ដោយៈ​ម៉េង​ឆៃ / ភ្នំពេញៈ គ្មានអ្វី​ត្រូវ​ខ្លាច​បារម្ភ ចំពោះ​ការចាក់​វ៉ាក់សាំង​កូ​វីដ​១៩ នោះទេ​។ តែ​អ្វីដែល​ត្រូវ​ខ្លាច ត្រូវ​បារម្ភ គឺ​ខ្លាច​តែ​មិនមាន​វ៉ាក់សាំង​ចាក់​។ សូម្បីតែ​កុមារ​អាយុ​ចាប់ពី ៦​ឆ្នាំ​ឡើង បាន​ចាក់​វ៉ាក់សាំង តាម​ផែនការ ស្ទើរតែ​ទាំងអស់​ហើយ​។ ចុះ​អ្នក​ពេញវ័យ ចាប់ពី ១៨​ឆ្នាំ​ឡើងទៅ នៅ​រារែក​អ្វី​ទៀត​?​។​

​ក្នុង​សារ​ពិសេស​ជូន​ជនរួមជាតិ កាលពី​ព្រឹក​ថ្ងៃទី​១៩ ខែតុលា សម្តេច​តេ​ជោ នាយករដ្ឋមន្ត្រី ហ៊ុន សែន បានប្រកាសថា នៅក្រោយ​ពិធីបុណ្យ​ភ្ជុំបិណ្ឌ ដែលជា​ការសាកល្បង​ដ៏​ធំ បើក​ឲ្យ​មាន​អ្នកធ្វើដំណើរ​ច្រើន ទៅ​ស្រុកកំណើត និង​ដើរលេង​ច្រើន​ពេញ​ផ្ទៃ​ប្រទេស គឺ​អត្រា​អ្នក​ឆ្លង​កូ​វីដ​១៩ បាន​ធ្លាក់ចុះ​ជា​បន្តបន្ទាប់ ដែល​អាច​ឈានទៅ​បើក​ប្រទេស​ឡើងវិញ នាពេល​ឆាប់ៗ​នេះ​។​

​សម្តេច​តេ​ជោ ហ៊ុន សែន លើកឡើងថា ការឆ្លង​កូ​វីដ ក្នុង​កម្រិត​បច្ចុប្បន្ន ទោះជា​ធ្លាក់ចុះ មិន​ដល់​សូន្យ​កូ​វីដ តែ​យើង​ត្រូវ​បន្តធ្វើ​ឲ្យ​ធ្លាក់ចុះ ដើម្បី​ឈានទៅ​បើក​ប្រទេស​ឡើងវិញ ជាមួយនឹង​វិធានការ ៣​ការពារ និង​៣​កុំ ព្រមទាំង​ត្រូវ​ទៅ​ទទួលយក​វ៉ាក់សាំង​ឲ្យ​បាន​គ្រប់ៗ​គ្នា និង​បំបាត់ចោល​នូវ​ជំងឺ​រើសអើង​អ្នកជំងឺ​កូ​វីដ ដោយ​បង្កើត​នូវ​វប្បធម៌​ជួយ​គ្នា ក្នុង​គ្រា​ដ៏​លំបាក​នេះ​។​

​សម្តេច​តេ​ជោ ក៏បាន​អំពាវនាវ​ដល់​បងប្អូន​ជនរួមជាតិ ទៅ​ចាក់​វ៉ាក់សាំង​បង្ការ​ជំងឺ​កូ​វីដ​១៩​។ ក្នុងនោះ សម្តេច ក៏បាន​ណែនាំ​ដល់​គ្រូពេទ្យ ត្រូវ​រៀបចំ​ពិនិត្យមើល​នៅ​ភូមិសាស្ត្រ​ឆ្ងាយៗ ដែលមាន​អ្នក​មិនទាន់​ចាក់​វ៉ាក់សាំង ឬ​ជនពិការ ត្រូវ​រៀបចំ​ទៅ​ចាក់​ដល់​ភូមិ និង​ដល់ផ្ទះ​តែម្តង​។

​សម្តេច​តេ​ជោ លើកឡើងថា មកដល់ពេលនេះ កុមារ អាយុ​ពី ៦​ឆ្នាំ ទៅ​ក្រោម ១៨​ឆ្នាំ ចាក់​បាន​លឿន ដល់​ជាង ៩០%​ហើយ ខណៈ​ចំនួន​អ្នក​ចាក់​វ៉ាក់សាំង​សរុប​ទូទាំងប្រទេស ចាក់​បាន​ជាង ១៣​លាន​នាក់​ហើយ​។ ដូច្នេះ​សូមកុំ​រារែក​ជាមួយនឹង​ការចាក់​វ៉ាក់សាំង ព្រោះ​បើតាម​សម្តេច​តេ​ជោ​សែន មកដល់ពេលនេះ មិនទាន់មាន​អ្នករងគ្រោះ​ណា​ម្នាក់​ទេ ដោយសារតែ​ការចាក់​វ៉ាក់សាំង​។​

​សម្តេច​តេ​ជោ​នាយករដ្ឋមន្ត្រី​ក៏បាន​ប្រកាស​ណែនាំ ឈប់​ឲ្យ​បញ្ជូន​អ្នកជំងឺ​កូ​វីដ​១៩ មកកាន់​មន្ទីរពេទ្យ នៅ​ភ្នំពេញ ព្រោះ​អាចធ្វើ​អោយមាន​គ្រោះថ្នាក់​ដល់​អ្នកជំងឺ​ទៅវិញ ក្នុងពេល​ធ្វើដំណើរ​។ ប្រជាពលរដ្ឋ គួរ​ជឿទុកចិត្ត​លើ​មន្ទីរពេទ្យ​ខេត្ត ដែល​រាជរដ្ឋាភិបាល បាន​ខិតខំ​កសាង​សមត្ថភាព ក្នុងការ​ព្យាបាល​ជំងឺ​កូ​វីដ​-១៩ រយៈពេល​ជាង​មួយឆ្នាំ​កន្លងមកនេះ​។​

​ចំណែក​ក្រសួងសុខាភិបាល នៅ​ថ្ងៃទី​១៩ ខែតុលា​នេះ ក៏បាន​ប្រកាស ជំរុញ​ឱ្យ​ក្រុម​គោលដៅ ដែល​ប្រឈម​នឹង​ឆ្លង​ជំងឺ​កូ​វីដ​១៩ ធ្ងន់ធ្ងរ ទៅ​ចាក់​វ៉ាក់សាំង​។ ក្រុម​គោលដៅ ដែល​ប្រឈម​នឹង​ឆ្លង​ជំងឺ​កូ​វីដ​១៩ ធ្ងន់ធ្ងរ រួមមាន អ្នក​ដែលមាន​វ័យចាស់ ស្ត្រី​មាន​ផ្ទៃពោះ ស្ត្រី​បំបៅ​ដោះ​កូន អ្នកជា​សះស្បើយ​ពី​ជំងឺ​ផ្សេងៗ និង​អ្នកមាន​ជំងឺ​ប្រចាំកាយ​។

​សេចក្តីប្រកាស​លើកឡើងថា កន្លងមក មាន​ពលរដ្ឋ​មួយចំនួន​តូច នៅ​មិនទាន់បាន​ស្ម័គ្រចិត្ត ចាក់​វ៉ាក់សាំង​កូ​វីដ​១៩ ដោយមាន​មូលហេតុ​ផ្សេងៗ​គ្នា ខណៈ​ប្រជាពលរដ្ឋ និង​កុមារ​ចាប់ពី​អាយុ ៦​ឆ្នាំ​ឡើង បាន​ស្ម័គ្រចិត្ត​ចាក់​វ៉ាក់សាំង បាន​ច្រើន​។ ក្នុងនោះ ក៏មាន​លោកតា លោកយាយ ដែលមាន​អាយុ​លើសពី ១០០​ឆ្នាំ ក៏បាន​ចូលរួម​ចាក់​វ៉ាក់សាំង ប្រកបដោយ​សុវត្ថិភាព​ផងដែរ​។​

​ដូច្នេះ​អ្នក​ដែល​មិនទាន់បាន​ចាក់​វ៉ាក់សាំង សូម​អញ្ជើញ​ទៅ​ចូលរួម​ចាក់​វ៉ាក់សាំង​ឱ្យបាន​គ្រប់គ្នា ដើម្បី​កាត់បន្ថយ​នូវ​សភាព​ធ្ងន់ធ្ងរ​នៃ​ជំងឺ​កូ​វីដ​១៩ ខណៈ​ក្រសួងសុខាភិបាល សង្កេតឃើញថា អាត្រា​នៃ​អ្នកស្លាប់ ដោយសារ​ជំងឺ​កូ​វីដ​កន្លងមក ភាគច្រើន ជា​អ្នក​ដែល​មិនបាន​ចាក់​វ៉ាក់សាំង​។

​ជាមួយគ្នានេះ គណៈកម្មការ​ចំពោះ​កិច្ច​ចាក់​វ៉ាក់សាំង​កូ​វីដ​១៩ ក៏បាន​ណែនាំ​ដល់​មន្ត្រី ដែល​ទទួលបន្ទុក​ការងារ​ចាក់​វ៉ាក់សាំង ត្រូវ​ស្រង់​ចំនួន​ឱ្យបាន​ច្បាស់លាស់ នៅតាម​ផ្ទះ​នីមួយៗ ចំពោះ​អ្នក​ដែល​មិនទាន់​ចាក់​វ៉ាក់សាំង និង​មូលហេតុ​ជាក់លាក់ ដើម្បី​ជំរុញឱ្យមាន​ការអប់រំ​ដល់​ពួកគាត់ ឱ្យ​យល់​ពី​សារប្រយោជន៍​រប​ស់​វ៉ាក់សាំង​កូ​វីដ​១៩​នេះ និង​សម្រេចចិត្ត​ចាក់​ឱ្យបាន​គ្រប់គ្នា បើទោះជា​មាន​វ័យចាស់​ក៏ដោយ​។​

​ចូរ​កុំភ្លេចថា ក្នុង​បរិបទ​ក្នុងពេល​បច្ចុប្បន្ន ដែល​កំពុង​មានការ​រាតត្បាត នៅលើ​ពិភពលោក ក៏ដូចជា នៅតាម​បណ្តា​ប្រទេស​នីមួយៗ ពី​វីរុស​កូ​វីដ​-១៩ បំប្លែង​ខ្លួន​ថ្មីៗ ជាពិសេស​វីរុស​បំប្លែង​ខ្លួន​ថ្មី ប្រភេទ​ដែល​តា ដែល​កំពុង​ចរាចរ​យ៉ាងសកម្ម​នៅ​ប្រទេស​ជាច្រើន ក៏ដូចជា​ប្រទេស​កម្ពុជា​ផងដែរ​។ ដូច្នេះ​អ្នក ដែល​មិនទាន់​ចាក់​វ៉ាក់សាំង ចាប់ពី​អាយុ ៦​ឆ្នាំ​ឡើង​ទាំងអស់ សូម​រួសរាន់​ស្ម័គ្រចិត្ត ទៅ​ចាក់​វ៉ាក់សាំង​កូ​វីដ​-១៩ ឱ្យបាន​គ្រប់គ្នា ដើម្បី​បង្កើត​ភាពស៊ាំ​ក្នុង​ខ្លួន និង​ភាព​សាំ​ក្នុង​សហគមន៍ សម្រាប់​ទប់ទល់​ពី​ការវាយលុក​នៃ​វីរុស​កូ​វីដ​-១៩ សំដៅ​កាត់បន្ថយ​ភាព​ធ្ងន់ធ្ងរ​អ្នកជំងឺ​កូ​វីដ​-១៩ និង​កាត់បន្ថយ​នូវ​អត្រា​សម្រាក ពេទ្យ ក៏ដូចជា​កាត់បន្ថយ​ជា​អតិបរមា​នូវ​អត្រា​ស្លាប់ ដែល​បណ្តាលមកពី​ជំងឺ​កូ​វីដ​-១៩​។​

​របាយការណ៍​របស់​ក្រសួងសុខាភិបាល ក្នុង​រយៈពេល ២​ថ្ងៃ​ចុងក្រោយ គឺ​នៅ​ថ្ងៃទី​១៧​តុលា និង​ថ្ងៃទី​១៨​តុលា ចំនួន​អ្នក​ឆ្លង​កូ​វីដ​១៩ បាន​ធ្លាក់ចុះ ពី​ជាង ២០០​នាក់ មក​នៅត្រឹម​ជាង ១០០​នាក់​។ ក្នុងនោះ ចំនួន​អ្នកស្លាប់​ដោយ​ជំងឺ​កូ​វីដ​១៩ ក៏​ធ្លាក់ចុះ​ពី​ជាង ២០​នាក់ មក​នៅត្រឹម​ជាង ១០​នាក់ ក្នុង ១​ថ្ងៃ​។ ប៉ុន្តែ​ចំនួន​អ្នកស្លាប់​ដោយ​កូ​វីដ​១៩ នៅ​ថ្ងៃទី​១៧​តុលា មាន​ចំនួន ១២​នាក់ គឺមាន ៨​នាក់ ជា​អ្នក​មិនបាន​ចាក់​វ៉ាក់សាំង​។ រីឯ​នៅ​ថ្ងៃទី​១៨​តុលា នៅ​ទូទាំងប្រទេស មាន​អ្នកស្លាប់​ដោយសារ​កូ​វីដ​១៩ ចំនួន ១១​នាក់ ក៏​ក្នុងនោះ មាន ៨​នាក់ ជា​អ្នក ដែល​មិនបាន​ចាក់​វ៉ាក់សាំង​ដែរ​។ នេះ​បើតាម​ការបញ្ជាក់​របស់​ក្រសួងសុខាភិបាល​។​

​ដូច្នេះ​វ៉ាក់សាំង​បង្ការ​ជំងឺ​កូ​វីដ​១៩ ដែល​រាជរដ្ឋាភិបាល ផ្តល់ជូន​ដោយ​ឥតគិតថ្លៃ​នេះ ពិត​សំខាន់ ដើម្បី​ប្រឆាំងនឹង​កូ​វីដ​១៩​។ ម្យ៉ាង​ចាប់តាំងពី​ថ្ងៃទី​១០ ខែកុម្ភៈ ឆ្នាំ​២០២១ មកដល់​ខែតុលា​នេះ ក៏​មិនមាន​នរណា ចាក់​វ៉ាក់សាំង​រួចហើយ មាន​បញ្ហា​ប្រតិកម្ម ប៉ះពាល់​ដល់​អាយុជីវិត​នោះឡើយ​។​

​រហូតដល់​ថ្ងៃទី​១៨ ខែតុលា ឆ្នាំ​២០២១ នៅ​ទូទាំងប្រទេស ចាក់​វ៉ាក់សាំង​សរុប​បាន​ចំនួន​ជាង ១៣​លាន ៦០​ម៉ឺន​នាក់ ស្មើនឹង​ជាង ៨៥​ភាគរយ នៃ​ប្រជាជន​កម្ពុជា​សរុប ១៦​លាន​នាក់​។​

​ក្រៅពីនេះ អ្នក​មិន​ចាក់​វ៉ាក់សាំង ក៏​មិនត្រូវ​បានអនុញ្ញាត​ឲ្យ​ចូល​សាលារៀន មិន​អនុញ្ញាត​ឲ្យ​ចូល​ផ្សារ និង​កន្លែងធ្វើការ ឬ​អាជីវកម្ម​ផ្សេងទៀត​។ ការធ្វើដំណើរ​ទៅ​ក្រៅប្រទេស នៅ​ប្រទេស​មួយចំនួន ក៏​អនុញ្ញាត​សម្រាប់​អ្នក​ដែល​បាន​ចាក់​វ៉ាក់សាំង​រួចរាល់​ប៉ុណ្ណោះ​៕​សរន​