​ប្រែ​សម្រួលៈ​វាសនា​៖ ដោយ​ហៅ​សហរដ្ឋ​អាម៉េរិក​ថា​ជា​«​ប្រភព​នៃ​អស្ថិរភាព​»​នៅ​ឧបទ្វីប​កូរ៉េ មេដឹកនាំ​កូរ៉េខាងជើង លោក​គីម ជុង​អ៊ុន បាន​និយាយថា កម្មវត្ថុ​សំខាន់​បំផុត​របស់​ប្រទេស​លោក​​គឺ​«​សមត្ថភាព​យោធា​មិន​អាច​ចាញ់​»​មួយ ដែល​គ្មាន​នរណា​ហ៊ាន​ប្រជែង​។​

​ទីភ្នាក់ងារ​សារព័ត៌មាន​កូរ៉េខាងជើង​KCNA​បាន​រាយការណ៍​នៅ​ថ្ងៃ​អង្គារ​នេះ​ថា ក្នុង​សុន្ទរកថា​បើក​ពិព័រណ៍​យោធា​មួយ​លោក​គីម បាន​បន្ទោស​អាម៉េរិក​ចំពោះ​ភាព​តានតឹង​នៅលើ​ឧបទ្វីប​កូរ៉េ​។​​លោក​ថា អាម៉េរិក​ជា «​មូលហេតុ​ឬ​សគល់​»​នៃ​អស្ថិរភាព​។​

​សូមបញ្ជាក់​ថា កូរ៉េខាងជើង​ស្ថិតក្រោម​ទណ្ឌកម្ម​អន្តរជាតិ​ជាច្រើន ដោយសារ​តែ​សព្វាវុធ​នុយគ្លែអ៊ែ​រនិង​កម្មវិធី​កាំជ្រួច​ផ្លោង​របស់​ប្រទេស​នេះ ដែល​មាន​ការអភិវឌ្ឍ​យ៉ាង​ឆាប់រហ័ស​ក្រោម​ការដឹក​​នាំ​របស់​លោក​គីម ជុង​អ៊ុន​។​

​នៅ​ឆ្នាំ​២០១៧ កូរ៉េ​ខាងជើង​បាន​សាកល្បង​កាំជ្រួច​ដែល​អាច​ហោះ​ដល់​អាម៉េរិក​ដីគោក​ទាំងមូល និង​បាន​បំផ្ទុះ​សាកល្បង​គ្រាប់បែកនុយគ្លេអ៊ែរ​ខ្លាំង​បំផុត​របស់​ខ្លួន​ហើយ​រដ្ឋាភិបាល​ក្រុង​ព្យុង​យ៉ាង​​បាន​និយាយថា​ខ្លួន​ត្រូវការ​ឃ្លាំង​អាវុធ​នុយគ្លេអ៊ែរ​ដើម្បី​ការពារ​ខ្លួនឯង​ទល់នឹង​ការឈ្លានពាន​របស់​អាម៉េរិក​។​

​រដ្ឋាភិបាល​លោក​ប្រធានាធិបតី បៃ​ដិន បាន​និយាយ​ដដែលៗ​ថា ខ្លួន​មិន​មាន​ចេតនា​អរិភាព​ចំពោះ​កូរ៉េខាងជើង​ទេ តែ​លោក​គីម បាន​ប្រាប់​ប្រតិភូ​ក្នុង​«​ពិព័រណ៍​ការពារ​ខ្លួន ឆ្នាំ​២០២១»​ថា​”​ខ្ញុំ​​ចង់ដឹង​ណាស់​ថា​តើ​មាន​នរណា​ឬ​ប្រទេស​ណា​គិត​ដូច្នេះ​។​វា​មិន​មាន​មូលដ្ឋាន​ត្រូវ​ជឿថា អាម៉េរិក​មិន​បង្ក​ជម្លោះ​»​។​

​រដ្ឋាភិបាល​របស់​លោកបៃ​ដិន បាន​និយាយថា ខ្លួន​មាន​បំណង​ជួប​មន្ត្រី​កូរ៉េខាងជើង​នៅពេល​ណា​មួយ ឬ​កន្លែង​ណាមួយ​ក៏បាន ដោយ​គ្មាន​លក្ខខណ្ឌ​ជាមុន​ក្នុង​កិច្ចខិតខំ​របស់​ខ្លួន​ដោយ​ធ្វើ​​អោយ​ឧបទ្វីប​កូរ៉េ​គ្មាន​នុយគ្លេអ៊ែ​រ​។​

​អាម៉េរិក​ដាក់​ទ័ព​ប្រមាណ​២៨.៥០០​នាក់​នៅ​កូរ៉េ​ខាងត្បូង​ហើយ​យោធា​នៃ​ប្រទេស​ទាំង​២​ទើប​បញ្ចប់​ការធ្វើ​សមយុទ្ធ​រួមគ្នា​កាលពី​ខែ​សីហា​។​សមយុទ្ធ​រាល់​ឆ្នាំ​តែ​បញ្ឆេះ​កំហឹង​កូរ៉េខាងជើង​ដែល​ចាត់​​ទុក​វា​ជា​ការហាត់​សម​ដើម្បី​ការឈ្លានពាន​។​

​កូរ៉េខាងត្បូង​ក៏​បង្កើន​សមត្ថភាព​យោធា​របស់​ខ្លួន ដោយ​កាលពី​ខែ​មុន​បាន​សាកល្បង​បាញ់​កាំជ្រួច​ផ្លោង​ចាញ់​ពី​នាវាមុជទឹក​និង​បាន​បង្ហាញ​កាំជ្រួច​លឿន​ជាង​សម្លេង​មួយ​ប្រភេទ​ផង​។​

​លោក​គីម​បាន​ចោទ​កូរ៉េខាងត្បូង​ថា​«​លាក់​ពុត​»​ដោយ​ថា​ប្រទេស​នេះ​ព្យាយាម​ពង្រឹង​អំណាច​យោធា​ដោយ​គ្មាន​ការហាមឃាត់​និង​គ្រោះថ្នាក់​ដែល​វា​នឹង​បំផ្លាញ​តុល្យភាព​យោធា​នៅលើឧ​ប​​ទ្វីប​កូរ៉េ​ហើយ​បង្កើន​អស្ថិរភាព​យោ​ថា​និង​គ្រោះថ្នាក់​៕

​គីម ជុង​អ៊ុន ថ្លែង​ក្នុង​ការបើក​ពិព័រណ៍​ការពារ​ខ្លួន​ឆ្នាំ​២០២១​កាលពី​ថ្ងៃ​ចន្ទ​