ដោយ​: ម៉េង​ឆៃ / ភ្នំពេញ​: ក្រសួង​អប់រំ យុវជន និង​កីឡាបានចេញសេចក្តីណែនាំ​នៅ​ល្ងាច​ថ្ងៃទី​២១ ខែតុលា​ថា ដើម្បី​ឈាន ទៅ​ដំណើរ​ការអប់រំ តាម​គន្លង​ប្រក្រតីភាព​ថ្មី ក្នុង​បរិបទ​កូ​វីដ​១៩ ចាប់ពី​ថ្ងៃទី​១ ខែវិច្ឆិកា ឆ្នាំ​២០២១ ក្រសួង​នឹង​ពង្រីក​វិសាលភាព​នៃ​ការបង្រៀន និង​រៀន​តាម​បណ្តុំ សម្រាប់​គ្រឹះស្ថានសិក្សា​សាធារណៈ និង​ឯកជន នៅ​គ្រប់​កម្រិត ក្នុងភូមិ​សាស្ត្រ​ទូទាំង​រាជធានី​ខេត្ត​ទាំងអស់​។

​សេចក្តីប្រកាសលើកឡើងថា ការពង្រីក​វិសាលភាព​នេះ រួមបញ្ចូល​ទាំង​ការពង្រីក​ពី​កម្រិត​ថ្នាក់​ទី​៩ និង​ទី​១២ រហូតដល់​គ្រប់​កម្រិត​ថ្នាក់មធ្យមសិក្សា និង​ការពង្រីក​វិសាលភាព​ដល់​កម្រិត​បឋម​សិក្សា គ្រឹះស្ថាន​ឧ​ត្ត​មសិ​ក្សា​សាធារណៈ និង​ឯកជន វិទ្យាស្ថាន​ជាតិ​អប់រំ វិទ្យាស្ថាន​បច្ចេកវិទ្យា គ្រឹះស្ថាន​បណ្តុះបណ្តាល​គ្រូ គ្រឹះស្ថាន​សិក្សាអប់រំ​ពិសេស សាលាអនុវត្តន៍ និង​វិទ្យាល័យ​ចំណេះ​ទូទៅ និង​អប់រំ​បច្ចេកទេស ដោយ​គោរព​តាម​យ៉ាង​ខ្ជាប់ខ្ជួន​នូវ​បទដ្ឋាន​សុខាភិបាល​ជា​ធរមាន​។​

​សូម​រម្លឹកថា សាលារៀន​ថ្នាក់​អនុវិទ្យាល័យ និង​ថ្នាក់​វិទ្យាល័យ នៅតាម​រាជធានី​ខេត្ត បាន​បើក​ដំណើរការ​ឡើងវិញ ក្រោយ​ស្ងប់​ឆ្លង​កូ​វីដ​១៩ កាលពី​អំឡុង​ខែកញ្ញា ឆ្នាំ​២០២១​។ សាលារៀន​បើក​ឡើងវិញ ថ្នាក់​ប្រឡង​ឌី​ប្លូ​ម និង​ប្រឡង​បាក់​ឌុប​នោះ ធ្វើឡើង ក្រោយពី​គ្រូ និង​សិស្ស បាន​ចាក់​វ៉ាក់សាំង​រួចរាល់​។ រីឯ​អ្នក​មិនទាន់​ចាក់​វ៉ាក់សាំង មិន​អនុញ្ញាត​ឲ្យ​ចូលរៀន​ឡើង​។

​ក្នុងពេល​បើក​សាលារៀន​ដំបូងៗ​នោះ ក៏មាន​គ្រូ និង​សិស្ស រកឃើញ​ឆ្លង​កូ​វីដ​១៩ ដែរ​។ តែ​មិនមាន​ច្រើន រហូតដល់​ត្រូវ​បិទ​សាលារៀន​វិញ​នោះទេ​។​

​នៅក្រោយ​ភ្ជុំបិណ្ឌ នា​ដើមខែ​តុលា​នេះ ក៏​គ្រូបង្រៀន​មួយចំនួន ធ្វើតេស្ត​រកឃើញ​ឆ្លង​កូ​វីដ​១៨ ដែរ​។ តែ​មិនមាន​ច្រើន ហើយ​ដំណើរ​ការរៀន និង​បង្រៀន​នៅ​ថ្នាក់រៀន តាម​គន្លង​ថ្មី រួមទាំង​ការបង្រៀន និង​រៀន​តាម​អន​ឡាញ ក៏​នៅតែ​បន្ត​។​

​រហូតដល់​ពេលនេះ សិស្សានុសិស្ស​នៅ​កម្រិត​បឋមសិក្សា ចាប់ពី​អាយុ ៦​ឆ្នាំ​ឡើង ក៏ដូចជា​កម្រិត​កុមារ និង​យុវវ័យ អាយុ​ពី ១២​ឆ្នាំ ដល់​ក្រោម ១៨​ឆ្នាំ នៅ​ថ្នាក់​អនុវិទ្យាល័យ និង​វិទ្យាល័យ រួមទាំង​អ្នកមាន​អាយុ ១៨​ឆ្នាំ​ឡើង នៅ​ទូទាំងប្រទេស បាន​ចាក់​វ៉ាក់សាំង​បង្ការ​ជំងឺ​កូ​វីដ​១៩ បាន​សឹងតែ ១០០% ហើយ​គ្រូបង្រៀន​ទាំងអស់ ក៏បាន​ចាក់​វ៉ាក់សាំង រហូតដល់ ៣​ដូ​ស​រួចរាល់​ហើយ​។​

​យ៉ាងណាក៏ដោយ ការសម្រេច​របស់​ក្រសួង​អប់រំ បើក​សាលារៀន​ឡើងវិញ នៅ​ថ្ងៃទី​១ ខែវិច្ឆិកា​ខាងមុខនេះ ក៏​បន្ទាប់ពី​ក្រសួង បាន​តាមដាន និង​វាយតម្លៃ​លើ​ដំណើរ​ការបង្រៀន និង​រៀន​តាម​សាលារៀន សម្រាប់​គ្រឹះស្ថានសិក្សា​សាធារណៈ និង​ឯកជន ក្នុងភូមិ​សាស្ត្រ ដែលមាន​ហានិភ័យ​ទាប នាពេល​កន្លងមក​។​

​ក្រសួង​អប់រំ លើកឡើង​នូវ​ហេតុផល​ធំៗ ៤​ចំណុច រួមមាន​៖ ១-​គ្រឹះស្ថានសិក្សា ប្រមាណ ៣០​ភាគរយ បា​ចាប់ដំណើរ ការ​តាម​គ្រប់​រូបភាព ស្របតាម​សេចក្តីណែនាំ​។ ២-​ការចូលរួម​តាម​គ្រប់​រូបភាព​ពី​សំណាក់​អ្នកពាក់ព័ន្ធ​ទាំងអស់ ដើម្បី​ធានា​ដំណើរការ​អប់រំ​ប្រកបដោយ​សុវត្ថិភាព និង​ប្រុងប្រយ័ត្ន​។ ៣-​ការបើក​ដំណើរការ​គ្រឹះស្ថានសិក្សា បានផ្តល់​លទ្ធភាព​ឲ្យ​យើង​អាចធ្វើ​តេស្ត និង​រកឃើញ​អ្នក​វិជ្ជមាន​កូ​វីដ​១៩ ទាំង​លើ​បុគ្គលិក​អប់រំ និង​សិស្សានុសិស្ស​មួយចំនួន​តូច ហើយ​បាន​ចាត់ចែង​ព្យាបាល​ទាន់ពេលវេលា និង​ទប់ស្កាត់ កាត់ផ្តាច់​ការឆ្លង​រាលដាល​បានល្អ​ប្រសើរ​។ ៤-​ករណី​វិជ្ជមាន​កូ​វីដ​១៩ លើ​គ្រូបង្រៀន និង​សិស្សានុសិស្ស ក្នុង​រយៈពេល ៧​ថ្ងៃ មុន​បុណ្យ​ភ្ជុំបិណ្ឌ និង​រយៈពេល ៧​ថ្ងៃ ក្រោយ​ថ្ងៃ​ភ្ជុំបិណ្ឌ មាន​ចំនួន​តិចតួច និង​អាច​គ្រប់គ្រង​បាន​។

​ម្យ៉ាងវិញទៀត ក្រសួង​អប់រំ ក៏បាន​ប្រកាសថា មាតាបិតា អ្នកអាណាព្យាបាល គ្រូបង្រៀន និង​សិស្សានុសិស្ស និស្សិត បាន​ចាក់​វ៉ាក់សាំង​ការពារ​កូ​វីដ​១៩ ក្នុង​អត្រា​ខ្ពស់​។ ដូច្នេះ​ក្រសួង​អប់រំ ក៏បាន​សម្រេច​ថា ចាប់ពី​ថ្ងៃទី​១ ខែវិច្ឆិកា ឆ្នាំ​២០២១ ក្រសួង​នឹង​ពង្រីក​វិសាលភាព នៃ​ការបង្រៀន និង​រៀន សម្រាប់​គ្រឹះស្ថានសិក្សា​សាធារណៈ និង​ឯកជន នៅ​គ្រប់​កម្រិត ក្នុងភូមិ​សាស្ត្រ​ទូទាំង​រាជធានី​ខេត្ត​ទាំងអស់​។

​ដូច្នេះ ចាប់ពី​ថ្ងៃទី​១ ខែវិច្ឆិកា​ខាងមុខនេះ សាលារៀន​ទាំងអស់ នៅ​ទូទាំងប្រទេស នឹង​បើក​ដំណើរការ​ឡើងវិញ ចាប់ពី​ថ្នាក់បឋមសិក្សា រហូតដល់​ឧ​ត្ត​មសិ​ក្សា រួមទាំង​សាលា​បណ្តុះបណ្តាល​វិជ្ជាជីវៈ និង​សាលា​បណ្តុះបណ្តាល​គ្រូ​ផងដែរ​។ ការសម្រេចចិត្ត​នេះ ស្រប​ពេលដែល​កម្ពុជា នឹងត្រូវ​បើក​ប្រទេស​ឡើងវិញ ជា​បណ្តើរៗ ក្រោយពី​បើក​ដំណើរការ​រួចហើយ នូវ​វិស័យ​ឧស្សាហកម្ម កាត់ដេរ និង​ការបើក​សាលារៀន រួមទាំង​ការសាកល្បង​ដ៏​ធំ លើ​វិស័យ​ទេសចរណ៍ កាលពី​បុណ្យ​ភ្ជុំបិណ្ឌ​។​

​យ៉ាងណាក៏ដោយ យើង​ត្រូវ​បន្ត​រៀន​រស់នៅ​ជាមួយ​កូ​វីដ​១៩ តាម​គន្លង​ថ្មី​។ ក្នុងនោះ វិធានការ ៣​កុំ និង​៣​ការពារ ក៏​នៅតែ​បន្ត​អនុវត្ត​គ្រប់ពេល និង​គ្រប់​ទីកន្លែង ទោះបីជា​ម្នាក់ៗ បាន​ចាក់​វ៉ាក់សាំង​បង្ការ​ជំងឺ​កូ​វីដ​១៩ បាន ២​ដូ​ស និង​រហូតដល់ ៣​ដូ​ស​ហើយក៏​ដោយ​។

​តែ​ចូរ​កុំ​ភ្លេច រៀងរាល់ថ្ងៃ កូ​វីដ​នៅ​កម្ពុជា​យើង នៅតែ​បន្ត​ឆ្លង​ជាង ១០០​នាក់ និង​ស្លាប់​ជាង ១០​នាក់ ក្នុង ១​ថ្ងៃៗ​។ ម្យ៉ាង​ត្បិតតែ​ការឆ្លង និង​ស្លាប់​នេះ ស្ថិតក្នុង​អត្រា​ធ្លាក់ចុះ​ជា​រៀង រាល់ថ្ងៃ ក៏ដោយ ក៏​យើង​មិនត្រូវ​ភ្លេចខ្លួន និង​ធ្វេសប្រហែស​នឹង​កូ​វីដ​ឡើយ​៕សរន