធានការ​ទប់ស្កាត់ និង​ការពារ​កូ​វីដ​១៩ ត្រូវបាន​អនុវត្ត ដោយមាន​ពាក់​ម៉ាស វាស់​កម្តៅ បាញ់​អាល់កុល និង​មាន​ទូរ​សម្លាប់​មេរោគ ជាដើម​។ ប៉ុន្តែ​នៅតាម​វត្ត​ខ្លះ មិន​ថា នៅ​ភ្នំពេញ និង​តាម​បណ្តា​ខេត្ត​នានា​ទេ ពុំបាន​អនុវត្ត​ឲ្យ​ត្រឹមត្រូវ នូវ​គម្លាត​សុវត្ថិភាព នោះទេ ដោយសារ​តែមាន​អ្នក​ទៅ​វត្ត​ច្រើន នៅ​ថ្ងៃបុណ្យ​ភ្ជុំបិណ្ឌ នា​ថ្ងៃនេះ​។ ដោយឡែក តាមផ្លូវ​នានា និង​ច្រកចេញចូល រាជធានី​ភ្នំពេញ ចរាចរណ៍ នៅ​មមាញឹក​។ អ្នក​នៅ​ភ្នំពេញ ជាច្រើន ក៏​មិនបាន​ធ្វើដំណើរ ទៅណា​មក​ណា​ឡើយ ក្នុងឱកាស​ឈប់សម្រាក បុណ្យ​ភ្ជុំបិណ្ឌ​នេះ​។ តែ​ក៏មាន​អ្នកធ្វើដំណើរ ទៅ​ស្រុកកំណើត ដើម្បី​ប្រារព្វ​ពិធីបុណ្យ​ភ្ជុំបិណ្ឌ និង​ជួបជុំ​ក្រុមគ្រួសារ ហើយ​បន្ត​ការដើរ​កម្សាន្ត នៅ​តំបន់​ទេសចរណ៍​នានា​។​

១១- ឈប់សម្រាក​បុណ្យ​ភ្ជុំបិណ្ឌ ៣​ថ្ងៃ គ្រោះថ្នាក់​ចរាចរណ៍ កើតឡើង ៣៥​លើក ស្លាប់ ១៤​នាក់ និង​របួស ៦៤​នាក់​
​ក្នុង​រយៈពេល ៣​ថ្ងៃ នៃ​ថ្ងៃ​ឈប់សម្រាក​បុណ្យ​ភ្ជុំបិណ្ឌ គឺ​នៅ​ថ្ងៃទី​៥ ថ្ងៃទី​៦ និង​ថ្ងៃទី​៧ ខែតុលា នៅ​ទូទាំងប្រទេស គ្រោះថ្នាក់​ចរាចរណ៍ បានកើត​ឡើង ៣៥​លើក បណ្តាល​ឲ្យ​ស្លាប់ ១៤​នាក់ និង​របួស ៦៤​នាក់​។
​នេះ​បើតាម​របាយការណ៍ ប្រចាំថ្ងៃ​របស់​នាយកដ្ឋាន នគរបាល​ចរាចរណ៍ និង​សណ្តាប់​សាធារណៈ នៃ​អគ្គស្នងការដ្ឋាន​នគរ​បាល​ជាតិ​។ ចំនួន​អ្នកស្លាប់ និង​អ្នករបួស ក្នុងអំឡុងពេល​បុណ្យ​ភ្ជុំបិណ្ឌ ឆ្នាំនេះ គឺមាន​ចំនួន​ប្រហាក់ប្រហែល​នឹង​ឆ្នាំមុន​ដែរ​។ ភ្ជុំបិណ្ឌ កាលពី​ឆ្នាំ​២០២០ មាន​អ្នកស្លាប់ ១៥​នាក់ និង​របួស ៦២​នាក់​។​

១២-​រយ​:​ពេល ៣​ថ្ងៃ នៃ​បុណ្យ​ភ្ជុំបិណ្ឌ កម្ពុ​ជាមាន​ភ្ញៀវ​ចេញ​ដើរ​កម្សាន្ត​ជាង ៦៦​ម៉ឺន​នាក់​
​ក្នុង​រយ​:​ពេល ៣ ថ្ងៃ នៃ​ពិធីបុណ្យ​ភ្ជុំបិណ្ឌ ត្រូវ​នឹង​ថ្ងៃទី​៥ ដល់​ថ្ងៃទី​៧ ខែតុលា នៅ​ទូទាំងប្រទេស មាន​ភ្ញៀវទេសចរ ចេញ​ដើរ​ទស្សនា​កម្សាន្ត សរុប​ចំនួន​ជាង ៦៦​ម៉ឺន ៤​ពាន់​នាក់​។ ក្នុងនោះ តំបន់​ជាប់មាត់​សមុទ្រ គឺ​ខេត្តកំពត ខេត្ត​កែប និង​ខេត្ត​ព្រះសីហនុ មាន​អ្នក​ទៅលេង​ច្រើន​។ វិធានការ​សុខាភិបាល ដូចជា ពាក់​ម៉ាស និង​រក្សា​គម្លាត​សុវត្ថិភាព នៅ​តំបន់​ទេសចរណ៍​ខ្លះ អនុវត្ត​មិនបាន​ត្រឹមត្រូវ​ឡើយ​។​

១៣-​សម្ដេច​តេ​ជោ លើកឡើងថា វិសោធនកម្ម​រដ្ឋធម្មនុញ្ញ ឱ្យ​មេដឹកនាំ មាន​សញ្ជាតិ​ខ្មែរ តែមួយ គឺ​ដើម្បី​ប្រយោជន៍​ជាតិ​វែងឆ្ងាយ
​សម្តេច​តេ​ជោ​នាយករដ្ឋមន្ត្រី ហ៊ុន សែន បាន​មានប្រសាសន៍ អំពី​សារសំខាន់ និង​ផលប្រយោជន៍ នៃ​ការធ្វើ​វិសោធនកម្ម រដ្ឋធម្មនុញ្ញ ដើម្បី​កំណត់​ឲ្យ ប្រធាន​ក្រុមប្រឹក្សាធម្មនុញ្ញ ប្រធានព្រឹទ្ធសភា ប្រធានរដ្ឋសភា និង​នាយករដ្ឋមន្ត្រី មាន​សញ្ជាតិ​ខ្មែរ តែមួយគត់ គឺជា​ការ​ធ្វើឡើង ដើម្បី​ប្រយោជន៍ វែងឆ្ងាយ​របស់​ជាតិ​។ សម្ដេច​បាន​ថ្លែង​យ៉ាង​ដូច្នេះ ក្នុងឱកាស​អញ្ជើញ​បើក កិច្ចប្រជុំពេញអង្គ​គណៈរដ្ឋមន្ត្រី ដែល​បានអនុម័ត លើ​សេចក្តីព្រាងច្បាប់ ស្តីពី វិសោធនកម្ម រដ្ឋធម្មនុញ្ញ​នេះ កាលពី​ព្រឹក​ថ្ងៃ​សុក្រ​។ នៅ​ថ្ងៃទី​១១ តុលា ក្រុមប្រឹក្សាធម្មនុញ្ញ នឹង​ប្រជុំ​ពិនិត្យ សេចក្តីព្រាងច្បាប់ វិសោធនកម្ម​រដ្ឋធម្មនុញ្ញ​នេះ មុននឹង​រដ្ឋសភា ប្រជុំ​អនុម័ត​។​

១៤- តុលាការ ចោទប្រកាន់​លោក សម រង្ស៊ី និង​គូកន ពីបទ «​រួមគំនិត​ក្បត់​» និង​បទ «​ញុះញង់​បង្កឱ្យមាន ភាពវឹកវរ​ធ្ងន់ធ្ងរ ដល់​សន្តិសុខ​សង្គម​»
​កាលពី​ថ្ងៃទី​៧ ខែតុលា តុលាការ​សាលាដំបូង រាជធានី​ភ្នំពេញ បានសម្រេច​ចោទប្រកាន់ ករណី​ថ្មី​ទៀត លើ​អតីត​មេដឹកនាំ គណបក្សប្រឆាំង លោក សម រ​ង្ស៉ី លោកស្រី មូរ សុខ​ហួរ លោក អេង ឆៃអ៊ាង លោក ហូរ វ៉ាន់ និង​គូកន ពីបទ «​រួមគំនិត​ក្បត់​» និង​បទ «​ញុះញង់ បង្កឱ្យមាន​ភាពវឹកវ​រ​ធ្ងន់ធ្ងរ ដល់​សន្តិសុខ​សង្គម​»​។ ការចោទប្រកាន់​នេះ ធ្វើឡើង បន្ទាប់ពី​លោក​សមរង្ស៊ី ដែល​កំពុង​រស់នៅ ក្រៅប្រទេស បាន​ចោទប្រកាន់ថា សម្តេច​តេ​ជោ ហ៊ុន សែន ទិញ​សញ្ជាតិ​បរទេស និង​មាន​លិខិតឆ្លងដែន ប្រទេស​សាយ​ប្រ៊ី​ស ( Cyprus )៕/V​