​ដោយៈ អង្គា​រ៍​ហេង / ភ្នំពេញៈ សមត្ថកិច្ច​នគរបាល នៃ​មន្ទីរ​ប្រឆាំង​គ្រឿងញៀន ក្រសួងមហាផ្ទៃ បាន​បង្ហាញមុខ​ជនសង្ស័យ ជា​ជនជាតិ​នី​ហ្សេ​រី​យ៉ា​ម្នាក់ ពាក់ព័ន្ធ​ទៅនឹង​ករណី ជួញដូរ​គ្រឿងញៀន ជិត​កន្លះ​គីឡូក្រាម នៅ​រាជធានី​ភ្នំពេញ នា​រសៀល ថ្ងៃទី​១២ ខែតុលា ឆ្នាំ​២០២១ នេះ​។

​មន្ត្រី​ជំនាញ បានបញ្ជាក់​ថាៈ កាលពី​ថ្ងៃទី​៩ ខែតុលា ឆ្នាំ ២០២១ វេលា​ម៉ោង ២០:៣០​នាទី កម្លាំង​ជំនាញ​នៃ មន្ទីរ​ប្រឆាំង​បទល្មើស​គ្រឿងញៀន (​ក​៧) ដឹកនាំ​ដោយ​លោក វរសេនីយ៍ ទោ វ័រ វុ​ទ្ធា នាយករង​មន្ទីរ ព្រមទាំង​មានការ​សម្របសម្រួល ពី​លោក ស៊ិត វណ្ណ​: ព្រះរាជអាជ្ញារង នៃ​អយ្យការ អម​សាលាដំបូង រាជធានី​ភ្នំពេញ បាន​ស៊ើបអង្កេត ស្រាវជ្រាវ និង​បង្ក្រាប ករណី​ជួញដូរ​គ្រឿងញៀន​មួយ នៅ​ចំណុច​ក្រោយ​វត្ត​សន្សំ​កុសល ផ្លូវ​បេតុង សង្កាត់​បឹងទំពុន ខណ្ឌមានជ័យ រាជធានី​ភ្នំពេញ ។​

​កិច្ចប្រតិបត្តិការ​នេះ បាន​ឈានទៅ​ឃាត់ខ្លួន ជនសង្ស័យ​ម្នាក់ ឈ្មោះ Lebechi Charles kelichi ភេទ​ប្រុស ឆ្នាំ​កំណើត ១៩៨៨ ជនជាតិ​នី​ហ្សេ​រី​យ៉ា កាន់​លិខិត ឆ្លងដែន លេខ A08315794 មុខរបរ មិន​ពិតប្រាកដ និង​ចាប់យក​វត្ថុតាង​បាន ថ្នាំញៀន ប្រភេទ​មេ​តំ​ហ្វេ​តា​មីន (ICE) ទម្ងន់​សុទ្ធ ៤៩៩,៤០ ក្រាម ។ ជនជាតិ​នី​ហ្សេ​រី​យ៉ា​នេះ និង​វត្ថុតាង កំពុង​ត្រូវបាន​សមត្ថកិច្ច​ជំនាញ រៀបចំ​ចាត់ការ ទៅតាម​នីតិវិធី​៕/V​