​ប្រែ​សម្រួល : កញ្ញា​ដា​លី​ស (​អេ​ស៊ាវ័ន​) ៖ នៅ​ថ្ងៃ​អង្គារ​នេះ​ចិន​បាន​សន្យា​ផ្តល់ប្រាក់​ចំនួន ២៣០ លាន​ដុល្លារ​ដើម្បី​បង្កើត​មូលនិធិ​ការពារ​ជីវៈចម្រុះ​នៅក្នុង​ប្រទេស​កំពុងអភិវឌ្ឍន៍​។​

​និយាយ​តាម​វីដេអូ​ទៅកាន់​សន្និសីទ​អ​.​ស​.​ប​នៅ​ទីក្រុង​គុន​មីង​ភាគ​និរតី​ប្រទេស​ចិន ប្រធានាធិបតី​ស៊ី ជីន​ភីង​បាន​អំពាវនាវ​ឱ្យ​ប្រទេស​ផ្សេង​ទៀត​ចូល​រួមចំណែក​ដល់​មូលនិធិ​ជីវៈចម្រុះ​​ទីក្រុង​គុន​មីង​។​

ស៊ី ប្រកាសបង្កើតមីលនិធិ ​ការពារ​ជីវៈចម្រុះ​នៅក្នុង​ប្រទេស​កំពុងអភិវឌ្ឍន៍​

​កិច្ចប្រជុំ​ពេញ​មួយ​សប្តាហ៍​នេះ​គឺជា​ការចាប់ផ្តើម​ជា​ផ្លូវការ​នៃ​កិច្ចពិភាក្សា​ជា​សកល​ថ្មី​ស្តីពី​ការការពារ​រុក្ខជាតិ​និង​សត្វ​របស់​ពិភពលោក​ពី​ការ​ផុត​ពូជ​។ សម័យប្រជុំ​លើក​ទី ២​និង​លើក​ចុងក្រោយ​​ដែល​នឹង​ព្យាយាម​ឯកភាពគ្នា​លើ​គោលដៅ​សម្រាប់​១០ ឆ្នាំ​ខាង​មុខ គ្រោង​នឹង​ធ្វើ​នៅ​ទីក្រុង​គុន​មីង​ចាប់ពី​ថ្ងៃទី ២៥ ខែ​មេសា​ដល់​ថ្ងៃទី ៨ ខែ​ឧសភា​ឆ្នាំ​ក្រោយ​។​

​ពិភពលោក​បាន​បរាជ័យ​ក្នុង​ការសម្រេច​គោលដៅ ១០ ឆ្នាំ​បច្ចុប្បន្ន ពោលគឺ​គោលដៅ​ជីវចម្រុះ​ទីក្រុង​អាឈី​នៅ​ប្រទេស​ជប៉ុន​ឆ្នាំ ២០១០​។ អង្គការ Greenpeace បាន​និយាយថា​ប្រទេស​​នានា​ត្រូវ​ផ្តោត​មិន​ត្រឹមតែ​លើ​ការកំណត់​គោលដៅ​ថ្មីៗ​ប៉ុណ្ណោះ​ទេ​ប៉ុន្តែ​ត្រូវ​បំពេញ​គោលដៅ​ទាំងនោះ​ឱ្យ​បាន​ផង​ដែរ​។​

​អង្គការ​បាន​និយាយ​ក្នុង​សេចក្តីថ្លែងការណ៍​មួយ​ថា “​មូលនិធិ​ជីវៈចម្រុះ​ទីក្រុង​គុន​មីង​ដែល​បាន​ចាប់ផ្តើម​នៅ​ថ្ងៃនេះ​គួរតែ​ចាប់ផ្តើម​ការសន្ទនា​ដែល​ត្រូវការ​ជា​បន្ទាន់​ស្តីពី​ហិរញ្ញវត្ថុ​ជីវៈចម្រុះ​”​។​

​គោលដៅ​មួយ​ក្នុង​ឆ្នាំ ២០១០ គឺ​សម្រេច​បាន ៖ ប្រហែល​១​ភាគ​៦​នៃ​ផ្ទៃដី​និង​ទឹកសាប​របស់​ភពផែនដី​ឥឡូវនេះ​ស្ថិតនៅក្នុង​តំបន់​ការពារ​ឬ​អភិរក្ស នេះ​បើ​យោងតាម​របាយការណ៍រ​បស់​អង្គការសហប្រជាជាតិ​ចេញផ្សាយ​កាលពី​ខែ​ឧសភា​៕

​ភ្ញៀវទេសចរ​ដើរកាត់​សួនផ្កា​រចនា​ឡើង​ដើម្បី​អបអរ​សន្និសីទ​ជីវៈចម្រុះ​គុន​មីង (COP15) ក្នុង​ទីក្រុង​គុន​មីង​កាលពី​ថ្ងៃទី​២​តុលា ២០២១