ដោយ​៖ ប​.​ជ័យ / បន្ទាយ​មាន​ជ័​យៈ នៅ​ខេត្តបន្ទាយមានជ័យ អ្នកជំងឺ​កូ​វីដ ១៩ តួលេខ​អ្នកស្លាប់ ហក់​ឡើងដល់ ៩ នាក់ តែ​ក្នុង​១​ថ្ងៃទី​១៤ តុលា​នេះ​, ខណៈ​គណៈកម្មការ បាន​ជូន​ដំណើរ​សព​ទី​២៦១ ចំ​ថ្ងៃ​ដែល​លោកស្រី វេជ្ជបណ្ឌិត ឱ វណ្ណឌី​ន រដ្ឋលេខាធិការ ក្រសួងសុខាភិបាល និង​ជា​ប្រធាន​គណៈកម្មការ​ចំពោះ​កិច្ច ចាក់​វ៉ាក់សាំង​កូ​វីដ ១៩ ក្នុង​ក្របខ័ណ្ឌ​ទូទាំងប្រទេស និង​ប្រតិភូ អញ្ជើញ​ចូលរួម​ក្នុង​ពិធី​បិទ យុទ្ធនា​ការចាក់​វ៉ាក់សាំង កូ​វីដ​១៩ ជុំ​ទី​១ ជូន​ប្រជាពលរដ្ឋ ដែលមាន​អាយុ​ចាប់ពី ១៨ ឆ្នាំ​ឡើង ក្នុង​ខេត្តបន្ទាយមានជ័យ​។​

​អ្នកជំងឺ​កូ​វីដ​១៩ ដែល​ស្លាប់ និង​បូជា​ចំនួន ៩ នាក់​នោះ មាន​ស្រី ៧ នាក់ ដែលមាន​អាយុ ចាប់ពី ៦១ ឆ្នាំ ដល់ ៨៩ ឆ្នាំ ។ នេះ​ជា​តួលេខ​អ្នកស្លាប់ ដោយសារ​ជំងឺ​កូ​វីដ​១៩ ប្រចាំថ្ងៃ ខ្ពស់បំផុត ក្នុង​ខេត្ត​នេះ គិត​ចាប់ពី​ព្រឹត្តិការណ៍ សហគមន៍ ២០ កុម្ភៈ និង​ជាពិសេស គិតពី​មានការ​ផ្ទុះ​ជំងឺ​កូ​វីដ ១៩ ដំបូង ក្នុង​ខេត្ត នា​ថ្ងៃទី​១៨ ខែមេសា ឆ្នាំ​២០២០ លើ​ជនជាតិ ឥណ្ឌូណេស៊ី ២ នាក់ នៅ​ក្រុង​ប៉ោយប៉ែត ហើយ​កាលពី​ចុងខែ​កញ្ញា ឆ្នាំ​២០២១ តួលេខ អ្នកស្លាប់​ប្រចាំថ្ងៃ ហក់​ឡើង​តែត្រឹម ៧ នាក់​ប៉ុណ្ណោះ ក្នុង​១​ថ្ងៃ ។​

​ដោយឡែក គិត​ត្រឹម​ល្ងាច ថ្ងៃទី​១៤ ខែតុលា ឆ្នាំ​២០២១ អនុគណៈកម្មការ​បូជា បញ្ចុះសព នៃ​គណៈកម្មការ​ប្រយុទ្ធ​នឹង​កូ​វីដ​១៩ ខេត្តបន្ទាយមានជ័យ បាន​ជូន​ដំណើរ​សព​ទី​២៦១ នៃ​អ្នកជំងឺ​កូ​វីដ ១៩ ក្នុងនោះ សព​មាន​អាយុ​ពី ៦១ ឆ្នាំ ទៅ ៨៩ ឆ្នាំ ហើយ​ភាគច្រើន ជា​ស្ត្រី ប៉ុន្តែ​ក៏មាន​អ្នកមាន​អាយុ ១៦ ឆ្នាំ និង ៣៦ ឆ្នាំ ចំនួន ២ នាក់​ដែរ​។​

​នេះ​បើតាម​លោក ប្រាក់ សុ​ភ័ត អាចារ្យ​ខេត្ត ក៏ដូចជា មន្ត្រី​អនុគណៈកម្មការ​បូជាសព នៃ​គណៈកម្មការ​ប្រយុទ្ធ​នឹង​ជម្ងឺ​កូ​វីដ​១៩ ខេត្តបន្ទាយមានជ័យ អោយរ​ស្មី​កម្ពុជា​ដឹង នៅ​ព្រលប់ ថ្ងៃទី​១៤ ខែតុលា ឆ្នាំ​២០២១​។​

​លោក ប្រាក់ សុ​ភ័ត ក៏បាន​ឱ្យដឹងទៀតថាៈ ក្នុងនោះ ជនជាតិខ្មែរ ២៥៥ នាក់ (​ស្រី​១៤៥ នាក់​) ជនជាតិ​ឥណ្ឌូ​ណេ​សី​ុ ៣​នាក់ (​ស្រី​១​នាក់​) ជនជាតិ​ថៃ ៣ នាក់ (​ស្រី​២​នាក់​)​។ ប៉ុន្តែ​ក៏មាន​សព​ទារក ចំនួន ៥​នាក់ ដែល​អវិជ្ជមាន​កូ​វីដ ១៩ ក៏ត្រូវ​ស្ត្រី​ម្តាយ​ដែល​វិជ្ជមាន​កូ​វីដ ១៩ ដែល​បាន​នឹង​កំពុង​សម្រាក​ព្យាបាល បាន​ផ្ញើ​មកអោយ គណៈកម្មការ បូជា​ផងដែរ ។ ពោលគឺ ជា​អ្នកស្លាប់ ដោយសារ​ជំងឺ​កូ​វីដ​១៩ ដែល​គិត​ចាប់ពី​ការផ្ទុះ​ជំងឺ​កូ​វីដ នៃ​ព្រឹត្តិការណ៍ សហគមន៍ ២០ កុម្ភៈ ឆ្នាំ​២០២០ ដល់​ថ្ងៃទី​១៤ ខែតុលា ឆ្នាំ​២០២១ នេះ​៕/V​