​ប្រែ​សម្រួល : កញ្ញា​ដា​លី​ស ៖ រដ្ឋមន្ត្រី​ក្រសួង​ការពារជាតិ​ឥណ្ឌា​លោក រ៉ា​ច​ណាត ស៊ី​ង បាន​សរសេរ​នៅលើ Twitter ដោយ​មិន​បាន​និយាយ​ចំឈ្មោះ​ប្រទេស​ចិន​ថា “​ការរួម​បញ្ចូល​យន្តហោះ​ចម្បាំង Rafale គឺជា​សារ​ដ៏​រឹងមាំ​មួយ​សម្រាប់​ពិភពលោក និង​ជា​ពិសេស​សម្រាប់​អ្នក​ដែល​ប្រជែង​នឹង​អធិបតេយ្យភាព​របស់​ឥណ្ឌា​”​។​

– យន្តហោះ Rafale នៅ​មូលដ្ឋានទ័ព​ហា​ស្មី​រ៉ា រដ្ឋ​វេស​បេង​ហ្គាល់​

​ប្រមុខ​កងទ័ព​ជើង​អាកាស​ឥណ្ឌា​លោក​បា​ដូរៀ​បាន​និយាយថា ការដាក់បញ្ចូល​យន្តហោះ Rafale កើតឡើង “​ចំ​ពេល​វេលា​សម​ស្រប​ណាស់ ដោយ​គិត​ពី​សេណា​រី​យ៉ូស​ន្តិ​សុខ​”​។​

​លោក​បាន​និយាយថា កងអនុសេនាធំ Golden Arrows បាន​ហោះ​យន្តហោះ​នេះ​រួច​ទៅ​ហើយ​និង​បាន​ឆ្លងកាត់​ការហ្វឹកហ្វឺន​ដើម្បី​រួម​បញ្ចូល​គ្នា​យ៉ាង​ខ្លាំងក្លា​ជាមួយនឹង​កង​យន្តហោះ​​ចម្បាំង​ផ្សេងទៀត រួម​ទាំង​ការបាញ់​អាវុធ​ទំនើបៗ​ផងដែរ​។​

​លោក​បាន​បន្ថែមថា “​ដូច្នេះ​ការចាប់ផ្តើម​ជា​ផ្លូវការ​នៅ​ថ្ងៃនេះ​ក៏​ជា​ការកត់សម្គាល់​ផងដែរ​នូវ​ការចាប់ផ្តើម​ប្រតិបត្តិការ​នៃ​យន្តហោះ​នេះ​ទៅក្នុង IAF ។​យើង​នឹង​ចេញ​ធ្វើ​ប្រតិបត្តិការ​បាន​​យ៉ាង​ល្អ​ជាមិនខាន​” ។ ប្រសិនបើ​និង​នៅពេល​ដែល​ឥណ្ឌា​សម្រេចចិត្ត​ទិញ​យន្តហោះ Hornets វា​នឹង​ធានា​ឱ្យមាន​ការផ្លាស់ប្តូរ​យុទ្ធសាស្ត្រ​សម្រាប់​កងទ័ពអាកាស​ឥណ្ឌា​ជាមួយនឹង​យន្តហោះ Rafale និង Hornets ដែល​ត្រៀម​រួច​ជាស្រេច​សម្រាប់​តួនាទី​ប្រយុទ្ធ​ឬ​សកម្មភាព​ពាក់ព័ន្ធ​ណាមួយ​។​

– យន្តហោះ​ចម្បាំង​បំបាំង​កាយ J-20 របស់​ចិន​ដាក់ពង្រាយ​នៅ​ចម្ងាយ ៣២០ គីឡូម៉ែត្រ​ពី​មូលដ្ឋាន​អាកា​សឡា​ដាក់​

​ចិន​បាន​បង្ហាញ​យន្តហោះ​ចម្បាំង​បំបាំងកាយ​ថ្មី​របស់​ខ្លួន J-20 ដែល​ជា​យន្តហោះ​ប្រយុទ្ធ​គេច​ពី​រ៉ា​ដា​ដំបូង​គេ​របស់​ប្រទេស​នេះ​ក្នុង​អំឡុងពេល​នៃ​ការសាកល្បង​មួយ​ក្នុងចំណោម​ការសាកល្បង​​ជាច្រើន​នៅ​ឯ​មូលដ្ឋាន​ទ័ពអាកាស​ក្នុង​ទីក្រុង​ចេង​ទូ ខេត្ត​ស៊ី​ឈាន់ ភាគ​និរតី​នៃ​ប្រទេស​ចិន​កាលពី​ខែ​មករា ឆ្នាំ ២០១១​។​

​ការហោះហើរ​សាកល្បង​នៃ​យន្តហោះ​ចម្បាំង​បំបាំងកាយ​ថ្មី​របស់​ចិន​កាលពី​ថ្ងៃទី ១១ ខែ​មករា​បាន​គ្របដណ្ដប់​លើ​ការប្រឹងប្រែង​របស់​អាម៉េរិក​ក្នុង​ការពង្រឹង​ទំនាក់ទំនង​យោធា​រកាំរកូស​រវាង​​ប្រទេស​ទាំង​ពីរ ដែល​នេះ​ស​បញ្ជាក់​ពី​ការ​ប្រជែង​គ្នា​កាន់តែ​ខ្លាំង​ឡើង​រវាង​មហាអំណាច​ទាំងពីរ​។​

​យោងតាម​របាយការណ៍ ប្រទេស​ចិន​បាន​ដាក់ពង្រាយ​យន្តហោះ​ចម្បាំង​បំបាំងកាយ J-20 នៅ​ចម្ងាយ ៣២០ គីឡូម៉ែត្រ​ពី​មូលដ្ឋាន​អាកា​សឡា​ដាក់​។​រូបភាព​ផ្កាយរណប​នៅ​ពាក់កណ្តាល​ខែ​​សីហា​បាន​បង្ហាញ​យន្តហោះ​ពីរ​គ្រឿង​នៅ​តំបន់​ហូ​តាន់​ចំពេល​មាន​ការប្រឈមមុខ​ដាក់​គ្នា​រវាង​ឥណ្ឌា​និង​ចិន​នៅ​ឡា​ដាក់​ភាគ​ខាងកើត​។​

​របាយការណ៍​បាន​និយាយថា កងទ័ពអាកាស​ឥណ្ឌា​បាន​ដាក់ពង្រាយ​យន្តហោះ​ចម្បាំង Su-30 MKI, MiG-29 និង MiG-29K ហើយ​វេន​របស់​យន្តហោះ Rafale ដែល​ត្រូវ​ឈរជើង​នៅ​ជិត​ព្រំដែន​មិន​អាច​មើលស្រាល​បានឡើយ ព្រោះថា​មូលដ្ឋាន​អាកាស​អាម​បា​ឡា​គឺ​ស្ថិតនៅ​ចម្ងាយ​តែ ២០០ គីឡូម៉ែត្រ​ពី​ព្រំដែន​ចិន​។

– ចិន​ទម្លាក់​កម្រិត​យន្តហោះ​ទំនើប​របស់​ខ្លួន​

​យន្តហោះ​ចម្បាំង J-20​របស់​ចិន​ត្រូវ​បាន​កោតសរសើរ​ថា​ជា​យន្តហោះ​ចម្បាំង​ទំនើប​បំផុត​នៅក្នុង​ឃ្លាំង​អាវុធ​របស់​ចិន​ជាមួយ​នឹង​សមត្ថភាព​វាយប្រហារ​ចម្ងាយ​ឆ្ងាយ​កម្រិត​ខ្ពស់​ជាមួយនឹង​​សមត្ថភាព​បញ្ញា​សិប្បនិម្មិត​ដ៏​ទំនើប​។ របាយការណ៍​បាន​និយាយថា ចិន​មាន​យន្តហោះ J-20 យ៉ាងហោចណាស់ ២០ គ្រឿង​។​

​ទោះយ៉ាងណា សំណួរ​សំខាន់​គឺ​ថា​តើ​យន្តហោះ J-20 ដែល​ភាគច្រើន​មិន​ធ្លាប់​សាកល្បង​ក្នុង​លក្ខខណ្ឌ​សមរភូមិ​ជាក់ស្តែង​អាច​ដំណើរការ​នៅក្នុង​តំបន់​រយៈកម្ពស់​ខ្ពស់​នៅ​តំបន់​ភ្នំ​ហេមពាន្ត​​បាន​ដែរឬទេ​?

​តាមពិតទៅ​មាន​របាយការណ៍​ថា ចិន​អាច​នឹង​ទម្លាក់​កម្រិត​យន្តហោះ​ទំនើប​នេះ​បន្ទាប់​ពី​របាយការណ៍រ​បស់ Global Times និយាយថា វា​ជា​យន្តហោះ​ចម្បាំង “​ជំនាន់​ទី​បួន​” មិនមែន​ជា​យន្តហោះ “​ជំនាន់​ទី​ប្រាំ​” នោះទេ​។​

​ទោះបីជា​កងទ័ពអាកាស​ចិន​ចូលចិត្ត​ប្រៀបធៀប​យន្តហោះ J-20 ទៅ​នឹង​យន្តហោះ​ចម្បាំង​បំបាំងកាយ F-22 និង F-35 របស់​អាម៉េរិក ប៉ុន្តែ​អ្នកជំនាញ​លោកខាងលិច​ជឿថា យន្តហោះ​ចិន​នៅ​មាន​ផ្លូវ​វែងឆ្ងាយ​ណាស់​ដើម្បី​ទៅ​ដល់​កម្រិត​យន្តហោះ​លោកខាងលិច ព្រោះ​ចិន​នៅ​មិនទាន់​បាន​សាកល្បង​វា​នៅក្នុង “​សង្គ្រាម​មែនទែន​” នៅឡើយ​ទេ​៕