​ប្រែ​សម្រួលៈ​វាសនា​/​វ៉ាស៊ីនតោន​៖​សេត​វិមាន​បាន​និយាយថា នៅ​ជំនួប​កំពូល​មួយ​ជាមួយ​មេដឹកនាំ​អាស៊ាន​កាលពី​ថ្ងៃ​អង្គារ​ទី​២៦​តុលា ប្រធានាធិបតី​អាម៉េរិក​បានប្រកាស​ថ្កោលទោស​​រដ្ឋប្រហារ​យោធា​និង​”​អំពើហិង្សា​ដ៏​រន្ធត់​”​នៅ​មី​យ៉ាន់​ម៉ា ។​

​ថ្លែង​ទៅ​កាន់​ជំនួប​កំពូល​តាម​វីដេអូ​បន្ត​ផ្ទាល់ លោកបៃ​ដិន​«​បាន​សម្តែង​ការព្រួយបារម្ភ​ជាខ្លាំង​អំពី​រដ្ឋប្រហារ​យោធា​និង​អំពើហិង្សា​ដ៏​រន្ធត់​នៅ​ភូមា​(​មី​យ៉ាន់​ម៉ា​)​និង​បាន​អំពាវនាវ​អោយ​របប​​យោធា​នៃ​ប្រទេស​នេះ​បញ្ចប់​អំពើ​ហិង្សា​ជាបន្ទាន់ ដោះលែង​ជន​ជាប់​ឃុំ​ដោយ​អយុត្តិធម៌ និង​ស្តារ​មាគ៌ា​របស់​ភូមា​ឆ្ពោះទៅ​កាន់​លទ្ធិប្រជាធិបតេយ្យ​ឡើងវិញ​»​។​

​សូមបញ្ជាក់​ថា រដ្ឋាភិបាលយោធា​មី​យ៉ាន់​ម៉ា​បាន​ពហិការ​មិន​ចូលរួម​ជំនួប​កំពូល​អាស៊ាន បន្ទាប់​ពី​ប្រមុខ​ដឹកនាំ​របស់​ខ្លួន​ត្រូវបាន​ហាមឃាត់​មិន​អោយ​ចូលរួម​កិច្ចប្រជុំ ដោយសារតែ​លោក​ខ្វះ​កិច្ច​​សហការ​ជាមួយ​តំណាង​ពិសេស​អាស៊ាន​នៅក្នុង​ការអនុវត្ត​ផែនការ​ស្តារ​សន្តិភាព​និង​ប្រជាធិបតេយ្យ​របស់​ប្រទេស​ជា​សមាជិក​មួយ​នេះ​ឡើងវិញ​។​

​សេចក្តីថ្លែងការណ៍រ​ប្រើ​សម្តី​ខ្លាំង​របស់​សេត​វិមាន​នេះ កើត​ឡើង​ក្រោយ​ពី​លោកបៃ​ដិន បាន​និយាយ​ជា​ចំហ​ទៅកាន់​ជំនួប​អាស៊ាន​ដែល​លោក​ចង់​សំដៅ​ទៅ​រក​ការ​ទប់ទល់​នឹង​ចិន​តែ​មិន​ប្រើ​​ពាក្យ​”​ចិន​ឬ​មី​យ៉ាន់​ម៉ា​”​ចំ​ទេ​។​

​ថ្លែង​តាម​វីដេអូ​បន្ត​ផ្ទាល់​ចេញពី​សេត​វិមាន លោកបៃ​ដិនបាន​ហៅអា​ស៊ានថា “​មាន​សារសំខាន់​” និង​ថា​អាម៉េរិក​ប្តេជ្ញា​”​គោរព​ភាព​ជា​កណ្តាល​របស់​អាស៊ាន​”​។​

​តាមពិត​អាម៉េរិក​មិន​ជា​សមាជិក​របស់​អាស៊ាន​ទេ តែ​មើល​ឃើញ​ប្លុក​១០​ប្រទេស​នេះ​ថា​ជា​ផ្នែក​សំខាន់​មួយ​នៅក្នុង​យុទ្ធសាស្ត្រ​របស់​ខ្លួន​ដើម្បី​រុញច្រាន​វត្តមាន​ការទូត ពាណិជ្ជកម្ម​និង​យោធា​កាន់​​តែ​រីក​ធំ​របស់​ចិន​នៅ​ទូទាំង​អាស៊ី​។​

​ទោះ​ជា​មិន​បាន​និយាយ​ចំពោះ​ឈ្មោះ​ចិន តែ​ការផ្តោត​របស់លោក​គឺ​ច្បាស់លាស់​ដោយ​អំពាវនាវ​អាស៊ាន​អោយ​ធ្វើខ្លួន​ជា​ស្នូល​ក្នុង​ការថែរក្សា​តំបន់​មួយ​«​ដែល​គ្រប់​ប្រទេស​អាច​ប្រជែង​គ្នា​និង​ទទួល​​ជោគជ័យ​ក្នុង​ទីលាន​កំរិត​ប្រកួត​មួយ ហើយ​គ្រប់​ប្រទេស​មិន​ថា​តូច​ឬ​ធំ ត្រូវ​គោរព​ច្បាប់​»​។​

​លោក​បាន​និយាយទៀតថា «​ភាព​ជា​ដៃគូ​អាស៊ាន​មាន​សារសំខាន់​នៅក្នុង​ការថែរក្សា​តំបន់​ឥណ្ឌូ​-​ប៉ាស៊ីហ្វិក​មួយ​សេរី​និង​បើកចំហ ដែល​វា​បាន​ធ្វើ​ជា​គ្រឹះ​នៃ​សន្តិសុខ​និង​វិបុលភាព​រួម​របស់​យើង​សំ​​រាប់​ពេល​ជាច្រើន​ទសវត្សរ៍​។​អាម៉េរិក​គាំទ្រ​យ៉ាងខ្លាំង​ទស្សនវិស័យ​អាស៊ាន​អំពី​តំបន់​ឥណ្ឌូ​-​ប៉ាស៊ីហ្វិក​និង​ច្បាប់​ផ្អែក​លើ​សណ្តាប់ធ្នាប់​ពិភពលោក​»៕

ប្រធានាធិបតី​អាម៉េរិក ចូ បៃ​ដិន ថ្លែង​ចូលរួម​ជំនួប​កំពូល​អាស៊ាន​-​អាម៉េរិក​ចេញពី​សេត​វិមាន​កាលពី​ថ្ងៃ​អង្គារ​