​ដោយៈ ស​រិ​ទ្ធ / កណ្តាល​៖ មានការ​ភ្ញាក់ផ្អើល​មួយ ទាំង​កណ្តាលអធ្រាត្រ ខណៈ​កម្លាំង នគរបាល​ព្រហ្មទណ្ឌ​កម្រិត​ស្រាល នៃ​ស្នងការដ្ឋាន​នគរបាល ខេត្តកណ្តាល សហការ​ជាមួយ កម្លាំងចម្រុះ​នៃ​អធិការដ្ឋាន នគរបាល​ក្រុង​តាខ្មៅ ចុះ​ឡោមព័ទ្ធ បង្ក្រាប​ភោជនីយ ដ្ឋា​ន អាយ​ផាប់ ដែល​លួច​បើកទទួល​ភ្ញៀវ និង​មានការ​ប្រគំ​តន្ត្រី​ជាវ​ង់ មាន​សម្លេង​ឮៗ ចេញមក​ខាងក្រៅ ព្រមទាំង​បាន​ឃាត់ខ្លួន​មនុស្ស ៦ នាក់ ។

​ការចុះ​បង្ក្រាប​នេះ បានធ្វើ​ឡើង​នៅ​យប់​ថ្ងៃទី​២៦ ខែតុលា ឆ្នាំ​២០២១ ក្នុង​ភោជនីយដ្ឋាន អាយ ផាប់ ស្ថិតនៅ​ផ្លូវ​បេតុង ភូមិ​ថ្មី សង្កាត់​តាខ្មៅ ក្រុង​តាខ្មៅ ខេត្តកណ្តាល ។

​លោក​វរសេនីយ៍ឯក ឡាក់ ម៉េង​ធី នាយការិយាល័យ​ព្រហ្មទណ្ឌ​កំរិត​ស្រាល​នៃ​ស្នងការដ្ឋាន នគរបាល ខេត្តកណ្តាល បាន​ប្រាប់ថាៈ ប្រតិបត្តិការ​នេះ បាន​ឃាត់ខ្លួន​បុគ្គលិក ៤ នាក់ និង អ្នកចម្រៀង ២ នាក់ ។ ចំណែក​ម្ចាស់​ទីតាំង និង​ភ្ញៀវ បាន​រត់គេចខ្លួន តាម​ទ្វារក្រោយ​អស់ បន្សល់ទុក​រថយន្ត ៦ គ្រឿង និង ម៉ូតូ ១៤ គ្រឿង ។

​លោក​បាន​បន្តទៀតថាៈ ភោជនីយដ្ឋាន អាយ ផាប់ បាន​បិទ​បណ្តោះអាសន្ន​ហើយ ។ ដោយឡែក ម្ចាស់​ទីតាំង សមត្ថកិច្ច កំពុង​តាម​ស្វែងរក និង​កសាង​សំណុំរឿង បញ្ជូនទៅ​តុលាការ ចាត់ការ​បន្ត តាម​នីតិវិធី​ច្បាប់ ៕/V​