ប្រែ​សម្រួលៈ​វាសនា​/​ស៊ីដ​នី​៖ ទីក្រុង​ស៊ីដនី របស់​អូស្ត្រាលី​នឹង​បើកទទួល​អ្នកដំណើរ​អន្តរជាតិ​ដែល​ចាក់​វ៉ាក់សាំង​កូវី​ដ​១៩​ហើយ ចាប់ពី​ថ្ងៃ​១​វិច្ឆិកា​ដោយ​មិនចាំបាច់​ធ្វើ​ចត្តា​ឡី​ស័កឡើយ នេះ​បើ​តាម​​អភិបាលរដ្ឋ​ញូ​វ​សោត​វេ​លបាន​ប្រកាស​កាលពី​ថ្ងៃ​សុក្រ​។​

​សូមបញ្ជាក់​ថា អូស្ត្រាលី​បាន​បិទ​ព្រំដែន​អន្តរជាតិ​របស់​ខ្លួន​កាលពី​ខែ​មីនា​ឆ្នាំ​២០២០​ជា​ការឆ្លើយតប​នឹង​ជំងឺ​ឆ្លងកូវី​ដ​១៩ ដោយ​អនុញ្ញាត​អោយ​ចូល​តែ​ពលរដ្ឋ​ខ្លួន​និង​អ្នករស់នៅ​អចិ​ប​ន្ត្រៃ​យ៍​ដែល​​ត្រូវធ្វើ​ចត្តា​ឡី​ស័ក​២​សប្តាហ៍​នៅ​សណ្ឋាគារ​ក្រោម​ការចំណាយ​ផ្ទាល់ខ្លួន​។​

​អភិបាលរដ្ឋ​ញូ​វ​សោត​វេលស៍ ដែល​បាន​ទីក្រុង​ស៊ីដ​នី​នៅ​ក្នុងនេះ បាន​និយាយថា​« យើង​ត្រូវការ​ចូលរួម​ជាមួយ​ពិភពលោក​ឡើងវិញ​។​យើង​មិន​អាច​រស់នៅ​ទី​នេះ​ក្នុង​ព្រះរាជាណាចក្រ​បង្ខាំង​ខ្លួន​​តែឯង​ទេ​។​យើង​ត្រូវ​បើកចំហ​»​។​

​នាយករដ្ឋមន្ត្រី​អូស្ត្រាលី​បាន​និយាយ​មុន​នេះ​ក្នុង​ខែ​នេះ​ថា​ការធ្វើដំណើរ​អន្តរជាតិ​នឹង​វិល​មក​ធម្មតា​វិញ​នៅពេល​ប្រជាជន​នៅក្នុង​រដ្ឋ​អូស្ត្រាលី​ណាមួយ​បាន​ចាក់​វ៉ាក់សាំង​ការពារកូ​វីដ​១៩​បាន​៨០​ភាគរយ​ឡើង​តែ​ដំបូង​សំរាប់តែ​ជនជាតិ​អូស្ត្រាលី​និង​ត្រូវ​ដាក់ខ្លួន​ដាច់​ពី​គេ​នៅក្នុង​ផ្ទះ​។​

​ទោះជា​យ៉ាងណា អភិបាលរដ្ឋ​ញូ​វ​សោត​វេលស៍ បាន​និយាយថា វា​ដល់​ពេល​បើក​រដ្ឋ​ដើម្បី​ជួយ​រុញ​កំណើន​សេដ្ឋកិច្ច​ដែល​ខូចខាត​ខ្លាំង​ដោយសារ​ការបិទ​ខ្ទប់​ដើម្បី​ទប់ស្កាត់​កូវី​ដ​១៩​ជិត​៤​ខែ​មកនេះ​។​​លោក​បាន​និយាយថា «​ចត្តា​ឡីស័​កនៅ​សណ្ឋាគារ ឬ​នៅ​ផ្ទះ​ជា​រឿង​ពី​អតីតកាល​។​យើង​បើក​ទីក្រុង​ស៊ីដនី​និង​រដ្ឋ​ញូ​វ​សោត​វេលស៍​សំរាប់​ពិភពលោក​»​។​

​រដ្ឋ​ញូ​វ​សោត​វេលស៍​ត្រូវ​គេ​រំពឹងថា​នឹង​ចាក់​វ៉ាក់សាំង​បាន​៨០​ភាគ​នៅត្រឹម​ចុង​សប្តាហ៍​នេះ ដោយ​សំរេច​គោលដៅ​បាន​មុន​រដ្ឋ​អូស្ត្រាលី​ផ្សេងទៀត​។​

​បើ​តាម​លោក​អភិបាលរដ្ឋ អ្នក​មក​ដល់​ស៊ីដនី​ដំបូង​ត្រូវ​បង្ហាញ​ភស្តុតាង​ថា​បាន​ចាក់​វ៉ាក់សាំង​កូវី​ដ​១៩​ពេញលេញ​និង​ការធ្វើ​តេស្តិ៍​អវិជ្ជ​មាន​កូ​វីដ​១៩​នៅពេល​មុន​ឡើង​ជិះ​យន្តហោះ​មកកាន់​​អូស្ត្រាលី​។​

​រដ្ឋ​ញូ​វ​សោត​វេលស៍ នៅ​ថ្ងៃ​សុក្រ​នេះ​បានប្រកាស​រក​ឃើញ​អ្នក​ឆ្លងកូវី​ដ​១៩​ថ្មី​ចំនួន​៣៩៩​នាក់ ដោយ​ចុះ​ឆ្ងាយ​ពី​ចំនួន​ឆ្លង​ប្រចាំ​ថ្ងៃ​ចំនួន​១.៥៩៩​នាក់​កាលពី​ដើម​ខែ​កញ្ញា​។​

​រដ្ឋ​ក្បែរ​ខាង​បាន​រាយការណ៍​អ្នក​ឆ្លង​ថ្មី​ដល់​ទៅ​២.១៧៩​នាក់ ភាគច្រើន​នៅ​ក្រុង​មែ​ល​ប៊​ន ដោយ​ចុះ​បន្តិច​ពី​ការឆ្លង​២ .២៩៧​នាក់​កាល​ពី​មួយ​ថ្ងៃមុន​។​

​ក្នុងពេល​ជាមួយគ្នា រដ្ឋធានី​កង់​បេរ៉ា នៅ​ថ្ងៃ​សុក្រ​នេះ​បាន​ចាកចេញ​ពី​ការបិទ​ខ្ទប់​អស់​ពេល​ជាង​២​ខែ​ដោយ​អនុញ្ញាត​អោយ​ហាង​កាហ្វេ ក្លិប​និង​កន្លែង​ហាត់​កីឡា​បើក​ឡើង​វិញ​ក្រោម​វិធាន​គម្លាត​​សង្គម​យ៉ាង​តឹងរឹង​៕