ដោយៈ ម៉េង​ឆៃ / ភ្នំពេញៈ កាលពី​ព្រឹក​ថ្ងៃ​ចន្ទ ទី​១១ ខែតុលា ក្រុមប្រឹក្សាធម្មនុញ្ញ បាន​បើក​កិច្ចប្រជុំ ពិនិត្យ​លើ​សេចក្តីព្រាងច្បាប់​វិសោធនកម្ម​រដ្ឋធម្មនុញ្ញ ដែល​កំណត់​សញ្ជាតិ​ខ្មែរ​តែមួយ សម្រាប់​មេដឹកនាំ​ជាតិ​កំពូលៗ រួមមាន នាយករដ្ឋមន្ត្រី ប្រធានរដ្ឋសភា ប្រធានព្រឹទ្ធសភា និង​ក្រុមប្រឹក្សាធម្មនុញ្ញ​។ ជា​លទ្ធផល ក្រុមប្រឹក្សាធម្មនុញ្ញ បានប្រកាសថា សេចក្តីព្រាង​វិសោធន​កម្មនេះ ស្របតាម​បរិបទ​នៃ​សភាពការណ៍​ជាក់ស្តែង និង​ពុំមាន​អ្វី​ប៉ះពាល់​ដល់​ប្រព័ន្ធ​ប្រជាធិបតេយ្យ សេរី​ពហុបក្ស និង​របបរាជានិយម​អាស្រ័យ​ដោយ​រដ្ឋធម្មនុញ្ញ​។​

​កិច្ចប្រជុំពេញអង្គ​រប​ស់​ក្រុមប្រឹក្សាធម្មនុញ្ញ នៅ​អគារ​ស ក្នុង​វិមាន​រដ្ឋ​ចំការមន ទល់មុខ​ព្រឹទ្ធសភា ក្នុង​រាជធានី​ភ្នំពេញ​ដើម្បី​ពិនិត្យ និង​រៀបចំ​សេចក្តីក្រាបបង្គំទូលថ្វាយ​មតិ​របស់​ក្រុមប្រឹក្សាធម្មនុញ្ញ ថ្វាយ​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​កម្ពុជា ដែល​ទ្រង់​ពិគ្រោះ​មតិ​ក្រុមប្រឹក្សាធម្មនុញ្ញ តាមរយៈ​ព្រះរាជសារ ចុះ​ថ្ងៃទី​៨ ខែតុលា ឆ្នាំ​២០២១ ចំពោះ​សេចក្តីព្រាងច្បាប់​ធម្មនុញ្ញ ស្តីពី វិសោធនកម្ម​មាត្រា​១៩​ថ្មី មាត្រា​៨២​ថ្មី មាត្រា​១០៦​ថ្មី​(​មួយ​) មាត្រា​១១៩​ថ្មី និង មាត្រា​១៣៧​ថ្មី នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មាត្រា​៣ និង​មាត្រា​៤ នៃ​ច្បាប់​ធម្មនុញ្ញ​បន្ថែម សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ​។​

​លទ្ធផល​នៃ​កិច្ចប្រជុំ​ក្រុមប្រឹក្សាធម្មនុញ្ញ​ត្រូវបាន​ប្រកាសថា ក្រុមប្រឹក្សាធម្មនុញ្ញ ក្រាបបង្គំ​ទូលថ្វាយ ព្រះករុណា​ជា​អ​ម្ចាស់ជីវិតលើត្បូង​ថា ការស្នើសុំ​ធ្វើ​វិសោធនកម្ម មាត្រា​១៩​ថ្មី មាត្រា​៨២​ថ្មី មាត្រា​១០៦​ថ្មី​(​មួយ​) មាត្រា​១១៩​ថ្មី និង​មាត្រា​១៣៧​ថ្មី នៃ​រដ្ឋធម្មនុញ្ញ​នៃ​ព្រះរាជាណាចក្រ​កម្ពុជា និង​មាត្រា​៣​និង​មាត្រា​៤ នៃ​ច្បាប់​ធម្មនុញ្ញ​បន្ថែម​សំដៅ​ធានា​នូវ​ដំណើរការ​ជា​ប្រក្រតី​នៃ​ស្ថាប័ន​ជាតិ អាចធ្វើ​ទៅបាន គឺ​ស្របតាម​បរិបទ​នៃ​សភាពការណ៍​ជាក់ស្តែង និង​ពុំមាន​អ្វី​ប៉ះពាល់​ដល់​ប្រព័ន្ធ​ប្រជាធិបតេយ្យ សេរី​ពហុបក្ស និង​របបរាជានិយម​អាស្រ័យ​ដោយ​រដ្ឋធម្មនុញ្ញ ព្រមទាំង​ធ្វើឡើង​នៅពេល​ប្រទេសជាតិ មិន​ឋិត​ក្នុង​ភាពអាសន្ន​។​

​សូម​រម្លឹកថា កាលពី​ថ្ងៃទី​៨ ខែតុលា ឆ្នាំ​២០២១ រាជរដ្ឋាភិបាល តាមរយៈ​កិច្ចប្រជុំពេញអង្គ​គណៈរដ្ឋមន្ត្រី ក្រោម​ការដឹកនាំ​របស់​សម្តេច​តេ​ជោ នាយករដ្ឋមន្ត្រី ហ៊ុន សែន បានអនុម័ត​សេចក្តីព្រាងច្បាប់​វិសោធនកម្ម​រដ្ឋធម្មនុញ្ញ ដែល​ចែង​កំណត់​ពី​នាយករដ្ឋមន្ត្រី ប្រធានរដ្ឋសភា ប្រធានព្រឹទ្ធសភា និង​ប្រធាន​ក្រុមប្រឹក្សាធម្មនុញ្ញ ត្រូវមាន​សញ្ជាតិ​ខ្មែរ​តែមួយ​។

​សេចក្តីព្រាងច្បាប់​នេះ ក្រោយ​ក្រុមប្រឹក្សាធម្មនុញ្ញ ទូលថ្វាយ​មតិយោបល់​ថ្វាយ​ព្រះមហាក្សត្រ គឺ​អង្គ​ព្រះមហាក្សត្រ នឹង​តប​ឆ្លើយ​មកកាន់​រាជរដ្ឋាភិបាល ហើយ​រាជរដ្ឋាភិបាល នឹង​បញ្ជូន​សេចក្តីព្រាង​វិសោធនកម្ម​ច្បាប់​នេះ ទៅ​រដ្ឋសភា ដើម្បី​ប្រជុំពិភាក្សា​អនុម័ត មុននឹង​បញ្ជូន​បន្តទៅ​ព្រឹទ្ធសភា​។​

​សម្តេច​តេ​ជោ ហ៊ុន សែន បានបញ្ជាក់​រួចមកហើយ​ថា ការរៀបចំ​កែ​ច្បាប់រដ្ឋធម្មនុញ្ញ ដើម្បី​កំណត់​សញ្ជាតិ​ខ្មែរ​តែមួយ សម្រាប់​តំណែង​កំពូល​ទាំង​បួន​នេះ មាន​ផលប្រយោជន៍​រយៈពេល​វែង សម្រាប់​ប្រទេស​កម្ពុជា ដើម្បី​បញ្ជៀ​ស​នូវ​ការជ្រៀតជ្រែក​ពី​បរទេស និង​បង្ហាញ​ភក្តីភាព ចំពោះ​ជាតិ​មាតុភូមិ​។

​មហាជន និង​ក្រសួង​ស្ថាប័ន​ជាតិ គាំទ្រ​ពេញទំហឹង ដូច​សេចក្តីព្រាងច្បាប់​វិសោធនកម្ម​រដ្ឋធម្មនុញ្ញ ដែល​កំណត់​សញ្ជាតិ​ខ្មែរ​តែមួយ លើ​មេដឹកនាំ​ជាតិ​កំពូលៗ នាពេល​នេះដែរ​។ ច្បាប់​ទាំងអស់នេះ សុទ្ធតែ​បម្រើ​ឲ្យ​ផលប្រយោជន៍​ជាតិខ្មែរ និង​បង្កើន​សាមគ្គី​ជាតិ ក៏ដូចជា សុខដុម​នីយកម្ម​ជាតិ​សាសន៍​យើង ៕​សរន​