​ប្រែ​សម្រួលៈ​វាសនា​/​ហាណូយ​៖ សត្វ​ឆ្កែ​ចំនួន​១៥​ក្បាល​និង​ឆ្មា​មួយ​ក្បាល​របស់​គ្រួរ​សារ​ពីរ​ដែល​ធ្វើដំណើរ​ចេញពី​ខេត្ត​ឡុង​អាន ទៅកាន់​ខេត្ត​កា​ម៉ៅ ត្រូវបាន​អាជ្ញាធរ​សម្លាប់​និង​ដុត​ចោល​ដើម្បី​​ជា​វិធានការ​បង្ការ​កូវី​ដ​១៩​កាលពី​ថ្ងៃ​សុក្រ​សប្តាហ៍​មុន​។​

​ផាំ មិញ ហ៊ុង អាយុ​៤៩​ឆ្នាំ បាន​អះអាង​កាលពី​ថ្ងៃអាទិត្យ​ថា ឆ្កែ​របស់​គាត់​១៣​ក្បាល ត្រូវ​កម្លាំង​បង្ការ​ជំងឺ​កូវី​ដ​១៩​ក្នុង​ខេត្ត​កា​ម៉ៅ កំទេច​ចោល​កាលពី​២​ថ្ងៃមុន​។​ឆ្កែ​៣​ក្បាល​ទៀត​បូក​រួម​ទាំង​​ឆ្មា​មួយ​ក្បាល​ដែល​មក​តាម​គ្រួសារ​បងប្អូន​លោក ក៏​ជួប​វាសនា​ដូច​គ្នា​។​

​ហ៊ុង បាន​ធ្វើ​ជា​កម្មករ​រៀប​ឥដ្ឋ​នៅក្នុង​ខេត្ត​ឡុង​អាន​ភាគខាងត្បូង ហើយ​ក្នុងអំឡុងពេល​កូវី​ដ​១៩​ផ្ទុះ​ខ្លាំង​គ្រួសារ​លោក​ជួប​ការលំបាក ដូច្នេះ​កាលពី​ថ្ងៃ​៨​តុលា​លោក​បាន​ជិះ​ម៉ូតូឌុប​ប្រពន្ធ​និង​​ឆ្កែ រួម​ដំណើរ​ជាមួយ​គ្រួសារ​ប្អូនថ្លៃ​ទៅ​កាន់​ស្រុកកំណើត​នៅ​ឃុំ​មួយ​ក្នុង​ខេត្ត​កា​ម៉ៅ​។​

​ពេលទៅដល់​កា​ម៉ៅ សមាជិក​២​គ្រួសារ​នេះ​មួយចំនួន​ត្រូវបាន​ធ្វើតេស្តិ៍​រហ័ស​ឃើញ​មាន​វិជ្ជមាន​កូវី​ដ​១៩ ដូច្នេះ​ដើម្បី​កុំអោយ​ប្រជាជន​ក្នុង​មូលដ្ឋាន​បារម្ភ​មិន​សប្បាយចិត្ត អាជ្ញាធរ​ឃុំ​បានសំរេច​​កំទេច​សត្វ​ទាំងនេះ​ចោល​។​

​កម្មករ​រៀប​ឥដ្ឋ លោក​ហ៊ុង ដឹក​ប្រពន្ធ​និង​ឆ្កែ​ពី​ឡុង​អាន ទៅ​កា​ម៉ៅ តែ​ដោយសារ​សមាជិក​គ្រួសា​រ​ខ្លះ​កើតកូ​វីដ​១៩ ឆ្កែ​១៥​ក្បាល​និង​ឆ្មា​១​ក្បាល​ត្រូវ​អាជ្ញាធរ​យក​ទៅ​សម្លាប់ចោល​

​យោង​តាម​មជ្ឈមណ្ឌល​គ្រប់គ្រង​ជំងឺ​អាម៉េរិក វីរុស​កូរ៉ូណា​អាច​ចម្លង​ពី​មនុស្សទៅ​សត្វ​រួម​មាន​ឆ្កែ​ឆ្មា តែ​លទ្ធភាព​ចម្លង​ពី​សត្វ​ចិញ្ចឹម​ទៅ​មនុស្ស​មាន​កំរិត​ទាប​។​

​ជុំវិញ​កូវី​ដ​១៩​នេះដែរ អាជ្ញាធរ​សុខាភិបាល​វៀតណាម​កាល​ពី​យប់​ថ្ងៃ​ចន្ទ​បានប្រកាស​រកឃើញ​អ្នក​ឆ្លង​ថ្មី​៣.៦១៧​នាក់ ដោយ​កើន​លើស​ចំនួន​ឆ្លង​កាលពី​មួយ​ថ្ងៃមុន ១០៤​នាក់​និង​រុញ​ចំនួន​ឆ្លង​​សរុប​ដល់​៨៣៨.៦៥៤​នាក់​។​

​ក្នុងពេល​ជាមួយគ្នា ចំនួន​មនុស្ស​ស្លាប់​ដោយកូវី​ដ​១៩​នៅក្នុង​ប្រទេស​នេះ​កើន​ដល់​២០.៦៧៩​នាក់ បន្ទាប់​ពី​អ្នកជំងឺ​១១៥​នាក់​ទៀត​បាន​ស្លាប់​៕

​អ្នកដំណើរ​ឡើង​យន្តហោះ​ពី​ក្រុង​ហាណូយ​មក​ក្រុង​ហូជីមិញ កាលពី​ថ្ងៃ​១០​តុលា នៅពេល​អាជ្ញាធរ​ដកចេញ​ការ​រឹតត្បិត​លើ​ការធ្វើដំណើរ​ក្នុងស្រុក​ដោយសារ​ចំនួន​ឆ្លង​ថយចុះ​ខ្លាំង​